ꠁꠘ꠆ꠎꠤꠟ ৭: ১-ꠇꠞꠤꠘ꠆ꠔꠤꠀ 7
7
ꠛꠤꠀ-ꠡꠣꠖꠤꠞ ꠛꠦꠙꠣꠞꠦ ꠔꠣꠟꠤꠝ
1ꠜꠣꠁꠀꠁꠘꠞꠦ, ꠔꠥꠝꠞꠣ ꠎꠦꠔꠣ ꠚꠔꠥꠀ ꠎꠣꠘꠣꠞ ꠟꠣꠉꠤ ꠀꠝꠣꠞ ꠉꠦꠍꠦ ꠟꠦꠈꠍ, ꠅꠈꠘ ꠅꠃ ꠛꠦꠙꠣꠞꠦ ꠇꠁꠞꠣꠝ। ꠔꠥꠝꠞꠣꠞ ꠇꠕꠣ ꠑꠤꠇ ꠀꠍꠦ, ꠝꠣꠘꠡꠞ ꠟꠣꠉꠤ ꠜꠣꠟꠣ ꠇꠣꠝ ꠅꠁꠟ ꠛꠤꠀ-ꠡꠣꠖꠤ ꠘꠣ ꠇꠞꠣ। 2ꠅꠁꠟꠦ ꠡꠝꠣꠎꠞ ꠢꠣꠟꠔ ꠖꠦꠈꠤꠀ ꠀꠝꠤ ꠇꠁꠞꠣꠝ, ꠎꠤꠘꠣ ꠕꠣꠇꠤ ꠛꠣꠌꠤꠛꠣꠞ ꠟꠣꠉꠤ ꠙꠞꠔꠦꠇ ꠛꠦꠐꠣꠁꠘ꠆ꠔꠞ ꠛꠃ ꠕꠣꠇꠟꠦ ꠜꠣꠟꠣ, ꠀꠞ ꠙꠞꠔꠦꠇ ꠛꠦꠐꠤꠘ꠆ꠔꠞꠅ ꠎꠣꠝꠣꠁ ꠕꠣꠇꠟꠦ ꠜꠣꠟꠣ। 3ꠢꠇꠟ ꠎꠣꠝꠣꠁꠄ ꠔꠣꠞ ꠛꠃꠞ ꠙꠣꠅꠘꠣ ꠢꠇ ꠀꠖꠣꠄ ꠇꠞꠃꠇ, ꠀꠞ ꠛꠃꠄꠅ ꠅꠟꠣ ꠎꠣꠝꠣꠁꠞ ꠙꠣꠅꠘꠣ ꠀꠖꠣꠄ ꠇꠞꠃꠇ। 4ꠛꠃꠞ ꠡꠞꠤꠟ ꠔ ꠔꠣꠁꠞ ꠘꠤꠎꠞ ꠘꠣꠄ, ꠔꠣꠁꠞ ꠎꠣꠝꠣꠁꠞ। ꠅꠟꠣꠈꠣꠘ ꠎꠣꠝꠣꠁꠞ ꠡꠞꠤꠟꠅ ꠔꠣꠞ ꠘꠤꠎꠞ ꠘꠣꠄ, ꠔꠣꠞ ꠛꠃꠞ। 5ꠎꠣꠝꠣꠁ-ꠛꠃꠄ ꠄꠇꠦ-ꠅꠁꠘ꠆ꠘꠞꠦ ꠘꠤꠞꠣꠡ ꠇꠞꠤꠅ ꠘꠣ, ꠈꠣꠟꠤ ꠈꠣꠍ ꠇꠥꠘꠥ ꠖꠥꠀ-ꠝꠥꠘꠣꠎꠣꠔꠞ ꠟꠣꠉꠤ ꠖꠥꠁꠅꠎꠘꠦ ꠙꠞꠣꠝꠤꠡ ꠇꠞꠤꠀ ꠇꠤꠍꠥ ꠡꠝꠄ ꠀꠟꠣꠖꠣ ꠞꠁꠔꠣꠄ ꠙꠣꠞ। ꠛꠣꠖꠦ ꠢꠤꠞꠛꠣꠞ ꠝꠤꠟꠤꠎꠤꠅ, ꠎꠣꠔꠦ ꠡꠞꠤꠟꠞ ꠈꠣꠁꠡꠞ ꠟꠣꠉꠤ ꠡꠄꠔꠣꠘꠦ ꠔꠥꠝꠞꠣꠞꠦ ꠉꠥꠘꠣꠞ ꠙꠕꠦ ꠐꠣꠘꠣꠞ ꠡꠥꠎꠥꠉ ꠘꠣ ꠙꠣꠄ। 6ꠔꠦ ꠁ ꠛꠦꠙꠣꠞꠦ ꠀꠝꠤ ꠔꠥꠝꠞꠣꠞꠦ ꠇꠥꠘꠥ ꠢꠥꠇꠥꠝ ꠖꠤꠞꠣꠝ ꠘꠣ, ꠈꠣꠟꠤ ꠁꠎꠣꠎꠔ ꠖꠤꠞꠣꠝ। 