Uttawa 34
34
Ikipande chikina cho malhuku chaalhepiye malheheriyo
(Itor 10:1-5)
1Apwiiya Nlhuku nkayeerelha ashinna Musa, “Nhemeke ikipande piilhi cho malhuku cho ulhikaana cho mpacho chaapwenshe inyu chilhe. Ni mii kinoolhepa malhove aalhepiye ikibau cho mpacho chilhe. 2Nkhalheke tayari meelho wichishu, mmweeke tho vachulhu mwaako wo Sinai mmwe mwaakulhumana. 3Ni vavawo vanowa inyu vawo, nhinttukane ntu riyoothe, akinttuna ntu awe umwaakoni. Tho, nhihiyerere ikhondoro ama ing'ope iriyoothe ilhie vakhiviru mwaako vawo.” 4Paahi ashinna Musa ahohema ikibau piilhi cho malhuku thoko chaari aya cho mpacho chilhe. Nkayonkwa wichishuru waashelhe aya. Nkayaakusha ikipande cho malhuku chiyo mmathathani urwaana vachulhu mwaako wo Sinai, thoko Apwiiya Nlhuku chaalhehenre aya.
5Yamalheke, Apwiiya Nlhuku ahokhuruwa nnihuteni ni weemelha ni ashinna Musa. Nkayaaromolha nchina naya wiira, Apwiiya Nlhuku. 6Baada yo vavawo Apwiiya Nlhuku ahovira uhoolho wa ashinna Musa ni wiiromolha wiira, “Mii Apwiiya Nlhuku. Ikatema chonkhaye kiri o ikiriri ni o waattuna attu. Akinaakuvia urushiya, kinopanga thoko chinolheha aka, wo uhirukunusha malhehano aka. 7Mii kinowaattuna attu wo maelufu o iyari, kinowaahiyerera uwonya waya, nansho akinohiya mena untwarusha ntu notteka. Akinaatwarusha yayo vekha ayaru, nansho ni achishaana aya, mpaka iyari yo neraru, ni yo necheshe.”
8Ashinna Musa nkayaakhoroma wo waakuvia mpaka vathi ni waathimicha Apwiiya Nlhuku. 9Nkayeera, “Apwiiya Nlhuku, mwakhalhaka nhoteelhiya ni mii, Kinoulhepelhani etu nrweeke vamoka ni hii. Eiyo, attu alha ahochara itiyamaru, nansho nnihiyerereke uwonya wihu wonkhaye, nnirumelhelheke wiira nikhalhe attu inyu mahuku o uhimalha.”
Malhehano anohokolhelhiya
(Utt 23:14-19; Itor 7:1-5; 16:1-17)
10Apwiiya Nlhuku nkayaakhulha, “Mwooneke, Kinoopanga malhehano ni inyu. Kinoopanga cho ushangiha chulhupalhe umihoolho wa attu inyu uno yoonaka. Cho ushangiha chihinapacha ata ntu mmoka upanga velhaponi va. Attu onkhaye ari vakhiviru ni inyu, anowoona chittu chulhupalhe chinohalha aka upanga mii, Apwiiya Nlhuku. Kinoupangelhani chittu cho ushangiha chinene. 11Nrumelhelheke malheheriyo anohalha aka uvahani lhelho. Kinowoomolhacha attu o Ukanaani, attu o Uhiti, attu o Uperizi, attu o Uhivi ni attu o Uyebusi. 12Nansho mwiichiinanelheke wiira, nheeshe malhehano ni attu anokhalha ilhapo inokelha inyu, ukhalhawaya yeyo inookhalha nrianko wo uwayihani. 13Nansho mphomolhacheke madhubahu aya, nkakhacheke mapoto anothimicha aya, ni isinyago cho milhuku chaya chithiyana Ashera.
14“Nhinthimiche nlhuku nkina yaahikhalhe mii. Ukhalhawaya Mii phi Nlhuku kineehaniya Nlhuku o ihache. Mwaahipangeke chiicho, kinoorushiya. 15Nhilhehane malhehano ni attu o yeyo ilhapo iyo, ukhalhawaya vanohalha aya ulhapelha milhuku chaya cho woothiya chiyo, ni ukumiha isadaka uwannyaya, anoulhatulhani. Paahi etu nhilhutaanane. 16Mwaakushaka manyaathiyana aya ukhalha manyaahanu a achishaana inyu ashilhopwana, uno manyaathiyana ayo alhapelhaka milhuku chaya chiyo, anowaapurulha achishaana inyu ashilhopwana ayo ulhapelhani milhuku chaya chiyo.
17“Nhikooroshache milhuku cho iyuma, nkamwaalhapelha.
