Galatiamiko 4
4
1Tsühi a kepo, kalüo zo sheri pü natsi kebathe micetami zü kekremo, pü tho metüpi Niepo thi bazori. 2Vele pü kemetha mu püpi kekhati püpo keda metayo. 3Uko sheri sübizo, uko natsi kebece, cejülü zho cebi uko phapü tazo (kemelümiko thezholü rhayi keta). 4Vele pütü tsovori ketasa, Jihova pü Nuo ketsüsü, thenomipü yo pü thisü, thezholü pü thiyi. 5Thezho khro ketako rhayi ketola, side upo pü nutho thita ketola. 6Mu neko nutho thi ketala Jihova pü Rüpü ketsü (pü nu Rüpü) pü umelü lü sü, side pü kra “Abba, Apo” siba. 7Süla neko cetami mote vele nutho nu thi te, mu mhace pünu thita lize pü kalümi sheri thite Khrista yo lüno. 8Sisheri neko Jihova se kemoce neko Therü kemoko choyi thita. 9Vele tsühi, neko Jihova seyi te, mori Jihova neko se bate, dipü bide neko regü sala vo khrü ketimi kethathi zhokereyilü vo tata, sülü neko thejü kethi kemenyü lü vo sala ta tome? 10Neko tüsozhoko, tekhriko mu pütüko, mu tetseko phi bayo, 11I neko methi (mpe) ba tele, molize I mhatho thipü neko yo kesü kemethu thita ketola. 12Asazüjürako, I neko ce choyo, “abiyite” kekrelamori I sheri neko bizo tila, neko areza sümo 13Neko seba I therace kukemolü (kethathilü) I jüyikeve zhopo thi neko ce vori. 14Ala medo kephi sü upho uthi neko mela va kemo, mori lümo tamo, vele akhipü tüyo jüyimi pü bi, Jihova celü kevori, Khrista Jisu celü. (Galatiami thezho kezülü thejo medi keva). 15Süsa neko kedipü thejo poba? I neko jüko seba, neko mhace thiyi vetolize, netho nemhüko sheri celapü atsü va keto thizo; 16I neko ce jütho kepola neko akhipü ne ngomuni thita mome? 17Uko ne thipü neko hüshüsü, vele vetamo, ile, uko neko saphri mote, ne ukoyo mhathi sü ketala. 18Vele mhakevelü ulü hü tive pütü metülü, mu I neko züba tice lebi mo (thezho mu ngokemezhe ni kezü tayomo). 19A nune keniko, I thenomi nunu vathi thide Khrista neko lülü hüyi kemothe. 20I tsühi neko zü keba menyü zole, mu afü redesü, kekrelamori I neko melü tüyi kemola. 21Ace posüte, neko thezho khro ta kenyüko, neko thezho reni sü mo teme? 22Thopü kemeta, Abraham pünu kenane, mipü thezhokhro keta nu mu kekre ukekha diti nu. 23Vele thezhokhro ketao nu uthiupho zholü nu; vele kekhakedi thenopü nu jü popü kemetalü. 24Süosü jüpü kemede kesü, mha hinihi jükho kena, püo lize Sinai cejütu yo Agar yo hü keyi thezho khro ketapü. 25Agar sü Sinai tuyo Arabia lü, mu Jerusalem lü fükho tsühi thi kesü mu pü nune zü thejü thi keta pü. 26Vele Jerusalem lü kebao upi, süo ukekha kedi, süpü uko metü zu. 27Süo thopü kemeta, Rechü süte, no nudipü thopha prari te, no menu vathi thi kemopü, krasüte, methu ketapü pünu kekro menu süte, pünopu pü kebace kro ku te. 28Tsühi uko sazüjüra kethiko Isaac celü kevori nuko, jüphrapü kemetalü. 29Vele uthi upho medolü menu keyi nuneko tsühi Rüpülü nuko methi meni kebako. 30Sizo sheri thopü kemeta dipü biba? Thenopü mu pünu thezhokhro ketani hu meta ve, thezhokhro ketapü mu pünuni po ukekha kedi pü mu pünuni kalü thiho. 31Süla tsühi, azüneko, uko thezhokhro ketapü nuneko mote, vele ukekha kedipü nu te.
ទើបបានជ្រើសរើសហើយ៖
Galatiamiko 4: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.