Uchokholha 24
24
Isaka nooveka
1Vano Aburahimu aari anolhuvanlhe chinene, ni Apwiiya Nlhuku aari anaavahilhe ibarakha wo kila iphiro. 2Nihuku nimoka Aburahimu ahomwiirelha namitheko aya o wulhuvalha waapwaha akina, eemelhelha inupa aya ni chittu chaya chonkhaye wiira, “Mweesheke moono inyu wuuthi mweto aka, 3kinothanana nkilhupelhelheke wa Apwiiya Nlhuku o wiirimu ni Nlhuku o ilhapo wiira, khannonkusha mwanthiyana riyoothe, munlhokoni mwa achishaana ashithiyana a Akanaani kinaakhalha naka alha va, nkamwanthelhiha mwaamwanaka. 4Nkilhupelhelheke wiira, nnoorwa mpaka wiilhaponi waka, wa ashilhoko aka, mwamwaavie nthiyana o uthelhiya ni mwaamwanaka Isaka.”
5Namitheko ulhe nkaakoha, “Keereke chani etu, nthiyana uyo akhotaka uthamelha uno? Chani kinrweheke mwaamwaninyu uyo ilhapo ukhumilhe inyu uwo?”
6Aburahimu nkayeera, “Mena! Nhiwe mwanhokolhosha mwaamwanaka wowo. 7Apwiiya Nlhuku o wiirimu aakithaminhe mii ukhuma inupa ya athumwanaka, nkayakoolhumana mii wiilhaponi waayarelhe aka, nkayaakilhupelha yiiraka, anowaavaha achishaana aka ilha ilhapo ilha, yayo anoruma nnepa aya uhoolhelheni ni inyu nnokompatta nthiyana o umphwanelha mwaamwanaka. 8Ni nthiyana uyo akhotaka uttukanani, naapo naka khaninowa nouttukani, nansho nhinhokolhoshe mwaamwanaka wowo.” 9Paahi namitheko ulhe nkeesha moono nawe nkhaukani mwa Aburahimu nkaalhupelha vachulhu nenno nlhove nno.
10Yamalhekeru, namitheko ulhe ahokusha ingamiya khumi cha nkunya awe ayo, nkaarwaa, ukhalhawaya nhakhu wonkhaye wa nkunya awe uyo waari mmathathani mwawe. Nkaathama nkaarwa mpaka Umesopotamiya mpaka iwani yaakhalha Nanahori. 11Vaaphilhe awe, ahokhoromiha ingamiya chawe vachereshere ilhushi aari vachereshere iwani. Yaari uchechilho manyoopani vaarwa aya urikani maashi. 12Nkaalhapelha, “Inyu Apwiiya Nlhuku, Nlhuku a athithi Aburahimu, kinoulhepelhani wiira lhelho nkivahere, kipatte, mwaapangelhe moombone athithi Aburahimu. 13Mwooneke, mii kiri va valhushi va vanowaacha aya imialhi o ilha iwani ilha urikani maashi.
14“Paahi etu mwamwalhi kinohalha aka umwiirelha wiira arulhe mwaapu awe akivahe maashi kiwurie, ni waavaha maashi ingamiya chaka, yoyo akhalheke phi uyo munthanlhenlhe inyu namitheko inyu Isaka. Yeyo inookooniha wiira nhaapangelha moombone athithi Aburahimu.”
15Hinaya umalhiha ulhapelha uwo, ahowa mwalhi, Rabeka, nakunshe mwaapu awe vamuruni. Yoyo aari anaaya Nabethueli, yaani uchuulhu wa Namilka, ahanu a Nanahori, ahima aya Aburahimu. 16Yoyo mwalhi uyo aari ni ikhove yorera chinene, mwalhi hinathupha mooro ahokhuruwa valhushi, nkaarika maashi nkaachariha mwaapu awe, nkaakhuma. 17Vavawo namitheko ulhe nkaakuvia umwiikamelha, nkaamwiirelha, “Kinoovenda maashi vakani o uwuria o mmwaapuni wao ayo.”
