Luk ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
LUK
Uvaʼs toq qootzaqitaʼ jaʼl tzʼibʼan u uʼ Luk
Aʼetz u uʼe uvaʼ Luk ibʼij, tan Luk ibʼij uvaʼ tzʼibʼan u uʼ. Tan ech uvaʼ nik tal inqʼa niman tetz Jesuus, inqʼa txhusux ka taʼn inqʼa itxhaq quBʼaal Jesuus, inqʼa apoostol; jankʼale inqʼa ikʼaol, atz inqʼa tij imam, inqʼa motx itxhus tibʼ kʼatz inqʼa itxhaq Jesuus, inqʼa apoostol; jankʼale Justiino, uvaʼ yatzʼax el tiʼ iqeex quBʼaal Jesuus. Tul nikat tal vaʼt u uʼ uvaʼ Muratoori ibʼij. Tul nima tel kuxh inqʼa yol nik ikʼul tibʼ uvaʼ, aʼ Luk tzʼibʼan tetz vitoxv uʼ tiʼ quBʼaal Jesuus. Tul aʼ Luk tzʼibʼan vaʼt u uʼ uvaʼ Vibʼanoʼm inqʼa Apoostol t-quyolbʼal, pet Hechos de Los Apóstoles ibʼij t-kastiiya. Tan aʼ nik kʼutxhun uvaʼ ant Luk nik toksa tibʼ tuul u yol uvaʼ itzʼibʼa. Tan ech uvaʼe nik tal t-Vibʼanoʼm inqʼa Apoostol 16.10-11 tuchʼ 20.5 tuchʼ 21.1.
Tul nikat quleqeʼ uvaʼ aj tzʼakich Luk. Ech uvaʼe nik tal tu Koloseenses 4.12-14 tuchʼ 2 Timoteeo 4.11 tuchʼ Filemoon 24. Tul lotxhonalich Luk kʼatz Paʼp. Jitichetz tij imam Israeel Luk. Atz jitich apoostol Luk, tan yeʼ til Luk quBʼaal Jesuus. Tan maʼtich titzʼeʼv vet quBʼaal Jesuus, atz bʼennaʼqich vet t-amlikaʼ, tul ok vet Luk s-niman tetz Jesuus.
Eenichetz alamal Luk tu tenam Antiokiia tuulbʼal Siiria. Aʼichetzxh iyolbʼal Luk u yolbʼal grieego. Xaʼtetze itxhabʼaxh Luk itzʼibʼal kaʼvaʼl inqʼa tuʼ tu yolbʼal grieego.
Uvaʼs toq qootzaqitaʼ kam s-tuul tzʼibʼal u uʼ Luk
Aʼetzxh itzʼibʼal u uʼ Luk tu yaʼbʼ vajxaqlaval toxkʼal (58) m.t.J. uvaʼs atich Luk kʼatz Paʼp tu tzeʼ tu tenam Sesareea tuulbʼal Siiria. Tan ech uvaʼe nik tal t-Vibʼanoʼm inqʼa Apoostol 23.33—26.32.
Uvaʼs toq qootzaqitaʼ kame u taqʼil vitxhusun Luk tuul u tuʼ
Aʼetz itzʼibʼavat bʼen Luk u tuʼ te val vimol uvaʼ atich tatin s-vatz, val u vinaq uvaʼ Teoofiloich ibʼij. Tul kamaletz Teoofilo jaqon bʼaʼnil te Luk tiʼ tootzaqileʼ kam talax inqʼa yol uvaʼ nimamalich vet taʼn Luk, atz nimamalich vet taʼn Teoofilo inpaqte. Echetz s-tiʼile ex ijotxhʼi Luk inuqul te inqʼa apoostol, tiʼ kamxhte uvaʼ pal ibʼan quBʼaal Jesuus vatz u txʼavaʼ. Tul aʼetz vet uvaʼe, itzʼibʼa bʼen Luk te Teoofilo. Tan ech uvaʼe nik tal t-Vibʼanoʼm inqʼa Apoostol 1.1.
