GENESIS 49

49
Jakob Thu Nanung
1Huan Jakob in atapate asamkhawm a, hichibang in agen hi: “Ni nanungte a na tung ua thil hong tung dingte ka hon hilhtheihna ding in hong kikhawm un.
2“Nou Jakob tapate aw,
hong kikhawm unla,
ngaikhia un;
na pa uh Israel thu ngai un.
3“Reuben, nang ka tapa masa, ka thilhihtheihna,
ka hatna gah masapen na hi.
Sanpenna leh thuneihpenna nang a ahi.
4Himahleh tui bang a kip lou na hi,
tungnunpenna na nei kei ding;
na pa lupnapi a na kal ziak in.
Huai ah ka lupna a kal in
na hihbuah hi.
5“Simeon leh Levi unau ahi ua,
anamsaute uh sisan suahna vanzat ahi.
6Ka kha aw, nang zaw
akikupna uah va kigolh ke'n.
Ka thupina, nang zaw akikhopna uah tel ke'n.
Aheh un mi athat ua,
agenhak un bawngtal thagui asattat uhi.
7Ahehna un hamsia dong hen,
hangsantak ahi ngal ua.
Athangpaihna un leng
hamsia dong hen,
hinsetak ahi ngal ua.
Jakob ah amaute ka kikhensak ding a,
Israel ah ka hihdalh ding hi.
8“Judah, nang na unaute'n
ahon phat ding uh.
Na doute ngawng ah na khut
na nga ding a; na ma ah na tapate akun ding uh.
9Judah humpinelkai nou ahi.
Ka tapa, na sa keih na paitouhsanta.
Na kun a, humpinelkai bang in na bok a,
humpinelkainu bang in
na kualsuk hi.
Kua'n ahia hon thousak ngam ding?
10Judah a kipan lalchiang amang kei ding,
vaihawmpa chiang akhekal a
kipan amang kei ding.
Shiloh ahong pai mateng;
mite'n ama thu amang ding uhi.
11Grepgui ah asakolnou akhih ding a,
asabiltungnou grepgui hoih chi ah akhih ding hi.
Apuansilhte uain in asawp ding a,
grep sisan in apuan asawp lai ding hi.
12Amitte uain in asan ding ua,
ahate nawitui in angou ding uhi.
13“Tuipi gei ah Zebulun ateng ding a,
longkhawlna luipiau ahi ding a;
agamgi Zidon ah ahi ding.
14“Issakar zaw sabiltung hattak ahi a,
van-gik nih kal a kual ahi.
15Khawl hoih in athei a,
gam leng hoih in athei;
huchi in van po ding in aliangzang aniamsak a,
phutluih nasem in sikha in ahong omta hi.
16“Dan in Israel nam lak a khat bang in
amite vai ahawmsak ding.
17Dan ahihleh lamlian gei a gul,
lampi a gulgial, atung a
tuangmi thalkiak ek khop a
sakol khetul tu nakpa ahi ding.
18“Aw Toupa, na hotdamna
ka ngak gige hi.
19“Gal in Gad asual ding a, himahleh
ama'n akhetul lam uah
amaute asual zaw ding hi.
20“Asher, anek ahoih ding a,
kumpi nekte apiangsak ding hi.
21“Naphtali, zukpi khah ahi.
Thuhoih pipi agen zel hi.
22“Joseph hiang gah nuamtak ahi,
tuikhuk kiang a hiang gah nuamtak;
ahiang nawnsawnte'n baang atuam uhi.
23Thalkap mite'n nakpitak in amah ahihgenthei ua,
akap ua, asimmoh uhi.
24Himahleh, amah thalpeu
khauhtak in a-om gige a,
abanthate Jakob' Pathian Mihatpa hatsak;
belamchingmi, Israel suangpi a pan ahi.
25Na pa Pathian,
nang hon panpih dingpa,
Bangkim hihtheipa,
tunglam van vualzawlnate,
nuailam a om gige tui thuktak
vualzawlnate,
nawite leh sul vualzawlnate,
nangmah hon vualzawl dingpa ngei hihhat in na om hi.
26Na pa vualzawlnate hon suangtute
vualzawlna sang in tangtawn mualte tawpkhawk pha in athupizawta hi.
Hiaite Joseph lutung ah a-om ding a,
asanggamte a kipan hihtuam a
ompa lusip ah a-om ding hi.
27“Benjamin ngia duhgawl bang in,
zingsang in asa matte ane ding a,
nitaklam in agallak ahawm ding,” achi hi.
28Huaite tengteng Israel nam sawm-le-nihte ahi uh. Huai thute leng amaute vualzawlna akiang ua apa uh thugen ahi. Vualzawlna atan ding gun bang zel un avualzawl chiat hi.
Jakob Sihna Leh Vuina
29Ama'n atapate thugou asiah a, akiang uah, “Ka chipihte kiang a pi a om ding ka hita. Hit mi Ephron lou a kokhuk a kei hon suangtute kiang ah hon vui un. 30Kanaan gam a Mamre ma a Makpelah lou a kokhuk, Abraham in kivuina mun ding a Hit mi Ephron a kipan alou toh alei ah. 31Huai ah Abraham leh azi Sarah avui ua; huai ah Isak leh azi Rebekah avui ua; huai mah ah Leah ka vui hi. 32Alou leh asung a kokhuk om Hit suante a kipan alei ahi,” achi hi. 33Jakob in atapate kiang a thugou asiah khit in akhete lupna ah angatou a, akha akhahta a, achipihte kiang ah pi in a-om samta hi.

ទើបបានជ្រើសរើសហើយ៖

GENESIS 49: PAITBSI

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល