Tes Haujlwm 21

21
Paulus Mus Rau Nram Yeluxalees
1Thaum peb haislus sibncaim rau lawv tag ces peb txawm mus lawm. Peb caij nkoj ncajnraim mus rau nram lub povtxwv Kaus; hnub tomqab peb mus txog nram lub povtxwv Laudes, thiab tomqab ntawd peb mus rau lub nroog Patalas. 2Peb pom ib lub nkoj yuav mus rau tim lub xeev Faunikias, peb txawm caij lub nkoj ntawd mus. 3Thaum peb mus pom lub povtxwv Xaipas lawm, peb txawm mus sab qabteb rau tim tebchaws Xilias. Peb txawm mus nres nkoj rau ntawm ntug dej lub nroog Thailes, rauqhov yuav tau thau khoom hauv lub nkoj rau ntawd.
4Thaum peb mus nrhiav tau cov ntseeg uas nyob hauv lub nroog Thailes lawm, peb txawm nrog lawv nyob tau xya hnub. Vaj Ntsujplig qhia rau lawv kom lawv tsis txhob pub Paulus mus nram lub nroog Yeluxalees. 5Tiamsis thaum dhau xya hnub lawm, peb thiaj ncaim lawv mus. Lawv txhua tus nrog rau lawv tej pojniam menyuam sawvdaws puavleej xa peb tawm hauv nroog mus txog nram ntug hiavtxwv, ces peb sawvdaws txawm txhoscaug thov Vajtswv. 6Tomqab ntawd peb ib leeg haislus sibncaim rau ib leeg; peb nce rau hauv nkoj, thiab lawv txawm rovqab mus tsev lawm.
7Peb caij nkoj mus ntxiv, uas yog tawm hauv lub nroog Thailes mus rau nram lub nroog Pataulemais; peb mus saib cov ntseeg hauv lub nroog thiab nrog lawv nyob tau ib hnub. 8Hnub tomqab peb thiaj mus txog rau nram lub nroog Xixaleyas. Peb mus so hauv Filiv uas yog ib tug qhia Txoj Moo Zoo lub tsev. Nws yog ib tug ntawm xya leej uas tau raug xaiv los pab haujlwm nyob rau hauv lub nroog Yeluxalees. 9Nws muaj plaub tug ntxhais tsis tau yuav txiv, thiab lawv puavleej yog cov cev Vajtswv Txojlus. 10Peb nyob ntawd tau ob-peb hnub, txawm muaj ib tug xibhwb cev Vajtswv lus hu ua Ankanpus tuaj nram xeev Yudas tuaj txog. #Teshl 11:28 11Nws tuaj saib peb, ces nws txawm muab Paulus txoj siv sia los khi nws tes nws taw thiab hais tias, “Vaj Ntsujplig hais li no hais tias: Cov Yudais uas nyob hauv lub nroog Yeluxalees yuav muab tus tswv ntawm txoj siv sia no khi ib yam li no, thiab lawv yuav muab nws cob rau Lwm Haivneeg.”
12Thaum peb hnov li ntawd, peb thiab cov ntseeg uas nyob ntawd tau cheem thiab thov kom Paulus tsis txhob mus rau saum lub nroog Yeluxalees. 13Tiamsis Paulus teb tias, “Vim licas nej thiaj quaj thiab ua rau kuv nyuajsiab? Kuv yeej npaj txhij lawm, tsis yog yuav raug khi nyob hauv lub nroog Yeluxalees xwb, tiamsis txaussiab hlo tuag rau ntawm tus Tswv Yexus lub npe.”
14Peb cheem tsis tau nws, yogli ntawd peb thiaj ua ib siab cia nws mus; peb hais rau nws tias, “Thov kom mus rawsli tus Tswv pomzoo.”
