Vibʼanoʼm inqʼa Apoostol 14
14
Uvaʼs pal ipaxsat Paʼp tuchʼ Vernavee viyolbʼal quBʼaal Tiuxh tu tenam Ikoonio
1Echetz ibʼane tuulbʼal uvaʼs eenich vet Paʼp tuchʼ Vernavee tu tenam Ikoonio, tul tzum ipal vet ok Paʼp tuchʼ Vernavee tu kʼulbʼal tibʼ inqʼa tij imam Israeel. Tul motx tal vet viyolbʼal quBʼaal Tiuxh tiʼ Jesuus. Echetz mamala vet tijaq imam Israeel motx toksaaq vet tibʼ s-niman tetz Jesuus, atz mamalaat vet inqʼa jit tij imam Israeel motx toksa tibʼ paqte. 2Pet atichetz jolt tijaq imam Israeel yeʼ motx niman Jesuus. Aʼetz inqʼae, aʼl motx itxhaqtziit jolt inqʼa xaol tiʼ uvaʼ jitichxh inuqul inqʼa yol uvaʼ nikich tal Paʼp nikich motx taleʼ. Atz aʼl motx iyansat ikʼuul inqʼa xaol, inqʼa jitich tij imam Israeel, tiʼ itxhiʼkʼuulal inqʼa niman tetz Jesuus.
3Poro nima teletz qʼij atin Paʼp tuchʼ Vernavee tu tenam Ikoonio. Tul atichaqxh itial tiʼ talax viyolbʼal quBʼaal Tiuxh tiʼ Jesuus xoʼl u tenam. Tul tira nikich motx ikʼuqbʼa ikʼuul tiʼ quBʼaal Tiuxh. Antetzxh quBʼaal Jesuus nikich yakʼinsan viyolbʼal quBʼaal Tiuxh tiʼ ikuyp vipaʼv inqʼa xaol uvaʼ nikich niman quBʼaal Jesuus. Atz antxh quBʼaal Tiuxh nikich kuyun ibʼant Paʼp tuchʼ Vernavee inqʼa etxhlal tuchʼ uvaʼ mam yol tilixeʼ, kʼutxhbʼal tetz uvaʼ, aʼ vinuqul nikich tal Paʼp. 4Poro kaʼvaʼlenich vet elnaʼq inqʼa xaol, inqʼa tu tenam Ikoonio. Tan jolol u xaol uvaʼ eenichaq tiʼ inqʼa tij imam Israeel, inqʼa yeʼ nikich qeon Jesuus. Atz jolt inqʼa eenichaq tiʼ Paʼp tuchʼ Vernavee, inqʼa iapoostol quBʼaal Jesuus.
5Yaʼne xeʼt vet inqʼa tij imam Israeel, inqʼa yeʼ nikich qeon Jesuus, tiʼ ibʼant eela iyol tuchʼ jolt inqʼa jit tij imam Israeel, atz tuchʼ inqʼa iqʼesal. Ayaʼletz inqʼae motx ok tiʼ ikʼaxbʼisal inqʼa niman tetz Jesuus. Tul motx xeʼtaq tiʼ ikʼoʼpileʼ, tetxhal motx ikʼonit s-sivan. 6Tabʼietz vet Paʼp u yol tuchʼ Vernavee, tul itzʼeqaq vet tibʼ. Tul yekichaq vet tu tenam Liistra, atz tu tenam Deerve tuulbʼal Likaoonia. Tul bʼenaq vet tinjolt tenam sinaaqaʼ. 7Tul tzitzi ipaxsavat Paʼp tuchʼ Vernavee inqʼa bʼaʼnla txhaq yol tiʼ Jesuus.