7ꠔꠣ-ꠅ ꠀꠝꠣꠞ ꠝꠘꠞ ꠀꠡꠣ ꠅꠁꠟ, ꠢꠇꠟ ꠝꠣꠘꠥꠡ ꠀꠝꠣꠞ ꠟꠣꠈꠣꠘ ꠀꠛꠤꠀꠔꠤ ꠞꠃꠇ! ꠅꠁꠟꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠔ ꠄꠇꠅ ꠝꠣꠘꠡꠦ ꠄꠇꠅ ꠘꠝꠥꠘꠣꠞ ꠞꠢꠝ-ꠘꠤꠀꠝꠔ ꠙꠣꠁꠍꠂꠘ।
8ꠔꠦ ꠠꠣꠠꠤ ꠛꠦꠐꠤꠘ꠆ꠔꠞꠦ ꠀꠞ ꠛꠃ ꠝꠞꠣ ꠛꠦꠐꠣꠁꠘ꠆ꠔꠞꠦ ꠀꠝꠤ ꠙꠞꠣꠝꠤꠡ ꠖꠤꠞꠣꠝ, ꠔꠣꠞꠣ ꠎꠥꠖꠤ ꠀꠝꠣꠞ ꠟꠣꠈꠣꠘ ꠞꠁꠔꠣ ꠙꠣꠞꠂꠘ, ꠔꠦ ꠜꠣꠟꠣ। 9ꠅꠁꠟꠦ ꠘꠤꠎꠞꠦ ꠡꠣꠝꠟꠣꠁꠔꠦ ꠘꠣ ꠙꠣꠞꠟꠦ ꠔꠣꠞꠣ ꠛꠤꠀ-ꠡꠣꠖꠤ ꠇꠞꠃꠇ। ꠇꠣꠞꠘ ꠡꠞꠤꠟꠞ ꠈꠣꠁꠡꠦ ꠎꠟꠤꠀ-ꠙꠥꠠꠤꠀ ꠝꠞꠣ ꠕꠣꠇꠤ ꠛꠤꠀ-ꠡꠣꠖꠤ ꠇꠞꠣꠃ ꠜꠣꠟꠣ।
10ꠀꠞ ꠎꠣꠝꠣꠁ-ꠛꠃꠞꠦ ꠀꠝꠤ ꠅꠃ ꠢꠥꠇꠥꠝ ꠖꠤꠞꠣꠝ, ꠛꠃꠄ ꠎꠣꠘꠥ ꠔꠣꠁꠞ ꠎꠣꠝꠣꠁ ꠍꠣꠠꠤꠀ ꠘꠣ ꠎꠣꠄ। ꠁ ꠢꠥꠇꠥꠝ ꠈꠣꠟꠤ ꠀꠝꠤ ꠖꠤꠞꠣꠝ ꠘꠣ, ꠡ꠆ꠛꠄꠅꠋ ꠝꠣꠟꠤꠇꠦꠃ ꠖꠤꠞꠣ। 11ꠀꠞ ꠎꠥꠖꠤ ꠔꠣꠁ ꠢꠞꠤꠀ ꠎꠣꠄꠉꠤ, ꠔꠦ ꠖꠥꠍꠞꠣ ꠛꠤꠀ ꠘꠣ ꠛꠃꠇ, ꠛꠞꠋ ꠎꠣꠝꠣꠁꠞ ꠉꠦꠍꠦ ꠚꠤꠞꠤꠀ ꠀꠃꠇ। ꠅꠟꠣ ꠇꠥꠘꠥ ꠎꠣꠝꠣꠁꠄꠅ ꠔꠣꠞ ꠛꠃꠞꠦ ꠔꠣꠟꠣꠇ ꠘꠣ ꠖꠦꠃꠇ।
12ꠅꠈꠘ ꠎꠦꠔꠣ ꠇꠁꠞꠣꠝ, ꠁꠔꠣ ꠔ ꠡꠞꠣꠡꠞꠤ ꠝꠣꠟꠤꠇꠞ ꠢꠥꠇꠥꠝ ꠘꠣꠄ, ꠔꠣꠘ ꠙꠇ꠆ꠇꠦ ꠀꠝꠤ ꠇꠁꠞꠣꠝ, ꠇꠥꠘꠥ ꠝꠥꠝꠤꠘ ꠜꠣꠁꠞ ꠛꠃ ꠎꠥꠖꠤ ꠁꠍꠣꠄꠁ ꠔꠞꠤꠇꠣꠞ ꠘꠣ ꠅꠁꠘ ꠀꠞ ꠔꠣꠁꠘ ꠎꠣꠝꠣꠁꠞ ꠟꠉꠦ ꠡꠋꠡꠣꠞ ꠇꠞꠔꠣ ꠌꠣꠁꠘ, ꠔꠦ ꠎꠣꠝꠣꠁꠄ ꠔꠣꠘꠞꠦ ꠔꠣꠟꠣꠇ ꠘꠣ ꠖꠦꠃꠇ। 