ROMEMIKO 2
2
Jihova kemezi sheco
1Süla nmezi kepo bamo, somino milümejoya; no milü mejo kebao ntho nmejo bate: mi mejo kebasü sübizo. 2Vele usekeba Jihova sheco sü ketülü co süyo, somi mimejo yo sheri sükoyo siziyo. 3No sopüleno mimejo kebao no Jihova sheco thürayi tole lübame? 4Mori no pü ketsükeve kene, sügüsühe keti, pütü kecho fükeyi, Jihova keveko uzüvo thelü rüde keyilü süyo siti semo zome? 5Vele nlükerü, thelü rude kemo hiko kengupüvo Jihova kemezi sheco nha hala süketo lekhu nmetsu tato. 6Kekrelamori pü utho umhatho cesü züde zhokhro khasüto. 7Sügüsühede mhatho keve thi kebako zapozale, thechu therho m sakemo kechothe kehü phu tayo. 8Vele somino mizüde kezhenyüsahühü, kethojü zümu, vele mezikemoko füzü, ulükekri (unhyüshethi) m thelü reda. 9Somi mhakesu thiyo sheli lüzhe, mhalüphayi keho hiko ukoyo voto; Judahmi ra süsa Israelmi kemoko yori voto. 10Vele mhakeve kethimiko zale, therho, ulüthsizi keti, Jewmiko ra m süsa Israelmi kemoko yo ri voto. 11Kekrelamori Jihova thümapüri rhomekre yomo. 12Kekrelamori thezho kedira kephoma kethiko thezho kedira shütazoto; thezholü phoma ketako thezholü uko neketi zo ketola. 13Kekrelamori thezho reni mori thezho se ketila Jihova mhüjülü matho tamo, vele thezhoko thi m zü keyila mezi yito. 14Kekrelamori Judahmi kemoko thezho tamo tila süculü zhoko züta, thezho bamozori süculü zhoko pü uko zho thiyo. 15Thezho mathoko pü umelülü thopü tayo, thive thisuko uko zhopo ngoyiyo; uko melülü kemüjo mori kejo keva sheri kemeli ketako seba. 16Jisu Khrista yono Jihova pünha thüma kemekhrüko jünyo ketito I jüyikeve hio poyo
Judahmi m thezho
17Hihe, ne Judahmile ne thezholü relü m Jihova la kemeko tayo. 18Pü medoko se m thezholü neko metha kesüla mhakevethoko thi keto nemedole sizi tayo. 19No mhücemi chotha keto ntho nlünve, kezülü ketako la kevepü thi keto sheri. 20Mhasekemo (kenyoko) thi kemezi keto, natsimiko metha keto; mhase zhoko m ketho le zitiko. 21No mi kemethao ntho nmethayi hola? Mharego hino po vele no mharego yola? 22No mipo kekhrükezü hinopo vele no peü thi yola? Marhe sü phikemeropüle si vele no marhe reshü yola? 23No thezhokola kemeko vele thezho varhü Jihova rho kemothi yola? 24Kekrelamori Judahkemoko mhüjülü Jihova zhoshü, side thometa. 25Yikerü sü mevezo thezho kezümila, vele no mhace thezho varhü tasüze yikerü sü nla yirükemo mipü thite. 26Süla yirükemomi thezho züyo tisa yirükemopü yirüle sitaho, ile? 27Vele süculü zhokezüko yirümode thezholü mezi ta yolizo uko neyikerüko vajo ketako mejo zoto. 28Pü chozu kengo zono Israelmi mozori, mori chozuco uthi uphoyo yikerümi mo zori: 29Sizizori pü Judahmipü tazo thelücono, yikerümipüri tazo pümelülüno; süsü rüpülü, lesi ketho kerolümo: süko chu ketosü thüma yomo vele Jihova yolü to.
ទើបបានជ្រើសរើសហើយ៖
ROMEMIKO 2: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
