2 Kauleethaus 3
3
Cov Tubtxib Uas Nyob Hauv Txojlus Cogtseg Tshiab
1Puas yog peb rov pib qhuas peb tuskheej dua thiab? Lossis puas yog peb yuavtsum tau ua li lwmtus, es yuavtsum muaj ib tsab ntawv qhuas peb xa tuaj rau nej lossis nej xa ib tsab tuaj qhuas peb thiab lov? 2Nej yog peb tsab ntawv uas peb muaj, uas tau muab sau cia rau hauv peb lub siab kom txhua tus tau paub thiab tau nyeem! 3Yeej meej kawg li hais tias nej yog tsab ntawv uas Khetos ua tus sau, peb yog cov uas xa. Tsab ntawv no tsis yog sau los ntawm tej kua mem, tiamsis yog sau los ntawm Vajtswv tus uas muaj txojsia nyob tus Ntsujplig, thiab tsis yog sau rau ntawm tej txiag zeb, tiamsis yog sau rau ntawm neeg lub siab. #Khiav 24:12; Yelemi 31:33; Exek 11:19; 36:26
4Peb hais li no rauqhov peb muaj kev ciasiab rau Vajtswv los ntawm Khetos. 5Yeej tsis muaj ib yam dabtsi nyob rau hauv peb uas yuav ua rau peb khav tau hais tias peb muaj cuabkav ua tau tes haujlwm no. Tus peevxwm uas peb muaj yog los ntawm Vajtswv los xwb. 6Nws yog tus uas ua rau peb muaj peevxwm ua tau tes haujlwm nyob rau hauv txojlus cogtseg tshiab, tsis yog txoj Kevcai uas sau los ntawm tej ntaub ntawv tiamsis yog sau los ntawm Vaj Ntsujplig; txoj kevcai uas sau rau hauv ntawv ua rau muaj kev ploj-tuag, tiamsis Vaj Ntsujplig ua rau muaj txojsia. #Yelemi 31:31
7Txoj Kevcai ntawd tau muab txaug ua npe ntawv rau ntawm ob daim txiag zeb, thiab Vajtswv tus tshwjchim tau ci ntsa-iab thaum uas Nws muab rau noobneej. Txawm yog tus tshwjchim ntawd twb ploj zujzus ntawm Mauxes lub ntsejmuag lawm los yeej tseem ci heev, ua rau cov Yixalayees yeej tsa muag ntsia tsis taus nws li. Yog tias txoj Kevcai uas thaum siv es ua rau neeg tuag, twb muaj los nrog tus tshwjchim uas ci ntsa-iab, #Khiav 34:29 8yogli ntawd, tes haujlwm uas Vaj Ntsujplig ua tseem tsis muaj tus tshwjchim uas ci loj dua ntawd thiab lov? 9Yog tias txoj kevcai uas ua rau neeg raug txim twb muaj tshwjchim loj npaum li ntawd; ces tej haujlwm uas ua rau neeg dim lub txim tseem hajyam muaj tshwjchim loj dua ntawd thiab! 10Tus tshwjchim uas thaum ub ci ntsa-iab ntawd nimno tsis ci lawm, vim muaj tus tshwjchim uas tseem ci tshaj ntawd lawm thiab. 11Yog tias yam uas nyob ib ntus xwb twb muaj tshwjchim loj npaum li ntawd, ces yam uas yuav nyob mus ibtxhis tseem yuav hajyam muaj tshwjchim loj dua ntawd!
12Twb yog vim peb ciasiab li ntawd, peb thiaj hais tau tawv qhawv li no. 13Peb tsis zooli Mauxes uas yuav muab ib daim ntaub npog nws lub ntsejmuag kom cov Yixalayees thiaj tsis pom tus tshwjchim ci ntsa-iab uas tabtom ploj zujzus mus ntawd. #Khiav 34:33 14Tiamsis lawv lub siab tawv heev, txawm yog niajhnub no los xij, thaum lawv nyeem txoj qub kevcai, daim ntaub ntawd yeej tseem npog rawv lawv lub ntsejmuag. Tsuas yog nyob rau hauv Khetos xwb daim ntaub ntawd thiajli raug muab rho tawm mus lawm. 15Txawm yog niajhnub no los thaum lawv nyeem Mauxes txoj Kevcai, daim ntaub ntawd tseem npog rawv lawv lub siab.
16Tiamsis thaum ib tug twg tig los cuag tus Tswv, nws daim ntaub yuav raug muab rho tawm mus. #Khiav 34:34 17Zaumno, lolus uas hais tias “tus Tswv” yog hais txog Vaj Ntsujplig; yog tus Tswv tus Ntsujplig nyob qhovtwg, qhov ntawd muaj kev ywjpheej. 18Peb txhua tus tsis muaj daim ntaub npog ntsejmuag lawm, peb zooli daim tsom-iav ci rau sawvdaws pom txog tus Tswv tus tshwjchim; tus tshwjchim ntawd yog los ntawm tus Tswv uas yog Vaj Ntsujplig, Nws muab peb hloov kom peb muaj tus yamntxwv zooli Nws uas tseem yuav ci ntsa-iab zujzus mus.
ទើបបានជ្រើសរើសហើយ៖
2 Kauleethaus 3: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.