13ꠅꠃ ꠟꠣꠈꠣꠘ ꠇꠥꠘꠥ ꠛꠦꠐꠤ ꠝꠣꠘꠡꠞ ꠎꠣꠝꠣꠁꠅ ꠎꠥꠖꠤ ꠁꠍꠣꠄꠁ ꠔꠞꠤꠇꠣꠞ ꠘꠣ ꠅꠁꠘ, ꠀꠞ ꠎꠣꠝꠣꠁ ꠔꠣꠘ ꠟꠉꠦ ꠞꠁꠔꠣ ꠌꠣꠁꠘ, ꠔꠦ ꠛꠃꠄ ꠁ ꠎꠣꠝꠣꠁꠞꠦ ꠔꠣꠟꠣꠇ ꠘꠣ ꠖꠦꠃꠇ। 14ꠇꠣꠞꠘ ꠅꠃ ꠛꠃꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣꠄ ꠔꠣꠁꠞ ꠎꠣꠝꠣꠁꠞꠦ ꠙꠣꠇ-ꠙꠛꠤꠔ꠆ꠞ ꠇꠞꠍꠂꠘ ꠀꠞ ꠅꠃ ꠎꠣꠝꠣꠁꠞ ꠃꠍꠤꠟ꠆ꠟꠣꠄ ꠔꠣꠞ ꠛꠃꠞꠦꠅ ꠙꠣꠇ-ꠙꠛꠤꠔ꠆ꠞ ꠇꠞꠍꠂꠘ। ꠁꠟꠣ ꠘꠣ ꠅꠁꠟꠦ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘ ꠔ ꠘꠣꠙꠣꠇ ꠅꠁꠟ ꠅꠘꠦ। ꠀꠍꠟꠦ ꠔ ꠀꠟ꠆ꠟꠣꠄ ꠅꠈꠘ ꠔꠣꠞꠣꠞꠦꠅ ꠙꠣꠇ-ꠙꠛꠤꠔ꠆ꠞ ꠝꠘꠅ ꠇꠞꠂꠘ। 15ꠅꠁꠟꠦ ꠁꠍꠣꠄꠁ ꠔꠞꠤꠇꠣꠞ ꠛꠣꠁꠞꠣ ꠢꠃ ꠛꠃ ꠛꠣ ꠎꠣꠝꠣꠁ ꠎꠥꠖꠤ ꠄꠝꠘꠦꠃ ꠀꠟꠉ ꠅꠁꠎꠤꠔꠣ ꠌꠣꠁꠘ, ꠔꠦ ꠅꠁꠔꠣ ꠙꠣꠞꠛꠣ। ꠁꠟꠣ ꠢꠣꠟꠔꠦ ꠢꠃ ꠝꠥꠝꠤꠘ ꠜꠣꠁ ꠛꠣ ꠛꠁꠘ ꠛꠤꠀꠞ ꠇꠥꠘꠥ ꠛꠣꠘ꠆ꠖꠘꠞ ꠝꠣꠎꠦ ꠕꠣꠇꠂꠘ ꠘꠣ। ꠛꠥꠎꠞꠣꠄ ꠘꠤ, ꠀꠝꠞꠣ ꠡꠣꠘ꠆ꠔꠤꠄ ꠞꠅꠀꠞ ꠟꠣꠉꠤ ꠀꠟ꠆ꠟꠣꠄꠃ ꠀꠝꠞꠣꠞꠦ ꠖꠣꠅꠔ ꠖꠤꠍꠂꠘ। 16ꠅ ꠛꠃ ꠅꠇꠟ, ꠔꠥꠝꠤ ꠇꠤꠟꠣ ꠛꠥꠎꠟꠣꠄ, ꠔꠥꠝꠣꠞ ꠎꠣꠝꠣꠁꠞ ꠎꠣꠘ ꠔꠥꠝꠤ ꠛꠣꠌꠣꠁꠔꠣꠄ ꠙꠣꠞꠔꠣꠄ ꠘꠣꠄ? ꠅ ꠎꠣꠝꠣꠁ ꠅꠇꠟ, ꠔꠥꠝꠤꠃ ꠛꠣ ꠇꠤꠟꠣ ꠛꠥꠎꠟꠣꠄ, ꠔꠥꠝꠣꠞ ꠛꠃꠞ ꠎꠣꠘ ꠔꠥꠝꠤ ꠛꠣꠌꠣꠁꠔꠣꠄ ꠙꠣꠞꠔꠣꠄ ꠘꠣꠄ?
