Kuxh 16
16
Uvaʼs titzʼeʼv vet quBʼaal Jesuus inpaqte
Tio 28.1-10; Luk 24.1-12; Xhun 20.1-10
1Qʼeqxetz veteʼ uvaʼs ipal vet u xeem qʼij saavado, tul bʼen vet kaʼl inqʼa ixoq tiʼ iloqʼox bʼaʼnla txʼumbʼisabʼal. Aʼe Mal, u aj tenam Magdaala, tuchʼ Mal, vitxutx Jakoovo, u itzʼina, atz tuchʼich Salomee. Tul laʼich bʼen isujoʼk u txʼumbʼisabʼal tiʼ vitxhiʼoʼl Jesuus uvaʼ motx tala. 2Tuulbʼaletz u bʼaxa qʼij tu xhemaana s-qʼalaʼmxhtuʼ, tul bʼen inqʼa ixoq. Tul tiqʼo vet u txʼumbʼisabʼal tiʼ itxʼumbʼisal vitxhiʼoʼl Jesuus tu muqbʼal kamnaʼq tal uvaʼ oksalika.
3Tul atichaq vet ok tiʼ bʼey, tul ech nikich motx tal s-vatzaq s-eche: —¿Jaʼletzxhte toq bʼalqʼun el u sivan titziʼ u muqbʼal kamnaʼq s-quxeʼ? —chichichaqe.
4Opoonetz vet inqʼa ixoq, tul tilaq veteʼ uvaʼ maʼtich teesal vet el u nimla sivan titziʼ u muqbʼal kamnaʼq. 5Yaʼne pal vet ok inqʼa ixoq s-tuul. Tul ajtxh til kʼuqlich val u aanxel t-visebʼal itziʼ u muqbʼal kamnaʼq. Tul echich tilix, eche invaʼq chelem vinaq. Tul atich ok val u qinkin oksaʼm taʼn. Tul oqxhich isaqal u toksaʼm. Tul tira motx samun inqʼa ixoq s-te.
6Yaʼne ech tal u aanxel te inqʼa ixoq s-eche: —Yeʼ kuxh xoʼv ex. Vootzaqle uvaʼ, aʼ u Jesuus nik etxhokeʼ, u aj Nasareet, uvaʼ aqʼax jaʼ vatz kurus. Poro yeʼl vet Jesuus tzitza, tan qat itzʼeʼvya. Saqivaq u atibʼal etileʼ tal uvaʼ aqʼaxik ka vitxhiʼoʼl Jesuus. 7Pet bʼenoq ex, tul bʼenoq etal te inqʼa nikich itxhus tibʼ kʼatz Jesuus. Tul ech etal te Luʼ s-eche: «Il Jesuus toq bʼaxabʼoq bʼen sevatz tuulbʼal Galileea. Tul een laʼ bʼen ekʼulvat etibʼ tuchʼ Jesuus tzitzi. Tan ech uvaʼe tal Jesuus,» chaq ex, —xeʼt u aanxel.
8Yaʼne qʼex tel tzaan inqʼa ixoq tziʼ u muqbʼal kamnaʼq. Tul oqxhichaq vet itiʼn t-xoʼval. Atz samunyichaqxh veteʼ. Tul tira yeʼxhkam invaʼq yol nikich tal inqʼa ixoq te invaʼq xaol, tan mam xoʼval nikich motx bʼanon.{*}#16.8 Tul ech kuxh nik yaʼk vet inqʼa iyol Kuxh s-eche, inqʼa itzʼibʼa ka. Pet jolt inqʼa iyol Kuxh, tan motx tzʼeqxi, inqʼa itzoqpebʼalich veteʼ. Pet kamal aʼ vet invaʼq, inqʼa imol Kuxh s-apoostolil, tzoqpisan. Aʼetz vete uvaʼ nik ixeʼt tzitza tu versiikulo bʼelval, tetxhal taqʼbʼ tu versiikulo viinqil. Tan jikxh nik ibʼen tiʼ itzoqpixsal talax inqʼa yol tiʼ kam ibʼan vet quBʼaal Jesuus s-xamtel uvaʼs maʼtich titzʼeʼv veteʼ. Pet aloq yeʼl inqʼa yol, uvaʼ nik tal t-inqʼa versiikulo inqʼaa, t-inqʼa uʼ uvaʼ sibʼal yaʼbʼ bʼaxa motx teluʼl. Pet bʼantan at qʼaoq, tuul inqʼa uʼ uvaʼ xamtel motx tel vet ul.
Uvaʼs ikʼutxht tibʼ quBʼaal Jesuus te Mal, u aj tenam Magdaala
Xhun 20.11-18
[9Maʼtichetz titzʼeʼv vet Jesuus s-qʼalaʼm tuulbʼal u bʼaxa qʼij tu xhemaana, tul aʼxh bʼaxich ikʼutxhvat tibʼ Jesuus te Mal, u aj tenam Magdaala, uvaʼ maʼtich itukit el Jesuus juqvaʼl demoonio t-taanima. 10Bʼenetz vet Mal, tul ex tal vet Mal u titzʼeʼv Jesuus te inqʼa nikich itxhus tibʼ kʼatz Jesuus. Tan oqxhaqich toqʼe. Atz oqxhaqich itxumune. 11Tabʼietz vet inqʼa nikich itxhus tibʼ kʼatz Jesuus uvaʼ maʼtich titzʼeʼv vet Jesuus, tul tira yeʼ motx iqea, kʼuxh maʼtich tilix vet Jesuus taʼn Mal.
