Tourat 1: Foyda Nama 41
41
Bashsha Feraunor dui kuab
1Er fura dui boros bade Feraune kuabe deḳla. Tain deḳla, Nil nodor gese tain ubai roisoin, 2ar Nil nod tone shatgu shundor tortaza goru uṭia aia nol bonor maze aṭia ḳaira. 3Erbade deḳoin, aro shatgu halaḳ ar ḳobisor laḳan goru uṭia aia, Nil nodor faror hou goruintor ḳasat ubailo. 4Heshe ou halaḳ ar ḳobisor laḳan goruinte hou shundor ar tortaza shato gorure ḳaililo, teu Feraunor gum bangi gelo. 5Bade tain hirbar gumaila ar duara kuabe deḳla, ek gomor ḍeṭat shatgu fusṭo ar taza soṛa bar oise. 6Heshe bar oilo, fubali batashor gorome hukna shatgu ḳom fusṭo susa-ala soṛa, 7ar ou ḳom fusṭo soṛae hou shato fusṭo-taza soṛare gililailo. Bade Feraunor gum bangi gelo, tain buzla zen ita to kuab. 8Biane tan mon ostir oigelo, teu Mishor deshor hoḳol zadugir ar fonḍitre ḳobriadi anaia, tan kuab tarare hunaila, oile erar ḳeu er tabir ḳoito farlo na.
9Heshe Feraunor hou shorab bilaorae ḳoilo, “Huzur, aiz amar eḳ dush mono oise. 10Bout din age huzure nizor dui gulamor ufre gusa ḳorsla, tain amare ar ruṭi banaorare boṛo zelar sabor baṛir zelo toisla. 11Ar eḳ raite amra duiozone alog alog kuab deḳlam, duio kuabor dui laḳan tabir asil. 12I shomoy zelar sabor, eḳ Ibrani zuan gulam-o ono asil. Tare amrar kuabor ḳota hunailam, ar he amrar kuabor tabir ḳoia dilo. 13He amrar kuabor tabir zela ḳoisil, ekkere ou laḳan-u folilo. Huzure amare hirbar tan ḳamo lagaila, oile ruṭi banaorare gaso loṭḳaila.”
14Ou Feraune Iusufre anar lagi manush faṭaila, tara gia zoldi kori zelḳana tone tanre bar ḳori anla. Iusufe daṛi-mus ḳamaia, ḳafoṛ bodlaia Feraunor dorbaro azir oila. 15Feraune tanre ḳoila, “Ami ekkan kuab deḳsi, oile er tabir ḳeu ḳoito farer na. Te ami hunlam zen tumar gese kuab hunaile, tumi er tabir ḳoitae faro.” 16Iusufe zuaf dila, “Hi kemota to amar nae, Alla Pake moharazor dilor shantir zuaf bataia diba ne.” 17Feraune Iusufre ḳoila, “Kuabe deḳlam, ami Nil nodor faro ubai roisi. 18Ar deki, gango tone shatgu shundor, tortaza goru uṭia aia nol bonor maze aṭia ḳaira. 19Erbade aro shatgu goru uṭia ailo. Ita halaḳ ar ḳobisor laḳan, Mishor deshor kunu ḳano ilaḳan be-surot goru kunu dino deḳsi na. 20Bade ou halaḳ ar be-surot goruinte, agor hi shato tortaza gorure ḳaililo. 21Oile tara itare gilar bade, ḳaise ḳori buza-o gelo na, ḳaron tara agor laḳan-u halaḳ ar be-surot roilo. Heshe amar gum bangi gelo. 22Bade ami hirbar deḳlam, gomor eḳ ḍeṭar maze shatgu boṛo ar fusṭo soṛa bar oilo. 23Fubali haoar gorome hukna shatgu ḳom fusṭo susa-ala soṛa-o bar oilo. 24Ar ou shato soṛae, hou taza shato soṛare gilililo. I kuab ami zadugir oḳolre hunaislam, oile ḳeu er mani koito farse na.”
25Iusufe Feraunre ḳoila, “Huzur, i duio kuab-u adote eḳ. Allae zeta ḳorta saira, ita afnare deḳaisoin. 26Ou tortaza shato gorur mani shat boros, ar fusṭo shato gomor soṛar mani-o shat boros. Duio kuab-u eḳ. 27Ar heshe uṭia aoa shato halaḳ ar be-surot goru, ar fubali haoar gorome hukna shato gomor soṛa, erar mani oilo, aḳalor shat boros. 28Te Allae zeta ḳorta saira, ita moharazre deḳaisoin. Ou ḳota-u ami afnare age ḳoisi. 29Hunoukka, hara Mishor desho shat boros kub beshi foshol folibo. 30Erbade-u aibo aḳalor shat boros. Teu agor hi beshi fosholor ḳota manshe fauriliba, ar aḳale deshre shesh ḳori dibo. 31Ou aḳalor dorun, agor hi fosholor ḳota manshor mono roito nae. I aḳal oibo kub bezuita mosibotor. 32I kuab afnare duibar deḳanir mani oilo, Allae i dosha goṭaiba, ekkere ṭik korilaisoin, ita kub zoldi kori-u goṭibo. 33Oḳon huzure eḳzon sotur-buzdar fonḍit manshore tukaia, en gese Mishorre shofi deukka. 34Ar afne oula ḳoroukka, desho afnar ḳormosari lagain, ou shat bosore zebla kub beshi foshol folbo, i shomoy tara er fas baṭor eḳbaṭ dola ḳorba. 35Tara ou shudinor bosoror dan dola ḳoria huzuror doḳole, bazare bazare gudamo boria touk ar hefazot ḳorouk. 36Shat boros dori Mishoro ze aḳal oibo, hou aḳalor lagi dan zomaia raḳba, teu aḳale deshor manush morta nae.”