18“Nvarechesheke malhemalhelho o Isikukuu yo Mikatte cho uhihelhiya ihengedure. Tho, thoko chinre aka wo ulheherani wiira, nhilhie mikatte cho uhelhiya ihengedure wo mahuku saba, mweeri wo Habibu, ukhalhawaya yoyo phi mweeri waathamme inyu Umisri.
19“Kila mwaana mwanlhopwana o nttara, ni madume o mattara a ashinama anaahuwa inyu, awaka. 20Nansho mmoopolheke kila mwannama o nttara o iphuta wo ukumiha ikhondoro ilhopwana vanipuroni waya. Mwaahipangeke chiicho, mmuntheke ishiko awe. Mmoopolheke kila mwaana mwanlhopwana o nttara.
“Tho vavawo, hikhalhe ntu riyoothe nohalha uwa umihoolho waka wo uhikhalha ni isadaka yo ukumiha.
21“Mpangeke mitheko chinyu mahuku sita, nansho nihuku no saba mwiittuweke, ata inakhalhaka ikatema yo ulhima ama nlhalha wo ukhungura choolhia.
22“Kila iyaakha, mpangeke Isikukuu yo Ukhungura choolhia kila vanochokholha inyu ukhungura ingaano, ni uvarechesha Isikukuu yo Marapatta vanomalhiha inyu nlhalha wo ukhungura choolhia chinyu.
23“Mikwaha miraru kila iyaakha, manyaalhopwana onkhaye athukumaaneke umihoolho waka, ukithimicha mii Apwiiya Nlhuku, Nlhuku a Aisraeli. 24Vanohalha aka woomolhacha amalhaponi inyu vawo, kinoochusheriha miinano cho ilhapo inyu, ni vavawo khanowa aakhalha ata ntu mmoka nohalha ulhikacha waatakana ni inyu ikatema yo isikukuu ttaru chiyo.
25“Vanokumiha inyu isadaka yo iphome, nhikumihe vamoka ni nkatte uhelhiye ihengedure. Ni ikatema yo isikukuu yo Pasaka, hihalhihe mmithe.
26“Nkumiheke isadaka yo choolhia cho mmamatani mwinyu vanowiiha inyu isadaka unupani waka mii Apwiiya Nlhuku inyu.
“Nhimwaapie mwaakhondoro ama mwaapuri mmapelheni mwa anumwanawe.”
27Tho, Apwiiya Nlhuku aheerelha ashinna Musa wiira, “Nlhepeke alha malhove alha, ukhalhawaya wo alha malhove alha kinolhehana ni inyu ni attu o Uisraeli.” 28Ashinna Musa ahokhalha umwaakoni uwo vamoka ni Apwiiya Nlhuku mahuku makhumi ncheshe, uthana ni uhiyu. Khayaalhilhie wala uwuria ittu iriyoothe. Nkayaalhepa malhove onkhaye o malhehano, malheheriyo khumi ayo.
Ashinna Musa anookhuruwa umwaakoni Usinai
29Ashinna Musa ahokhuruwa umwaakoni Usinai anakushilhe Malheheriyo Khumi, ahichuwelhaka wiira ikhove aya yaari ithekaka ukhalhawaya ahoolhumana Apwiiya Nlhuku. 30Naharuni ni attu onkhaye ahaaweha ashinna Musa nkayoona ikhove aya ithekaka, nkayoovacha waatameria. 31Nansho ashinna Musa aheehana Naharuni ni ashulhupalhe onkhaye, nkayoolhumana. 32Baada yo vavawo, Aisraeli onkhaye ahowaacha, ni ashinna Musa ahaavaha malheheriyo onkhaye aavahiye aya ni Apwiiya Nlhuku umwaakoni Usinai. 33Ashinna Musa amalhihekeru woolhumana attu, aheetiyelhelha ni ntandiyo wiitho. 34Nansho ashinna Musa kila vaakelha aya Nihema Nitakatifu wolhumana Apwiiya Nlhuku, ahorulha ntandiyo uyo. Ni kila vaakhuma aya vathe, ahaahimeriacha Aisraeli malhove onkhaye alheheriye aya ni Apwiiya Nlhuku. 35Aisraeli onkhaye yahoona wiira ikhove ya ashinna Musa yaari ipharelhaka. Phi vavawo ashinna Musa veetiyelhelha aya tho wiitho ni ntandiyo, mpaka ikatema ikina yaarwa aya woolhumanani Apwiiya Nlhuku.
ទើបបានជ្រើសរើសហើយ៖
Uttawa 34: MOT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Version in Makua @The Word for The World International and Makua Language translators. All rights reserved.