Uvaʼs ikʼutxht tibʼ quBʼaal Jesuus te kaʼvaʼl inqʼa niman tetz
Luk 24.13-35
12Yaʼne ikʼutxh tibʼ Jesuus tiʼ bʼey te kaʼvaʼl inqʼa niman tetz uvaʼs aalaqich ibʼen t-vitz. Poro yeʼ motx bʼen s-te s-bʼaxa oq uvaʼ Jesuusiche, tan jalpinaʼqich vet ikaʼy Jesuus. 13Pet taʼnetz kuxh motx bʼenaq vet s-te, tul nal kuxh motx iqʼaʼvaq veteʼ. Tul ex tal vet te jolt inqʼa niman tetz Jesuus. Poro jitoq motx iqej txha inqʼa imol oq uvaʼ maʼtich titzʼeʼv vet Jesuus inpaqte.
14Xamtichetz veteʼ, tul ikʼutxh tibʼ Jesuus te junlavat inqʼa nikich itxhus tibʼ s-kʼatza uvaʼs kʼuqinyich ok viʼ meexha tiʼ itxʼaʼoneʼ. Yaʼne iyaj Jesuus inqʼa nikich itxhus tibʼ s-kʼatza tiʼ yeʼ iqejt inqʼa yol uvaʼ ex alaxoq s-te taʼn inqʼa ixoq, inqʼa motx ilon uvaʼ maʼtich titzʼeʼv vet Jesuus inpaqte. Atz iyaj Jesuus, tiʼ uvaʼ yeʼ nikich motx tul vet s-kʼuul uvaʼ tetxhal kuxh laʼich itzʼeʼv Jesuus inpaqte.
Uvaʼs ibʼekʼt ka quBʼaal Jesuus inqʼa niman tetz tiʼ ipaxsal inqʼa bʼaʼnla txhaq yol tiʼ quBʼaal Jesuus
Tio 28.16-20; Luk 24.36-49; Xhun 20.19-23
15Yaʼne ech tal Jesuus s-eche: —Bʼenoq ex, tul bʼenoq epaxsa inqʼa bʼaʼnla txhaq yol s-viʼ te jankʼal inqʼa xaol vatz u txʼavaʼ s-kaqaayil. 16Jaʼl uvaʼ laʼ qeon inqʼa yol uvaʼ laʼ etala, tul laʼ aqʼax kuʼ xeʼ aʼ, aʼetz uvaʼe, chitel tiqʼabʼ inqʼa paʼv laʼ ibʼana. Pet jaʼl uvaʼ, yeʼ laʼ qeon inqʼa bʼaʼnla txhaq yol s-viʼ, tul aʼetz uvaʼe, laʼ jaʼp u yol s-tiibʼa tiʼ bʼen tilt u kʼaxkʼo. 17Jaʼl uvaʼ laʼ qeon inqʼa bʼaʼnla txhaq yol s-viʼ, tul aʼetz tetxhlal u vatin s-kʼatza. Aʼe, uvaʼ tuchʼ u tiqleʼm uvaʼ qat vaqʼ s-te, laʼ motx itukivat el demoonio t-taanima inqʼa xaol. Atz laʼ iyolbʼe jolt yolbʼal uvaʼ jit jaʼl laʼ txhusun s-te. 18Atz kʼuxh laʼ itxey kan, atz kʼuxh laʼ tukʼa invaʼq tzʼakabʼal tetz yatzʼbʼal aanima, tan yeʼxhkam laʼ ibʼan taʼn. Tul laʼ taqʼ jaʼ iqʼabʼ tiviʼ inqʼa yaabʼ, tul laʼ ibʼan bʼaʼn inqʼa yaabʼ, —xeʼt Jesuus.#Vibʼanoʼm inqʼa Apoostol 28.3-6
Uvaʼs ibʼen vet quBʼaal Jesuus t-amlikaʼ
Luk 24.50-53
19Yaʼetz kuxh vet iyolon quBʼaal Jesuus tuchʼ inqʼa niman tetz, tul iqʼol vet jaʼ Jesuus t-amlikaʼ taʼn quBʼaal Tiuxh. Tul yekich vet Jesuus kʼuqloq tisebʼal quBʼaal Tiuxh, tu kʼuqeʼvbʼal tetz tiqleʼm.
20Yaʼne bʼen vet inqʼa niman tetz Jesuus paxsa tetz inqʼa bʼaʼnla txhaq yol tiʼ Jesuus tuulbʼal jankʼal inqʼa tenam. Tul nikich motx ilotxhox taʼn quBʼaal Jesuus. Tul nikich taqʼ quBʼaal Jesuus tiqleʼm tiʼ ikʼutxhux inqʼa etxhlal, tiʼ taqʼax iyakʼil inqʼa bʼaʼnla txhaq yol uvaʼ nikich motx ipaxsa.]
[Tul echxh laʼ ibʼane.]
ទើបបានជ្រើសរើសហើយ៖
Kuxh 16: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.