Vibʼanoʼm inqʼa Apoostol 20
20
Uvaʼs ex isolit Paʼp inqʼa niman tetz Jesuus tuulbʼal Masedoonia, atz tuulbʼal Greesia tiʼ ikolt tibʼ vatz inqʼa tij imam Israeel
1Yaʼetz kuxh vet tzi vatz inqʼa xaol uvaʼ lakich vet tibʼ tu tenam Eefeso, tul imol vet Paʼp inqʼa niman tetz Jesuus. Atz taqʼ vet Paʼp itial tiʼ inimal inqʼa bʼaʼnla txhaq yol tiʼ Jesuus, atz itiila bʼekʼu vet ka Paʼp s-te uvaʼ yeʼ laʼ motx el ka tiʼ inimaleʼ. Yaʼne tal vet Paʼp ibʼen te inqʼa niman tetz Jesuus. Tul motx ijele vet tibʼ Paʼp s-tuchʼ. Tul bʼen vet Paʼp tuulbʼal Masedoonia. 2Yaʼne ex isoli vet Paʼp inqʼa niman tetz Jesuus t-junun inqʼa tenam, inqʼa at tuulbʼal Masedoonia. Tul pal taqʼ vet ka Paʼp itial inqʼa niman tetz Jesuus. Tul nima tel kuxh yol motx itiila bʼekʼu ka Paʼp te inqʼa niman tetz Jesuus tiʼ inqʼa bʼaʼnla txhaq yol. Yaʼne bʼen vet Paʼp tuulbʼal Greesia uvaʼ antxh Akaaya ibʼij. 3Oxvaʼlichetz vet ichʼ tatin Paʼp tuulbʼal Greesia, tul saʼich bʼen vet Paʼp t-val u vaarko tiʼ ibʼen t-Siiria. Tul tabʼi Paʼp uvaʼ kuʼ vet yol s-tiʼ taʼn inqʼa tij imam Israeel tiʼ iyatzʼpeʼl. Echetz yeʼ ipal vet Paʼpe tal uvaʼ saʼich palka. Pet aʼ titzʼa vet Paʼp uvaʼ ech laʼich ipal vet tuulbʼal Masedoonia inpaqte. 4Atichetz jolol imol Paʼp uvaʼ tzum laʼich ibʼen s-tuchʼ tu Jerusaleen, tul ibʼaxabʼsa bʼen Paʼp s-vatz tu tenam Trooas tuulbʼal Aasia. Antichetz Soopater, u aj Vereea; atz antich Aristaarko tuchʼ Seguundo, inqʼa ajaq Tesaloonika; atz antich Gaayo u aj Deerve; atz antichat Timoteeo u aj Galaasia; tul antich Tiikiko tuchʼ Troofimo, inqʼa ajaq Aasia. 5Aʼetz inqʼae, bʼaxabʼ bʼen s-quvatz. Tul een ex itxʼebʼvat oʼ tu tenam Trooas. 6Paletz viqʼiil Vitxʼaʼp Inqʼa Paan, inqʼa yeʼl aqʼbʼal jaʼ tuul atoʼk, yaʼne el vet bʼen oʼ tu tenam Filiipos. Tul ok vet bʼen oʼ t-vaarko viʼ maar. Tul oʼvaʼlen qʼij pal qutxʼakvat inqʼa qumol tu tenam Trooas. Tul tzitzi atink vet oʼ juqvaʼl qʼij.
Uvaʼs mamala iyolbʼal quBʼaal Tiuxh itxhus Paʼp xoʼl inqʼa niman tetz Jesuus tu tenam Trooas, tetxhal isaqbʼeʼ
7Aʼxhetz ibʼant tumeenkuʼ tu bʼaxa qʼij t-vixeʼtebʼal u xhemaana, tul motx ikʼul tibʼ inqʼa niman tetz Jesuus tiʼ ipixhix el u paan s-xoʼl s-vatzaq tiʼ tulsat vikamebʼal Jesuus s-kʼuul. Tul xeʼt vet Paʼp txhusun s-xoʼl. Tul nimalxh ibʼan Paʼp, tetxhal itxhaqʼaan aqʼbʼal, tan ech qalich el vet bʼen Paʼp t-Trooas. 8Tul mamala txiqubʼal atich ok tuul vitoxv viq u otzotz tal uvaʼ kʼulich tibʼ inqʼa niman tetz Jesuus. 9Atichetz val u chelem xaak, uvaʼ Eutiikoich ibʼij, kʼuqlich tziʼ vixotoʼlil u otzotz t-vitox viq tuulbʼal uvaʼs nikich itxhusun Paʼp. Kamyichetzxh vet u xaak t-vataʼm, tan yeʼ nikich iyaʼ Paʼp tiʼ itxhusuneʼ. Bʼenetz vet u xaak t-vataʼm. Tul el tzaan u xaak tziʼ u xotoʼl. Exetz lakaxoq vet u xaak, tul ilixi uvaʼ kamnaʼqich veteʼ.
