MATTHAI 16
16
Inchikna inhmutir dingin an ngên
(Mk 8.11-13; Lk 12.54-56)
1Chun, Pharisaihai le Saddu- kaihai an hung a, ama fiena dingin vâna inthawka inchikna anni inentir dingin an hnih a.
2Nisienlakhawm, ama chun an kuomah, “Zântieng a hung ni pha, ‘Khuo a ṭha ding nîng a tih, kâwl a sen êm el,’ in ti hlak a.
3Chun, a zîngkâr chun, ‘Vawisûn chu khuo a se ding nîng a tih, kâwl a sen a, vân ân nîm êm el,’ in ti hlak a.#Ziekna ṭhenah Ch.2 le Ch.3 na chenve chen hi a um nawh Vân umzie in hrietthiem thei sih a, nisienlakhawm, hun inchiknahai hi in hriet fie thei si nawh a.
4Ruolthar suol tak le uire hmang- hai chun inchikna an zawng a; nisienlakhawm, Jona inchikna chau naw chu an kuomah inchikna hrim pêk ni naw ni,” a ta, a dawn a. Chun, anni a fesan a, a fe ta dai a.
Pharisai le Saddukaihai chawl
(Mk 8.14-21)
5Chun, inchûktirhai chu râlkhing tieng an tlung chun, bei an lo chawi theinghil a,
6Isûn an kuomah, “Pharisaihai le Saddukaihai chawla inthawk chun invêng unla, fîmkhur ro,” a ta.
7Chun, anni chun, “Bei ei chawi dêr nawh,” tiin an inngaituoh a.
8Chun, Isûn chu chu a hriet a, “Ringna tlâwmhai, iengdinga bei in nei naw leia in inngaituo am a na?
9Tu khawm hin in lungrilin in la hriet naw rawp maw? Mi sâng nga beiphêk panga le, in bâwm rût sip zât kha in hriet zing naw am a nih?
10Mi sâng li beiphêk pasari le, in bâwmrâng rût sip zât khawm kha?
11Bei thu in kuomah ka hril nawh ti iengtiziea in hriet naw am a na? Pharisaihai le Saddukaihai chawla inthawk ruok chun fîmkhur ro,” a ta.
12Chu phingleh, bei chawla inthawka fîmkhur dingin a ti nawh a, Pharisaihai le Saddukaihai inchûk- tirnaa inthawka fîmkhur dingin anni a ti lem ti an hung hriet tah a.
Peterin Isu chu Krista a ni ngeizie a phuongna
(Mk 8.27-30; Lk 9.18-21)
13Chun, Isu chu Philip Kaisari biel a hung tlung chun, a inchûktirhai kuomah, “Mihaiin Mihriem Naupa hi tu am a nih an tih a?” tiin ân dawn a.
14Anni chun, “Ṭhenkhatin, ‘Bap- tistu Johan an ti che a,’ ṭhenkhatin, ‘Elija’, ṭhenkhatin, ‘Jeremia amanih, zâwlnei tu amanih’ an ti che” an ta.
15Ama chun an kuomah, “An leh, nangnîn tu am a nih in mi tih a?” a ta.
16Simon Peterin, “Krista Pathien hring Naupa chu I nih,” a ta, a dawn a.
17Chun, Isûn a kuomah, “Simon Bar-Jona, i hamṭha ie; tisa le thisenin ân hriettir che a ni si nawh a, ka Pa vâna mîn ân hriettir lem che a nih.
18Chun, nang Peter i nih ti ka hril che; hi lungpui chunga hin ka kohran rem ka ta, mithi khuo kul kawtkhârhai chun chu chu ngam naw ni hai.
19Vân ram chabihai pêng ka ti cheh a, hnuoi chunga iengkhawm i phuor taphawt vânah phuor ning a ta; hnuoi chunga iengkhawm i sût taphawt chu vânah sût ning a tih,” a ta, a dawn a.
20Chu hnunga chun Krista a ni ti tukhawm hril lo dingin inchûktirhai chu a ti tlat a.
Isu a thina le a hung nâwkna ding a hrillâwkna
(Mk 8.31—9.1; Lk 9.22-27)
21Chu chena inthawk chun, Isûn Jerusalema a fe dingzie dâm, upahai, thiempu lalhai, Dân inchûktirtuhaia inthawka thil tamtak a tuor dingzie dâm, sukhluma a um dingzie dâm le ni thum nia keithoa a um dingzie dâm chu a inchûktirhai chu ân hriettir phut tah a.
22Chun, Peter chun ama chu a tumin a ṭhuoi a, “Lalpa, Pathienin lunginsiet raw se che!; chuong chu i chungah tlung naw tawp a tih,” tiin a kâwk tah a.
23Ama ruok chu a nghah a, Peter kuoma chun, “Setan, ka hnungah fe rawh, keia ta dingin tlûkna i nih; Pathien thil ngaituo loin mihriem thil i ngaituo lem a ni hi,” a ta.
Mâni le mâni intheinghil dinga kona
(Lk 9.23-27)
24Chun, Isûn a închûktirhai kuomah, “Tukhawmin mi zui a nuom chun, mâni inhnâwlin, a kraws putin, mi zui raw se.
25Tukhawm a hringna hum nuom taphawt chun chân a tih; tukhawm keia leia hringna chân phawt chun hum a tih.
26Mîn khawvêl hi a pumin nei sien, ama hringna chân si sienla, a ta dingin ieng am ṭhahnem a ta? Annawleh, mîn a hringna sikin ieng am pêng a ta?
27Mihriem Naupa hi a vântir- kohai leh, a Pa ropuinaa inthuomin a hung ding a ni sih a; chu pha chun mi tin an thilthaw ang peiin thung seng a tih.
28Titakzetin ka hril cheu hi, hitaka ngîr a ṭhen hi, Mihriem Naupa a rama a hung an hmu hmakhat chun, thina intem tawp lo ding an um,” a tih a.
ទើបបានជ្រើសរើសហើយ៖
MATTHAI 16: HMARCLBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