Feraune Iusuf (a:)re montri banaila
37Iusufor i mat, Feraun ar tan dorbaror hoḳlor gese kub bala mono oilo. 38Feraune tan uzir-nazir oḳolre ḳoila, “I besaṛar laḳan Allar ruh-ala manush ami kuai tukaia faimu?” 39Ou Feraune Iusufre ḳoila, “Allae zebla tumar gese ita hokkolta zair ḳorsoin, te tumar laḳan buzdar ar bibekman to ar ḳeu nae. 40Oḳon razbaṛir hokkolta tumi-u salaibae. Amar hoḳol proza tumar hukme solba. Ḳali bashshar toḳto, ami tumar ufre taḳmu.” 41Tain Iusufre ḳoila, “Huno, ami asta Mishor desh tumar ato shofi dilam.” 42Ar Feraune nizor anguil taki bashshai silor angṭi kulia Iusufor ato findaila, tan golat shunar har dila ar dami kafoṛor shada lebas-o findaila. 43Bade tain Iusufre tan raijjor dui nombor rotor maze tulla ar Iusufor age age elan ḳora oilo, “Fornam ḳoro! Fornam ḳoro!” Ou laḳan tain Iusufor ufre asta Mishor deshor bar shomzai dila. 44Feraune Iusufre ḳoila, “Ami-u Feraun, Mishoror bashsha! Oile tumar hukum saṛa, asta Mishor desho ḳeu ruma-o laṛaito farto nae.” 45Feraune Iusufor noya nam raḳla, Safonot-Paneh. Tain Oun mondiror babon-ṭakur Puṭiferar fuṛi Asonotre Iusufor loge bia dila ar Iusufe asta Mishor desho guraguri korat lagla.
46Iusufe tish boros boyosho, Mishoror bashsha Feraunor ḳamo lagla, tain Feraunor dorbar tone bar oia deshor hoḳol zaga sofor ḳorla. 47Ar beshi fosholor ou shat bosore desho bout foshol folilo. 48Teu Iusufe i shudinor shat bosore Mishoror hoḳol dan, bazaror gudam gorainto zoma ḳoraia toila. Tain hokkol bazaror sairo galar dan oḳol, hou bazaror gudamo zomaila. 49Tain doriar balur laḳan oula behishab dan dola ḳorla zen, ita ar mafia fuṛaita farla na, teu mafa-mafi kora bad dilaila.
50Ar aḳalor age Oun mondiror babon-ṭakur, Puṭiferar fuṛi Asonotor feṭo Iusufor dui fua oila. 51Iusufe tan boṛo fuar nam raḳla Manosha [mani, faurilaoa]. Tain ḳoila, “Allae amar hoḳol toklif ar bafor baṛir hokkolta, amar dil tone fauraila.” 52Bade tan dusra fuar nam raḳla Afraim [mani, foldar]. Tain ḳoila, “Ami ze desho toklif faisi, hou desho-u Allae amare foldar banaila.”
53Ar Mishor deshor kub beshi fosholor hi shat boros furigelo. 54Teu Iusufe zela ḳoisla, oula aḳalor hou shat boros aia azilo. Er loge ḳanda-ḳasar hoḳol desho-o nidan deḳa dilo oile Mishoror kunu zagat ḳani-kurakir obab oilo na. 55Heshe asta Mishor desho aḳal deḳa dile, proza oḳole aia Feraunor gese ḳani magila, teu Feraune ḳoila, “Tumra Iusufor gese zao. Ein zela ḳoin, ṭik-u oula ḳoro.” 56I aḳal asta desh zuṛi deḳa dilo. Bade aro bezuita oae Iusufe hoḳol zagar gudam gorain kulia, Mishori oḳlor gese dan besat lagla. 57Asta duniait nidan deḳa dilo ar hoḳol deshor manshe dan ḳorid ḳorar lagi Mishor desho Iusufor gese aila.
ទើបបានជ្រើសរើសហើយ៖
Tourat 1: Foyda Nama 41: sylL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Ahle Kitab Society. All rights reserved.