ROMEMIKO 15
15
Minü kethi, utho unü thikemo
1Ukekumiko kethathiko khrühi timesü, utho unü umedo thita mode. 2Thüma kehopüri usüzanumi nüthi de hunehu thi nveyi khe. 3Kekrelamori Khrista zori pütho pünü thita mo, vele süo thopü metati, mikemeshu pü uko zhoshüthi kesüko ayo kurite. 4Hijü thopü metatiko ukopo seyi ketola thopü meta, uko sügüsühe m hunehu thi kethepu de ketholesiyo ukemeri ba ketola. 5Tsüo Jihova sügüsühe keti m thokemelu kha netsü kesü nekopo Khrista zhorele bide hunehu zü kelürhü bayite. 6Sizi neko kelürhü füpü thide Therüopo zapozale thiyite, uko Niepoo Jisu Khrista Po. 7Sizide neko hunehu züyite, Khrista ri uko züpü Jihova zapo zalelü kesübi.
Jüyikeve Judahmi lari m Judah kemomi lari kemhazo
8Tsü akepo, Kekrelamori Khrista ri yikerülü thekümi thi hijü Jihova reshupü utsüpumi tsü kemetako thitsü sü ketola. 9Sizi keyilü Judahmi kemokopori phikemezhe ngoyi de Therüopo zapozale thiyi ketola, hizi thopü meta, I hila nzapü Judahmi kemoko ce posüto, n zapü chele süto. 10Posa kesü, Niepoo chuyite püthümakozüde, ne Judahmi kemoko. 11Süsari Niepoo chuyite, ne Judahmi kemoko püpo meto süte, nethüma metüko. 12Isaiah ri pokesü, Jesse meyo kevoripü Judah kemoko kekhato, Judahmi kemoko pümelüto. 13Tsüo kemeri kha uketsü Jihova celü kemelüla kenü m kezükeve po neko lü ba thishü thi bayite, side kemeri neshu, Kemesa Rüpü kekulü.
Paul thokesü kethepu keneco
14I nekoyo athepu bate, azüko, nekoyo keve nephi bate, ngokeyimhaseri seshu bate, hunehu tahi tarhoyi rivebate. 15Sizizo sheri akhrüko, thepu zode neko mesela kesü copü Jihova ngokemezhe kha aketsüla. 16Apo Judahmi kemokola Jihova choyi thi jüyikeve kepo thevomipü thide Judahmi kemoko po züyi keve, Kemesa Rüpü thi kemesa kesübi. 17Jisu Khrista zalü, I Jihova la amhathopü kemeha zori pücoba. 18Kekrelamori Khrista kha atsü kemoko mhapüri po keto athepu bamo, Judahmi kemokopo jüzülü bayi ketola jülü m mhatho lüri. 19Kemesa Rüpü kekulü zasiko m ungo mhathoko thikesü, Jerusalem lüsheri, pükhüko Illyricum lüsheri, I Khrista jüyikeve poshu süte. 20I Jüyikeve po ketola ahe thi züzo, thethi dipüce Khrista zapo mesemo balusheri; Kekrelamori I tavo mikekremi shüdüyo mhathi batari sehomo. 21Hibide thopümezü, Püposü kemora ukopo ngoto; seyokemora ukopo seyito.
Paul Romelü voketo kelü
22Kekrelamori mhahizi tila apo nekoce vori mode achokha tate. 23Vele tsüo, hico ala mhatho baphi mote, I hijü tütse kekro menyü ketabi nekoce vori nyü bate. 24I Spainlü kevo züde nekoce vorito, arevü cholü tavoride neko zükesü keto melüba de nekopo aketsü kesüri thito; vapü neko züde pütü donepü anü keyibi. 25Vele tsüzova I ta Jerusalem lü vode kemesakoce choyi thisüto. 26Kekrelamori Macedonia m Achaia lü kebako mhahu khapü Jerusalem lü kemesako kedi vaphi sünyü de kekhrüsü ketala. 27Uko mhatho hithinyüde thisüte, süla uko popü shusü. Kekrelamori Judahmi kemoko rüpülü ceneyo zhürhü thi ketabi, themoyo mhatho sheri uko thipü süko tsüsüte. 28I mhatho hiko thitso kevasa, mhapü ketakokhi uko tsü kevasalü; I ta Spain lü kevo cholü neko züde kesüto. 29I melütü keba, nekoce kevorice Khrista Jüyikeve thejo khapü neko tsü thishuthi süto. 30Azüneko, I nekoce kecho, Niepo Jisu Khrista zalano, m Kemesa Rüpü kekhrülü, neko azüde Therüoce ala cho ba zote. 31Judealü melükemoko celü akelayi ketola, m Jerusalem lü kemesako amhatho hi uko nüde khiyi ketola. 32Sizide apo Jihova medolü anüde nekoce vori ketola, neko pori nenü salayi keto. 33Tsühi Jihova celü thelü kemenü po neko metü züba yite. Amen.
ទើបបានជ្រើសរើសហើយ៖
ROMEMIKO 15: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
