CORINTHMIKO KÜRAO 7
7
Kesü keri tizho therütho khasü
1Hice neko lesi thopü ace kesü kola; thepu mipü thenomi yi kemo ve, 2Sisheri keregü kerezhü therüyi keto la thepumi mipü tho pücemi neta, mu thenomi sheri pü nopu nete. 3Mi nopu ne ucemi neyo thi kezüdü thipü tsüte, mu sübi micemi neri unopu neyo thi kezü dü thi tsü te. 4Mi cemi ne utho uthi upho yo pü, keku bamo; vele pü nopu zhüte; mu sübi mi nopu ne sheri püpho yo pü keku ba mote, vele pü cemizhü. 5Hunehu kemenyü thisü mota hite, mhapüce umedo kemethade bata zo kemosa, kecho kemevo kethi pü lazo kemosa; süsalü ta sala voriyi, Satan ne kethü kerü kebalü vota ne kedo taze su tila. 6Vele I hio kepo neko medo ketso lüzo, moze su sitilü mode; 7Kekrelamori thüpumi metüpo abita nyü, vele thüma püpü hi Jihova celü mhaphrü ba phrü zo, mipü püzho kre mu kekre mipü mha kekre püba. 8I süla ceyo kemoko mu samemiko ce poti, uko po abi bata lize ve zoto. 9Vele uko siziyi hota lize, uko po ceyo tate, kekrelamori ceyo keta kemenyü rüpü kebace veku tila. 10Ceyo ketako ce neko po thino kesü, I no mori Niepoo no, micemi ne po unopu necelü tata hite, 11Mhace tata lize püpo ceyo sala hite, mori püpo pü nopu zü kefüse sala yite, mu mi nopu neko sheri ucemi hu meta va hite. 12Vele mha kekreko I po süyo, Niepoo po moho, mhace usazüjürako ucemi melü kemomi ta lize, mu theno pü püzü tanyü ta lize pücemi süo hu meta va hite. 13Thenomi unopu melü kemomi pü ta lize mu thepuo pücemi zü hüta nyü tisa unipo kezü tate, thenopü po pü nopu khava hite. 14Kekrelamori melü kemo nopu-o pü cemi la pü thi kemesa yiyo tila, mu melü kemo cemi pü nopu kemelü la püthi kemesa yi ziyo; kemosa ne nuneko mesamo tato; vele tsühi uko mesa bate. 15Vele melü kemoo tata nyüta lize püpo tata te. Sazüjüra mu ulipü neko kemelü ba ketami uko phapü mezümo tila, vele Jihova uko cü mekrepü kezü keve thelü kereyi lü sü. 16Kekrelamori micemi neko neko se bame neko nopu neko kelayi keto, mori minopu neko neko cemi neko kelayi keto se bame? 17Vele Jihova mha kezapü mi püpü ti tsüsü, Niepoo uko cüpü kemeta uko sülü tayi khe, I kehu metüla a ketsüsü. 18Thüma humi yi kerülü pü cüyi lize püpo yirü kemomi thita hite, humi yi rü kemolü pücüyi lize püpo yi kerümi thita hite. 19Yirü tisü mhapü zomo, mu yi rü kemo sü sheri mhapü zomo, vele Jihova jüpo khakesüko thimu zü keyizo. 20Thüma kehopüri pücü keyilü bayi te; 21N cüpü pü thekümi thisü me? Süo no thejü thi kebace No süo lümo hite; vele ncüpü hekesümi thisü me süo khiyi te. 22Niepoo cüyi ketamiko pü thekü mithi te Niepoo he kevami, cüyi ketako hesü ve, mu Khrista thekümi thite. 23Neko mhama khipü khriyi ketako, neko thüma ceta thihi tate. 24Sazüjürako, thüma kehopüri pücüyi ketako Jihova yo thayi te. 25Reliphosako Niepoo celü jü khakesü I ngo zoyi mo, siri a tho alü kelü khasüto, mipü phikemezhe Niepoo celü ngoyi ta lize, kemelülü thayi te. 26A kelüce mha hiko tsü kehülü kemezhe keba tülü la vezoto, A kepo thüma püla keve sülü bayi te. 27No thenopü züta keto rophalü bateme sülü bayi te, rephrü keto lü hite. N cemi ropha kedimi theno keyi lühi. 28Vele mhace no theno yiyi teme, kephomo thi tamo, mu mhace reliphosa mipü ceyo (nhita) zori süo kephoma tamo; sizi zori nthi npho kemenyü lüzhe la, ntho mhayi te, (I pomo tato). 29Vele akepola, azüneko, pütü kejüla utho uthilü tha yite, ucemi kene kori mu ucemi kediko sheri kenani la. 30Kra ketako, krakemobi; rechü ketami rethu kemobi; mhakhri keyimi mhapüri kedi bi. 31Cejükhi ketako uko süo mesu kemobi, kekrelamori cejü hio tata zoto. 32Vele I nekopo mha süko khi menu zoba ti amedomo, Pü ceyo ketami cejülü zhüko la mhalü tayo, vele ceyo kemoko Niepoo nü kethi lü tayo. 33Vele ceyo ketami cejülü zhüko menu de lü tayo; dipü bide pü cemi nü thita ziti. 34Reliphosapü mu micemi ni dolü sheri kekreti ba; ceyo kemomi Niepoo la mhalü tayo, pü thi püpho sheri mu pü rüpü la sheri kenani la vele ceyo ketapü cejülü lüzheko lü tayo, dipü bide pü nopu nü thiyi ta. 35Neko kemevela I hiohi posüho, keba (zoma) khi neko mava keto lamo; mha kezüve mu Niepoo la tso keti neko kemeka lamo. 36Vele mipü mhace reli kezüve pü nyepü pü kebace pü krokrüyi hota lize mu süo khimo suta lize püpo pü kelü thi tate, pü kephoma thimo unipo keri tate. 37Siri pü melü tha metüyi, khi moze sumo ti bamo, vele pü keku pü kethükerü ti pi ba mu pü merho vamo de phosa thiyi ve keto sa, süo vetüzo. 38Süla ceyo ta zori vezo, vele ceyo homo zi to lize süo vekuzo. 39Mi cemi ne thezho khro batayo, pü nopu rhü kebathe, vele mhace pü nopu sata lize, thenopü pü medo thi ta to, thenopü sopü ce nhito sheri pü medo te, Niepoo lebi zalü. 40Vele thenopü pünü kuto ceyo mode pülebi bata lize, akelüce, vele alü kelü ce Niepoo rüpü azüta.
ទើបបានជ្រើសរើសហើយ៖
CORINTHMIKO KÜRAO 7: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.