Uvaʼs ipaxsat Paʼp viyolbʼal quBʼaal Tiuxh tu tenam Liistra, tul aqʼax vet bʼen Paʼp s-tiuxh taʼn inqʼa xaol, tul kʼonil Paʼp paqte s-sivan
8Atichetz val u vinaq tu tenam Liistra uvaʼ yeʼ nikich ixaoneʼ, tan aʼichxh ala s-talaleʼ. Kʼuqlichetz kuxhtuʼ, tan yeʼ nikich itiʼn inqʼa toq. 9Tabʼietz u vinaq inqʼa yol uvaʼ tal Paʼp tiʼ Jesuus, tul isaqi Paʼp u vinaq s-bʼaʼn. Tul til Paʼp uvaʼ kʼuqlichxh ikʼuul u vinaq tiʼ quBʼaal Jesuus tiʼ ibʼant bʼaʼn.
10Yaʼne taqʼ jaʼ Paʼp tiʼ iqul. Tul ech tal Paʼp te u vinaq s-eche: —¡Txakpen! Tul ¡jikxh atxakeʼv tuchʼ inqʼa avoq! —xeʼt Paʼp. Tul yuqel ijaʼ u vinaq. Tul xaon veteʼ.
11Taʼnetzxh til inqʼa xaol kam uvaʼ ibʼan Paʼp tiʼ vibʼant u vinaq bʼaʼn, tul xeʼt vet inqʼa xaol sichʼin tiyolbʼal inqʼa aj tenam Likaoonia. Tul ech motx tal vet s-eche: —¡Iletz vet inqʼa qutiuxh kuʼy vet ul s-quxoʼl! Tul ¡qat taqʼl vet bʼen tibʼ s-vaʼl aanima! —xeʼtaq veteʼ.
12Aʼetz Vernavee tal inqʼa xaol s-Seeus, viqʼesal inqʼa bʼitichla tiuxh. Pet aʼetz Paʼp tal inqʼa xaol s-Eermes, tan aʼ Paʼp nikich iyoloneʼ.{*}#14.12 Eche vibʼij inqʼa bʼitichla tiuxh uvaʼ nik tal t-inqʼa versiikulo inqʼaa, tan aʼ vibʼij vibʼitichla tiuxh inqʼa aj Greesiae uvaʼ paxnaʼq el tuulbʼal jankʼal vitxʼavaʼ u tenam uvaʼe. Tan aʼich u uqʼeʼybʼale uvaʼ ipaxsa Alejaandro Maagno xoʼl inqʼa tenam, inqʼa okoʼk jaqʼ ibʼekʼbʼal Alejaandro Maagno uvaʼs ibʼant tu yaʼbʼ 330 y.u.J. Xaʼtetze aʼ vet uvaʼe nikich inatxhkʼuula inqʼa xaol, inqʼa aj Ikoonio uvaʼs ibʼant tu yaʼbʼ 62 m.t.J. Pet tuulbʼal uvaʼs nikich ipaxsat vet Paʼp inqʼa bʼaʼnla txhaq yol s-xoʼl, tan aʼ atich vet ok u tenam Ikoonio jaqʼ ibʼekʼbʼal u tenam Rooma. Tul ijalpuletz vet inqʼa aj Rooma ibʼij inqʼa ibʼitichla tiuxh, inqʼa aj Ikoonio. U bʼitichla tiuxh Juupiter, tan Seeus vet ibʼija. Pet u bʼitichla tiuxh u Merkuurio, tan Eermes vet ibʼija. 13Atichetz vaʼl tatibʼal Juupiter tal uvaʼ nikich natxhkʼuulalika. Aʼ atilich vatz u palebʼal ok tu tenam. Tul atich iqʼesal u uqʼeʼybʼal tetz Juupiter. Aʼetz vet viqʼesal uqʼeʼybʼal bʼekʼon tiqʼol tzaan viqbʼal, tul taqʼ vet kuʼ tiqul Paʼp tuchʼ Vernavee vatz vijubʼalil u atibʼal. Atz ibʼekʼ u qʼesal tenam tuchʼ inqʼa mam tenam tiqʼol vaʼt yakʼa vaʼk. Tul laʼich yatzʼax tiʼ toksal iqʼij Paʼp tuchʼ Vernavee uvaʼ tala.
