Uchokholha 29
29
Nayakhobo anoophiya wa Nalaabani
1Nayakhobo ahothepa weeta nkwaha aya, nkayaaphiya ilhapo cha attu o unosha nchuwa. 2Gafula nkayoona ilhushi uthakoni, ni vachereshere aya mikutiro miraru cho ikhondoro chineettuwilhe. Ikhondoro chaari chiwurihiyaka maashi vavawo valhushi vaakhunelhiye nlhuku nulhupalhe vawo. 3Wo ikawaida, mikutiro chonkhaye cho ikhondoro vaakumaanacha aya, achunga ayo phi ikatema yaapirikishacha aya nlhuku nno vamoka, upatakulha valhushi vawo, ni ikhondoro chiyo khuwuriaka maashi. Chamalhaka uwuria, kuhokolhoshaka tho nlhuku nno.
4Nayakhobo nkayaakoha achunga ayo, “Ashilhoko aka, nnnokhuma uyi?”
Nkayaakhulhiya, “Ninokhuma Uharani.”
5Nkayaakoha tho, “Chani, nhaachuwelha Nalaabani, uchuulhu wa Nanahori?”
Nkayaakhulhiya, “Nihaachuwelha.”
6Nkayaathepa ukoha, “Chani anowungwelhelha?”
Tho, nkayaakhulhiya, “Anowungwelhelha, ata mwaamwanaya mwanthiyana, Raheli, ulhe nowa vava ni ikhondoro chawe.”
7Vavawo Nayakhobo nkayeerelhacha, “Kinoona wiira bado uthana, kuhii ikatema yo uthothokaniha ikhondoro vamoka, paahi etu mwaawuriheke maashi nrweeke mwaalhihacheke.”
8Nansho manyaattu ayo nkayeeracha, “Khaninooria upanga chiicho mpaka mihuwo chonkhaye chiwe chaakumaana vamoka vaa, nlhuku ninapirikishiye, phi nohalha ihu uwurihacha maashi ikhondoro.”
9Nayakhobo vaari aya bado olhumanaka achunga o ikhondoro ayo, Raheli ahophiya ni ikhondoro cha athumwanawe, kwaani Raheli uyo phi aari aachunga ikhondoro chiyo. 10Nayakhobo vaamwonne aya Raheli, biti Labani, mwaamwana a athatha aya, ni woona ikhondoro chi Nalaabani, ahorwaa ni upirikisha nlhuku nne valhushi vawo, nkaawuriha maashi ikhondoro cha athatha aya, Nalaabani. 11Baada yo upanga chiicho, nkayankumbatira Raheli nkayonlha ikutto. 12Nkayanhimeria Raheli wiira, yaari mwanchulhaya Nalaabani, athumwanawe Raheli, yaani mwaana a Narabeka.
Raheli nkaattimakacha nkaahokolhia uwani, uwaahimeriani athumwanawe.
13Yeyo ikatema Nalaabani yeeweke mwaha u Nayakhobo, mwanchulhaya, ahottimakacha ni ayo urwaa uwekamelhani, nkayaakumbatira, ni waakharibisha uwannyaya. Nayakhobo nkayaahimiacha mwaha wonkhaye ukhumelhenlhe. 14Nalaabani ni ayo nkayeera, “Wo ikekhiaye, inyuva mwa alhoko aka, iphome aka!” Nayakhobo nkayaakhalha wowo mweri mmoka.
Nayakhobo anowaathelha achishaana ashithiyana a Nalaabani
15Nihuku nimoka Nalaabani yaheerelha Nayakhobo, “Inyuva mwa alhoko aka, nansho yeyo khirini maana wiira nnohalha uvara ntheko aka wo chiicho, kinoulhivani. Nhimieke etu, nnothanana kuulhivekenini?” 16Nalaabani ahanaa ashaana ashithiyana elhi, mulhupalhe eehaniya Lea ni o nkani ehaniya Raheli. 17Lea ari o miitho orera, nansho Raheli ahothepa, ari mwalhi orera, o ikhove yorera chinene.
18Nayakhobo nkayanttuna chinene Raheli, paahi nkayeerelha Nalaabani wiira, “Kinoovara ntheko uwaninyu iyaakha saba wiira nkivahe Raheli, mwaamwaninyu mwankani ulha, kinthelhe.”
