Mathais 27
27
Coj Yexus Mus Cuag Philaj
(Malakaus 15:1; Lukas 23:1-2; Yauhas 18:28-32)
1Thaum kajntug txoog, tagnrho cov thawj povthawj hlob thiab cov txwjlaug txawm sablaj pomzoo kom muab Yexus coj mus tua. 2Lawv muab Nws khi thiab coj mus cob rau Philaj uas yog cov neeg Loos tus tswvxeev.
Yudas Dai Tuag
(Tes Haujlwm 1:18-19)
3Thaum Yudas tus uas ntxeevsiab paub tias Yexus raug luag txiavtxim rau lawm, nws tusiab heev rau yam uas nws tau ua los, ces nws txawm nqa 30 npib nyiaj rovqab mus rau cov thawj povthawj hlob thiab cov txwjlaug. #Teshl 1:18-19
4Nws hais tias, “Kuv tau ua txhaum lawm vim kuv muab ib tug neeg uas tsis muaj txim rau luag coj mus tua!”
Lawv teb tias, “Tej ko muaj qabhau dabtsi rau peb? Ntawd yog koj li haujlwm!”
5Yudas txawm muab cov nyiaj ntawd povtseg rau hauv lub Tuamtsev thiab tawm mus; ces nws txawm mus dai cajdab tuag lawm.
6Cov thawj povthawj hlob thiaj khaws cov nyiaj ntawd thiab hais tias, “Yog yuav muab cov nyiaj no tso rau hauv lub txhab nyiaj hauv lub Tuamtsev, mas nws txhaum kevcai, vim cov nyiaj no yog nyiaj ntshav.” 7Thaum lawv sablaj pomzoo lawm, lawv thiaj muab cov nyiaj ntawd mus yuav ib tug uas puab laujkaub av thaj teb, cia ua tojntxas log cov uas yog Lwm Haivneeg. 8Vimli ntawd thaj teb ntawd thiaj raug hu ua, “Thaj Teb Ntshav” los txog niajhnub no.
9Tej no muaj tiav rawsli Yelemis, uas yog tus xibhwb cev Vajtswv lus tau qhia tseg lawm hais tias: “Lawv txais 30 lub npib nyiaj, uas yog tus nqi cov neeg Yixalayees pomzoo them nws, #Xekhali 11:12-13 10thiab lawv muab cov nyiaj ntawd mus yuav ib tug uas puab laujkaub av thaj teb, rawsli tus Tswv tau xaaj tseg rau kuv lawm.”
Philaj Taug Yexus Zaj
(Malakaus 15:2-5; Lukas 23:3-5; Yauhas 18:33-38)
11Thaum Yexus sawv ntawm cov neeg Loos tus tswvxeev xubntiag, nws nug Yexus hais tias, “Koj puas yog cov Yudais tus vajntxwv?”
Yexus teb tias, “Yog li koj hais.” 12Tiamsis thaum cov thawj povthawj hlob thiab cov txwjlaug kom Yexus, Nws yeej tsis teb ib los li.
13Philaj thiaj hais rau Yexus tias, “Koj tsis hnov txog tej lus uas lawv komtxim rau Koj no lov?”
14Tiamsis Yexus yeej tsis teb ib los li; qhov ntawd ua rau tus tswvxeev xav tsis thoob li.
Txiavtxim Muab Yexus Tua
(Malakaus 15:6-15; Lukas 23:13-25; Yauhas 18:39—19:16)
15Txhua zaus uas ua kevcai Hla Dhau, cov neeg Loos tus tswvxeev yeej tso ib tug neeg raug txim rawsli cov pejxeem thov. 16Thaum ntawd muaj ib tug txivneej raug txim hu ua Yexus Npalanpas uas sawvdaws yeej paub nws zoo. 17Thaum cov neeg coob-coob tuaj uake, Philaj nug lawv hais tias, “Nej xav kom kuv tso tus twg rau nej? Tso Yexus Npalanpas lossis tso Yexus tus uas hu ua Mexiyas?” 18Philaj yeej paub tseeb hais tias qhov uas lawv ntes Yexus tuaj rau nws ntawd twb yog vim lawv khib xwb.