14Ajtetz tabʼi vet inqʼa apoostol, aʼe Vernavee tuchʼ Paʼp, kam uvaʼ saʼich ibʼan inqʼa xaol, tul ilitxʼaq vet el inqʼa toksaʼm s-tiʼ, tetxhlal vitxumun te vitxumbʼal inqʼa xaol. Atz palaq vet ok xoʼl inqʼa xaol. Tul taqʼaq vet jaʼ tiʼ iqul tiʼ iyoloneʼ. 15Tul ech motx tal s-eche: —¡Ex tenam sekaqaayil! Yeʼ laʼ utxh enatxhkʼuulat oʼ. Tan oʼat kuxh invaʼl aanima, eche ex. Tul aʼ kuxh vinuqul nik qal sete, tiʼ uvaʼ yeʼ laʼ enima vet kam uvaʼ nik enima uvaʼ yeʼxhkam vaʼq nik taqʼeʼ. Pet aʼ ebʼana uvaʼ laʼ ejalpu vetxumbʼal, tul aʼ vet quBʼaal Tiuxh laʼ enima uvaʼ itzʼlele. Aʼe u quBʼaal Tiuxh u viinqixsan tetz u txʼavaʼ tuchʼ jankʼal inqʼa at s-vatz, atz tuchʼ u amlikaʼ tuchʼ jankʼal inqʼa at s-vatz, atz tuchʼ u maar tuchʼ jankʼal inqʼa at s-tuul. 16Poro eche inqʼa s-naʼya, tan nikich kuxh ikuy vet quBʼaal Tiuxh ipaʼv inqʼa xaol tiʼ kamaq kuxh inqʼa nikich motx ibʼaneʼ, jankʼale vitzʼeʼsal ok oya vatz kam kuxh tiuxhil. 17Kʼuxhetz eche, poro aʼ ikʼutxh quBʼaal Tiuxh vatz inqʼa xaol uvaʼ yeʼl vibʼaʼnil imaq taqʼax tiibʼa inqʼa xaol. Tul il vibʼaʼnil quBʼaal Tiuxh nik qil setuchʼ s-txheel. Tan aʼ nik aqʼon kuʼl u jabʼal s-qiibʼa. Tul at qetxhbʼubʼal taʼn quBʼaal Tiuxh. Tan aʼ quBʼaal Tiuxh nik aqʼon ivatz kam inqʼa nik motx qava. Echetz nik ichiibʼe u qaanima s-qukaqaayil, —xeʼt Paʼp.
18Kuxhetz itxhok Paʼp iyaʼsal vatz inqʼa xaol tiʼ yeʼ itzʼeʼsal ok inqʼa oya s-vatz, poro kaaroxh yaʼ vet vatz inqʼa xaol tiʼ vitzʼeʼsal ok inqʼa yakʼa vaʼk vatz Paʼp.
19Yaʼne aqʼbʼ vet jolol inqʼa tij imam Israeel, inqʼa yeʼ nikich qeon Jesuus, inqʼa tzajnaʼqich tu tenam Antiokiia, atz inqʼa tzajnaʼqich tu tenam Ikoonio. Tul xeʼtaq vet tiʼ itxhaqtziil jankʼal inqʼa xaol uvaʼ tu tenam Liistra tiʼ Paʼp, tiʼ uvaʼ yeʼich laʼ iqej inqʼa xaol inqʼa yol uvaʼ nikich tal Paʼp tiʼ Jesuus. Yaʼne motx kʼonil vet Paʼp s-sivan taʼn inqʼa xaol. Tul aʼ titzʼa vet inqʼa xaol uvaʼ kamnaʼqich vet Paʼp. Tul juxumich tel vet Paʼp tiʼeʼl u tenam ibʼan inqʼa xaol. 20Pet koq inqʼa niman tetz Jesuus, tan molelichaq vet ok tibʼ tiʼ Paʼp. Tul ajtxh motx til ilakp Paʼp. Tul antxh qʼaʼvik vet ok Paʼp tu tenam inpaqte.