Aʼetz itzʼibʼavat bʼen Luk u tuʼ te inqʼa xaol, inqʼa jitich tij imam Israeel, inqʼa grieego nikich iyolbʼe. Tul aʼichetz isaʼ Luk laʼ ibʼen te inqʼa laʼich sikʼlen u uʼ kame uvaʼ pal ibʼan quBʼaal Jesuus vatz txʼavaʼ. Tul aʼ nikich isaʼ Luk ibʼen inuqul te inqʼa laʼ sikʼlen u uʼ, tiʼ uvaʼ tira bʼen quBʼaal Jesuus s-vaʼl alam aanima. Aʼ u yole uvaʼ ‹Hijo del Hombre,› chich tu kastiiya. Tul iKʼaol quBʼaal Tiuxh u quBʼaal Jesuus, tan Tiuxhiche. Tul yeʼl invaʼq ipaʼv atiche. Tul vinaqkaj paqlen itzʼibʼa Luk tuul u tuʼ uvaʼ, aʼ quBʼaal Jesuus uvaʼ bʼen s-vaʼl alam aanima. Tan ech uvaʼe nik tal tu Luk 5.24 tuchʼ 6.5. Tan antxh quBʼaal Jesuus alon u yol s-tiʼ uvaʼ, vaʼl iKʼaol quBʼaal Tiuxh uvaʼ bʼen s-alam aanima vatz u txʼavaʼ. Tan aʼ nikich ex tiqʼo tzaan quBʼaal Jesuus s-tuul uvaʼ alelich ka tu Danieel 7.13-14, tal uvaʼ nik talvat tiʼ vaʼl uvaʼ laʼich bʼen s-alam aanima, tul tetxhal laʼich ul vatz txʼavaʼ.
Atz aʼat nikich isaʼ Luk paqte, uvaʼ laʼich bʼen inuqul te inqʼa jit tij imam Israeel uvaʼ laʼichat utxh inimat inqʼa bʼaʼnla txhaq yol uvaʼ ul tal quBʼaal Jesuus. Tan jitichat tij imam Israeel Teoofilo. Tul jit taʼn inqʼa tij imam Israeel atich tokebʼal tiʼ inimal inqʼa bʼaʼnla txhaq yol. Ech uvaʼe nik tal tu uʼ Luk 7.9 tuchʼ 10.33-37.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Luk
U uʼ Luk uvaʼ itzʼibʼa ka Luk, tan kajvaʼlen nimla txhaq tanul elnaʼq inqʼa yol uvaʼ nik tal s-tuul tiʼ kame uvaʼ pal ibʼan quBʼaal Jesuus vatz u txʼavaʼ.
1. Luk 1.1—2.52
U bʼaxa nimla tanul yol, tan aʼ tal Luk, tiʼ uvaʼ tetxhal laʼich ul u Kriisto vatz txʼavaʼ. Tul talat Xhun, u aqʼol kuʼ xaol xeʼ aʼ, uvaʼ aʼich quBʼaal Jesuuse u Kriisto. Tul tal Luk tuulbʼal tanul viyol tiʼ vineʼitbʼal quBʼaal Jesuus tetxhal topoon s-chelem xaak.
2. Luk 3.1—9.50
Vikaʼv nimla tanul yol, tan aʼ tal Luk tiʼ kam inqʼa aqʼon ibʼan quBʼaal Jesuus tuulbʼal Galileea tetxhal itzoqpisataʼ.
3. Luk 9.51—21.38
Vitoxv nimla tanul yol, tan aʼ tal Luk tiʼ vibʼen quBʼaal Jesuus tu tenam Jerusaleen tuulbʼal Judeea. Atz tal tiʼ kam inqʼa aqʼon ibʼan quBʼaal Jesuus tzitzi.
4. Luk 22.1—24.53
Vikajv nimla tanul yol, tan aʼ tal Luk tiʼ u tixval quBʼaal Jesuus tetxhal iyatzʼax el. Tul tal tiʼ vimuqux quBʼaal Jesuus tuchʼ uvaʼs titzʼeʼv inpaqte, atz tuchʼ uvaʼs ibʼen vet jaʼ t-amlikaʼ. Aʼ inqʼa bʼaʼnla txhaq yole, inqʼa tzʼibʼamal ka taʼn Luk tiʼ quBʼaal Jesuus.
ទើបបានជ្រើសរើសហើយ៖
Luk ALBʼAL INUQUL U YOL TIʼ U Uʼ: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.