GENESIS 37
37
Joseph Leh Asanggamte
1Apa mikhual a a-omna gam, Kanaan ah Jakob ateng hi. 2Hiaite Jakob suante ahi uh. Joseph, kum sawm-le-sagih a upa ahih in, asanggamte toh ganhon akhah uhi. Amah naupang ahi lai a, apa' zite Bilhah leh Zilpah tapate kiang ah a-om a; Joseph in agitlouhna thu uh apa uh kiang ah atun hi.
3Israel in Joseph, atek lam ta ahih ziak in atapate tengteng sang in a-itzaw a; puanaktual ze tuamtuam a gial abawlsak hi. 4Apa un asanggamte tengteng sang in amah a-itzaw chih asanggamte'n athei uhi; amah amudah ua, kampha himhim in ahoupih thei kei uhi.
5Joseph in mang anei a, asanggamte ahilh a, amah amudah semsem uhi. 6Ama'n akiang uah, “Hehpih in ka mang ngai dih uh. 7Ngai un, lou ah buhphalte i na gak ua, ngai dih uh, kei buhphal athoutou a, adingh nemnom hi. Ngai un, nou buhphalte'n ahong um ua, kei buhphal ma ah akun chiat uh,” achi hi.
8Asanggamte'n akiang ah, “Nang sop lai in ka tung uah vai na hawm mahmah ding maw? Nang sop lai in ka tung uah thu na nei mahmah ding maw?” achi uh. Huchi in amang ziak in amah amudah semsem uhi.
9Mang dang anei nawn a, asanggamte ahilh nawn hi, “Ngai un, mang ka nei nawn hi. Ni, kha leh aksi sawm-le-khatte ka mai ah akun uhi,” achi hi.
10Apa leh asanggamte ahilh hi. Apa'n atai a, akiang ah, “Mang na neih bangchi mang ahia? Kei leh na nu leh na sanggamte lei si in na mai ah ka kun taktak ding uh maw?” achi hi. 11Asanggamte'n amah ahaza ua, apa'n bel athugen alungsim in apai nilouh hi.
Joseph Zuakna Leh Aigupta A Pina
12Asanggamte Shekem ah apa uh ganhon khah in ahoh uhi. 13Israel in Joseph kiang ah, “Na sanggamte'n Shekem ah ahi maw ganhon akhah uh? Hong pai dih, akiang uah ka hon sawl ding,” achi hi. Huan ama'n, “Hiai ah ka om,” achi hi.
14Ama'n akiang ah, “Na sanggamte adamdam na uhiam, ganhon leng adamdam na hiam va en inla, atanchin uh hong hilh nawn in,” achi hi. Hebron Phaizang a kipan asawlkhia a, Shekem ava pha hi. 15Mi kuahiam in amah gamlak a vakvak amu hi. Huai mi'n, “Bang zong na hia?” chi in adong hi.
16Ama'n, “Ka sanggamte zong ka hi. Hehpih in ganhon akhahna uh hon hilh ve,” achi hi. 17Huai mi'n, “Hiai a kipan pawt hi ve un, Dothan ah i hoh ding uh, achih uh ka za,” achi hi. Joseph in asanggamte adelhzui a, Dothan ah ava mu hi.
18Amau gamlapi a kipan ana galmuh ua, akiangnai uh atun ma in, amah thah ana sawm khin uhi. 19Amau, “En un, hiai ah mang neipa ahong pai. 20Hong un, i that ding ua, kokhuk khat ah i khe ding uh. Gamsa gilou in ane, chi na ni. Amangte bangchibang in a-om a, chih i thei mai ding uh,” akichi uhi.
21Reuben in huai ana za a, akhut ua pan ahunkheta hi. “Thah zaw i that hial kei ding uh,” achi hi. 22Reuben mah in apa uh kiang a, apitheihna ding a, akhut ua pan ahotkhiak theihna ding in, akiang uah, “Sisan zaw suah kei un, gamdai ah kokhuk ah khia un, atung ah khut kha kei un,” achi hi. 23Huan hichi ahong hi a, Joseph asanggamte kiang atun in, Joseph puanaktual ze tuamtuam a gial asilh, ana suahsak uhi. 24Amah api ua, kokhuk ah akheta uhi. Huai kokhuk avuak ahi a, tui om louhna ahi.
25An ne ding in atu chiat ua, adak ua, a-en ua, ngai in, Gilead gam a kipan Ishmael khualzin mite, asangawngsau ua thil gimnamtui, singnai damdawi leh murrah pua in Aigupta gam a paisuk dingte ahong pai uhi. 26Judah in asanggamte kiang ah, “I naupa uh i thah ua, asisan suak i iim un bang phattuamna om ding ahia? 27Hong un, atung a khut kha lou in, Ishmaelte kiang ah i zuak zaw ding uh; amah lah i sanggam uh, i sa ngeingei uh ahi ngal a,” achi hi. Huchi in asanggamte'n athu azuita uhi. 28Midian sumsin mite ahong pai ua; kokhuk a kipan Joseph akaikhia ua, Ishmaelte kiang ah dangka sawmnih in Joseph akhawngta uhi. Amau Aigupta gam ah Joseph api uhi.
29Kokhuk ah Reuben ahong pai nawn a, ngai in, kokhuk ah Joseph ana omta kei a; apuansilhte abotkek hi. 30Asanggamte kiang ah ahong kik nawn a, “I naupa uh a-om nawn kei. Kei koi a paita ding ka hia oi?” achi hi.
31Joseph puanaktual ala ua, kelnou agou ua, asi ah apuanaktual adiah uhi. 32Huai puanaktual ze tuamtuam a gial akhak ua, apa uh kiang ah ahon la ua, “Hiai lel ka mu ua, na tapa puanaktual ahi hia, hilou, en mah dih,” achi uh.
33Ama'n ana thei pah a, “Ka tapa puanaktual ahi ve. Gamsa gilou in ne ahi ve. Joseph bohnen vek a om hi mahmah ding ahi ve,” achi hi. 34Jakob in apuansilhte abotkek a, sai-ip puan ateng a, ni tamtak atapa asuun hi. 35Atapa tengteng leh atanu tengteng amah lungmuan ding in athou ua; himahleh amah lungmuan a-ut kei, “Suun kawm in han ah ka tapa kiang ah ka paisuk ding,” achi hi. Amah ngai in apa akap hi.
36Midiante'n Aigupta gam ah Joseph alutpih ua, Pharaoh nuai a heutu khat, vengmi pawl heutu Potiphar kiang ah azuak uhi.
ទើបបានជ្រើសរើសហើយ៖
GENESIS 37: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.