Kalatias 1
1
1Kuv yog Paulus, uas yog Vajtswv ib tug timthawj. Qhov uas kuv tau ua Vajtswv ib tug timthawj, tsis yog neeg lossis yog ib lub koomhaum ntawm sab nqaijtawv twg tsa kuv ua, tiamsis yog Yexus Khetos thiab Vajtswv uas yog peb Leejtxiv tus uas tau tsa Yexus sawv hauv qhovtuag rovqab los tsa kuv ua. 2Cov kwvtij ntseeg uas nrog kuv nyob, lawv puavleej xa lus nojqab nyobzoo tuaj rau cov pawg ntseeg uas nyob hauv Kalatias:
3Thov Vajtswv uas yog peb Leejtxiv thiab tus Tswv Yexus Khetos pub txoj hmoovhlub thiab kev nyabxeeb rau nej.
4Khetos muab Nws txojsia los txhiv peb lub txim, kom peb dim ntawm tej kev phem uas nyob rau tiam no. Qhov uas Nws ua li ntawd yog rawsli peb tus Vajtswv uas yog Leejtxiv lub siab nyiam. 5Thov kom Vajtswv tau koobmeej mus ibtxhiab ibtxhis li! Amees.
Tsuas Muaj Tib Txoj Moo Zoo Xwb
6Kuv xav tsis thoob rau nej li, hais tias uacas tibpliag xwb nej ciali muab Vajtswv tus uas tau hu nej los ntawm Khetos txoj hmoovhlub#1:6: Khetos txoj hmoovhlub; tej phau ntawv qub uas xuas tes sau, muaj los ntawm Nws txoj hmoovhlub. ntawd tsotseg thiab ciali mus txais yuav lwm zaj uas tsis yog Vajtswv Txoj Moo Zoo. 7Qhov tseeb tiag yeej tsis muaj “lwm Txoj Moo Zoo,” li. Kuv hais li no rauqhov muaj qeeleej ua rau nej ntxhovsiab, thiab lawv xav hloov Yexus Khetos Txoj Moo Zoo. 8Txawm hais tias yog peb lossis yog ib tug timtswv ceebtsheej kiag, los qhia lwm zaj rau nej uas txawv Txoj Moo Zoo uas peb twb xub qhia rau nej lawm, ces kom tus ntawd raug poob mus rau hauv ntujtawg! 9Yav tas los peb twb hais rau nej lawm, nimno los kuv rov hais dua ib zaug rau nej hais tias, yog leejtwg tuaj qhuabqhia lwm zaj rau nej uas txawv Txoj Moo Zoo uas nej twb ntseeg lawm, ces kom tus ntawd raug poob mus rau hauv ntujtawg!
10Kuv hais li no puas yog kuv hais kom neeg qhuas kuv? Tsis yog li ntawd! Qhov kuv xav tau yog kom Vajtswv txaussiab rau kuv xwb! Puas yog kuv xav kom neeg nyiam kuv? Yog kuv tseem ua li ntawd, ces kuv yeej yuav ua tsis tau Yexus Khetos ib tug tubqhe.
Qhov Uas Paulus Tau Los Ua Ib Tug Timthawj
11Cov kwvtij, kuv xav qhia rau nej paub tias Txoj Moo Zoo uas kuv qhia no tsis yog hais txog neeg. 12Kuv yeej tsis tau kawm zaj no ntawm leejtwg, lossis yeej tsis tau muaj neeg qhia zaj no rau kuv li, tiamsis tus uas muab zaj no nthuav qhia rau kuv yog Yexus Khetos.
13Nej twb hnov txog kuv lub neej yav tas los thaum uas kuv tseem coj cov Yudais txoj kevcai, hais tias kuv tsimtxom cov ntseeg Vajtswv npaum licas thiab xav muab cov ntseeg ua kom puastsuaj tag huv tibsi. #Teshl 8:3; 22:4-5; 26:9-11 14Thaum kuv tseem coj cov Yudais txoj kevcai, peb cov kwvtij Yudais uas nrog kuv ib phaum, mas kuv yog tus uas ua tau tshaj thiab yog tus uas coj tau peb cov yawgkoob tej kevcai nruj dua sawvdaws. #Teshl 22:3
15Tiamsis nyob rau hauv Vajtswv txoj hmoovhlub, Nws twb xaiv kuv cia thaum nruabthiab los lawm, thiab hu kom kuv los ua Nws tes haujlwm. #Teshl 9:3-6; 22:6-10; 26:13-18 16Vajtswv pomzoo qhia Nws tus Tub rau kuv paub, kom kuv thiaj mus qhia tau Txoj Moo Zoo uas hais txog Nws tus Tub rau Lwm Haivneeg. Kuv tsis tau mus nrog ib tug neeg twg tuavxam tswvyim 17lossis mus rau saum lub nroog Yeluxalees, es mus ntsib cov uas twb xub ua timthawj uantej kuv. Tiamsis tamsim ntawd kuv ciali mus rau tebchaws Alanpias thiab dhau ntawd ces kuv rovqab mus rau hauv lub nroog Damaxakas. 18Peb lub xyoos tomqab ntawd kuv mamli mus saib Petus hauv lub nroog Yeluxalees thiab nrog nws nyob tau kaum-tsib hnub. #Teshl 9:26-30 19Kuv yeej tsis pom lwmtus timthawj li, tsuas pom Yakaunpaus#1:19: lwmtus timthawj li, tsuas pom Yakaunpaus; lossis lwmtus timthawj li, tus uas kuv pom ces tsuas yog Yakaunpaus nkaus xwb. uas yog tus Tswv tus kwv xwb.
20Tej uas kuv sau tuaj rau nej no yog kuv hais qhov tseeb xwb. Vajtswv paub tias kuv yeej tsis dag nej!
21Tomqab ntawd kuv thiaj mus rau tej cheebtsam uas nyob hauv lub xeev Xilias thiab Kilikias. 22Thaum ntawd cov ntseeg uas nyob hauv lub xeev Yudas, lawv tseem tsis tau paub kuv meej pestsawg. 23Lawv tsuas hnov tej uas lwmtus hais tias: “Tus neeg uas thaum ub txeev tsimtxom peb, nimno nws ho qhuabqhia txog txoj kev ntseeg uas yav tas los nws tau npajsiab yuav muab ua kom puastsuaj mus!” 24Yogli ntawd, lawv thiaj ua Vajtswv tsaug rau tej uas Nws tau ua nyob rau hauv kuv.
ទើបបានជ្រើសរើសហើយ៖
Kalatias 1: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.