MHATHOKO 24
24
Paul Felix Angh mhüjülü kethace, Caesarea lü
1Tüsozho püngu sa Anania takiri, mehi miko ri sa, mu jüpo kese mipü Tertullus uko Paul kemejo jüko khi posü. 2Pücü kesüce Tertullus pü kemejo po shüdüta, pü poti, Keveo, nla hako pütü kecho kezükevelü vori, nkebala mhatho keve thipü rüna kolü sü. 3Hako mhatho süko hakonü de züvori, thethi metülü, nmeza shu zode. 4Vele ntü kha mecho mo ketola, hako phi mezhe zode holini ta mode hako jü kedopü reni sü tome siti choyo. 5Kekrelamori thüma hio mha kebu keta tüsa therü khopü, Jews miko dophro kekre kesü, cejü metülü Jews miko kebalü, kebü keti krüta Nazarene mi kro ketsüpü. 6Pü kereshüce sheri thi merho, mu hako pü tüpü hako zholü keti nyüba. 7Vele Lysia lü thipahe krapi kezho ta hako ce vori, hako kemu thi hako belü pü tüzü tate 8Pükemejoko po nce vori tano po, no ntho sheri mha hiko seyito, dipüla hako pü mejo ta sheri. 9Jews miko kebako metü süsü kethozo sita.
Paul Felix mhüjülü pümezi kepo
10Angh pübepü püpo jüpo süno thasü, Paul süsa po kesü, I sekeba no pütü kecho shuye hiola sheco thita te, I anü shude mhapopü kela süto. 11No sebata metse, I zho kerikena vo ketace, Jerusalem lü kho kereshü thi ketola. 12Kereshücelü I mipüri züde kemeliri ba uko ngomo, mori mipüri hüpü mha kebüri bamo, synagogue lü sheri mori nadelü sheri. 13Tsühi amejo keba uko mhapüri seli ngomo. 14Vele uko po keba I nani khakeva pü amejo, I apotsaneko reshü keta Jihova reshütazo, mhametü thopü kemetako melü mu thezho saju kepoko thopü kemetako. 15Jihova celü akemeri ta, uko sheri süko khamo, kesami rhülakesü ba, kemezimi sheri mu matho kemoko sheri. 16A kehülü Jihova sheri mu thüma sheri nümo thimo keto la mhalü tayo. 17Tsühi süze, tütse kekro sa mhakhapü ashuye tsüsü ketola mhakengupü I tavo rizü. 18Jews miko humi Asia lü tavori kereshücelü athi kemesa keba ngoyi, makro sheri bamo mori mhakebu keti sheri azü bamo. 19Uko nmhüjülü hice vori ti mesü, uko mhace mhahu amejo keti ba tisa. 20Mori hiko kedipü I thikekri ba ngo sheri I kehu mhüjülü kebace. 21Kesami rhüla kesü kepola zokemosa I tha nmhüjülü tha de ane kepo kebahi. 22Felix süko se kemesa kesüsa pü poti, pü uko khapü thela thiva, de poti, Lysia krapi kezhoo takiri süze I pücelü nju se kemesa yito. 23Pü kefümipü cepoti, püpo pümedo thiyi keve pü pütsü süte, vele püzümiko püce kevoriko kha hite.
Paul tüzüpü kebace
24Pütü husa Felix pücemi Drusilla zü vori, theno süpü Jewmi, pü Paul cüsü, side Khrista kemelü reniyi. 25Pü kematho, ukethükerü keti, mu hisa jünyo keti keto püco po kesüce, Felix mpeta de püce poti, Ta tate, Tsühila, I pütü uzhoti ngoyi süze ncü süto. 26Pü kemerice Paul presa khapü pütsüsü keto lüba, size pü khasü ketola; süla tsükenu pü miketsüpü pü rethi bayo. 27Tütse kena vota, Felix vale Porcius Festus tavo rita, Jews miko nü thi ketola Felix Paul khapü thejü thi mezüta.
ទើបបានជ្រើសរើសហើយ៖
MHATHOKO 24: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