15Tomqab peb nyob hnub puav rau qhov chaw ntawd lawm, peb txawm tunra thiab mus rau saum lub nroog Yeluxalees. 16Muaj qeeleej thwjtim uas nyob hauv lub nroog Xixaleyas kuj nrog peb mus thiab, lawv tau coj peb mus so hauv Manaxoos tsev. Yav tas los Manaxoos nyob pem lub povtxwv Xaipas thiab nws twb ntseeg Vajtswv ntev los lawm.
Paulus Mus Saib Yakaunpaus
17Thaum peb mus txog hauv lub nroog Yeluxalees, cov ntseeg tostxais peb ntawm txoj kev zoosiab kawg li. 18Hnub tomqab Paulus nrog peb mus saib Yakaunpaus; tagnrho cov txwjlaug hauv pawg ntseeg kuj tuaj nyob rau ntawd thiab. 19Paulus tau hais kev nojqab nyobzoo rau lawv thiab piav txhua yam uas Vajtswv tau siv nws ua haujlwm rau Lwm Haivneeg rau lawv mloog.
20Thaum lawv hnov li ntawd, lawv sawvdaws ua Vajtswv tsaug. Lawv hais tias, “Tijlaug, koj pom tias cov Yudais muaj ntau txhiab leej tau los ntseeg Yexus lawm, thiab lawv yog cov uas coj txoj Kevcai nruj heev. 21Lawv hnov tias koj pheej mus qhia rau txhua tus neeg Yudais uas nyob hauv Lwm Haivneeg tej tebchaws kom lawv tso Mauxes txoj Kevcai tseg, kom lawv tsis txhob muab lawv tej menyuam ua kevcai txiav, lossis tsis txhob ua rawsli cov Yudais tej kevlig kevcai uas sawvdaws ibtxwm coj los lawm. 22Lawv yeej yuav hnov tias koj twb tuaj txog ntawm no lawm. Yogli ntawd, peb yuav ua licas?
23“Peb xav kom koj ua li no. Muaj plaub tug txivneej nyob ntawm no, lawv tau ua kevcai coglus lawm. #Teev 6:13-21 24Koj nrog lawv mus thiab nrog lawv ua kevcai ntxuav, koj pab them lawv tej nqi, kom lawv thiaj chais tau lawv tej plaubhau.#21:24: chais tau lawv tej plaubhau: mus saib ntawm 18:18. Yog koj ua li ntawd, sawvdaws thiaj paub tias tej uas lawv hnov ntawd tsis muaj tseeb, koj yeej tseem coj rawsli Mauxes txoj Kevcai. 25Peb twb sau ib tsab ntawv xa mus rau Lwm Haivneeg uas tau los ntseeg Vajtswv lawm hais tias, peb pomzoo kom lawv tsis txhob noj tej zaub-mov uas twb muab fij rau tej mlom lawm, tsis txhob noj ntshav, tsis txhob noj tej tsiaj uas hlua zawm cajdab tuag, thiab tsis txhob deev luag pojniam luag txiv.” #Teshl 15:29
26Yogli ntawd, Paulus thiaj coj plaub tug txivneej ntawd mus, thiab hnub tomqab ntawd nws nrog lawv ua kevcai ntxuav. Dhau ntawd, nws tau mus rau hauv lub Tuamtsev thiab qhia tias thaum twg lawv mamli ua kevcai ntxuav tiav, hnub ntawd yog hnub uas lawv ib leeg twg yuav tau nqa khoom tuaj fij rau Vajtswv.
