CORINTHMIKO KÜNAO 11
11
1Atho künyodzü küdopüh pota zori nieko sügüsühüyi te; nieko sühüyi yo. 2I kümüsa lü nieko rüyoyo, nie nopu püh takho thi mütate, niepüh rüli phosü püh bi khi Khrista cie süva tono. 3Vele I müprü kütsü tünyhio püdo veshu no Eve küdo küva bi, nielü Khrista cieco nie sührhü mu müsamüzi ta kütsü külüo sühpüh ta küta müprü yo. 4Kükrelamole humi vono ha poyo kümo Jisu kükrepüh püh zhopo thisü, mori nie ropü ngoyi kümo küsapüh ngoyi, mori dzüyiküve nie ngoyikümo kükrepüh pühvo tsüsa nie süo yiyitayi ve. 5A külü iri apostle kürükrüthoko ceri tsü pfü mo. 6I dzü küpo do shemo zori mhashemo bamo; süo nie mha colünyi mu dolünyi lü mütsümüce nie kave. 7I küjo hu thi teme? Nieko thi kümüle sü kütola akhi kürünu no Nyepoo Jihova dzüyio küveo müchuh nieko mütha tsüla. 8I kühu kükreko rügoyi te uko kükhrühi püh nieko choyi thi tsülü, 9Mu I nieko zü ba no tsakhuyi kütalüri I nieko mipühri müzhie thimo, kükrelamole uküzü Macedonia lü küvoko a tsakhuko pühvo ta tsüla. I sino nie müzhie thimo te mu hisa ri nie müzhie thi ho. 10Khrista cielü küvo küthoo ayo ba tsüla, a künü hio Achaia ciejü lümipühri a khaküyi di. 11Ditsüna? I nieko khrü kümo la me? Jihova tho küsheo. 12I tsü thiyo küzhoko thiba zoto, sino yitho lü u thürho ha zü kütüyi to rikütako khayi to. 13Kükrelamole süko kücejü sajuküshemi zo, mhaküdo no Khrista apostle küthi müdeküthi kropüh zo. 14Süzo tsü mha ungo mo, Satan zori küveo choyimi do thiyo tsüla. 15Süla pü choyimi kümatho choyimi do thiri zhokre zomo, külalü uko tho umhathoo zü küsüh to. 16I po sühla yo, mipühri po apüh künyomi le lühi, mhanuü sitsüpüh thiri künyomi püh thino a züyi, sino a po kümüha zayi. 17I thüpu no kümühayo küzho hio Nyepoo zhopo mono künyomi bi no poyo. 18Mi kükro thüma zhorüle lü kümühayo küzho bi iri kümühato. 19Nieko nie nüsai no künyomi dzüzüyiyo nietho nie püh mhasheleno. 20Nieko mipüh niepüh udzü thizori, niepüh uthitü thizori, mori nieyo kütüpro zori, mori uthi kürükrü mori bezi püh niezü vü zori nie sümi dzüzü thiyo. 21I müngazo, ha sü kütso thiküyi küku bamo. Vele mi mha kühopühlüri thüpu no kümüha tsüsa, I künyomi bi dzü poto iri sülü kümühayi ve. 22Süko Hebrewmi me? Iri zo. Süko Israelmi me? Iri zo. Süko Abraham yiemi me? Iri zo. 23Süko Khrista yithomi me? I künyomi bino poto; I püko ce vepü; I püko ce uyi thi mükropü, thüdzü ri thi mükropü, mi aküvü ri kropü, tsükünu sata nu zo. 24Jewmi pova pühngu a küvü heda pühmo thücü. 25Vasüh sühpüh avü, vapüh kütsüpüh ava, vasüh püzu shüta, tüsozho püh mu tüzüzho püh dzülü ta, 26Tsükünu rüvüh lü kürü lü kümüthi zü küsüh, sühkütimi belü ri kümüthi zü küsüh, atho athüma yolü ri kümüthi züh küsüh, mülükümomi belü ri kümüthi züh küsüh, nade lüri kümüthi züh küsüh, nha dolü ri kümüthi züh küsüh, dzüküzholü ri kümüthi züh küsüh, uzümi kücedzüko belü ri kümüthi züh küsüh; 27Kümüzhie mu kürüh mürha, tüzüzho kükro zümo, müri mu thüri, tsükünu tükhü thi, süh mu phochü ta. 28Sümho ri I potsoyi kümo tüsonha kühuko la alü kümüzhie tayo. 29Sopüh thathiyi no I thathi mota? Sopüh müjo küvace I alüshü mota? 30I kümüha mozho shüyo athathiko popüh kümüha to. 31Jihova u Nyepoo Jisu Khrista nie Po, küchothe thüchuh küpüo I müda mo tsü sheba. 32Damacus lü küzhoo Aretas küdeo khro kübao atüyi tono Damascus nadeo khüba, 33Vele mürha lü a püh cohu küvecelü mükisü no apo pü belü tayi.
ទើបបានជ្រើសរើសហើយ៖
CORINTHMIKO KÜNAO 11: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.