10Yaʼne qʼex ikuʼl Paʼp. Tul kʼoʼeʼv vet Paʼp tiʼ ijelel u xaak. Tul ech tal Paʼp s-eche: —Yeʼ kuxh xoʼv ex, tan il naq u xaak itzʼeʼvy inpaqte, —xeʼt Paʼp.
11Yaʼne qʼaʼv vet jaʼ Paʼp inpaqte t-vitoxv viq u otzotz. Tul ipixh vet Paʼp u paan s-tuul. Tul motx itxʼaʼ vet inqʼa niman tetz Jesuus tiʼ tulsataq vikamebʼal Jesuus s-kʼuul. Tul nima tel kuxh txhusuʼm ibʼan Paʼp, tetxhal isaqbʼeʼ. Tul bʼen vet Paʼp.
12Pet u xaak, tan iqʼol vet t-totzotz. Tul aʼl mam chiibʼichil ibʼan vet inqʼa niman tetz Jesuus, tiʼ uvaʼ yeʼl u xaak kami, pet itzʼeʼv inpaqte.
Uvaʼs tel bʼen Paʼp tu tenam Trooas, tul yekich vet Paʼp tu tenam Mileeto
13Bʼaxabʼetz vet bʼen oʼ t-vaarko, tul yekich vet oʼ tu tenam Asoon. Pet Paʼp, tan toq Paʼp bʼenka. Tul maʼtich talt Paʼp s-qe uvaʼ, aʼ laʼich qukʼulvat qibʼ s-tuchʼ tu tenam Asoon. 14Exetz qukʼul vet qibʼ tuchʼ Paʼp tu tenam Asoon, tul ok vet bʼen Paʼp s-qukʼatza tuul u vaarko. Tul ech qupal vet tu tenam Mitileene. 15Tul vaʼl aqʼbʼal qubʼan tzitzi. Saqbʼetz veteʼ, tul bʼen vet oʼ t-vaarko inpaqte. Tul pal qil vet ka val u txʼavaʼ uvaʼ Kiio ibʼij, tul ok bʼen oʼ. Tikaʼvetz qʼij quxaon tuul vaarko, tul een ex txakeʼvik vet oʼ tu tenam Saamos. Yaʼne ok bʼen oʼ paqte, tul aqʼbʼ vet oʼ tu tenam Trojiilio. Echetz txhan vet vaʼt qʼij, tul aqʼbʼ vet oʼ tu tenam Mileeto. 16Tan itzʼamich taʼn Paʼp uvaʼ laʼich kuxh pal paʼl Paʼp tu tenam Eefeso tuulbʼal Aasia. Echetz yeʼl Paʼp ibʼal tibʼ tuulbʼal Aasia, tan aʼ nikich tojqeʼla Paʼp uvaʼ tuul laʼich bʼen tilt Paʼp u nimla qʼij Pentekostees tu tenam Jerusaleen oq quBʼaal Tiuxh laʼich saʼon.{*}#20.16 Aʼ nikich inimal u qʼij Pentekostees tu ichʼ juunio, atzoq tu ichʼ juulio.