18Mwalhi uyo nkaakhulha, “Haya, mmurieke pwiiya.” Nkaakuvia urulha mwaapu awe, nkaavarelhelha wiira aawurihe. 19Vaamalhinhe awe unvaha maashi ntu ulhe, nkeera, “Kinokoorika maashi o waavaha ingamiya chinyu chiicho, mpaka vanohalha aya urupalha.” 20Paahi, nkaakuviha, nkaamiina maashi o mmwaapuni mwawe uhelha nnikulhani mwaawureria aya ashinama, nkaathupulhuwa urwaa ulhushi urikani maashi tho ni uwuriha ingamiya chiyo chonkhaye. 21Ntu ulhe nkammweha wo miitho melhi mwalhi uyo wo uhulhumacha ittu iriyoothe, wiira achuwelhe yakhalhaka Nlhuku horeriha nkwaha awe ama kuhiwe.
22Ingamiya chawurieke maashi nkachaathoshiya, ntu ulhe ahommaha mwalhi uyo ikipuli yo idhahabu yo ulhemelha yo nchurukhu mwinchi yo uwariya vaphulhani, ni ibangili piilhi cho idhahabu cho nchurukhu mwinchi chiicho, nkammwariha mmoononi. 23Nkankoha, “Ukihimerie etu, Uweva mwaamwana a apani? Chani tho, vahawo vakittu wo urupa hii uwani uwo?”
24Rabeka nkaakhulha, “Mii mwaamwana a Nabethueli, mii uchuulhu wa Namilka, ahanu a Nanahori. 25Eiyo, vahaawo vakittu wo urupa alheto. Tho, uwanihu uwo ahaawo manyashi menchi o waalhiha ingamiya.”
26Phi vavawo etu ntu ulhe vooromihilhe awe muru, nkaathimicha Apwiiya Nlhuku, 27nkeera, “Athimichiye Apwiiya Nlhuku, Nlhuku a athithi Aburahimu, hilhiyanlhe mitheko chawe choombone ni ukhulhuvelhiya wawe wa athithi. Apwiiya Nlhuku akiholhenlhe mii kimwanene uwa mpaka wa alhoko aya athithi Aburahimu!”
28Paahi baada yo vavawo, mwalhi ulhe ahottimakacha urwaa uwaahimeriani amuchi a anumwanawe mwaha wo yoyo ntu uyo. 29Rabeka ahanaa arokorawe eehaniya Nalaabani. Nalaabani ahottimakacha etu urwaa unkumaanani ntu ulhe ulhushi uwo, 30ukhalhawaya Nalaabani aari anoonne ikipuli ilhe ni ibangili chilhe mmiononi mwa mwanrokoraya, ni wiiwa mwaha uhimeriye awe Rabeka ni yoyo ntu uyo. Nalaabani yahomphwanya ntu ulhe neemenlhe vakhiviru ni ingamiya chawe vachereshere ilhushi vawo. 31Nalaabani nkaamwiirelha ntu ulhe, “Chani woonaka nneemelha uchereshere uno? Kharibu uwanihu etu, inyuva nvahiye ibarakha ni Apwiiya Nlhuku va. Mii kiheesha vakittu wo urupa mwaatti ni vakittu wo weesha ingamiya chinyu chilha!”
32Paahi namitheko a Aburahimu uyo nkaarwaa vawani. Nalaabani nkaarulha ingamiya mituro chaakushilhe aya ni waavahacha manyashi, nkammaha ntu uyo vamoka ni attu yaattukanne awe, maashi o ukhucha mieto chaya. 33Paahi nkayaaterekhelhiya yolhia, nansho uyo nkeera, “Akinolhia mpaka vanohalha aka uhimiacha mwaha unothanana aka wulhumacha.”
Nalaabani nkayeera, “Haya etu nnihimerieke.”