19Thaum Philaj tseem nyob ntawm lub rooj hais plaub, nws tus pojniam txib neeg tuaj hais rau nws tias: “Koj tsis txhob ua ib yam dabtsi rau tus txivneej uas tsis muaj txim no, rauqhov naghmo kuv ua npausuav txog tus txivneej no mas ua rau kuv nyuajsiab kawg li.”
20Cov thawj povthawj hlob thiab cov txwjlaug ntxias kom cov pejxeem thov Philaj tso Npalanpas thiab muab Yexus coj mus tua. 21Tiamsis Philaj rov nug lawv hais tias, “Ob tug no, nej xav kom kuv tso tus twg rau nej?”
Lawv teb tias, “Npalanpas!”
22Philaj nug lawv hais tias, “Yogli ntawd, nej yuav kom kuv ua licas rau tus Yexus uas hu ua Mexiyas?”
Lawv teb tias, “Muab Nws ntsia rau saum ntoo khaublig!”
23Tiamsis Philaj nug hais tias, “Vim licas? Nws tau ua txhaum dabtsi?”
Lawv sawvdaws hajyam qw nrov-nrov hais tias, “Muab Nws ntsia rau saum ntoo khaublig!”
24Thaum Philaj pom tias ua tsis tau dabtsi ntxiv lawm, tiamsis cov pejxeem tsuas muaj yuav ua kom muaj kev kubntxhov xwb, nws txawm muab dej los ntxuav tes tabmeeg sawvdaws thiab hais tias, “Kuv tsis ris tus txivneej no txoj kev tuag! Qhov ntawd nej ris nej xwb!” #2Kev 21:6-9
25Ces cov pejxeem sawvdaws teb tias, “Cia Nws lub txim tuag los raug rau peb thiab peb cov menyuam!”
26Thaum ntawd, Philaj thiaj tso Npalanpas rau lawv; tomqab uas nws muab Yexus rau cov tubrog nplawm tag lawm, nws thiaj muab Yexus cob rau lawv coj mus ntsia rau saum ntoo khaublig.
Cov Tubrog Ua Saib Tsis Taus Yexus
(Malakaus 15:16-20; Yauhas 19:2-3)
27Thaum ntawd, Philaj cov tubrog txawm coj Yexus mus rau hauv tus tswvxeev lub vajloog, thiab tagnrho cov tubrog txawm los sawv vij Yexus. 28Lawv muab Yexus lub tsho hle thiab muab ib lub tsho ntev tsamxem rau Yexus hnav. 29Lawv muab pos kausntsaj qhaib ua ib lub kausmom looj Nws taubhau, thiab muab ib tug cwjnrig rau Nws sab tes xis tuav; ces lawv txawm txhoscaug ntawm Nws xubntiag luag thiab haislus saib tsis taus Nws, lawv hais tias, “Thov kom cov Yudais tus vajntxwv muaj sia nyob ntev!” 30Lawv nto qaubncaug rau Yexus, thiab muab tus lojkov los ntaus Yexus taubhau. 31Thaum lawv ua saib tsis taus Yexus tag lawm, lawv muab lub tsho ntev ntawd hle thiab rov muab Nws cev khaubncaws kho rau Nws hnav. Ces lawv txawm coj Nws tawm mus thiab muab Nws ntsia rau saum ntoo khaublig.