Uvaʼs ibʼekʼt Paʼp tul inqʼa iqʼon iviʼ xoʼl inqʼa niman tetz Jesuus tu tenam Mileeto, tul motx itzaqʼta vet tibʼ Paʼp s-tuchʼ, tul motx ijatxaq vet tibʼ
17Atichetz oʼ tu tenam Mileeto, tul aʼl ibʼekʼ vet Paʼp tul inqʼa iqʼon iviʼ t-Mileeto, inqʼa nikich iqʼonaq iviʼ xoʼl inqʼa niman tetz Jesuus tu tenam Eefeso. 18Uletz vet inqʼa iqʼon iviʼ tu tenam Mileeto, tul ech tal Paʼp s-xoʼl s-eche: —Etootzaqle kam bʼaʼnil nikich inbʼan tiʼ vatin sexoʼl uvaʼs vul s-bʼaxa tzitza tuulbʼal Aasia tetxhal qul tzitza. 19Tan tira nikich viqʼo kuʼl vibʼ sevatz tuulbʼal uvaʼ nik inbʼan kam uvaʼ nik isaʼ quBʼaal Jesuus s-ve tiʼ talax viyolbʼal. Tul mam kuxh itzaʼlal motx palk in taʼn inqʼa yol uvaʼ nikich itxhok inqʼa inmol s-viʼ, inqʼa tij imam Israeel. Tul mam txumlebʼal, atz mam oqʼel motx palk in taʼn. 20Tul yeʼl in inmaq vibʼ tiʼ ipaxsal viyolbʼal quBʼaal Tiuxh sexoʼl tiʼ Jesuus. Tan nimal kuxh ibʼanax qat inbʼan tiʼ talax viyolbʼal quBʼaal Tiuxh sexoʼl. Atz nimal kuxh ibʼanax qat inbʼan tiʼ intxhust ex tiʼ viyolbʼal quBʼaal Tiuxh. Qat intxhus ex kʼuxh vatz tenam, atz qat intxhus ex kʼuxh tuulaq otzotz, atz qat intxhus ex kʼuxh tal kuxhtuʼ. 21Tul qat motx vaqʼl ootzaqiloq viyolbʼal quBʼaal Tiuxh tiʼ Jesuus xoʼl jankʼal inqʼa tenam, kʼuxh tijaq imam Israeel, atz kʼuxh jit tijaq imam Israeel. Qat vaqʼ ootzaqiloq, tiʼ uvaʼ laʼ motx titzʼa tibʼ inqʼa xaol tiʼ ijaqt ikuya vatz quBʼaal Tiuxh. Atz qat vaqʼ ootzaqiloq uvaʼ tetxhal laʼ motx ikʼuqbʼa inqʼa xaol ikʼuul tiʼ quBʼaal JesuKriisto.
22Pet nik val sete s-txheel uvaʼ yekl vet in tu tenam Jerusaleen. Aloq ile nik inatxhp te u vaanxelal uvaʼ at vaʼl toq palk in, kʼuxh tira yeʼ vootzaqle kame uvaʼ toq palk in tzitzi. 23Tan txhaqpaq inpal t-junun tenam, tul nik taqʼ viTiuxhil Tiuxh vootzaqi uvaʼ toq jaʼoq in t-tzeʼ, atz toq paloq in titzaʼlal. Tan aʼ uvaʼe, nik itxʼebʼon s-viʼ tu tenam Jerusaleen.
24Poro yeʼxhkam nik voksa s-tuul kʼuxh eche. Atz yeʼxhkam nik vitzʼa inkolt vibʼ vatz u kamchil. Pet taʼn kuxh nik vitzʼa uvaʼ tetxhal toq oleʼvoq in tiʼ kam uvaʼ nik isaʼ quBʼaal Jesuus s-ve. Tul toq inbʼan tuchʼ chiibʼichil. Tul tetxhal toq intzoqpisa u aqʼon uvaʼ inkʼul tiqʼabʼ u quBʼaal Jesuus uvaʼ laʼ inbʼana. Aʼetz u vaqʼone uvaʼ laʼ vaqʼ ootzaqiloq inqʼa bʼaʼnla txhaq yol tiʼ teesat el tibʼ inqʼa xaol t-vipaʼv taʼn vibʼaʼnil u quBʼaal Tiuxh.#2 Timoteeo 4.7
25Pet toq val sete s-txheel uvaʼ: Yeʼl paqt laʼ til tibʼ quvatz setuchʼ, ex, uvaʼ qat inpaxsal sexoʼl vibʼant quBʼaal Tiuxh iqʼesalil tetaanima. 26Echetz nik valte sete uvaʼ yeʼl vet inpaʼv setiʼ, jabʼiste ex yeʼ nik niman inqʼa bʼaʼnla txhaq yol, inqʼa qat motx vall sete, tan qat motx inyolbʼel ex s-tiʼ. 27Tan nimal kuxh ibʼanax qat inbʼan tiʼ talax kam uvaʼ nik isaʼ quBʼaal Tiuxh setiʼ. 