Tourat 1: Foyda Nama 35
35
Hozrot Iakub (a:) hirbar Betelo
1Erbade Alla Pake Iakubre ḳoila, “Tumi hirbar Betelo zaogi. Tumar bai Ishʼor ges tone bagibar bala, zein tumare doroshon disla, hou Alla Pakor name tumi hono ekkan kurbani kana banao.” 2Teu Iakube tan afon manshore ar logor hoḳolre ḳoila, “Tumrar gese devtar zeta murtin ase, ita hokkolṭi falao; ar hoḳole fak-saf oia, saf-sutra lebas findo. 3Ar solo, amra Betelo zaitamgi. Hono ami Allar name ekkan kurbani kana banaimu, zein mosibotor dino amar dua kobul ḳorsla, ar amar soforor logi oisla.” 4Teu tarar zoto laḳan devtar murtin ar ḳanor zeorat asil, hoḳolta Iakubor ato dilaila. Tain ita nia Shikim ṭaunor ḳandat elon gasor tole gaṛilaila.
5Bade tara hon tone roana oila ar Allae sairobae hoḳol gau-geramo eḳ ḍor foyda ḳorla, teu hinor kunu manshe Iakubor fuaintore ḳedanit gelo na. 6Heshe Iakub ar tan logor hoḳole Kenan deshor Luz namor zaga, mani Betelo aia fosla. 7Ono tain ek kurbani kana banaia, ou zagar nam dila El-Betel [mani, Betelor Alla], ḳaron bair ges taki bagibar bala Allae ono-u tanre didar-doroshon disla. 8Ar Rebekar daima Dobura mara gela. Tane Betelor lamat eḳ elon gasor tole maṭi dila, teu i zagar nam oilo Elon-Bakut [mani, ḳandonor gas].
9Iakube Foddon-Iram taki aoar bade, Allae hirbar tanre didar dia borkot nazil ḳorla. 10Allae ḳoila, “Tumar nam to Iakub; oile manshe tumare ar Iakub ḳoia ḍakta nae, tumare Israil ḳoiba.” Teu tan nam oilo Israil. 11Allae tanre ḳoila, “Ami-u Shorbo-shoktiman Alla. Tumi folala oia baṛo. Tuma tone eḳ zati foyda oibo, iṭa oibo bout gusṭiala zati, ar tumar ḳandano bashsha oḳol foyda oiba. 12Ami Ibrahim ar Isʼhakre ze desh dan ḳorsi, hou desh oḳon tumare ar tumar bador oarishre dimu.” 13Allae hono Iakubor loge batchit ḳoria harle asmano toshrif nilagi. 14Iakube hou batchitor zagat fattoror ek kuṭi gaṛia, er ufre tain Allar name shorbot-fanir sodga ḍalila, heshe tel-o ḍalila. 15Allae zeḳano tanre didar disla, Iakube i zagar nam raḳsla Betel.
16Bade Iakub ar tan logor hoḳole Betel taki roana ḳoria Ifrato fosar bakka age, Rahelar hurutta oar bishe dorlo, tan kub toklif oilo. 17Hurutta oar bish aro baṛlo, teu dai beṭie ḳoilo, “Ḍoraio na go, ibar-o tumar goro fua oibo.” 18Oile Rahela mara gela. Morar shomoy tain fuar nam raḳla Bin-Oni [mani, amar toklifor fua] oile bafe tar nam raḳla Bin-Iamin [mani, amar bolor fua]. 19Rahelar moutor bade Ifrat, mani Betelham, zaoar fotor ḳandat tanre maṭi deoa oilo. 20Maṭi dia harle Iakube tan ḳoyboror ufre eḳ fattoror kuṭi gaṛla, i kuṭi aiz-o ono ase. 21On tone Israile hirbar roana dila, ar Edor minar falaia aia tan tambu gaṛila.
22Israil zebla hono roira, ou faḳo Rubene gia tar bafor bador biar bou Bilhar loge zina ḳorlo ar ita Israilor ḳano gelo.
23Iakubor barozon fua asla, Lear torofa tan boṛo fua Ruben, bade Shimion, Lebi, Ehuda, Isaḳor ar Sobulon. 24Rahelar torofa Iusuf ar Bin-Iamin. 25Rahelar bandi Bilhar torofa, Dan ar Noftali. 26Lear bandi Zilpar torofa, Sadu ar Ashir. Tan ou hurutta oḳol Foddon-Iramo oisla.
Hozrot Isʼhak (a:)or inteḳal
27Heshe Iakub Kiriot-Orbor, mani Hebronor ḳasat Momri namor zagat, tan baf Isʼhakor gese aila. Ou zagat Ibrahim ar Isʼhake-o boshot ḳorta. 28Isʼhakor boyosh eḳ-sho ashi boros oisil. 29Ar Isʼhak furafur buṛa oia, murobbi boyosho mara gia tan baf-dadar gese gia azila. Tan fua Ish ar Iakube tanre dafon ḳorla.
ទើបបានជ្រើសរើសហើយ៖
Tourat 1: Foyda Nama 35: sylL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Ahle Kitab Society. All rights reserved.