Yexus Raug Ntsia Rau Saum Ntoo Khaublig
(Malakaus 15:21-32; Lukas 23:26-43; Yauhas 19:17-27)
32Thaum lawv tabtom tawm mus, lawv ntsib ib tug txivneej hu ua Ximoos, uas tuaj hauv lub nroog Kulenes tuaj; lawv txawm ciali yuam kom nws kwv Yexus tus ntoo khaublig. 33Lawv thiaj mus txog ib qhov chaw uas hu ua Khaulakhauthas, uas txhais hais tias, “Pobtxha Taubhau.” 34Thaum ntawd lawv txawm muab cawv txivhmab tov xyaw kua iab rau Yexus haus; tiamsis thaum Nws saj mentsis, Nws txawm tsis kam haus lawm. #Nnkauj 69:21
35Thaum lawv muab Yexus ntsia rau saum ntoo khaublig lawm, lawv txawm muab Nws cev ristsho los twv seb leejtwg yuav tau yam twg. #Nnkauj 22:18 36Lawv ua li ntawd tag, ces lawv txawm zaum zov Nws. 37Lawv sau cov lus uas teemtxim rau Nws hais tias, “Tus no yog Yexus, uas yog cov Yudais tus Vajntxwv,” thiab muab ntsia ncaj ntawm Nws taubhau rau saud. 38Lawv kuj muab ob tug tubsab ntsia nrog Yexus thiab; ib tug nyob ntawm Nws sab xis thiab ib tug nyob ntawm Nws sab laug.
39Cov neeg uas dhau kev ntawd co taubhau nto thiab txobthuam Yexus hais tias, #Nnkauj 22:7; 109:25 40“Koj twb yuav rhuav lub Tuamtsev thiab peb hnub Koj yuav rov ua dua tshiab no ne! Yog Koj yog Vajtswv tus Tub tiag, ciali cawm Koj kom dim los mas! Ciali nqis saum ntoo khaublig ko los!” #Math 26:61; Yauh 2:19
41Cov thawj povthawj hlob thiab cov xibhwb qhia Kevcai thiab cov txwjlaug los kuj thuam Yexus ib yam nkaus thiab. Lawv hais tias, 42“Nws cawm tau lwmtus, tiamsis Nws ho cawm tsis tau Nws tuskheej! Nws twb yog cov Yixalayees tus vajntxwv ne! Nws kuj nqis kiag saum tus ntoo khaublig los tamsim no kom peb thiaj ntseeg tau Nws! 43Nws twb tsosiab rau Vajtswv thiab Nws twb hais tias Nws yog Vajtswv tus Tub no ne! Yogli ntawd, yog Vajtswv xav cawm Nws, kuj cia Vajtswv cawm Nws tamsim no!” #Nnkauj 22:8
44Ob tug tubsab uas raug ntsia rau saum ntoo khaublig nrog Yexus los kuj txobthuam Yexus tibyam thiab.
Yexus Txoj Kev Tuag
(Malakaus 15:33-41; Lukas 23:44-49; Yauhas 19:28-30)
45Thaum tavsu, thoobplaws lub tebchaws txawm ciali tsausntuj nti tau peb txoosteev. 46Kwvlam li thaum peb teev hnubqaij ntawd, Yexus txawm hu nrov-nrov hais tias, “Elis, Elis, lemas xanpathanis?” uas txhais hais tias, “Kuv tus Vajtswv, Kuv tus Vajtswv, vim licas Koj thiaj muab Kuv tsotseg lawm?” #Nnkauj 22:1
47Ibtxhia neeg uas sawv ntawd hnov Yexus hais li ntawd, lawv hais tias, “Nws tabtom hu Eliyas!” 48Cov neeg ntawd muaj ib tug txawm khiav mus muab ib lub xwbkuab raus cawv txivhmab qaub, muab chob rau ib tug pas thiab cev mus rau Yexus haus. #Nnkauj 69:21
49Tiamsis muaj ib cov hais tias, “Tos rawm, cia peb tos seb puas pom Eliyas los cawm kom Nws dim!”
50Yexus rov hu dua ib zaug nrov-nrov, ces Nws txawm tusiav nrho lawm.