17ꠎꠣꠁ ꠅꠃꠇ, ꠝꠣꠟꠤꠇ ꠁꠍꠣꠄ ꠎꠣꠞꠦ ꠎꠦꠟꠣ ꠞꠣꠈꠍꠂꠘ, ꠀꠟ꠆ꠟꠣꠄ ꠎꠣꠞꠦ ꠎꠦꠟꠣ ꠖꠣꠅꠔ ꠖꠤꠍꠂꠘ, ꠢꠦ ꠅꠟꠣ ꠌꠟꠃꠇ। ꠢꠇꠟ ꠁꠍꠣꠄꠁ ꠎꠝꠣꠔꠞꠦ ꠀꠝꠤ ꠅꠃ ꠄꠇꠁ ꠢꠥꠇꠥꠝ ꠖꠤꠀꠞ। 18ꠎꠦꠟꠣ, ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠇꠥꠘꠥ ꠝꠣꠘꠡꠦ ꠁꠍꠣꠄꠁ ꠔꠞꠤꠇꠣ ꠇꠛꠥꠟ ꠇꠞꠟꠦ ꠢꠦ ꠔꠣꠞ ꠅꠃ ꠝꠍꠟꠝꠣꠘꠤꠞꠦ ꠅꠡ꠆ꠛꠤꠇꠣꠞ ꠘꠣ ꠇꠞꠃꠇ, ꠀꠞ ꠝꠍꠟꠝꠣꠘꠤ ꠘꠣ ꠇꠞꠣꠁꠟ ꠇꠥꠘꠥ ꠝꠣꠘꠡꠦ ꠁꠍꠣꠄꠁ ꠔꠞꠤꠇꠣ ꠇꠛꠥꠟ ꠇꠞꠟꠦ, ꠢꠦ ꠝꠍꠟꠝꠣꠘꠤ ꠘꠣ ꠇꠞꠃꠇ। 19ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤ ꠛꠣ ꠘꠣ ꠇꠞꠣꠘꠤ ꠁꠐꠣ ꠇꠥꠘꠥ ꠛꠠ ꠛꠦꠙꠣꠞ ꠘꠣꠄ, ꠀꠟ꠆ꠟꠣꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠣꠃ ꠅꠁꠟ ꠀꠍꠟ ꠇꠕꠣ। 20ꠀꠟ꠆ꠟꠣꠄ ꠎꠣꠞꠦ ꠎꠦ ꠢꠣꠟꠔꠦ ꠖꠣꠅꠔ ꠖꠤꠍꠂꠘ, ꠢꠦ ꠅꠃ ꠢꠣꠟꠔꠦꠃ ꠕꠣꠇꠃꠇ। 21ꠁꠍꠣꠄꠁ ꠔꠞꠤꠇꠣꠔ ꠀꠁꠛꠣꠞ ꠇꠣꠟꠅ ꠔꠥꠝꠤ ꠉꠥꠟꠣꠝ ꠀꠍꠟꠣꠄ ꠘꠤ? ꠔꠦ ꠁꠔꠣꠞ ꠟꠣꠉꠤ ꠛꠦꠎꠣꠞ ꠅꠁꠅ ꠘꠣ, ꠀꠞ ꠡ꠆ꠛꠣꠗꠤꠘ ꠅꠁꠔꠦ ꠙꠣꠞꠟꠦ ꠡ꠆ꠛꠣꠗꠤꠘ ꠅꠅ। 