EKSODAS 3
3
Pathian In Mosi Asam
1Mosi in asungpa, Midian siampu, Jethro belamhonte aching hi. Gamdai nunglam a belamhonte pi in, Pathian tang, Horeb pha in, ahong pai hi. 2Pawn lak a pan meikuang in akiang ah Toupa Angel ahong kilak hi. A-en a, ngai in, mei in loubukh akuang a, himahleh loubukh akang kei hi. 3Mosi in, “Ka kihei dia, hiai thil muh thupi, bangziak a loubukh kang lou ahia, ka va en ding,” achi hi.
4Huchi a-en dia kihei lai Toupa'n amuh in loubuk a pan amah asam a, “Mosi, Mosi,” achi hi. Ama'n, “Hiai ah ka om,” achi hi.
5Ama'n, “Hiai mun hon naih ke'n. Na khepek a pan na khedapte suah in. Na dinna mun lei siangthou ahi,” achi hi. 6Hiai achi lai a, “Na pa' Pathian, Abraham' Pathian, Isak' Pathian leh Jakob' Pathian ka hi,” Mosi in Pathian a-et ngam louh ziak in amai asel hi.
7 Toupa'n, “Aigupta gam a ka mite thuakgimna ka mu a, atung ua nasem heutute ziak a akah uh ka zata a, adahnate uh ka thei hi,” achi hi. 8“Aiguptate khut a pan amaute pikhe ding leh huai gam a pan gam hoih leh za, bawngnawi leh khuaizu a luang gam, Kanaante, Hitte, Amorte, Perizte, Hivte leh Jebuste gam tun dia hong paisuk ka hi. 9Huaiziak in tu in, ngai in, Israel suante kah thawm ka kiang ahong tungta. Aiguptate'n amau anuaisiahdan uh leng ka mu hi. 10Huaiziak in tu in kisa in, Pharaoh kiang ah ka hon sawl ding, Aigupta gam a pan Israel suante, ka mite na hon pikhiak theihna ding in,” achi hi.
11Mosi in Pathian kiang ah, “Pharoah kiang a hoh a, Aigupta gam a pan Israel suante pikhe ding, kei kua ka hia?” achi hi. 12Ama'n, “Na kiang ah ka om ngeingei ding, ka hon sawl chih, hiai nang a ding in akitheihna ahi ding. Aigupta gam a pan mite na pikhiak khit chiang in, hiai tang tung ah Pathian nna na sem ding uh,” achi hi.
13Mosi in Pathian kiang ah, “Ngai in, Israel suante kiang a ka hong pai a, akiang ua, hichibang a ka va gen chiang in, ‘Na pipute uh Pathian in na kiang ua ahon sawl ka hi,’ huan amau ka kiang ah, ‘Amin bang ahia?’ chi in ahon dong ding ua, ke'n akiang uah bang ka genta dia?” achi hi.
14Pathian in Mosi kiang ah, “KA HIH KA HI,” achi hi. Huchibang in Israel suante kiang ah na va gen ding ahi, “KA HIH IN na kiang uah ahon sawl hi,” chi in. 15Pathian in Mosi kiang ah agen behlap lai a, “Israel suante kiang ah hiai gen in: Israel suante Pathian, Abraham' Pathian, Isak' Pathian leh Jakob' Pathian in na kiang uah ahon sawl hi:
“Hiai ka min ahi gige a,
suan tengteng tan a kei theihgigena min ahi.
16Kuan inla, Israel upate kaikhawm inla, akiang uah hichi in va gen in. Ka kiang ah, ‘Na pipute uh Toupa Pathian, Abraham' Pathian, Isak' Pathian leh Jakob' Pathian ahong kilak a, hichi in achi, “Ka hong veh petmah a, Aigupta gam a na tung ua hih a omte ka muta hi.” 17Huan hichi in ka chita, Aigupta gimna a pan Kanaante, Hitte, Amorte, Perizte, Hivte leh Jebuste gam, bawngnawi leh khuaizu a luang gam ah ka hon pilut ding.’ ”
18“Na aw angaikhe ding uhi. Huchi in na kuan ding a, nang leh Israel upate, Aigupta kumpipa kiang ah na va hoh ding ua, akiang ah hichibang in na va gen ding uhi. Hebrute' Toupa Pathian in ahon kimuhpih a, tu in, ka hon ngen uhi, hon paisak in, gamdai a ni thum lam a Toupa ka Pathian uh kiang a ka kithoihtheihna ding un. 19Ahi a, Aigupta kumpipa'n bantha hatna toh lou in ahon paisak kei ding chih ka theitel hi. 20Ka ban ka zak ding a, alak ua ka hih ding ka thillamdang tengteng in Aigupta gam ka gawt ding. Huai nung in ahon paisak pan ding hi.
21“Aiguptate mitmuh in hiai mite deihsakna ka pe ding. Huan hichi ahi ding a, na pai chiang un khutvuak in na pai kei ding uh. 22Numei teng in invengte leh a-inn a khualtamte a pan dangka suangmantamte, dangka-eng suangmantamte leh puansilhte aleitawi ding. Huchi in huaite na tapate uh na silhsak ding ua, na tanute uh na silhsak ding uh. Huchibang in Aiguptate na lok ding uhi,” achi hi.
ទើបបានជ្រើសរើសហើយ៖
EKSODAS 3: PAITBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.