Efexaus 4
4
Kev Koomxeeb Ntawm Lub Cev
1Yogli ntawd, kuv tus uas tabtom raug kaw rau hauv tsev lojcuj vim ua Vajtswv tes haujlwm, kuv thov nquahu kom nej ua nej lub neej kom phim qhov uas Vajtswv tau hu nej los cuag Nws lawm. 2Nej yuavtsum txo hwjchim txhua lub sijhawm, ua lub siab mosmuag thiab ua siabntev. Nej ib leeg yuavtsum ua siabntev rau ib leeg, sawvdaws thiaj paub tias nej muaj kev hlub tiag. #Kaulx 3:12-13 3Nej yuavtsum ua txhua yam txhua tsav kom nej ceev tau txoj kev koomxeeb uas Vajtswv tus Ntsujplig twb muab rau nej thiab twb rub nej los nyob uake sibhaum lawm. 4Tsuas muaj ib lub cev thiab ib tug Ntsujplig xwb, zoo ib yam li muaj ib txoj kev ciasiab uas Vajtswv tau hu nej los rau txoj kev ciasiab ntawd ntag. 5Tsuas muaj tibtug Tswv, tib txoj kev ntseeg, thiab tib txoj kevcai rausdej xwb. 6Tsuas muaj tibtug Vajtswv uas yog tagnrho sawvdaws Leejtxiv, nws yog tus uas kav sawvdaws, ua haujlwm tshwm los ntawm sawvdaws, thiab nyob hauv sawvdaws.
7Peb txhua tus nyias tau txais nyias ib qhov khoomplig tshwjxeeb rawsli Khetos muab pub rau peb. 8Vimli no, Vajtswv Txojlus thiaj hais tias:
Thaum Nws nce mus rau saum qhov chaw siab,
Nws coj cov neeg uas raug ntes coob leej nrog nws mus;
Nws muab ntau yam khoomplig rau neeg. #Nnkauj 68:18
9Lolus uas hais tias “Nws nce mus rau saud” yog txhais licas? Lolus ntawd txhais hais tias, Nws twb xub nqis mus rau qhov uas tob tshajplaws hauv nruab a.#4:9: qhov uas tob tshajplaws hauv nruab a; lossis qhov tob dua, uas yog hauv nruab a. 10Yogli ntawd, tus uas nqis mus rau hauv nruab a yog tibtug uas nce mus siab tshaj saum nruabntug, kom Nws thiaj nyob tau txhua qhov hauv lub qabntuj no.
11Nws yog tus uas pub khoomplig rau neeg, Nws tsa qeeleej ua cov timthawj, qeeleej ua cov xibhwb cev Vajtswv lus, qeeleej ua cov coj Txoj Moo Zoo mus qhia rau lwmtus, qeeleej ua cov xibhwb saib cov ntseeg thiab ua cov uas qhia lawv. 12Nws ua li ntawd twb yog Nws npaj kom txhua tus uas yog Vajtswv cov neeg paub ua Vajtswv tes haujlwm, kom Yexus Khetos lub cev thiaj txawj lojhlob 13mus txog qhov uas peb sawvdaws ua tau ib lub siab nyob rau hauv txoj kev ntseeg, peb paub tseeb txog Vajtswv tus Tub, peb dhau mus ua ib co neeg uas ruaj-khov rau sab kev ntseeg, thiab ua tau lub neej zooli Khetos lub.