22ꠉꠥꠟꠣꠝꠤ ꠇꠞꠣ ꠢꠣꠟꠔꠦ ꠝꠣꠟꠤꠇ ꠁꠍꠣꠄ ꠎꠣꠞꠦ ꠖꠣꠅꠔ ꠇꠞꠤ ꠀꠘꠍꠂꠘ, ꠢꠦ ꠔ ꠔꠣꠘ ꠖꠞꠛꠣꠞꠅ ꠡ꠆ꠛꠣꠗꠤꠘ ꠅꠁꠉꠦꠍꠦ। ꠀꠞ ꠡ꠆ꠛꠣꠗꠤꠘ ꠢꠣꠟꠔ ꠕꠣꠇꠤ ꠎꠣꠞꠦ ꠖꠣꠅꠔ ꠇꠞꠤ ꠀꠘꠍꠂꠘ, ꠢꠦ ꠔ ꠀꠟ-ꠝꠍꠤꠞ ꠉꠥꠟꠣꠝ ꠛꠘꠤꠉꠦꠍꠦ। 23ꠜꠣꠁꠀꠁꠘꠞꠦ, ꠔꠥꠝꠞꠣꠞꠦ ꠛꠃꠔ ꠖꠣꠝꠖꠤ ꠈꠞꠤꠖ ꠇꠞꠣ ꠅꠁꠍꠦ, ꠄꠞꠟꠣꠉꠤ ꠝꠣꠘꠡꠞ ꠉꠥꠟꠣꠝ ꠛꠘꠤꠅ ꠘꠣ। 24ꠀꠟ꠆ꠟꠣꠄ ꠎꠣꠞꠦ ꠎꠦ ꠢꠣꠟꠔꠦ ꠖꠣꠅꠔ ꠖꠤꠍꠂꠘ, ꠀꠟ꠆ꠟꠣꠞ ꠖꠞꠛꠣꠞꠅ ꠢꠦ ꠅꠟꠣꠃ ꠞꠃꠇ।
25ꠅꠈꠘ ꠀꠝꠤ ꠀꠛꠤꠀꠔꠤ ꠙꠥꠠꠤꠘ꠆ꠔꠞ ꠝꠥꠍꠟꠣꠞ ꠛꠦꠙꠣꠞꠦ ꠇꠁꠞꠣꠝ। ꠁ ꠛꠦꠙꠣꠞꠦ ꠝꠣꠟꠤꠇꠞ ꠉꠦꠍ ꠕꠣꠇꠤ ꠀꠝꠤ ꠡꠞꠣꠡꠞꠤ ꠇꠥꠘꠥ ꠢꠥꠇꠥꠝ ꠙꠣꠁꠍꠤ ꠘꠣ, ꠅꠁꠟꠦ ꠀꠟ꠆ꠟꠣꠞ ꠞꠢꠝꠔꠦ ꠢꠇ-ꠢꠣꠟꠣꠟ ꠞꠁꠀ ꠀꠝꠤ ꠀꠝꠣꠞ ꠝꠔꠣꠝꠔ ꠎꠣꠘꠣꠁꠞꠣꠝ। 26ꠅꠃ ꠀꠈꠦꠞꠤ ꠎꠝꠣꠘꠣꠔ ꠎꠦꠟꠣ ꠝꠍꠤꠛꠔ ꠀꠁꠀ ꠀꠎꠤꠍꠦ, ꠀꠝꠣꠞ ꠝꠘꠦ ꠅꠞ ꠔꠥꠝꠞꠣ ꠎꠦꠁꠘ ꠎꠦꠟꠣ ꠀꠍ, ꠅꠟꠣꠃ ꠞꠅ। 27ꠔꠥꠝꠣꠞ ꠎꠥꠖꠤ ꠛꠃ ꠕꠣꠇꠦ, ꠔꠦ ꠔꠣꠁꠞꠦ ꠔꠣꠟꠣꠇ ꠖꠤꠅ ꠘꠣ, ꠀꠞ ꠛꠃ ꠘꠣ ꠕꠣꠇꠟꠦ ꠛꠤꠀ-ꠡꠣꠖꠤ ꠇꠞꠣꠔꠅ ꠟꠣꠉꠤꠅ ꠘꠣ। 28ꠅꠁꠟꠦ ꠛꠤꠀ ꠇꠞꠟꠦ ꠇꠥꠘꠥ ꠉꠥꠘꠣ ꠅꠁꠔ ꠘꠣꠄ, ꠀꠞ ꠇꠥꠘꠥ ꠀꠛꠤꠀꠔꠤ ꠙꠥꠠꠤ ꠛꠤꠀ ꠛꠁꠟꠦ ꠔꠣꠁꠞꠅ ꠉꠥꠘꠣ ꠅꠁꠔ ꠘꠣꠄ। ꠈꠣꠟꠤ ꠎꠉꠔꠅ ꠔꠣꠞꠣꠞ ꠇꠡ꠆ꠐ ꠛꠣꠠꠤꠛ, ꠅꠃ ꠇꠡ꠆ꠐ ꠕꠣꠇꠤ ꠀꠝꠤ ꠔꠥꠝꠞꠣꠞꠦ ꠛꠣꠌꠣꠁꠔꠣꠝ ꠌꠣꠁꠞꠣꠝ।
