MHATHOKO 1
1
Mhakethiko Lesi (apostleko mhatho ju)
1Hei, Theophilus I vakerao lesi tho kesü Jisu therace mhatho kethi mu mi metha keti ju thosü. 2Püzü tüyo khota kemothe, süsa pü Kemesa Rüpü lü jü khapü kedakeyi Pü methakeyiko tsüsü. 3Pü kemezhe kevasa pümerhüpü mipo püngosü püco kekre ketilü, tüsozho hedapü mimhüngo thi, Jihova kede kethi juko pü po. 4Mu süko züvo kengusü de ukoce poti Jerusalem lü tata hite sisü, vele u Po püjü kha kesüo fübate, Hihe, neko acelü seyite. 5Kekrelamori John zono jülü nekopü jülopü sü vele neko lano hisa zho choba kemolü Kemesa Rüpü lü jülopü tato. 6Uko vo kengu keyice uko pü ketsoti “Niepoo no Israelmi kede khasü tatome”? 7Pü ukoce poti, neko lazono pütü mu kedi kethice to sheri seyiho, Pootho pü kekulü süko khiba. 8Vele neko keku ngoyito, Kemesa Rüpü neko yo vori keyisa; neko azhopo thi Jerusalem, Judea, Samaria mu cejü vala ketso voto. 9Pü mha hiko po kevasa uko püpe kebalü püzü tüyo khota, kemhüpü voride uko mhüngolü püzü tata. 10Püzü kho ketala uko tüyope mhüdemo bari, Hihe, mikena fü kemega süde uko khüce thade ngoyi. 11Uni ukoce poti, Ne Galilee thümako, dipüla neko tüyo pezo bata? Jisu hio neko dolü zü tüyo kho ketabi hihi bide pü lavorito. 12Süsa uko Olivet cejütuyo ta sala Jerusalem lü vorita, Sabbath nha revu chotalü.
Matthias kedapü Iscariot Judas vale thiyi
13Uko tavo kengu keyice celü kerekrüo (mesoyo) bayi, sülü Peter, James, John, Andrew, Philip, Thomas, Bartholomew, Matthew, James Alphaeus, Simon Zealot, mu Judas, James hiko metü ba. 14Uko metü lüpü thide kechothi mu umezhe melo, thenomiko riba mu Mary Jisu zu risa mu Jisu sazüko ri saba. 15Hitüce Peter kemelümiko dolü sütha bayo, metükesa thüma krapü mecü kezüba. 16Akhreko ketholesi jüko thitso ketola, thajü David talü Kemesa Rüpü popü kemetako Judas (Iscariot) michotha süde mipo Jisu tüzü taketa. 17Kekrelamori püpü uko saphriyi de yitho lü ukozü keza. 18Tsühi yipü thüma hio mesakemolü khripü metate, püpi meso de retute, pü kesü phrepha va, pübü püsü püra metü kesüla ve. 19Theju süo Jerusalem lü kehüko metü se bate, yi süo cüpü Aceldama püco “Thüza yi.” 20Kekrelamori Süo ju ketholesi Cheleko thopü meta, “Pü kehüthi po mechü tate, mipü pori sülü hü hitate, mi kekre püpo püsülü yitho thi tate.” 21Süla mipü Jisu uko dolü tapra talü ketace uko zü tatipü. 22John mipü jülompü ketilü shudü de tavo uko dolü püzü khoketa nha ketso, mipü züpü uko züde rhüla kesü zhopo thita moze su. 23Mu uko mikena kethayi Joseph cüpü Barnabas leziyo, mori cüpü Justus le sizi riyo, mu Matthias ni. 24Uko kecho thisü, “Niepoo no thüma lüdo metü se, hini dolü sopüpo n medolü kedasü to sheri thatü süte.” 25Püpo apostle yitholü mhathi to sheri, Judas retu vajo keta sülü, süo thethilü. 26Uko heve hesu (chethikhele) thisü, sülü Matthias khiyi ta, mu uko pü phripü apostleko mi keripü sa phri yita.
ទើបបានជ្រើសរើសហើយ៖
MHATHOKO 1: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.
