Loos 7
7
Lus Pivtxwv Los Ntawm Kev Sibyuav
1Cov kwvtij, ciasiab hais tias nej yuav totaub txog qhov uas kuv tseem yuav hais no, rauqhov nej sawvdaws puavleej paub txog txoj kevcai. Kevcai tsuas kav tus neeg uas thaum tseem muaj sia ua neej nyob xwb. 2Pivxam hais tias, tus pojniam uas yuav txiv lawm, rawsli txoj kevcai, yog tus txiv tseem muaj sia nyob nws yuavtsum ua neej nrog nws tus txiv ntawd mus li; tiamsis yog tus txiv tuag lawm, ces nws dim ntawm txoj kevcai sibyuav ntawd lawm. 3Yog tias nws tus txiv tseem nyob, es nws ciali mus nrog lwmtus txivneej nyob lawm, sawvdaws yuav hais tias nws deev hluasnraug; tiamsis yog nws tus txiv tuag lawm, txawm yog nws mus yuav txiv tshiab los yeej tsis txhaum kevcai, thiab tsis yog nws deev hluasnraug lawm.
4Cov kwvtij, ib yam nkaus li ntawd, yog hais ntawm txoj kevcai ces nej twb tuag lawm, rauqhov nej yog ib feem ntawm Khetos lub cev lawm. Nimno nej yog Khetos tus uas Vajtswv tau tsa sawv hauv qhovtuag rovqab los tus lawm, kom peb thiaj yuav tawgpaj txitxiv pub rau Vajtswv. 5Thaum peb tseem ua peb lub neej rawsli neeg ntiajteb ua, txoj kevcai pheej niajhnub tshoov peb lub siab kom mus ua txhaum, kom thaum kawg peb raug kev ploj kev tuag. 6Tiamsis nimno peb twb dim ntawm txoj kevcai lawm, rauqhov peb twb tuag rau txoj kevcai uas txeev muab peb khi cia ntawd lawm. Nimno peb tsis ua haujlwm rawsli txoj qub kevcai uas tau muab sau tseg cia lawm, tiamsis peb ua rawsli txoj kevcai tshiab uas Vaj Ntsujplig qhia.
Kevcai Thiab Kev Txhaum
7Yogli ntawd, peb yuav hais licas? Peb yuav hais tias txoj kevcai yog kev txhaum no lov? Tsis yog li ntawd! Twb yog muaj txoj kevcai, es kuv thiaj paub tias kev txhaum yog dabtsi. Yog txoj kevcai tsis tau hais tias, “Tsis txhob ntshaw luag tug,” ces kuv yeej yuav tsis paub tias kev ntshaw luag tug yog licas. #Khiav 20:17; 2Kev 5:21 8Tiamsis txoj kev txhaum tau muab tej nqe kevcai ua haukev tshoov kuv siab kom kuv ntshaw txhua yam. Yog tsis muaj txoj kevcai, ces txoj kev txhaum yeej tuag lawm. 9Yav tas los kuv ua kuv lub neej tsis muaj txoj kevcai kav kuv, tiamsis thaum muaj tej nqe kevcai ntawd lawm, kev txhaum ciali tshwm tuaj, 10thiab kuv thiajli tuag. Lub homphiaj ntawm tej nqe kevcai yog ua kom neeg tau txojsia, tiamsis nws coj kev ploj kev tuag los rau kuv. 11Kev txhaum tau muab tej nqe kevcai ua haukev los dag-ntxias kuv thiab tua kuv povtseg. #Chiv 3:13
12Yogli ntawd, txoj Kevcai yeej dawbhuv, thiab tej nqe kevcai los yeej dawbhuv, yeej ncajncees thiab zoo lawm. 13Tiamsis puas yog txoj Kevcai uas zoo ntawd ua rau kuv raug kev ploj kev tuag? Tsis yog li ntawd! Kev txhaum yog qhov uas tua kuv; kev txhaum siv yam uas zoo los ua rau kuv raug kev ploj kev tuag, kom sawvdaws thiaj paub tias txoj kev txhaum zoo licas. Yogli ntawd, los ntawm tej nqe kevcai ntawd, sawvdaws thiaj pom tias txoj kev txhaum phem kawg nkaus li.
Kev Sib Tawmtsam Hauv Lub Siab
14Peb paub tias txoj Kevcai yog hais txog sab ntsujplig; tiamsis kuv yog neeg nqaijtawv, kuv thiaj raug muab muag ua kev txhaum qhev. 15Kuv tsis totaub tej uas kuv ua; rauqhov tej uas kuv xav ua, kuv ho tsis ua, tiamsis tej uas kuv ntxub, kuv ho ua. #Kalat 5:17 16Yog kuv ua tej uas kuv tsis xav ua, qhov ntawd qhia rau kuv paub tias txoj Kevcai yeej zoo tiag. 17Yogli ntawd, kuv tsis yog tus uas ua, tiamsis txoj kev txhaum uas nyob hauv kuv yog tus ua. 18Kuv paub tias ntawm sab nqaijtawv, ces yeej tsis muaj ib qho zoo nyob rau hauv kuv li. Kuv yeej muaj lub siab xav ua qhov zoo, tiamsis kuv ua tsis tau. 19Qhov zoo uas kuv xav ua, kuv ho tsis ua, tiamsis qhov phem uas kuv tsis xav ua, kuv ho ua. 20Yog kuv ua tej uas kuv tsis xav ua, tej ntawd yeej tsis yog kuv ua, tiamsis txoj kev txhaum uas nyob hauv kuv yog tus ua.
21Yogli ntawd, kuv pom tias txoj kevcai ua haujlwm zooli no: thaum kuv xav ua qhov zoo, kuv pheej xaiv ua qhov phem. 22Hauv kuv lub siab yeej xav ua rawsli Vajtswv txoj kevcai xwb, 23tiamsis kuv pom tias muaj dua ib txoj kevcai uas tabtom ua haujlwm nyob rau hauv kuv lub cev; txoj kevcai ntawd pheej tawmtsam txoj kevcai uas nyob hauv kuv lub siab, thiab pheej yuam kuv mus ua txoj kev txhaum uas nyob hauv kuv lub cev li qhev. 24Uacas kuv yuav nyuajsiab ualuaj li lau? Leejtwg thiaj yuav cawm tau kuv dim ntawm lub cev uas tabtom coj mus rau txoj kev ploj kev tuag no? 25Ua Vajtswv tsaug, uas peb tus Tswv Yexus Khetos tau cawm kuv dim!
Yogli ntawd, kuv lub neej ces zooli no: kuv lub siab yog ua Vajtswv txoj kevcai li qhev, tiamsis kuv lub cev ntawm sab nqaijtawv yog ua qhev rau txoj kev txhaum li kevcai.
ទើបបានជ្រើសរើសហើយ៖
Loos 7: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.