29ꠜꠣꠁ ꠅꠇꠟ, ꠀꠝꠤ ꠇꠁꠔꠣꠝ ꠌꠣꠁꠞꠣꠝ, ꠝꠣꠟꠤꠇ ꠁꠍꠣꠄ ꠈꠥꠛ ꠎꠟꠖꠤ ꠔꠡꠞꠤꠚ ꠀꠘꠞꠣ, ꠛꠦꠡꠤ ꠖꠦꠞꠤ ꠘꠣꠄ। ꠄꠞꠟꠣꠉꠤ ꠅꠈꠘ ꠕꠣꠇꠤ ꠅꠃꠟꠣ ꠝꠘꠅ ꠇꠞꠤꠅ, ꠎꠦꠞꠣꠞ ꠛꠃ-ꠛꠣꠁꠌ꠆ꠌꠣ ꠀꠍꠦ, ꠝꠘꠅ ꠇꠞꠤꠅ ꠛꠃ-ꠛꠣꠁꠌ꠆ꠌꠣ ꠘꠣꠁ। 30ꠎꠦꠞꠣ ꠖꠥꠈ-ꠝꠍꠤꠛꠔꠅ ꠀꠍꠂꠘ, ꠔꠣꠞꠣ ꠝꠘꠦ ꠇꠞꠃꠇ꠆ꠇꠣ ꠇꠥꠘꠥ ꠖꠥꠈ-ꠝꠍꠤꠛꠔ ꠘꠣꠁ, ꠎꠦꠞꠣ ꠈꠥꠡꠤ-ꠛꠣꠡꠤ ꠇꠞꠞꠣ, ꠔꠣꠞꠣ ꠝꠘꠦ ꠇꠞꠃꠇ꠆ꠇꠣ ꠇꠥꠘꠥ ꠈꠥꠡꠤ-ꠛꠣꠡꠤ ꠘꠣꠁ, ꠀꠞ ꠎꠣꠞꠣ ꠈꠞꠤꠖ-ꠛꠤꠇꠤ ꠇꠞꠦꠞ, ꠔꠣꠞꠣꠅ ꠝꠘꠦ ꠇꠞꠃꠇ꠆ꠇꠣ, ꠁꠔꠣ ꠝꠣꠟꠞ ꠃꠙꠞꠦ ꠔꠣꠞꠣꠞ ꠇꠥꠘꠥ ꠖꠣꠛꠤ-ꠖꠣꠅꠀ ꠘꠣꠁ। 31ꠎꠦꠞꠣ ꠎꠉꠔ-ꠡꠋꠡꠣꠞ ꠟꠁꠀ ꠛꠦꠡ꠆ꠔ, ꠔꠣꠞꠣꠞ ꠜꠣꠛ ꠎꠣꠘꠥ ꠙꠥꠞꠣꠙꠥꠞ ꠡꠋꠡꠣꠞꠤ ꠘꠣ ꠅꠄ, ꠇꠣꠞꠘ ꠜꠛꠞ ꠛꠣꠎꠣꠞ ꠔ ꠡꠣꠋꠉ ꠅꠁꠎꠣꠞ।
32ꠀꠝꠤ ꠌꠣꠁꠞꠣꠝ, ꠔꠥꠝꠞꠣꠞꠦ ꠢꠇꠟ ꠘꠝꠥꠘꠣꠞ ꠌꠤꠘ꠆ꠔꠣ-ꠜꠣꠛꠘꠣ ꠕꠣꠇꠤ ꠢꠞꠣꠁ ꠞꠣꠈꠔꠣꠝ। ꠇꠣꠞꠘ ꠀꠛꠤꠀꠔꠤ ꠛꠦꠐꠣꠁꠘ꠆ꠔꠦ ꠌꠤꠘ꠆ꠔꠣ ꠇꠞꠂꠘ ꠝꠣꠟꠤꠇꠞ ꠛꠦꠙꠣꠞꠦ, ꠇꠤꠟꠣ ꠝꠣꠟꠤꠇ ꠝꠃꠟꠣꠞꠦ ꠈꠥꠡꠤ ꠞꠣꠈꠣ ꠎꠣꠄ। 