Uchokholha 42
42
Manyonnaya Nayusufu anoorwaa Umisri
1Nayakhobo yeeweke wiira, chihawo choolhia Umisri, aheerelha achishaana aya wiira, “Chani woonaka nnokhalha chiicho mmwehanachaka thuu? 2Kiheewa wiira, Umisri uwo choolhia chihawo. Nrwaacheke etu mwathumacheke choolhia nihiwe naakhwa ithalha.” 3Paahi manyonnaya Nayusufu khumi yahorwaa Umisri uthumani choolhia. 4Nansho Nayakhobo khayanhiilhe Benyamini, nhima aya Nayusufu, wiira arwee vamoka ni yayo manyaattu ayo, ukhalhawaya yoova wiira aanokelha ntatakoni. 5Paahi achishaana a Nayakhobo nkayaaphiyacha Umisri akhalhaka amoka munlhokoni mwa attu yaarwelhe uthumani choolhia, kwaani ata ilhapo yo Ukanaani ni iyo yahokelhiya ikuruna.
6Yeyo ikatema iyo Nayusufu phi ari olhupalhe anene ilhapo yo Umisri. Yayo phi emelhelha mitheko cho waathumihera attu choolhia. Paahi manyonnaya nkayaawacha ni nkayaakhoroma wo heshima wa Nayusufu. 7Nayusufu vonanche aya manyonnaya, ahaachuwelhacha, nansho nkayeepanga thoko khaachuwenlhe, nkoolhumana wo uchacha. Nkaakoha wiira anokhuma vayi yayo manyaattu ayo. Ni ayo nkayaakhulha wiira anokhuma Ukanaani, awiilhe uthuma choolhia. 8Inakhalhaka Nayusufu ahaachuwelha manyonnaya, ayo khayaachuwenlhe. 9Nayusufu nkayoopuwelha itora chaalhohilhe aya khalhayi chaachaka manyonnaya, nkayeerelha, “Mwaatti attu o uhotelha, mmwiilhe uno uwehaweha mwoone uhiichoria wo ilhapo ihu ilha.”
10Nansho ayo nkayaakhulhacha wiira, “Kuhii chiicho, nansho niwiilhe uthumani choolhia. 11Hii achishaana a ntu mmoka, athumwanihu amoka. Hii attu o mitheko choombone, kahii attu o uhotelhacha.”
12Nayusufu nkayaaminda yeerelhaka wiira, “Mena, mwaatti mmwiilhe uhotelhani mwoone uhiichoria wo ilhapo ihu ilha.”
13Nkayaathepa manyaattu ayo uhimia wiira, “Hii anamitheko inyu naari achishaana khumi ni elhi, achishaana a ntu mmoka, nnenchi o ilhapo yo Ukanaani. Mwanhima ihu mwankani hohalha uwani ni athumwanihu, nhima ihu nkina ahorimelha khalhayi.”
14Nansho Nayusufu nkayeerelhacha wiira, “thoko chinre aka wo uhimia, mwaatti attu o uhotelhacha. 15Iphiro inohalha aka ulhikacherani phi ilha. Kinoolhupelha wo nchina ni Nafarao, wiira khannothamacha vaa, mpaka vanohalha inyu ummwiiha mwanhima inyu mwankani uyo wono. 16Munrumeke mmoka inyu arwee ammwiihe nhima inyu uyo, uno mwaatti akina va, nttukiyaka ujerani. Vavawo phi nohalha aya uchuwania wiira malhove inyu ayo arii e ikekheene. Mwaahipangeke chiicho, kinolhupelha wo nchina ni Nafarao wiira, wo ikekheene mwaatti attu o uhotelhacha!” 17Amalhihekeru, nkaattuka onkhaye ujerani mahuku mararu.
18Nihuku no neraru Nayusufu nkayeerelha wiira, “Ukhalhawaya mii ki ntu nomwoova Nlhuku, mpangeke choo wiira mwoopwe. 19Yakhalhaka we ikekhiaye mwa attu o mitheko choombone, mmoka inyu ahalheke ujerani, ni akina nhokolhiacheke mwarwehelheke choolhia ashilhoko inyu anowolhiya ithalha ayo. 20Yamalhaka, mummwiiheke mwanhima inyu mwankani uyo. Yeyo phi nohalha uhimiechesha ikekheene yo malhove inyu ayo, ni mena khannowa mweeviya.” Paahi nkayaarumelhelha nenno nlhove nno.
21Nkawaakhalhiya ntemera ashineneru achukulhachaka wiira, “Wo ikekhiaye ninohuva vano wo nlhatu wo ittu yo unanara yampangenlhe nhima ihu ilhe! Ukhalhawaya inakhalhaka nahomwona vaachukulha awe munrimani, khananlhonhe, ata vaanishontelhelha awe, khanaattunne umwiiwelhelha.”