34Ntu ulhe nkeera, “Mii namitheko a Aburahimu. 35Apwiiya Nlhuku ahaavaha ibarakha chinchi athithi ayo, ni ayo ahokhalha ntu o uchuwania chinene. Ahaavahera mikutiro chinchi cho ikhondoro ni ing'ope chinchi, chittu chikooroshiye wo isiliva ni idhahabu, anamitheko enchi ashilhopwana ni ashithiyana, ingamiya ni iphuta! 36Asara ahanu a athithi Aburahimu, uwulhuvalhani waya ahonnyara mwaana mwanlhopwana, ni athithi ayo ahonhiyera yoyo mwaana uyo nhakhu waya wonkhaye. 37Ni athithi ayo ahokilhupelhiha mii yeeraka, ‘Nhinthelhihe mwaamwanaka nthiyana riyoothe munlhokoni mwa ashithiyana o Ukanaani anaakhalhana aka wilhaponi waya va. 38Nansho nrweeke mpaka wiilhaponi waka, wa ashilhoko aka, wiira mwamwaaviere mwaamwanaka nthiyana o unveka.’ 39Ni mii nkakerelha, ‘Chani yakhalhaka nthiyana uyo nokookhota ukittukana mii uwa uno?’ 40Nansho ayo nkayeera, ‘Apwiiya Nlhuku kinaarumelhelha aka muukumini mwaka, anowaaruma minepa o wiirimu aya ottukaneni ni uvaherani munkwahani mwinyu mwonkhaye, ni inyu nnokompatta mwalhi o unveka ukhuma wa ashilhoko aka, unupani wa athumwanaka. 41Mwaahivahiyeke mwalhi vanohalha inyu uphiya wa ashilhoko aka uwo, paahi etu, khannowa mwaattukiya ni nna naapo naka nna.’
42“Lhelho vaaphilhe aka valhushi kaholhepelha wiira, ‘Inyu Apwiiya Nlhuku, Nlhuku a athithi Aburahimu, kinoulhepelhani wiira lhelho kipatte munkwahani mwaka, ni mwaapangelhe moombone athithi Aburahimu. 43Kiri vachereshere ilhushi va. Mwalhi nohalha uwa urikani maashi, nkakanvekelha maashi o uwuria vakani mmwaapuni mwawe, 44ni uyo nkaakivaha, ni urika maashi o waavaha ingamiya chaka, paahi yoyo akhalheke phi uyo munthanlhe inyu ukhalha ahanu o mwaamwanaya athithi.’
45“Kihinaya umalhiha ulhapelha munrimani mwaka, Rabeka nkaawa phiyaru nakunshe mwaapu awe vanikhathani uwa urikani maashi. Ni mii nkakaamwiirelha, ‘Ukivahe maashi vakani kiwurie.’ 46Ni uyo ahorulha mwaapu awe chitemachitema, nkeera, ‘Haya, pwiiya mmurieke. Tho kinoorika maashi o waavaha ingamiya chinyu chiyo.’ Paahi nkakaawuria, nkaawuriha ni ingamiya chaka. 47Phi vavawo vankohilhe aka, ‘Uweva mwaamwana a apani?’ Nkakaakhulha, ‘Mii mwaamwana a Nabethueli, uchuulhu wa Namilka, ahanu a Nanahori.’ Phi ikatema vammwarihilhe aka ikipuli vaphulhani ni ibangili mmiononi. 48Nkakooromiha muru aka waathimicha Apwiiya Nlhuku, nkakaathimicha Apwiiya Nlhuku, Nlhuku a athithi Aburahimu, kiholhenlhe mii mpaka wa mwalhi o nihimo naya wo nlhatu wo mwaamwanaya. 49Paahi etu, mwoonihaka urera wo nrima winyu ni ukhulhuvelhiya winyu, nkihimerieke. Yaahirieke chiicho, nhimieke etu ni mii kinoochuwelha ittu yo upanga.”