33ꠅꠁꠟꠦ ꠛꠤꠀꠔꠤ ꠝꠣꠘꠡꠦ ꠌꠤꠘ꠆ꠔꠣ ꠇꠞꠂꠘ ꠡꠋꠡꠣꠞꠞ ꠛꠦꠙꠣꠞꠦ, ꠇꠤꠟꠣ ꠊꠞꠞ ꠛꠃ-ꠛꠣꠁꠌ꠆ꠌꠣꠞꠦ ꠈꠥꠡꠤ ꠞꠣꠈꠣ ꠎꠣꠄ, 34ꠄꠞꠟꠣꠉꠤ ꠔꠣꠞꠣꠞ ꠝꠘ ꠖꠥ-ꠐꠣꠘꠣꠔ ꠙꠠꠤ ꠎꠣꠄ। ꠅꠃꠟꠣ ꠀꠛꠤꠀꠔꠤ ꠛꠦꠐꠤ ꠀꠞ ꠙꠥꠠꠤꠘ꠆ꠔꠦ ꠌꠤꠘ꠆ꠔꠣ ꠇꠞꠂꠘ ꠝꠣꠟꠤꠇꠞ ꠛꠦꠙꠣꠞꠦ, ꠇꠤꠟꠣ ꠝꠣꠟꠤꠇ ꠝꠃꠟꠣꠞꠦ ꠈꠥꠡꠤ ꠞꠣꠈꠣ ꠎꠣꠄ, ꠎꠣꠔꠦ ꠔꠣꠞꠣꠞ ꠡꠞꠤꠟ ꠀꠞ ꠝꠘ ꠙꠣꠇ-ꠙꠛꠤꠔ꠆ꠞ ꠕꠣꠇꠦ। ꠅꠁꠟꠦ ꠛꠤꠀꠔꠤ ꠛꠦꠐꠤꠘ꠆ꠔꠦ ꠌꠤꠘ꠆ꠔꠣ ꠇꠞꠂꠘ ꠡꠋꠡꠣꠞꠞ ꠛꠦꠙꠣꠞꠦ, ꠇꠤꠟꠣ ꠎꠣꠝꠣꠁꠞꠦ ꠈꠥꠡꠤ ꠞꠣꠈꠣ ꠎꠣꠄ। 35ꠛꠥꠎꠞꠣꠄ ꠘꠤ, ꠅꠃ ꠔꠣꠟꠤꠝ ꠅꠇꠟ ꠔ ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠇꠁꠞꠣꠝ। ꠀꠝꠤ ꠔꠥꠝꠞꠣꠞ ꠉꠟꠣꠔ ꠇꠥꠘꠥ ꠚꠣꠡ ꠟꠣꠉꠣꠁꠔꠣꠝ ꠌꠣꠁꠞꠣꠝ ꠘꠣ, ꠈꠣꠟꠤ ꠇꠁꠔꠣꠝ ꠌꠣꠁꠞꠣꠝ, ꠔꠥꠝꠞꠣ ꠘꠦꠇ ꠙꠕꠦ ꠌꠟꠅ ꠀꠞ ꠖꠤꠟꠦ-ꠎꠣꠘꠦ ꠝꠣꠟꠤꠇ ꠝꠃꠟꠣꠞ ꠀꠡꠤꠇ ꠅꠅ।
36ꠇꠥꠘꠥ ꠝꠣꠘꠡꠦ ꠎꠥꠖꠤ ꠝꠘꠅ ꠇꠞꠦ, ꠢꠦ ꠔꠣꠞ ꠀꠛꠤꠀꠔꠤ ꠙꠥꠠꠤꠞ ꠖꠣꠄ-ꠖꠣꠄꠁꠔ꠆ꠔ ꠀꠖꠣꠄ ꠇꠞꠦꠞ ꠘꠣ, ꠙꠥꠠꠤꠞ ꠛꠤꠀꠞ ꠛꠄꠅꠡ ꠙꠣꠞ ꠅꠁꠎꠣꠞ ꠇꠞꠤ, ꠢꠦ ꠙꠥꠠꠤꠞꠦ ꠛꠤꠀ ꠖꠦꠅꠀ ꠎꠞꠥꠞ ꠝꠘꠅ ꠇꠞꠦ, ꠔꠦ ꠔꠣꠞ ꠈꠥꠡꠤ ꠝꠣꠚꠤꠇ ꠙꠥꠠꠤꠞꠦ ꠛꠤꠀ ꠖꠦꠃꠇ। ꠄꠔꠦ ꠇꠥꠘꠥ ꠉꠥꠘꠣ ꠅꠁꠔ ꠘꠣꠄ। 