22Narobeni nkayeerelhacha ashikhunanaya, “Chani, akolhumanche wiira nihimpangelhache ittu yo unanara nhima ihu ulhe? Nansho khakeewelhelhiye. Vano etu uttwaruwa wihu ulha uri wo nlhatu wo iphome awe ilhe.” 23Manyaattu ayo yaari ahichuwelhaka wiira Nayusufu ahochuwelha chonkhaye chopuwelhacha aya, ukhalhawaya ikatema volhumana aya, olhumana wo iphiro yo ulhamulhelhiya ni ntu nkina. 24Nayusufu nkayaarwa uchereshere, nkayaamoriha miithori. Vaamanlhe aya, ahohokolhia ni woopana mwaha. Baada yo vavawo nkaalhehera wiira Simeoni attukiye ipingu uno akina ayo yoonaka.
Manyonnaya Nayusufu anohokolhiacha uwani
25Nayusufu nkayaalhehera wiira majuniya aya acharihiye choolhia, ni kila mmoka aya ahokolhosheriye nchurukhu awe nnijuniyani mwawe, tho avahachiye yolhia yo ulhia mphironi. Nkayaapangelhachiya chittu chonkhaye chiyo. 26Yamalheke, nkayaathathiha iphuta majuniya o choolhia chiyo, nkayaathamacha. 27Nkayaaphiya vakittu venshe aya nipuro no urupelha veelhelhiye aya nchuwa. Mmoka aya nkaathaphulha nsigo awe wiira akumihe ittu yo ulhiha iphuta awe, nansho nkaashanga uphwanya nchurukhu awe unari vamalhakuni vachulhu nijuniya nawe. 28Nkeerelhacha ashunnawe wiira, “Nchurukhu aka uhohokolhoshiya. Uri vamalhakuni wo nijuniya va!” Ashikhunanawe ayo veewilhe aya chiicho, nkayaaririyacha, machiri nkayaamalhelha. Nkayaawehanacha, athukumelhachaka.
Nkayaakohanacha, “Phi nlhatu waani yolha Nlhuku unonipangelhacha awe ulha?”
29Vaaphiyanche aya Ukanaani, wa athumwanaya, Nayakhobo, yahaatangachera mwaha wonkhaye waaphwannye, nkayeerelha wiira, 30“Mulhupalhe o ilhapo uyo anulhumanne wo uchacha chacha, ni unaanyihera wiira naari attu o uhotelha ilhapo aya. 31Nansho naheevarangacha ni umwiirelha wiira khanaari attu o uhotelha, nansho attu o mitheko choombone. 32Tho, nahonhimeria wiira naari ashaana o yaraana khumi ni elhi, athumwanihu amoka, nhima ihu mmoka horimelha, nkina mwankani ri uwani Ukanaani, hohalha ni athumwanihu. 33Tho, Mulhupalhe o ilhapo uyo ahoniirelha wiira, ‘Cho, phi nohalha aka uchuwelha wiira mwaatti attu o mitheko choombone. Munhiyeke nhima inyu mmoka uwannyaka, ni akina va, nrweeheke choolhia wa ashilhoko inyu, ahiwe yaakhwa ithalha. 34Mwamalhaka, mummwiiheke wono mwanhima inyu mwankani uyo, phi vavawo vanohalha aka uhimiechesha wiira mwa attu o mitheko choombone, kanhii attu o uhotelha. Vanohalha inyu upanga chiicho, nhima inyu nohalha uvarelhelhiya uyo, noohiyereriya. Ni inyu nnohiyereriya wiira mpange maronda mwiilhaponi mu.’ ”
35Ikatema veetta aya choolhia mmajuniyani mwaya, yahoshangacha woona kila mmoka aya hohokolhosheriya nrupa waahenlhe awe nchurukhu munsigoni mwawe. Vonne aya chiicho, onkhaye vamoka ni athumwanaya yahokelhiya woova. 36Nayakhobo, athumwanaya, nkayaakhulha wiira, “Nnothanana ukithurulha achishaana aka onkhaye! Yusufu khaawo, ni Simeoni khaawo, vano tho nnothanana unkusha ni Benyamini. Onkhaye ayo anokipatta mii!”
37Vavawo Narobeni nkayeerelha athumwanaya, “Kaahinhokolhosheke Benyamini, mweeveke etu achishaana aka elhi ayo. Munhiyeke Benyamini uyo mmathathani mwaka, ni mii kinomwinkelha ni uhokolhosherani.”
38Nansho Nayakhobo, athumwanaya, nkayaakhulha wiira, “Mwaamwanaka ulha khanorwaa wowo, kwaani munnawe horimelha, yoyo vekha awe phi hanlhe, ni mii kiholhuvalha. Benyamini ulha athuriyaka mwommo munkwahani mwinyu mmo, kinookhwa wo nlhatu no ihuzuni inohalha aka uthepa upatta iyo.”
ទើបបានជ្រើសរើសហើយ៖
Uchokholha 42: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.