51Tamsim ntawd daim ntaub uas thaiv hauv lub Tuamtsev txawm ntuag rhe saum hau ti nkaus rau hauv taw ua ob daig. Lub ntiajteb uazog koog, tej pobzeb pobtsuas tawg zomzaws, #Khiav 26:31-33 52tej qhovntxa txawm qhib thiab ntau tus ntseeg Vajtswv uas tuag lawm txawm ciajsia rov los, 53thiab tawm hauv lawv tej qhovntxa los. Tomqab uas Yexus sawv hauv qhovtuag rovqab los lawm, lawv cov uas ciajsia sawv rov los ntawd kuj mus rau hauv lub Nroog Dawbhuv thiab muaj neeg ntau leej pom lawv.
54Thaum tus thawj tubrog pawg pua thiab cov tubrog uas zov Yexus pom lub ntiajteb uazog koog thiab pom txhua yam uas muaj tshwm los ntawd, lawv ntshai kawg li, lawv sibtham hais tias, “Tseeb tiag lau, tus no yeej yog Vajtswv tus Tub!”
55Muaj ntau tus pojniam tuaj sawv deb-deb saib. Lawv yog cov uas nrog Yexus tuaj pem Kalilais tuaj thiab yeej ibtxwm pab Nws. #Lukas 8:2-3 56Ibtxhia ntawm cov pojniam ntawd yog Malis Madalas, Malis uas yog Yakaunpaus thiab Yauxej niam, thiab muaj ib tug yog Xenpedais tus pojniam.
Log Yexus
(Malakaus 15:42-47; Lukas 23:50-56; Yauhas 19:38-42)
57Thaum yuav tsausntuj, muaj ib tug txivneej npluanuj, hu ua Yauxej uas nyob hauv lub nroog Alimathias txawm tuaj txog. Nws kuj yog Yexus ib tug thwjtim thiab. 58Nws mus cuag Philaj thiab thov kom muab Yexus lub cev rau nws. Ces Philaj thiaj tsocai kom lawv muab Yexus lub cev rau Yauxej. 59Yogli ntawd, Yauxej thiaj txo Yexus lub cev los, muab ib chaws ntaub mag tshiab los qhwv lub cev, 60thiab muab tso rau hauv nws lub qhovntxa tshiab uas nws nyuamqhuav txaug tau rau hauv ib phab pobzeb. Nws dov ib daim lagzeb loj los npog lub rooj ntxas cia, ces nws txawm mus tsev lawm. 61Malis Madalas thiab muaj dua ib tug Malis, nkawd kuj zaum sab tid ntsiantsoov lub rooj ntxas thiab.
Cov Fajxwm Uas Nyob Tom Lub Qhovntxa
62Hnub tomqab uas yog hnub Xanpataus, cov thawj povthawj hlob thiab cov Falixais txawm mus cuag Philaj 63thiab hais tias, “Tus Tswv, peb nco tau hais tias thaum tus neeg dag ntawd tseem muaj sia nyob mas Nws tau hais tias, ‘Tomqab peb hnub Kuv yuav sawv rovqab los.’ #Math 16:21; 17:23; 20:19; Malak 8:31; 9:31; 10:33-34; Lukas 9:22; 18:31-33 64Yogli ntawd, thov koj tso neeg mus ua tibzoo zov lub qhovntxa kom puv peb hnub. Yog tsis ua li ntawd, Nws cov thwjtim yuav mus nyiag Nws lub cev thiab mus qhia rau sawvdaws hais tias Nws twb sawv hauv qhovtuag rovqab los lawm. Tej uas lawv dag zaum no tseem yuav hajyam loj dua thawjzaug thiab.”
65Philaj txawm hais rau lawv tias, “Nej ciali coj ib pab tubrog mus zov lub qhovntxa kom zoo npaum li nej muaj peevxwm zov tau.”
66Lawv txawm mus ua kom lub qhovntxa ntawd khov heev los ntawm qhov uas nias kiag homthawj rau daim lagzeb thiab tso tubrog zov zoo heev.
ទើបបានជ្រើសរើសហើយ៖
Mathais 27: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.