28Pet xeevaqxh etibʼ, ex inqʼa iqʼon iviʼ. Tul laʼat exee inqʼa niman tetz Jesuus, eche ixeel inqʼa karneʼl taʼn u xeen tetz. Tan aʼ viTiuxhil Tiuxh qat oksan ex s-iqʼon iviʼ tiʼ ichʼijsal inqʼa niman tetz u quBʼaal Jesuus, eche taqʼt u xeen karneʼl ikʼoatxh inqʼa ikarneʼl. Tan sibʼ tiqleʼm inqʼa niman tetz Jesuus vatz u quBʼaal Tiuxh. Tan txhoel vet vipaʼv inqʼa xaol taʼn Jesuus uvaʼs tel vikaqal. 29Pet xeevaq etibʼ, tan vootzaqle uvaʼ laʼ txhej jolol yaabʼla txhaq xaol sexoʼl uvaʼs yeʼl vet in. Tan taʼn kuxh titzʼabʼal uvaʼ, aʼ laʼ txʼakonk viʼ inqʼa niman tetz Jesuus, eche xoʼ uvaʼ laʼ koq ixoʼva ibʼanax te u karneʼl, pet bʼeeno toq ivitutaʼ tiʼ itxhiʼixeʼ. 30Jitetz kuxh taʼne, pet antxh laʼ txhejk jolol inqʼa xaol sexoʼl, inqʼa laʼ txhusun txhusbʼal uvaʼ jitxh aʼ vinuqul laʼ tala. Tul laʼ oleʼv tiʼ ibʼokʼtziil inqʼa niman tetz Jesuus tiʼ iqejt inqʼa txhusbʼal uvaʼ jitxh inuqul. 31Pet xeevaq etibʼ vatz inqʼa tzʼeqolaq tzij. Tul atoq sekʼuul uvaʼ tuchʼ oqʼel qat intxhusvat jununil ex, tiʼ uvaʼ yeʼ laʼ enima invaʼtoʼq uqʼeʼybʼal, atz qat innatxhonsa sete s-qʼiil s-aqʼbʼal tuulbʼal oxvaʼl yaʼbʼ.
32Pet vitzʼin vatzik, nik voksa vet ka ex s-txheel tiqʼabʼ quBʼaal Tiuxh. Tul yeʼ laʼ etanbʼa inimal viyolbʼal quBʼaal Tiuxh tiʼ Jesuus, uvaʼ at bʼaʼnil s-kʼatza. Tan oq yeʼ laʼ etanbʼa inimaleʼ, tul laʼetz chʼij etatin tuulbʼal viyolbʼal quBʼaal Tiuxh. Tan tiʼ eqejt viyolbʼal quBʼaal Tiuxh, tul laʼ etetza inqʼa bʼaʼnil uvaʼ laʼ taqʼ quBʼaal Tiuxh te jankʼal inqʼa niman tetz. Tul emol vet etibʼ tuchʼ jankʼal inqʼa txael vet taʼn laʼ ibʼana. 33Tul etootzaqle uvaʼ yeʼxhabʼil kam tetz qat vatxhva. Tan yeʼl puaq uvaʼ plaataxhtuʼ qat vatxhva. Atz yeʼl ooro qat vatxhva. Atz jitoq toksaʼm invaʼq xaol qat vatxhva. 34Pet in qat aqʼonv in tuchʼ inqʼabʼ tiʼ iloqʼox kam uvaʼ qat saʼon s-ve tuchʼ inqʼa inmol uvaʼs atich oʼ sexoʼl. 35Tul qat intxhusl ex, tiʼ uvaʼ laʼ aqʼonv ex, eche uvaʼ nik vaqʼonveʼ. Echetz laʼ tutxh elotxhte inqʼa xaol oq kam vaʼq nik isaʼon s-te. Tul ulsavaq inqʼa iyol quBʼaal Jesuus sekʼuul, uvaʼ ech tal s-eche: «Aʼl sibʼ bʼaʼnil laʼ taqʼ quBʼaal Tiuxh te u xaol uvaʼ laʼ lotxhon vimol, viʼ uvaʼ aʼl laʼ ikʼult lotxhbʼal,» xeʼt Jesuus, —xeʼt Paʼp te inqʼa iqʼon iviʼ, inqʼa tzajnaʼqlich tu tenam Eefeso.
36Taletz kuxh vet Paʼp inqʼa yol inqʼae, tul qajeʼv vet Paʼp tuchʼ inqʼa iqʼonaq iviʼ. Tul motx inatxh vet Tiuxh. 37Tul mam oqʼel nikich ibʼan vet inqʼa iqʼon iviʼ. Tul motx jelel vet Paʼp taʼn, atz motx tzʼubʼux vet itziʼ Paʼp tiʼ ijatxt vet tibʼ Paʼp s-tuchʼ. 38Tul mam txumuʼm nikich ibʼan vet inqʼa iqʼonaq iviʼ, tiʼ u yol uvaʼ tal Paʼp uvaʼ yeʼ vet inpaqt laʼich til tibʼ ivatz Paʼp s-tuchʼ. Tul ex qʼexsaloq vet ka Paʼp tuul vaarko taʼn inqʼa iqʼon iviʼ.
ទើបបានជ្រើសរើសហើយ៖
Vibʼanoʼm inqʼa Apoostol 20: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