Paulus Raug Ntes Hauv Lub Tuamtsev
27Thaum yuavluag dhau xya hnub ntawd, muaj qeeleej Yudais uas tuaj pem lub xeev Exias tuaj txawm pom Paulus nyob hauv lub Tuamtsev. Lawv tau ua kom tagnrho cov pejxeem muaj kev kubntxhov ces lawv txawm ntes Paulus. 28Lawv qw hais tias, “Cov Yixalayees! Nej ciali los pab peb! Tus no yog tus uas pheej mus qhia txhua qhov kom sawvdaws tawmtsam cov Yixalayees, tawmtsam Mauxes txoj Kevcai, thiab lub Tuamtsev no. Tsis tas li ntawd xwb, nws tseem coj Lwm Haivneeg tuaj rau hauv lub Tuamtsev thiab ua rau lub Tuamtsev uas dawbhuv no ciali tsis huv lawm.” ( 29Lawv hais li ntawd, rauqhov lawv pom Rhaufimus uas tuaj pem lub nroog Efexaus tuaj, nrog Paulus uake hauv lub nroog, ces lawv txawm xav tias Paulus yeej coj Rhaufimus mus rau hauv lub Tuamtsev lawm.) #Teshl 20:4
30Tagnrho lub nroog txawm muaj kev kubntxhov. Tej pejxeem sawvdaws txawm khiav tuaj uake, ntes Paulus thiab muab nws cab tawm hauv lub Tuamtsev mus. Tamsim ntawd lawv txawm muab lub Tuamtsev tej qhovrooj kaw kiag lawm. 31Thaum cov neeg coob-coob ntawd tabtom yuav muab Paulus tua povtseg, txawm muaj ib tug mus qhia rau tus thawj tubrog pawg txhiab uas saib cov tubrog Loos hais tias lub nroog Yeluxalees tabtom kubntxhov heev. 32Tamsim ntawd tus thawj tubrog pawg txhiab txawm coj kiag cov thawj tubrog pawg pua thiab ib pab tubrog nrog nws khiav ceevnrooj mus rau ntawm cov pejxeem. Thaum cov pejxeem pom tus thawj tubrog pawg txhiab thiab cov tubrog, ces lawv thiaj tsum tsis ntaus Paulus lawm.
33Tus thawj tubrog mus kiag rau ntawm Paulus, ntes kiag Paulus, thiab hais kom muab ob txoj saw hlau los khi Paulus. Nws txawm nug hais tias, “Tus no yog leejtwg, thiab nws tau ua txhaum dabtsi?” 34Cov neeg ntawd lawv nyias hais nyias lawm ib yam tsis sibthooj, ua rau tus thawj tubrog paub tsis tseeb hais tias yog vim licas tiag, nws thiaj kom cov tubrog coj Paulus mus rau hauv lub yeej rog. 35Thaum lawv mus txog ntawm tus ntaiv, cov tubrog yuav tau muab Paulus nqa, rauqhov cov pejxeem uanruj uatsiv heev. 36Cov pejxeem lawv Paulus qab thiab qw hais tias, “Ciali muab nws tua povtseg!”
Paulus Hais Daws Nws Zaj
37Thaum cov tubrog tabtom yuav coj Paulus mus rau hauv lub yeej, nws txawm hais rau tus thawj tubrog pawg txhiab hais tias, “Thov cia kuv hais ib los rau koj puas tau?”
Tus thawj tubrog teb tias, “Koj paub lus Kilis thiab lov? 38Koj tsis yog tus neeg Iziv uas yav tas los tawmtsam nomtswv thiab coj 4,000 leej uas nrhiav kev tua neeg nrog nws mus rau tom roob mojsab qhua lov?”
39Paulus teb tias, “Kuv yog neeg Yudais, kuv yug hauv lub nroog Thaxus uas nyob pem tebchaws Kilikias, yog ib tug pejxeem ntawm ib lub nroog uas tseemceeb. Thov koj tsocai rau kuv hais rau cov pejxeem ntawd mentsis.”
40Tus thawj tubrog thiaj tsocai rau nws hais. Paulus txawm sawvntsug ntawm tus ntaiv thiab co tes kom sawvdaws nyob twjywm. Thaum sawvdaws ntsiag tag lawm, Paulus thiaj ua lus Henplais hais rau lawv hais tias:

ទើបបានជ្រើសរើសហើយ៖

Tes Haujlwm 21: MWW2022

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល