Alawi 20
20
Ntwarusho wo nlhatu no uwonya
1Apwiiya Nlhuku nkayeerelha ashinna Musa wiira, 2“Mwaahimerie attu o Israeli wiira: Ntu riyoothe munlhokoni mwa attu o Israeli ama nlheto nokhalha munlhokoni mwinyu, ankumihaka isadaka mwaamwanawe riyoothe wa nlhuku Moleki yoyo ntu uyo eeviyeke. Attu o nlhoko wawe amwiiveke wo umwaata malhuku. 3Mii kimwanene kinonthunalhelha yoyo ntu uyo ni umwoomolha wa attu awe ukhalhawaya honkumiha mwaamwanawe mmoka isadaka wa nlhuku Moleki, paahi honanariha Vakittu Vatakatifu vaka ni nchina naka nitakatifu. 4Yakhalhaka attu o vavawo vakittu vawo khanontwarusha yoyo ntu uyo wo umwiiva, 5mii kimwanene kinontwarusha yoyo ntu uyo ni manyaalhoko awe. Kinowaahukumulha wiira eeviye, yoyo mwanene uyo vamoka ni attu onkhaye ahiilhe ukikhulhuvelha mii ni unkhulhuvelha nlhuku Moleki.
6“Yakhalhaka ntu riyoothe noorwaa wa attu o umoopa nttiti, wa attu o mashoka ni wa attu o miruchi, ni uhiya ukikhulhuvelha Mii, kinontwarusha yoyo ntu uyo ni unhukumulha wiira eeviye.
7“Paahi etu, mwiikumiheke ukhalha atakatifu, ukhalhawaya mii phi Apwiiya Nlhuku inyu. 8Nvarechesheke malheheriyo aka ni upanga. Mii phi Apwiiya Nlhuku kinoopangani ukhalha atakatifu.
9“Ntu riyoothe naaruwana athumwanawe ama anumwanawe, yoyo noothananiya wiira eeviye. Ukhalhawaya iphome awe inookhalha vachulhu vawe mwanene.
10“Yakhalhaka nlhopwana noolhuva ni mahanu a amwaatamana awe, onkhaye oyeelhi eeviyeke.
11“Nlhopwana arupaka ni mmoka a manyaahanu a athumwanawe, nowoolhihacha muru athumwanawe, onkhaye oyeelhi eeviye. Yoyo nlhopwana uyo ni yoyo nthiyana uyo, iphome chaya chinookhalha vachulhu waya ashinene.
12“Nlhopwana riyoothe arupaka ni mahanu a mwaamwanawe, onkhaye oyeelhi anowiiviya. Ahopanga ulhuva wo uhilhoka chinene, ahorihakacha iphome chaya ashinene.
13“Yakhalhaka nlhopwana riyoothe noorupa ni nlhopwana nkhunanawe thoko wiira nthiyana, paahi onkhaye oyeelhi anowiiviya, ukhalhawaya ahopanga ittu yo urushiha chinene, iphome chaya chinookhalha vachulhu waya ashinene.
14“Yakhalhaka nlhopwana nonthelha nthiyana ni anumwanawe, wowo uwonya, onkhaye oraaru apahiyeke mooro, eeviye, ukhalhawaya ahowonya. Mpangeke chiicho wo nlhatu no uhiiha uwonya munlhokoni mwinyu.
15“Yakhalhaka nlhopwana riyoothe noorupa ni mwannama, yoyo eeviyeke, ni mwannama uyo chiicho eeviyeke.
16“Yakhalhaka nthiyana noomwaatameria mwannama ni unrupana, yoyo nthiyana uyo eeviye ni mwannama uyo chiicho, iphome chaya chiri vachulhu waya ashinene.
17“Yakhalhaka nlhopwana riyoothe nonthelha mwanrokorawe, yariye ni athumwanawe ama anumwanawe, nkanrupana, yeyo ittu yo urushiha. Oomolhiyeke munlhokoni mwa attu aka, ukhalhawaya nlhopwana uyo hopanga ittu yo wuulhihacha muru. Yoyo nlhopwana uyo eeviyeke.
18“Yakhalhaka nlhopwana noorupa ni nthiyana rii ni mahuku awe, onkhaye oyeelhi oomolhiye munlhokoni mwa attu aya, ukhalhawaya ahopaphulha nrapo no iphome no nthiyana uyo. Khanorumelhelhiya wo iphiro cho waalhapelha Apwiiya Nlhuku.
19“Nhirupe ni onnaya anumwaninyu mena ni amaati inyu, ukhalhawaya yayo amuchi inyu. Mwaatti oyeelhi nnootwarushiya.
20“Ntu aarupanaka mahanu a athumwanawe, olhupalhe ama aakani, noowoolhiha muru athumwanawe olhupalhe ama aakaani ayo. Oyeelhi anoohukumulhiya wo uwonya waya, ni onkhaye oyeelhi anookhwa wo uhikhalha ni ashaana.
21“Yakhalhaka nlhopwana nowaathelha mahanu a nhima awe ama a munnawe, wowo unyalha. Khanorumelhelhiya wo iphiro cho waalhapelha Apwiiya Nlhuku. Paahi onkhaye oyeelhi anookhwa wo uhikhalha ni ashaana.
22“Nvarechesheke ni upangacha malheheriyo ni malheheriyo aka onkhaye, yahikhalheke chiicho ilhapo yo Ukanaani inoorweehaakani iyo inouraphiani. 23Nhittwarihe malhemalhelho a attu o ilhapo inoomolhaka uhoolho winyu, ukhalhawaya yahopangacha yayo yonkhaye ayo, ni mii kahaavenganana chinene. 24Nansho kihomalha uhimeriani wiira, nokookhalha yeyo ilhapo iyo. Kinouvahani yeyo ukhalha yawinyu, ilhapo inolhoka ulhima ni uhuwa mihuwo. Mii phi Apwiiya Nlhuku inyu kuumwalhaninheni ni attu o ilhapo chikina.
25“Wo chiichammo etu, mmwalhaaniheke iriyari yo mwannama ama mwaanuni norumelhelhiya wo iphiro cho waalhapelha Apwiiya Nlhuku ni hinorumelhelhiya. Mwannama, mwaanuni ama iriyoothe ineepurulha velhaponi va yeeshilhe aka uchereshere wiira inounanarihani, ukhalhawaya khinorumelhelhiya wo iphiro cho waalhapelha Apwiiya Nlhuku. 26Ukhalhawaya mii Apwiiya Nlhuku ki ntakatifu, ni mii kihoomwalhanihani mwaattiva ni attu o ilhapo chikina wiira nkalhe attu aka, nkhalhe atakatifu.
27“Nlhopwana ama nthiyana riyoothe o mashoka o nanara ama nkhwiri, hothananiya wiira eeviye wo waatiya malhuku. Iphome chaya onkhaye ayo chinookhalha vachulhu waya ashinene.”
ទើបបានជ្រើសរើសហើយ៖
Alawi 20: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.