CORINTHMIKO KÜRAO 1
1
Kemelü miko ngokemezhe la kemetsu süri keta
1Paul cüpü Jisu Khrista sajimi (apostle) Jihova medolü, mu Sosthenes uko züo. 2Corinth lü Jihova kehuko cekesü, Khrista Jisu yo thi kemesa keyiko mu cükeyiko, mu kekreko sheri kesa Jisu Khrista za lü cükeyiko, uko Niepoo mu hako sheri sa. 3Phikemezhe mu kezükeve Jihova uko po mu Niepo Jisu Khrista celü kevori po neko züba yite. 4I pütü metülü kethezü khapü Jihova tsüsü bayo, kekrelamori Jihova ngokemezhe khapü neko tsüsü ketala Jisu Khrista zalü. 5Kekrelamori mhakeho pülü sheri neko püyo nethi mene süte, ne jüpolü mu mhaselü metülü. 6Neko dolü Khrista zhopo thi kemetü süte, 7Süla neko Rüpü mhaphrüko tsakhu mo te, uko Niepoo Jisu Khrista mengo sü keto fü keba bi. 8Pü sheri thela ketso neko thi kemetü vo zoto, side nekopo thece kedi thivo Niepo Jisu Khrista tüsozho ketso bayi keto la. 9Jihova sü jüthozo, pula neko cüpü Nuo krotholü süyi, Jisu Khrista uko niepoo. 10Tsühi, I nekoce melo süyo, sazü jürako mu lipü neko, Niepo Jisu Khrista yolü püthi ketako, neko dolü kezü püthi lükerhü ti
Uko thüma krüta meji ketala uko dolü mhakebu keta
11Kekrelamori Chloe thümako tavori ace mhapoti, kemeliti neko dolü baketa, asazüko mu alipü neko. 12Akepoco, neko mipüpü ti, I Apollo ceco, mori I Paul ceco, mori I Cephas ceco, mori I Khrista ceco. 13Khrista kezaphro vateme? Paul nekola cross yo sa süme? Mori Paul neko khapü jülopü süme? 14I Niepoo meza ba I neko mipüri kha jülo mpü sümo Crispus mu Gaius nilebi sasü. 15Molize neko azalü jülopü tele zita ketola, 16Süsa sheri I jülo khapü Stephanas cekroko tsüsü, süpi kezü I jülo khakesü semo I jülo khasasü me mo sheri. 17Kekrelamori Khrista apo jülo khasü ketola aketsü sümo, vele jüyikeve po ketola zo, mhapokese mhase fümo, siziti Khrista cross keku thimedi kevapü.
Khrista Keku mu Jihova mhase
18Kekrelamori cross jüyikevesü kata ketoko la kenyo jüzo, vele uko kelayi ketako la Jihova keku lü. 19Süo ju hiziti thopü meta, “I mhakeseko mhase thimedi vato,” mu mhakeve kesu lü keseko thi kethathi süto 20Mhakeseko mhase dipüce vota? Lesi keseko dipüce tata? Tsükehülü thezho khipü kemeli ketako dipüce vota? Jihova mhase kemoko thipü cejülü mhakeseko thisü ta mome? 21Kekrelamori Jihova mhaselü, cejüopo Jihova seyi mote uko mhaselü, Jihova kelülü, uko mhasekemo zhopo lü somi melüyi sheri sükopo kelakeyi ngoyi ketala. 22Kekrelamori Jew miko sazi menyü yo, Greek miko mhase jü phu yo. 23Vele uko Khrista pü cross yo gu keva zhopo kethi Jew miko la uphe kemesü püzo, mu Jew kemoko la kenyo jü. 24Vele cüyi ketako, Jew miko sheri mu Greek miko sheri kenani Khrista hi Jihova kekuo zo, mu Jihova mhaselü jü. 25Kekrelamori Jihova kenyo zori thüma mhase ce veku, mu Jihova kemeza (kethathi) zori thüma keku ce kuku. 26Nekecü lü süte, asazüjürako mu alipü neko, neko thüma zhorele lü mhakese phimi zomo, kekumi zo rimo, cekro kerekrülü menu keyimi ri zomo. 27Vele Jihova kerenuko kedapü kerekrüko nga thi süte, mhase kemoko kedapü mhakeseko po thenga thiyi, kukemoko kedapü kekuko po thenga thiva. 28Jihova cejülü kerenuko mu khakevako keda yite, mhapüri kemoko khipü mhapüri thi süte. 29Süla mipüpori Jihova mhüjülü kemeko kemeha ta mo ketola, 30Pü nekola kerhü boo (bodü) (jüri) zo, Khrista Jisu yo, kemezi, thi kemesa keyi, mu rhakeyi. 31Süsüla thopü kemeta, “sopü kemeko yo sheri püpo Niepoo yo kemeko yite.”
ទើបបានជ្រើសរើសហើយ៖
CORINTHMIKO KÜRAO 1: NAG5BSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Chakhesang Chokri Naga New Testament © Bible Society of India, 2015. Used by permission. All rights reserved worldwide.