Echetz vet eqal, tul bʼen vet Paʼp tuchʼ Vernavee tu tenam Deerve. 21Tul ex tal vet Paʼp inqʼa bʼaʼnla txhaq yol tiʼ quBʼaal Jesuus tu tenam Deerve. Tul mamala vet xaol motx ok s-niman tetz Jesuus. Yaʼne qʼaʼv vet Paʼp inpaqte tu tenam Liistra, atz tu tenam Ikoonio, atz tu tenam Antiokiia. 22Qʼaʼvetz vet Paʼp t-inqʼa tenam inqʼae, tan aʼ nikich isaʼ Paʼp pal taqʼt itial inqʼa niman tetz Jesuus, atz tiʼ ikʼuqbʼat tel ikʼuul tiʼ Jesuus. Atz laʼich motx taqʼ yaʼl, inqʼa yaʼnaq kuxh tok tiʼ inimal Jesuus, tul yeʼich laʼ motx el ka tiʼ inimaleʼ. Tul ech nikich tal Paʼp s-eche: —Tetxhalxh laʼ nal pal oʼ tu mamala itzaʼlal tiʼ iqeex Jesuus, yaʼne laʼ opoon oʼ tal uvaʼ nik ibʼanvat quBʼaal Tiuxh iqʼesalil tu amlikaʼ, —chichich Paʼp xoʼl inqʼa niman tetz Jesuus.
23Tul nikich pal toksa ka Paʼp iqʼonaq iviʼ xoʼl inqʼa niman tetz Jesuus t-junun inqʼa tenam. Tul nikich imaq Paʼp itxʼaʼon tuchʼ Vernavee tiʼ inatxhax Tiuxh. Tul nikich toksa ka inqʼa iqʼonaq iviʼ tiqʼabʼ quBʼaal Jesuus, inqʼa yaʼnaqich kuxh tok siqʼonaq iviʼ.
Uvaʼs iqʼaʼv vet Paʼp inpaqte tuchʼ Vernavee tu tenam Antiokiia uvaʼ tuulbʼal Siiria
24Yaʼne pal vet paʼl Paʼp tuchʼ Vernavee tuulbʼal Pisiidia, atz tuulbʼal Panfiilia. 25Aqʼbʼetz vet Paʼp tu tenam Peerje uvaʼ tuulbʼal Panfiilia, tul ipaxsa vet Paʼp viyolbʼal quBʼaal Tiuxh tiʼ Jesuus. Yaʼne aʼl ikuʼ vet Paʼp tu tenam Ataalia.
26Yaʼne ok vet bʼen Paʼp tuchʼ Vernavee tuul u vaarko viʼ maar. Tul ulaq vet inpaqte tu tenam Antiokiia tuulbʼal Siiria. Tan tzitzi natxhaxik bʼen quBʼaal Tiuxh s-tiʼ s-kaʼbʼil tiʼ toksal tiqʼabʼ quBʼaal Tiuxh tiʼ inqʼa aqʼon uvaʼ exaq ibʼaneʼ. 27Atichetz vet Paʼp tuchʼ Vernavee tu tenam Antiokiia, tul motx imol vet inqʼa imol s-niman tetz Jesuus. Tul motxaq tal vet inqʼa nimla txhaq bʼaʼnil uvaʼ motx ibʼan quBʼaal Tiuxh xoʼl inqʼa xaol. Atz motxaq tal vet inuqul uvaʼ quBʼaal Tiuxh kuyun tok vet inqʼa xaol s-niman tetz Jesuus, inqʼa jitich tijaq imam Israeel, eche ijaqp invaʼq jubʼal tiʼ tootzaqit inqʼa xaol quBʼaal Tiuxh. 28Tul nimal qʼij ibʼan vet Paʼp tuchʼ Vernavee xoʼl inqʼa niman tetz Jesuus tu tenam Antiokiia.
ទើបបានជ្រើសរើសហើយ៖
Vibʼanoʼm inqʼa Apoostol 14: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
