Khiav Dim 27
27
Lub Thaj
(Khiav Dim 38:1-7)
1“Ciali muab ntoo kubtwg los ua ib lub thaj xwmfab xwmmeem. Ntev 2.2 mev, dav 2.2 mev, thiab siab 1.3 mev. 2Ua plaub tug kub rau saum plaub cegkaum thaj. Plaub tug kub ntawd, txua koom hlo nrog lub thaj thiab muab tooj vuam huv tibsi. 3Ua ib co ciblaug ntim tshauv, ib co duav, ib co tais, ib co diav rawg thiab ib co yias rau ncaigtaws. Tej cuabyeej no puavleej yog muab tooj ua. 4Muab tooj ua ib daim ntxaij; thiab muab tooj ntaus ua plaub lub khawb ntsia rau plaub cegkaum ua tes nqa. 5Muab daim ntxaij tooj ntawd tso rau hauvqab ntawm tus ntug lub thaj txog ntua ibnrab. 6Muab ntoo kubtwg ua ob tug las uas kwv lub thaj, thiab muab tooj vuam rau, 7thiab muab ob tug las ntawd ntxig rau ntawm plaub lub khawb uas ntsia rau ntawm lub thaj ob sab. 8Muab txiag ntoo ua lub thaj thiab tseg hauv plawv khoob, rawsli qhov uas Kuv tau qhia rau koj saum roob lawm.
Xov Vaj Ncig Lub Tsevntaub Sibntsib
(Khiav Dim 38:9-20)
9“Koj yuavtsum xov vaj ncig lub tshavloog ntawm Tsevntaub. Yuavtsum muab daim ntaub mag uas ntev 44 mev los xov rau sab nrad, 10muab neesnkaum tus kav tooj ua ncej, muab neesnkaum lub taw tooj los tiag taw, tiamsis cov khawb thiab cov hlua pav yog muab nyiaj ua. 11Xov zoo ib yam li ntawd rau sab ped thiab. 12Sab hnubpoob, yuavtsum muab daim ntaub uas ntev 22 mev los xov ncig lub tshavloog ntawd, txhos kaum tus ncej thiab kaum lub taw. 13Sab hnubtuaj, uas yog lub roojloog nkag mus rau hauv, sab tshavloog ntawd xov 22 mev dav ib yam nkaus thiab. 14-15Ib sab roojloog twg muab cov ntaub uas ntev 6.6 mev los dai rau, thiab txhos peb tug ncej thiab peb daim tiag taw.
16“Lub qhovrooj uas nkag mus hauv lub tshavloog, yog muab daim ntaub mag uas ntev 9 mev uas xuas xov xiav, xov tsamxem, thiab xov liab, xaws ua pajntaub txaij nraug zees rau. Txhos plaub tug ncej thiab plaub lub taw tiag dai daim ntaub ntawd. 17Tagnrho cov ncej uas xov ncig lub tshavloog ntawm lub tsev, puavleej muab xov nyiaj pav, tej khawb khawm los yog khawb nyiaj, thiab cov tiag taw puavleej yog tooj. 18Lub tshavloog, qhov ntev muaj 44 mev, qhov dav muaj 22 mev, thiab qhov siab muaj 2.2 mev. Muab cov ntaub mag uas zoo heev xaws ntswj ua ntsa vaj thiab muab tooj ua cov tiag taw. 19Tagnrho txhua yam cuabyeej siv hauv lub Tsevntaub, tej tswg uas txhos rub lub Tsevntaub thiab tus ntsa vaj yuavtsum yog muab tooj ua.
Tu Lub Teeb
(Levis Kevcai 24:1-4)
20“Koj yuavtsum xaaj rau cov Yixalayees kom lawv nqa cov roj txivntoo uas zoo tshajplaws tuaj rau koj sam rau lub teeb, kom thiaj tau taws txhua hmo. 21Aloos thiab nws cov tub ua cov uas saib thiab taws lub teeb hauv lub Tsevntaub Sibntsib uas ncaj lub Phijxab Lus Cogtseg ntawm daim ntaub sabnraum no kom cig tabmeeg Kuv ib hmos kajntug. Cov Yixalayees thiab lawv cajces yuavtsum ceev cov lus xaaj no mus ibtxhis li.
ទើបបានជ្រើសរើសហើយ៖
Khiav Dim 27: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.