ROMEMIKO 8
8
Rüpüyo kerhü keba
1Süla tsüo kemejo dide Jisu Khrista yo ba ketako, somi uthi upho menyülü tamo ta de Rüpü chothalü tata sheri. 2Kekrelamori Jisu Khrista yono Rüpü kehü thezho kephoma m kesalü asüphra pari te. 3Kekrelamori uthi umo kethathila thezholü thiyi ho tate, Jihova pünu thüma kephoma hübide uthi umoyo kephoma mejo ve. 4Sizide kemezi zho uyo thitsüyi ketola, uthi upho menyülü mode Rüpülü hü tato. 5Kekrelamori uthi upho menyülü kehüko uthi upho medo züyo, vele Rüpülü kehüko Rüpü medoko lü m züyo. 6Upho medoko kesazo, vele Rüpü medo kelüsü kerhü m thelükemenü. 7Kekrelamori upho lüdosü Jihova medo metsuyo, süo Jihova zho khro ta kemola; mori tari yihozo. 8Süla upho medolü ketako Jihova nü thiyi hozo tila. 9Vele neko upho medolü tamote, vele Rüpü medolü tate; mhace Rüpü nemelülü hüta süze. Tsü mhace thüma kehopüri Khrista Rüpü uyo kedimi sümi püzhü mote. 10M Khrista neyo ta süze, upho umoco no kesamite kephomala; vele kemezila Rüpülü rhü yito. 11Vele mhace Rüpü Jisu thi merhü kesüo n yo hüta süze, Khrista phu merhü keyio nemori phü merhü süto Rüpü neyo hü ketao no. 12Süla akhreko, uko uthi upho nüthiketola umo kenü popü tamo. 13Mhace uthi menyülü hüyo süze neko sa zoto, vele Rüpülü kehüla uthi menyüko khava süze neko rhüyito. 14Kekrelamori Jihova Rüpü chotha zü keyiko metü Jihova nune thizo ketola. 15Kekrelamori neko tüpü thejü kethi mha mpe ti rüpü ngoyimo, vele neko züpü nuthonu kethi Rüpü ngoyi de süla u krati, Abba, Apo siyo. 16Jihova Rüpü urüpü zü kese yo (zhopo) uko Jihova nune thi keta. 17Uko pü nune ta lize uko pü kalümi ri tazo, Jihova kalü, Khrista zü kesade; mhace u püzü kemezhe yo lize, upüzüde zapozaleri thi kesazo ketola.
Hisa zapozale thiketo
18Kekrelamori I lüti tsükehülü kemezhe ketiko pü hisa zapozale uyo mengosü ketoko zü kemede shü mozo. 19Thi m rhe kesümetü Jihova nuneko pü mengosü keto menyüde fü bazo. 20Mehükesüko kemethu püzo, utho umedolü mo, vele mipü mha mehü kesüo kemeripü thisü. 21Kekrelamori mehü kesüko metü kecekere thimolü uko kelapü zapozale Jihova nune thi ketola. 22Kekrelamori methümehü kesüko metü panyo m kemenu mezhe melo bayo tha ketso. 23Süko lebimo, vele uko Rüpü se kerako sheri uko melülü panyo m melo tazo; ukopü nuthonu kethi m uko pho rha keyi fü tazo. 24Kemeriyo uko kelayi ketala, kengolü kemerisü kemeri mo; thümapü mhango baketasa kedipü merisaba? 25Vele mhace u ngokemo meri ba süze süsa u sügüsühe de süo fübatayo. 26Sübide Rüpü ri ukethathikolü ukhrühi bayo, kekrelamori u chokezüko ri seyomo; vele Rüpü no usülü mehimelo de upoyi kehoko ri cho bayo. 27Rüpü umelülü ukelü kedipü bashi keti phuvo seyi yo, kekrelamori pü kemelümiko la Jihova kelülü mehimelo bayo. 28Usekeba Jihova kekhrümiko mhakehopü thizori mhakevela thiyo, pümedo thi ketola cükeyiko. 29Kekrelamori pü mejü sekeba bide uko khi pülünu thisü Nuo hü bide, püpo sazüjürako dolü nurao thi. 30Süpiri pülünu thi kesüko süko cüriyi, cükeyiko süko thi kemeziriyi, m thikemezi keyiko thipü zapozale ri thisü.
Jisu Khristayo Jihova kekhrü thaka kesü
31Süsa uko kedipü hikola pota? Mhace Jihova ukola tisa, sopüno uko (ngomu) metsuyi veta? 32Pünu zori kela vamozode uko metüla pü püprasü, pü mhakekre kehopü ri kha utsü sü motome? 33Sopüno Jihova kedaketako mejo ketoba? Jihova tho thi kematho süte. 34Sopü mi mejo ta? Khrista süla satade rhüla süte, Püvo Jihova zaco bate; ukola pü mezhemelo sü bayo. 35Sopü uthikhoyi veta Khrista kekhrülü? Kemezhe ketilü, lüzhelü, methimeni tilü mori kemekrelü, füne kedilü (mechü), kempelü, zecholü hibitilü ta tome? 36Hizi thometa, nlano tüsonha ha dokhri sütayo, uko khi tenyü tekopübi kedokhrilü. 37Simo, hiko metülü pü kekhrüla ukukeyisari kulayi yo. 38Kekrelamori I lükeyi kesasheri, mori kerhü sheri, tüyo choyimi sheri, mori thezhoko sheri, mori kekuko sheri, mori tsükehü mori hisa vori ketoko sheri. 39Mori kerekrü sheri, mori kerelü sheri, mori khonu kehopü sheri, Jihova kekhrülü uthikho vaho, Jisu Khrista uko Niepoo lano.
ទើបបានជ្រើសរើសហើយ៖
ROMEMIKO 8: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