19Nalaabani nkayeera, “Aye, nambaya kuthelhiheni Raheli, kuliko unthelhiha wa ntu riyoothe nkina. Nthepeke ukhalha ni mii etu.” 20Paahi Nayakhobo nkayaavara ntheko wa Nalaabani iyaakha saba wo nlhatu no unthelha Raheli, nansho yoonaka chechiyo iyaakha chiyo thoko mahuku vakani, wo nlhatu no unttuna Raheli chinene.
21Iyaakha saba chatimireke, Nayakhobo nkayeerelha Nalaabani, “Iyaakha chihotimira, nkithelhiheke etu ahanu aka ayo.”
22Paahi Nalaabani nkayaaterekha yolhia ni waalhalhia attu onkhaye o wowo. 23Nansho uhiyu, Nalaabani nkayankusha Lea, mwaamwanaya mulhupalhe ni waarwehelha Nayakhobo. Nayakhobo nkayanrupana. 24Nalaabani nkayankumiha Zilpa, namitheko aya nthiyana wiira akhalhe namitheko a Lea. 25Wichishu washeeke, Nayakhobo nkayaathuthuwa vaachuwenlhe aya wiira kaahiwe Raheli aari Lea! Paahi, ahorwaa wa Nalaabani anathunanlhe, nkayaakoha, “Nkipannge chani! Akaavanre ntheko inyu wo nlhatu no unthelha Raheli? Woonaka nhokithepiacha etu?”
26Nalaabani nkayaakhulha, “Velhaponi wihu va, khaninopanga chiicho, khavanooria unthelhiha o nkani, munnawe hinaya uthelhiya. 27Muntimiriheke Lea mahuku awe saba o ukhalha mpaani ayo thoko chinothaniya aya, ni mii kinouvahani Raheli, nansho wo uvara ntheko wo iyaakha saba chikina.”
28Nayakhobo nkayaarumelhelha. Ni vaamalhinhe aya utimiriha mahuku saba wa Lea, Nalaabani ahaavaha Nayakhobo Raheli, mwaamwanaya o nkani akhalhe ahanu aya. 29Nalaabani nkayankumiha Bilha, namitheko aya nthiyana akhalhe namitheko a Raheli. 30Nayakhobo nkayanrupana Raheli ni uyo. Nansho nkayanttuna chinene Raheli umpwaha Lea. Paahi nkayaavara ntheko wa Nalaabani iyaakha saba chikina.
Nayakhobo anowaapatta ashaana
31Apwiiya Nlhuku vonne aya wiira Nalea ari ahittuniyaka chinene, ahaavaha ashaana, nansho Naraheli khaayara. 32Nalea nkayaarupalha irukulhu, nkayeethaphulha mwaana mwanlhopwana, nkayammaha nchina nawe Robeni, maana aya “Ahoona uhuva waka.” Ukhalhawaya yeera, “Apwiiya Nlhuku aheewa ichuku aka, wo ikekhiaye vano owannyaka anookittuna.” 33Nkayaarupalha irukulhu ikina tho, nkayannyara mwaana mwanlhopwana, nkayammaha nchina nawe Simeoni, maana aya “Apwiiya Nlhuku ahokivaha mwaana.” Ukhalhawaya yaari yeeraka “Apwiiya Nlhuku aheewa chineera aka wo upangelhiya ichimwa, paahi ahokivaha mwaana nkina mwanlhopwana.” 34Nkayaarupalha irukulhu tho, nkayeethaphulha mwaana mwanlhopwana nkayammaha nchina nawe Lawi, maana aya “Ulhutaana.” Munrimani mwaya yaari yeeraka, “Owannyaka vano anolhutaana ni mii, ukhalhawaya kihaayarelha ashaana ashilhopwana araru.” 35Nkayaarupalha irukulhu ikina tho, nkayeethaphulha mwaana mwanlhopwana. Munrimani nkayoopuwelha wiira, “Ulha nkwaha ulha kinowaatotopelha Apwiiya Nlhuku.” Paahi nkayammaha nchina nawe Yuda, nkayaahiya uyara.
ទើបបានជ្រើសរើសហើយ៖
Uchokholha 29: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.