Vibʼanoʼm inqʼa Apoostol 1
1
VIBʼANOʼM INQʼA APOOSTOL
Uvaʼs talt bʼen Luk kaʼt u yol te Teoofilo
1Axh nimla vatz vinaq Teoofilo, tzʼibʼamal vet opoon see vaʼn tu bʼaxa uʼ tiʼ inqʼa mamala kam ibʼan Jesuus, atz inqʼa motx itxhus ka, 2tetxhal topoon viqʼiil tiqʼol jaʼ Jesuus tu amlikaʼ taʼn quBʼaal Tiuxh. Pet yeʼxnaqichetz bʼenoq jaʼ Jesuus tu amlikaʼ, tul ibʼekʼ ka Jesuus yol te inqʼa iapoostol taʼn viTiuxhil Tiuxh tiʼ kam laʼ motx ibʼana. Aʼ inqʼa iapoostol inqʼa chʼexich taʼn.
Uvaʼs ixeʼt Luk tiʼ talax kam ibʼan inqʼa apoostol
3Maʼtichetz ipal vet Jesuus t-kʼaxkʼo tiʼ ikameʼl, tul itzʼeʼv Jesuus inpaqte. Tul itzʼlich veteʼ sikʼutxht tibʼ vatz inqʼa iapoostol. Tuulbʼaletz kaʼviinqil qʼij, tul jatpaqtel kuxh ikʼutxh tibʼ Jesuus, tiʼ uvaʼ yeʼxhabʼil laʼich ibʼan kaʼl ikʼuul, tiʼ uvaʼ itzʼlich vet Jesuus. Tul motx tal tel Jesuus yol tiʼ vibʼant quBʼaal Tiuxh iqʼesalil t-taanima inqʼa xaol.#1 Koriintios 15.3-8 4Tuulbʼaletz invaʼl inqʼa qʼij inqʼae, tul kʼulich tibʼ Jesuus tuchʼ inqʼa iapoostol, tul ech ibʼekʼ ka Jesuus s-te s-eche: —Yeʼl ex laʼ motx eleʼl ex tu tenam Jerusaleen. Pet laʼ nal etxʼebʼ tul viTiuxhil Tiuxh uvaʼ alel ka taʼn quBʼaal Tiuxh. Tan alel vet sete vaʼn tiʼ u tulebʼal. 5Tan xeʼ kuxh aʼ taqʼvat kuʼ Xhun inqʼa xaol. Pet echetz koq vet uvaʼe toq ibʼane, tan aʼ vet viTiuxhil Tiuxh toq okoq tetaanima tuulbʼal yeʼxh jatvaʼt qʼij s-txheel, —xeʼt ka Jesuus te inqʼa iapoostol.#Luk 24.49; Vibʼanoʼm inqʼa Apoostol 11.16; Joeel 2.28; Esekieel 36.27
Uvaʼs nik talt inqʼa yol tiʼ vibʼen vet quBʼaal Jesuus t-amlikaʼ
6Tuulbʼaletz uvaʼ kʼulich tibʼ inqʼa apoostol kʼatz Jesuus, tul ech motx tabʼi te Jesuus s-eche: —QuBʼaal, ¿toqetz kol abʼaneʼ uvaʼ toq alak u qutenam Israeel inpaqte t-inqʼa qʼij inqʼa s-txheel tiʼ ibʼant iqʼesalil? —xeʼtaq te Jesuus.
7Yaʼne ech tal Jesuus s-eche: —Yeʼl etokebʼal tiʼ tootzaqileʼ kam s-tuul laʼ ibʼan quBʼaal Tiuxh iqʼesalil, atz kam tutxh ibʼanleʼ laʼ ibʼan quBʼaal Tiuxh. Tan taʼn kuxh atil tiqʼabʼ vinBʼaal. 8Pet yaʼn laʼ etootzaqitaʼ uvaʼs laʼ ekʼult eyakʼil, atz etial uvaʼs laʼ toksat quBʼaal Tiuxh viTiuxhil tetaanxelal. Aʼetz vet ex, laʼ aqʼon ootzaqiloq kam uvaʼ qat etila, atz kam uvaʼ qat etabʼi. Tul aʼ laʼ etalvat tu tenam Jerusaleen, atz tuulbʼal jankʼal Judeea, atz tuulbʼal Samaaria, tetxhal topoon tuulbʼal jankʼal u vatz txʼavaʼ s-kaqaayil, —xeʼt ka Jesuus te inqʼa iapoostol.
9Yaʼetz kuxh vet Jesuus tiʼ talax inqʼa yol inqʼae, tul iqʼol vet jaʼ Jesuus t-amlikaʼ ech ivatz inqʼa apoostol. Tul sotz kuxh vet Jesuus tuul val u suʼtzʼ. 10Sebʼtelichetz isaqin jaʼ inqʼa apoostol tiʼ vibʼen jaʼ Jesuus t-amlikaʼ, tul yeʼ kuxh taqla txaklich vet kaʼvaʼl inqʼa aanxel kʼatz inqʼa apoostol. Tul echich bʼanel taʼn inqʼa aanxel, eche kaʼvoʼq vinaq. Tul oqxhich isaqal toksaʼm inqʼa aanxel.
11Tul ech tal inqʼa aanxel s-eche: —Yeʼ kuxh saqin vet jaʼ ex t-amlikaʼ, ex inqʼa een tzajnaʼq ex tuulbʼal Galileea. Tan echatxh laʼ iqʼaʼv Jesuus inpaqte xoʼl suʼtzʼ, eche uvaʼ qat etilt tiqʼol jaʼ Jesuus tu amlikaʼ xoʼl suʼtzʼ, —xeʼt inqʼa aanxel te inqʼa iapoostol Jesuus.
12Tzaetz vet inqʼa iapoostol Jesuus tu vitz Inqʼa Oliivo, tul yekichaq qʼaʼv vet paqte tu tenam Jerusaleen. Tan naqlich kuxh ixoʼl kamal taʼn kuxh ixoʼl jankʼal uvaʼ nikich ikuyux ixajt vaʼq xaol tuulbʼal u xeem qʼij saavado.{*}#1.12 ¿Kam s-tiʼil yeʼxh jankʼal nikich tutxh ixajt inqʼa xaol tuulbʼal u xeem qʼij? Tan aʼ inqʼa iqʼon iviʼ motx jeqbʼan vet jolt yol, atz motx itzʼibʼa tuul mamala uʼ uvaʼ kam laʼ motx bʼanax tiʼ inimal inqʼa bʼekʼbʼal uvaʼ itzʼibʼa ka Moisees. Aʼetz motx ijeqbʼa ka inqʼa iqʼon iviʼ uvaʼ ox kʼalal (60) kuxh kʼaʼa laʼ utxh ixaax tuulbʼal xeem qʼij. Tul motx itzʼibʼa ka. Tul bʼen vet s-bʼekʼbʼal taʼn inqʼa iqʼon iviʼ. Jaʼletz uvaʼ yeʼich laʼ niman vet u bʼekʼbʼal uvaʼe, tul laʼich kʼaxbʼisali.
13Aqʼbʼetz vet inqʼa apoostol tu tenam Jerusaleen, tul yekichaq vet jaʼ t-vikaʼviq u otzotz tal uvaʼ nikich motx vatka. Aʼetze Luʼ, Jakoovo, Xhun, Lixh, Piʼl, Maxh, Tuʼl, Tio, tuchʼ Jakoovo, vikʼaol qʼes Alfeeo, atz tuchʼ Simoon uvaʼ atich ok xoʼl inqʼa Seloote, tuchʼ Juudas, u titzʼin Jakoovo. 14Jankʼaletzxh inqʼa apoostol, tan vaʼlaqichxh iyol tiʼ tabʼil invaʼq kam te quBʼaal Tiuxh. Tul bʼenamen nikich motx inatxht quBʼaal Tiuxh. Antichetz Mal, vitxutx Jesuus, atz tuchʼ inqʼa titzʼin Jesuus, atz tuchʼ jolt inqʼa ixoq ataqich ok s-xoʼl tiʼ inatxhax Tiuxh.
Uvaʼs itxhokt inqʼa apoostol ivatzil Juudas tiʼ itzʼeqaq tatin s-kabʼlaval
15-16Ibʼanetz paqul tuulbʼal inqʼa qʼij inqʼae, molelich tibʼ inqʼa apoostol tuchʼ jolt niman tetz Jesuus. Tul kamal vaʼqich vet sieen tuchʼ viinqil (120) s-kaqaayil. Tul txakeʼv Luʼ s-xoʼl. Tul ech tal Luʼ s-eche: —Jankʼal ex, qumol s-niman tetz Jesuus, at inqʼa yol uvaʼ tzʼibʼamal ka taʼn Daviid s-naʼya uvaʼ tetxhalxh qat elaʼpun. Tan tootzaqich viTiuxhil Tiuxh uvaʼ, aʼ Juudas laʼich iqʼon ibʼey inqʼa motx txeyon Jesuus. Aʼetz talaxe uvaʼ, aʼ viTiuxhil Tiuxh nikich alon te Daviid kam uvaʼ laʼ itzʼibʼa ka Daviid.
