Levis Kevcai 1
1
Hlawv Tagnrho Tej Khoom Fij
1Tus TSWV hu Mauxes ntawm lub Tsevntaub Sibntsib tuaj thiab muab cov kevcai no 2rau cov Yixalayees siv thaum lawv muab khoom tuaj fij.
“Thaum nej coj ib tug tsiaj tuaj tua hlawv fij, txawm yog nej yuav coj tus nyuj lossis tus yaj lossis tus tshis los xij. 3Yog nej coj ib tug nyuj tuaj tua hlawv fij, nej yuavtsum coj tus uas tsis muaj ib qho phem hlo li. Nej yuavtsum cab tuaj rau ntawm lub qhovrooj uas mus rau hauv lub Tsevntaub Sibntsib, kom tus TSWV thiaj txaussiab txais yuav nej. 4Nej yuavtsum tsa tes rau saum tus nyuj lub taubhau, tus nyuj ntawd thiaj yuav ua tau khoom theej txhoj tshem nej lub txim. 5Nej yuavtsum muab tus nyuj ntawd tua tabmeeg tus TSWV, thiab Aloos cov tub uas yog cov povthawj hlob yuav muab cov ntshav ntawd coj mus fij rau tus TSWV thiab muab coj mus hliv ywg thoobplaws lub thaj ntawd plaub sab huv tibsi uas nyob ntawm lub qhovrooj uas mus rau hauv lub Tsevntaub Sibntsib. 6Nej yuavtsum muab tus tsiaj ntawd laws tawv thiab muab txiav ua tej thooj, 7ces Aloos cov tub uas yog cov povthawj hlob mam muab taws coj mus teeb rau saum lub thaj thiab tis hluavtaws rau. 8Lawv mamli muab cov nqaij uas txiav ua tej thooj, lub taubhau, thiab cov nqaij rog mus tso rau saum cov taws uas teeb saum lub thaj. 9Nej yuavtsum muab dej ntxuav tej plab hnyuv, siab-ntsws, thiab ob cesqab, ces tus povthawj hlob uas khiav haujlwm mamli muab hlawv huv tibsi rau saum lub thaj ua khoom fij theej txhoj. Tej pa khoom noj uas muab fij no yuav tswqab ntxiag ua rau tus TSWV txaussiab.
10“Yog nej muab nej ib tug yaj lossis ib tug tshis tuaj ua khoom fij, nej yuavtsum muab tus txiv uas tsis muaj ib qho phem hlo li. 11Nej yuavtsum muab tus tsiaj ntawd tua rau ntawm lub thaj sab ped, thiab cov povthawj hlob muab cov ntshav coj mus hliv ywg thoobplaws lub thaj ntawd plaub sabhauv tibsi. 12Tomqab nej muab tus tsiaj ntawd txiav ua tej thooj lawm, ces tus povthawj hlob uas khiav haujlwm mamli muab lub taubhau thiab cov nqaij rog mus tso rau saum cov taws uas teeb rau saum lub thaj. 13Nej yuavtsum muab dej ntxuav tej plab hnyuv, siab-ntsws, thiab ob cesqab, ces tus povthawj hlob muab coj mus fij rau tus TSWV thiab muab hlawv huv tibsi rau saum lub thaj. Tej pa khoom noj uas muab fij no yuav tswqab ntxiag ua rau tus TSWV txaussiab.
14“Yog nej muab noog tuaj tua hlawv ua khoom fij, tus noog ntawd yuavtsum yog ib tug nquab taug lossis nquab nyeg. 15Tus povthawj hlob yuav coj tus noog ntawd mus rau ntawm lub thaj, muab lub cajdab ntswj kom tu, thiab muab lub taubhau hlawv rau saum lub thaj. Cia cov ntshav ntws kom tag rau ntawm lub thaj ib sab. 16Nws yuav tau muab lub txia dawj povtseg rau sab hnubtuaj ntawm lub thaj uas yog qhov chaw nchuav cov tshauv. 17Nws yuav tau tuav ob sab tis dua kom tus noog lub cev ntuag, tiamsis tsis txhob pub ob sab tis tu, thiab muab tus noog ntawd hlawv kom tagnrho rau saum lub thaj. Tej pa khoom noj uas muab fij no yuav tswqab ntxiag ua rau tus TSWV txaussiab.
ទើបបានជ្រើសរើសហើយ៖
Levis Kevcai 1: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.