ROMEMIKO 10
10
1Hihe, akhreko, amelü kemenyü m Therüoce akecho Israelmiko kelayiketola. 2I lüketi uko Therüola lüni ba, vele süosü mhaselü mote. 3Kekrelamori uko Jihova kemezi semote, side ukotho uko kemezi phu tate, uko khapü Jihova kematholü sü yomo. 4Kekrelamori Khrista sü kemelümi metükola thezho kemezi thülao zo.
Kelakeyi sü thüma metüla
5Moses thezho kemezi thosüzo, somi thezho süko thi mzüyi sheri rhüyi zoto. 6Vele kemezi kemelüyo kevori, nmelülü hizi lüta yomo, “Sopü tüyo kirita? Püco, sopü Khrista zü kiri ta? 7Mori, sopüpo mezalü kita (kesami rüna)? Püco, sopüpo Khrista kesalü zü prari ta? 8Vele süsü dipü poba? Jüosü nmenobazo ntalü m nmelülü. Jü süo ha nece po ketao zo. 9No mhace ntapü Jisu Niepoo zo ti phrayi süze, nemelü pü kesalü Jihova püphü merhü yitazo ti melüyi süze, ne kelakeyi ngo yito. 10Kekrelamori thüma umelüpü kematho melüyi tisa püthi kemezi yiyo, pütapü phra keyi la kelayiyo. 11Kekrelamori ketholesi poti, kehopüri pumelü keyimi thenga thitaho. 12Judahmi m Greekmi nidolü kekreho tila, Niepo püzo siti pücükeyiko metüla baphi. 13Kekrelamori kehopüri Niepoo za cükeyi khü kelayi zoto. 14Kedipü bide pü melü kemoko pücü yita? M kedipü bide püfüse kemoko pü melüyi ta? M kedipü bide kemetha dize uko reni yita? 15M kedipü bide uko ketsüsü moze vopota? Hizi thometa, Kezükeve jüyi kepoko phezi dithedüri züveshi, jüyikeve kethi kenüjüko pü kevoriko phe didü züve shi! 16Vele Israel uko metüko jüyikeve züyi mote. Kekrelamori Isaiah ri hizi popü meta, Niepoo, sopü ha jüpo kesüko melü yita? 17Süla kerenilü kemelü voriyo, Jihova jüko reni keyilü. 18Vele akepo, uko semo zome? Setüzo, uko füphra cejü metülü vote; uko jüko cejü vala ketsolü vote. 19Vele akepo, Thürace Moses poti, thüma kemo kropü püsü nekopo nekoro kene thi süto, mhasekemo kenyo shuyepü khipü neko lüda thizo süto. 20Vele Isaiah thepu shude poti, aphuta kemo kropüpo angoyi, akhipü aketsota kemoko mese mengosü. 21Vele pü Israelmice poti, Tüsozho metü I abo chopü jüzü kemo ulü ketako umezi kephuko tsü thazo.”
ទើបបានជ្រើសរើសហើយ៖
ROMEMIKO 10: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