37ꠅꠁꠟꠦ ꠎꠦ ꠝꠣꠘꠡꠞ ꠝꠘ ꠕꠤꠞ ꠀꠍꠦ, ꠎꠣꠞ ꠝꠘꠅ ꠇꠥꠘꠥ ꠅꠡꠣꠘ꠆ꠔꠤ ꠘꠣꠁ, ꠢꠦ ꠔꠣꠞ ꠘꠤꠎꠞ ꠝꠘꠞꠦ ꠡꠣꠝꠟꠣꠁꠀ ꠇꠣꠝ ꠇꠞꠦ, ꠁ ꠝꠣꠘꠡꠦ ꠎꠥꠖꠤ ꠝꠘꠦ ꠇꠞꠦ ꠔꠣꠞ ꠙꠥꠠꠤꠞ ꠛꠤꠀ-ꠡꠣꠖꠤ ꠎꠞꠥꠞ ꠘꠣꠄ, ꠔꠦ ꠢꠦ ꠑꠤꠇ ꠇꠣꠝꠃ ꠇꠞꠦꠞ। 38ꠅꠈꠘ ꠛꠥꠎꠣ ꠎꠣꠞ, ꠎꠦ ꠎꠘꠦ ꠔꠣꠞ ꠙꠥꠠꠤꠞꠦ ꠛꠤꠀ-ꠡꠣꠖꠤ ꠖꠦꠄ, ꠢꠦ ꠘꠦꠇ ꠇꠣꠝ ꠇꠞꠦ ꠀꠞ ꠎꠦ ꠎꠘꠦ ꠔꠣꠞ ꠙꠥꠠꠤꠞꠦ ꠀꠛꠤꠀꠔꠤ ꠢꠣꠟꠔꠦ ꠞꠣꠈꠦ, ꠢꠦ ꠀꠞꠅ ꠛꠦꠡꠤ ꠘꠦꠇ ꠇꠣꠝ ꠇꠞꠦ।
39ꠎꠣꠝꠣꠁ ꠎꠔꠖꠤꠘ ꠎꠤꠘ꠆ꠖꠣ ꠕꠣꠇꠂꠘ, ꠅꠔꠖꠤꠘ ꠛꠃ ꠎꠣꠝꠣꠁꠞ ꠛꠣꠘ꠆ꠖꠘꠅ ꠕꠣꠇꠂꠘ। ꠅꠁꠟꠦ ꠎꠣꠝꠣꠁ ꠝꠣꠞꠣ ꠉꠦꠟꠦ ꠛꠃꠄ ꠈꠣꠟꠣꠍ ꠙꠣꠁꠘ, ꠀꠞ ꠘꠤꠎꠞ ꠙꠍꠘ꠆ꠖ ꠝꠣꠚꠤꠇ ꠁꠍꠣꠄꠁ ꠔꠞꠤꠇꠣꠞ ꠎꠦꠇꠥꠘꠥ ꠎꠘꠞ ꠉꠦꠍꠦ ꠛꠤꠀ ꠛꠁꠔꠣ ꠙꠣꠞꠂꠘ। 40ꠔꠣ-ꠅ ꠀꠝꠤ ꠝꠘꠅ ꠇꠞꠤ, ꠔꠣꠁꠘ ꠠꠣꠠꠤ ꠢꠣꠟꠔꠦ ꠞꠁꠟꠦꠃ ꠀꠞꠅ ꠜꠣꠟꠣ। ꠀꠝꠤ ꠛꠥꠎꠞꠣꠝ, ꠀꠝꠤ ꠅꠃ ꠢꠇ꠆ꠇꠟꠔꠣ ꠀꠟ꠆ꠟꠣꠁ ꠞꠥꠢꠥꠞ ꠛꠟꠦ ꠇꠁꠞꠣꠝ।
ទើបបានជ្រើសរើសហើយ៖
ꠁꠘ꠆ꠎꠤꠟ ৭: ১-ꠇꠞꠤꠘ꠆ꠔꠤꠀ 7: sylN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Ahle Kitab Society. All rights reserved.