17Tan atich ok Juudas s-quxoʼl. Tul nikich ilotxh oʼ Juudas tiʼ qaqʼonv tiʼ viyolbʼal quBʼaal Tiuxh.
18Pet aʼetze tan, ibʼan vet Juudas val u yeʼbʼaʼn. Tan ikʼul Juudas puaq tiʼ toksal Jesuus tiqʼabʼ inqʼa iqʼesal u qutenam. Aʼetz itxakunsavat Juudas u puaq tiʼ iloqʼox val u txʼavaʼ. Yaʼne ex iyatzʼ vet el tibʼ Juudas s-tuul. Tul tʼebʼel ikuʼl Juudas t-txʼavaʼ. Tul aʼ iviʼ Juudas ul taqʼ kuʼ t-txʼavaʼ. Tul yekich rinp Juudas tinikʼa. Atz tira motx eluʼl taqʼ itxaʼ Juudas.
19Paxetz vet itziulal inqʼa yol inqʼae xoʼl inqʼa aj tenam Jerusaleen. Echetz s-tiʼile yekich oksal vet ibʼij u txʼavaʼ s-Aseeldama taʼn inqʼa xaol. Aʼetz nik elkaʼp u bʼij Aseeldama s-eche. ‹Txʼavaʼ tetz kaq,› chich t-viyolbʼal inqʼa tij imam Israeel, tan tzitzi elk ikaqal vaʼl xaol.
20Tan ech val u yol tzʼibʼamal ka t-inqʼa Saalmo s-eche:
«Tzʼinkabʼ kuxh vet
u tatibʼal laʼ ibʼana.
Tul yeʼxhabʼil invaʼq
laʼ atin s-tuul,»
chich u yol.
Atz echat nik tal vaʼt u yol s-eche:
«Tikʼen laʼ ok
invaʼt u iqʼon iviʼ
tiʼ ibʼanax u taqʼon,»
chich u yol.#Saalmo 69.25; 109.8
21Echetz s-tiʼile tetxhal toq quchʼex vaʼl qumol s-quxoʼl uvaʼ antxh niman tetz Jesuus tiʼ tok sivatzil Juudas, poro aʼ vaʼq uvaʼ ilonaʼq tetz jankʼal uvaʼ ibʼan Jesuus. Aʼetz laʼ quchʼex uvaʼ atichxh s-quxoʼl tuulbʼal jankʼal uvaʼ atin Jesuus s-quxoʼl, atz tuulbʼal uvaʼ nikich teleʼl quBʼaal Jesuus s-quxoʼl paqte. 22Atz aʼ vaʼq uvaʼ ilon ikuʼ Jesuus xeʼ aʼ taʼn Xhun, tetxhal tilt titzʼeʼv Jesuus inpaqte, atz u topoon viqʼiil tiqʼol jaʼ Jesuus t-amlikaʼ, —xeʼt Luʼ xoʼl inqʼa niman tetz Jesuus.
23Yaʼne ichʼex vet inqʼa niman tetz Jesuus kaʼvaʼl inqʼa imol s-xoʼl. Vaʼl uvaʼ, Xhuʼlich ibʼij. Tul antxh varSavaasich ibʼij. Tul Juusto chichich eʼl tu yolbʼal latiin. Tul vaʼt uvaʼ, Tiaxhich ibʼij.
24Yaʼne inatxh vet inqʼa niman tetz Jesuus quBʼaal Tiuxh. Tul ech motx tal s-eche: —QuBʼaal Tiuxh, ootzaql u qaanima s-qukaqaayil. Tul kʼutxh s-qe jabʼiste vaʼl u niman eetz s-te qat achʼex te kaʼvaʼl inqʼa at s-quxoʼl. 25Tul laʼ ok s-apoostolil s-quxoʼl tiʼ qulotxhox tiʼ vavaqʼon uvaʼ taqʼ ka Juudas tiʼ vipaʼvineʼ. Tul yekich vet Juudas tal uvaʼ bʼen kʼaxbʼisalika, —xeʼt inatxht inqʼa niman tetz Jesuus Tiuxh.
26Yaʼne motx ibʼanbʼe vet invaʼl kam tiʼ tilixeʼ jaʼle uvaʼ laʼich oki. Aʼetz ex jaʼkaʼp tiibʼa Tiaxh. Echetz tok vet Tiaxhe xoʼl junlavat inqʼa apoostol, tul ex tzʼeqoq vet tatxhul s-kabʼlaval.
ទើបបានជ្រើសរើសហើយ៖
Vibʼanoʼm inqʼa Apoostol 1: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