50Baada yo wiiwa yayo, Nalaabani ni Nabethueli nkayaakhulhacha wiira, “Nenna nlhove nna nikhumme wa Apwiiya Nlhuku, hii khaninooria waamulha ittu iriyoothe. 51Rabeka ulha va, munkusheke munrwaaneke. Akhalheke etu ahanu o mwaamwanaya athithi inyu thoko Apwiiya Nlhuku chinre aya wo ulhehera.” 52Namitheko a Aburahimu veewilhe awe yayo malhove ayo, ahooroma muru awe ni waathimicha Apwiiya Nlhuku. 53Nkaakumiha ikuwo ni chittu chikooroshiye wo isiliva ni idhahabu, nkammaha Rabeka. Tho, nkayaavaha Nalaabani ni anumwanawe Rabeka, mapambo o nchurukhu mwinchi.
54Namitheko a Aburahimu ni attu aawanne awe ayo nkayaalhiacha, nkayaawuriacha ni urupa wowo. Wichishu vonkwilhe aya, namitheko ulhe nkeera, “Kinoulhepelhani etu kihokolhie wa athithi Aburahimu.”
55Nansho arokorawe ni anumwanawe Rabeka nkayeera, “Munhiyeke mwalhi ulha akhalhe wo mahuku vakani, mahuku khumi cho, yamalhaka munrwaaneke.”
56Nansho ayo nkayeera, “Chonte, mwaatti nhikicherewihe, ukhalhawaya Apwiiya Nlhuku ahomalha ukivahera munkwahani mwaka, kinolhepelha etu wiira, nkihiyeke kihokolhie wa athithi ayo.”
57Ni ayo nkayaakhulha, “Paahi, nimwiihaneke mwalhi uyo thoko, ninkoheke.”
58Rabeka nkeehaniya ni ukohiya, “Chani nnoorwa ni ntu ulha?”
Ni uyo nkaakhula, “Eiyo, Kinoorwa.”
59Paahi Rabeka nkaahiiya wiira arwee vamoka ni amwethi awe, arwee ni namitheko a Aburahimu ulhe vamoka ni attu aattukanne awe. 60Rabeka nkaavahiya ibarakha eerelhiyaka,
“Inyu arokorihu,
mwakhalheke anaangoro a attu enchi chinene ahinaalhakelhia,
achishaana inyu avarelheke iwani cha amalhaponi aya!”
61Paahi Rabeka ni anamitheko awe ashithiyana nkayaawelhacha ingamiya chaya ni unttwara namitheko a Aburahimu uyo, nkayaathamacha.
62Yeyo ikatema iyo Naisaka aari anathamme Ubeer lahai roi, akhalhaka ilhapo cho Unegebu. 63Nihuku nimoka uchechilho, Naisaka ahorwaa umamatani uwupuwelhani chittu. Paahi ahoweha, nkayoona ingamiya chiwaachaka. 64Rabeka vaawenhe awe ni umwoona ntu eekamelhaka, ahokhuruwa vathi uhalhawaya aari aanyiheraka wiira phi Naisaka. 65Paahi nkankoha namitheko a Aburahimu, “Phi apani aneeta mmatani alhe anowa unikamelhani alhe?”
Namitheko ulhe nkeera, “Yayo phi athithi aka.” Paahi Rabeka ahokusha ntandiyo awe nkeekhunelha wiitho.
66Namitheko ulhe ahaahimiachera Naisaka chittu chonkhaye chaapannge awe. 67Paahi Naisaka ahonrweeha Rabeka nnihemani mwaakhalha aya Asara, anumwanaya, vaari aya akumi, nkaakhalha phi ahanu aya. Naisaka ahonttuna chinene Rabeka nkayaapatta mpuha munrimani baada yo ukhwachuni wo nookhwa a anumwanaya.
ទើបបានជ្រើសរើសហើយ៖
Uchokholha 24: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.