PHILIPPIKO 4
4
1Süla a züko, I khrü mu münyü bayo küzhoko, a künü mu küdepirüko, nieko Niepoo yolü tha mütü bazoyi te a kükhrüko. 2I Euodia mu Syntyche ni po Niepoo yolü lüpü thiyi no rüda yo. 3Mu I n ceri choyo, a besü küthoo, thüno hini ri khrühi süte, uni dzüyiküveo la Clement hani mu uzü kükreko kürhü lesida lü uza küniekori khrühi shu sü tsüla. 4Niepoo yolü nienü süh tayite, I küposa polayo nienüyite. 5Mipo nie künüo sheyite, Niepoo küvori tü müno bate. 6Mhapü la ri nie lü müco hi, vele kücho mu mülolü küthüzü lü nie mhacho pü Niepoo müshe zoyi. 7Siyi tsüsa Niepoo celü thülü kümünü, mhashe mütü ce vevü kütsüo n mülü mu n lüdo mütü Khrista Jisu yo kükhapü bayito. 8Külalü, küzüko, mha dipüko kütho, mha dipüko thürho, mha dipüko müzi, mha dipüko müsa, mha dipüko züve, mha dipüko mphrü, mha velotsü kütsü, mhahu chuyiküve ba tsüsa süko lü zoyi. 9Nieko a celü sheyi, khiyi, rünyiyi mu ngoküyiko thiyi, si tsüsa Niepoo künüo nieko zü bayito. 10I Niepoo yo a nü shu bate, nieko a rüle rükra la küsüla, nieko a rüle müdo bazo vele süo thisü küto tü ngoyi mo vote. 11I nieko ce mha rüda kütsüla hio po bamo kükrelamole I mha kübako pü anü küba do she kütsüla. 12I mütümügü kütsü do ri she, mu I münyhümünyhü kütsü do ri she; mha kühopü lüri u kühi küthi mu müri kütsü, küthüvü mu kümüzhie kütsü do ri she. 13I mha kühopüri thiyi ve Khrista a thi müku küsüo lü. 14Kühopü biri nieko a müzhie küzaküyi la nieko müzari zoho. 15Nie Philippiko nieko thori she ba vele dzüyiküve mhatho thürao lü I Macedonia lü ta kütace kühu kükre püri a zü kübedu mha khasü mori ngoyi mo, nieko lübi zo 16I Thessalonia lü küba ceri nieko a khrühi lasü. 17I nieko ce mha müri tsüla mo, vele püshe zhü mve sapü nieko cenye ba sasü küto lazo. 18I mooküshü mütü ngoyi te, sü küzü ri ngoyite, a kühi thisüte Epaphroditus celü mha kütsü küsüko ngoyino, küthünyü mu u rüh küve rüshü, rütho mu Niepoo künü yiyi küshü rüshü. 19Mu Niepoo pütho nieko tsakhu khüko lü Khista Jisu zaleo la nieko khrühi sü to. 20Uko Niepoo mu u Poo po küchothe zapozale thiyite. Amen. 21Khrista Jisu yolü kümüsako mütü külü süte. U zümi a zü kübako mütü nieko külü süho. 22Kümüsako mütü nieko külü süho, bahorei Caesar cielüko. 23Niepoo Jisu Khrista ngokümüzhieo po nieko müt zü bayite. Amen.
ទើបបានជ្រើសរើសហើយ៖
PHILIPPIKO 4: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.