14Thaum ntawd peb yuav tsis zooli tej menyuam yaus, yuav tsis raug cua muab ntsawj mus ntsawj los uas yog cov neeg dag-ntxias tej lus qhia; lawv ua rau lwmtus yuamkev los ntawm lawv tej lus haub-ntxias ntawd. 15Peb tsis txhob ua li ntawd, peb yuavtsum haislus tseeb vim peb muaj kev hlub, peb yuavtsum lojhlob txhua fab rau ntawm Khetos, tus uas yog lub taubhau. 16Nws yog tus uas kav tagnrho lub cev tej tes taw thiab tej siab-ntsws. Txhua yam thiaj los sibtxuas uake, thiab tagnrho lub cev thiaj muaj tej ya txha thiab leeg los tuav. Yogli ntawd, thaum txhua yam ntawm lub cev nyias ua nyias tes haujlwm thiab sibhlub sibpab, ces lub cev yuav lojhlob khovkho. #Kaulx 2:19
Lub Neej Tshiab Hauv Khetos
17Ntawm tus Tswv lub npe, kuv thov ceebtoom rau nej hais tias, nej tsis txhob ua nej lub neej zooli cov neeg uas tsis paub Vajtswv ua ntxiv lawm. Lawv tej kev xav yeej tsis muaj qabhau li. 18Lawv txoj kev totaub los tsausntuj nti thiab lawv tsis muaj feem tau txojsia uas Vajtswv pub rau cov ntseeg, vim lawv yeej tsis paub dabtsi li thiab lawv lub siab tawv dhau. 19Lawv yeej tsis paub txajmuag rau ib yam dabtsi li, lawv tso lawv lub cev mus ua txhua yam kev phem kev qias uas tsis muaj leejtwg txwv tau.
20Nej twb tsis tau kawm hais tias Khetos ua li ntawd! 21Nej twb hnov txog Nws zaj thiab nej twb tau txais tej lus qhia uas yog txoj kev tseeb hauv Yexus lawm. 22Yogli ntawd, nej yuavtsum muab nej lub siab qub uas coj li yav tas los lawm tso povtseg, vim lub siab qub uas niajhnub ntshaw ua kev phem kev qias ntawd yuav ua rau nej lub neej puastsuaj mus. #Kaulx 3:9 23Nej lub siab thiab tej kev xav yuavtsum raug muab hloov dua tshiab tagnrho huv tibsi. 24Nej yuavtsum coj dua lub neej tshiab, uas yog raug tsim dua tshiab kom zooli Vajtswv tus yamntxwv, kom sawvdaws thiaj pom tias nej ua nej lub neej nyob rau hauv txoj kev ncajncees thiab dawbhuv uas yog qhov tseeb tiag. #Kaulx 3:10; Chiv 1:26
25Yogli ntawd nej tsis txhob dag ntxiv lawm! Txhua tus yuavtsum haislus tseeb rau kwvtij zejzog uas yog cov ntseeg, rauqhov peb sawvdaws puavleej yog tej tes taw uas koom rau Khetos lub cev. #Xekhali 8:16 26Yog thaum twg nej npautaws, tsis txhob ua txhaum, thiab tsis txhob npautaws mus txog thaum lub hnub poobqho. #Nnkauj 4:4 (LXX) 27Tsis txhob pub sijhawm rau dab ntxwgnyoog kiag li. 28Tus uas txeev ua tubsab tubnyiag los tsis txhob ua ntxiv lawm, tiamsis nws yuavtsum mus khwv ncaj khwv ncees los ntawm nws txhais tes, kom nws thiajli yuav muaj los pab nws lub neej thiab muaj peevxwm pab cov neeg txomnyem.
29Tsis txhob cia ib lolus phem tawm hauv nej lub qhovncauj los kiag li, tiamsis nej yuavtsum siv tej lus zoo uas yuav pab thiab txhawb tau lwmtus rawsli lawv tej kev ntshaw xwb, kom tej lus uas nej hais ntawd thiaj yuav muajnqis rau cov uas mloog. 30Thiab tsis txhob ua rau Vajtswv tus Ntsujplig uas Dawbhuv tusiab; rauqhov tus Ntsujplig ntawd yog Vajtswv lub homthawj uas Nws muab nias rau nej, uas qhia hais tias nej yog Vajtswv haivneeg, thiab kom nej paub meej txog Hnub uas Vajtswv yuav tso kom nej dim. 31Ciali muab txhua yam kev iabsiab, kev uanruj uatsiv, kev npautaws, kev sibcav sibceg lossis kev txobthuam lwmtus tso povtseg, thiab tsis txhob muaj ib nploojsiab uas ntxub ntxaug lwmtus kiag li. 32Nej ib tug yuavtsum ua siabzoo rau ib tug, ib tug hlub ib tug, thiab ib tug zamtxim rau ib tug, ib yam li Vajtswv twb zamtxim rau nej nyob rau hauv Khetos lawm. #Kaulx 3:13
ទើបបានជ្រើសរើសហើយ៖
Efexaus 4: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.