MHATHOKO 20
20
Paul ta Macedonia mu Greece lü kevo
1Kebu keti la ketasa, Paul kemelü miko cüpü puce süyi, uko mebosü de ta Macedonai lü vo ketola ukozü kekho ta. 2Pü thethi sükolü vo de uko tarho shusü, de ta Greece lü vota. 3Sülü tükhri sü ba, Jews miko püla bata, pü Syria lü ru thopü voto zü tice, süla pü ta Macedonia lü sala vota keto lüyi. 4Sülü Sopater, Pyrrhus nu Berea mipü püzü Asia lü vota, mu ta Thesalonia miko Aristarchus mu Secundus ni, Gaius Derbe lü kevori mipü, mu Timothy, Tychicus, Trophimus, hiko Asia lü vori. 5Uko taravo Troas lü hako fü bata. 6Vele hako ru thopü Philippi lü khre khasü kemo nye salü tasü, zho püngu sa tavo uko tsoyi Troas lü, sülü hako zho thüna ba.
Paul sülü kevo thela thi keta
7Deobado theranha, kemelü miko tavori Niepoo kerekraco tsükhri keti thi ketola, Paul sülü ukoce zhopo thi zoba meso tülu vota, sodo tata ketola. 8Cebü meso halü keve kekro ba, uko kengupü kebalü. 9Khresa mipü kharüce poyo baba, püza Eutychus lezi, püzü relüta, Paul zhopo thi mecho ba ketala, pü zürenyüba retuta, cebü ha sülü bade tsü pü kesükhri va. 10Paul taki de renutsü pü mebosü, püpoti, nekolü kemezhe hite, kekrelamori pü kerhüro püyo bazo tila. 11Pü tasala khori de tsükhri cethisü, süo ti keyisa pütü kecho jüposü, tüso vori kemothe, side pü tata. 12Uko khresao rhüyi ketao züde prari mu uko metü melü thomelupü uko nüdamo.
Ru revü Troas lü ta Miletus lü kevo
13Hako mejümera ru thopü Assos lü voba, sülü Paul züpü ru lü süyi ketola; kekrelamori pü hakopo sizino pometa tila. Pütho zono püphelü tavori keto lüde sizisü. 14Pü tavo Assos lü hako zü kesüyi, püzüpü ru lü süyi de ta Mitylene lü vo. 15Hako ru thopü süsanha Chios kemetsu ce vori, süsanha hako tavo Samos lü bayi, side hako Trogyllium lü thothüyi, mu süsanha tavo Miletus tsoyi. 16Kekrelamori Paul lüti ru thopü Ephesus cholü vo keto lüba, kekrelamori pü Asia lü pütü mevomo ketola, pü thiyi ve lize tavo Jerusalem lü Pentecost zhonha banyü ketala rekri shuzü.
Paul Ephesus lü mehikoce jü thela kepo
17Pü Miletus lü thüma ketsüpü Ephesus lü kehu mehiko cüsü. 18Uko ta püce kevorice pü ukoce poti, I Asia lü nekoce kevorice pütü metülü I dipü bide ba sheri neko metü se mu ngoba 19Niepoo choyi kethilü I renu metsa de bazo, amhüjü mekri sü, medokephi ayo kevori kolü, Jews miko kemeda la arizo thi keba kolü. 20I mhapü lüri akethüta mozo neko la meve keti kolü vele khapü neko mese mengo süzo, methi mhüjülü neko metha sü, ce püpülü sheri. 21Zhopo thipü Jews koce ri mu Greek miko ceri süzo, thelü redepü Jihova ketsü mu kemelü khapü Niepoo Jisu Khrista yo kesü. 22Tsühi, Hihe, Rüpülü I phapü tate Jerusalem lü vo ketola, mhakedipü ayo vorito sheri semo. 23Kemesa Rüpü tho kese-zo, nade metülü poti ropha mu kemethi lü mezhe ayo ba. 24Vele mha sükola I thipü tsüsa va mozo, mori a kerhüro hihi lüpü ala mhapüri zomo, side I yitholü amesüco anüde thivo tsosü ketola, yitho hio I Niepoo Jisu celü ngoyi, sülü Jihova ngokemezhe jüyikeve po mese sü ketola. 25Tsühisa, Hihe, neko dolü I Jihova kede zhopo thi kevoko azü ngo samo tato. 26Mha hiola I neko po seta keto tha tüsohi, I mipü zalü sheri kekri mozo mu mesazo. 27Jihova mharhükolü I nekoce mhapü lüri akethü kerü de pomo ta mozo. 28Süla neko menu yite, ukroko ce sheri, Kemesa Rüpü neko thipü mikefümi thisü tila, Jihova kehu va thino pütho püzapü neko khri yite. 29Kekrelamori I ta ketasalü sace kemere kethiko neko dolü vori keto I seba. 30Neko dolü sheri thüma hu sajiko shüpü mezikemo lü vota keto süri zoto. 31Süla fü mu la bate, nesa lüde, I tütse süko tüso tüzü relü mozode nekoce amhüjü kri zode po tazo. 32Akro miko, I neko khapü Jihova melü sü teho, pü phikemezhe jülü, süo neko phe mesü yive, side nekopo kemesako zü kalü thi yito. 33I mipü raka sheri. Suna sheri mori füne sheri menyü meho tamozo. 34Izo, ketho, neko ri seba zo; thebe hini tho ala moze keshüko thipü atsü mu azü ketako sheri khrühi tayo. 35I mha metüpü neko mese süte, dipü bide mhatholü kemezami khrühi moze sushi ti, Niepoo Jisu jüko rekra de, pükepo, “mice mhakhi keyi ceri mhapü mi ketsü thejo püku.” 36Pü jü süko po kevasa chütüki de uko metü zü kecho thiyi. 37Uko metü krakhu ta, uko tavo Paul vo chopüyi, de pü mebosü. 38Pü jüpo kesü kola uko lü suphita, uko püzü ngosa mota ketosü. Uko pü züvo ru lü khasü.
ទើបបានជ្រើសរើសហើយ៖
MHATHOKO 20: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
