1 Kauleethaus 15
15
Khetos Kev Sawv Hauv Qhovtuag Rovqab Los
1Zaumno, cov kwvtij, kuv xav rov hais kom nej ncontsoov txog Txoj Moo Zoo uas kuv twb qhia rau nej, uas nej tau txais yuav thiab tau ua rau nej txoj kev ntseeg sawv khovkho. 2Yog nej tuav rawv Txoj Moo Zoo uas kuv tau qhia rau nej lawm, nej yeej yuav dim nej lub txim, ntshe tsuas yog nej tsis ntseeg tiag xwb.
3Tej lus uas kuv tau txais los, kuv muab cev rau nej, tej ntawd yog tej uas tseemceeb tshajplaws, uas hais tias: Khetos tau tuag theej peb sawvdaws lub txhoj rawsli Vajtswv tej Lus tau sau tseg, #Yaxaya 53:5-12 4Nws tau raug muab faus thiab peb hnub tomqab ntawd Nws tau sawv hauv qhovtuag rovqab los rawsli Vajtswv tej Lus tau sau tseg; #Nnkauj 16:8-10; Math 12:40; Teshl 2:24-32 5Nws tau los tshwm rau Petus pom thiab tomqab ntawd Nws los tshwm rau kaum-ob tug timthawj pom. #Lukas 24:34; Math 28:16-17; Malak 16:14; Lukas 24:36; Yauh 20:19 6Dhau ntawd, muaj ib zaug, Nws tau los tshwm rau cov kwvtij ntseeg uas muaj 500 tawm leej pom rau tiblub sijhawm; feem ntau ntawm lawv cov ntawd tseem muaj sia nyob, tsuas yog qeeleej thiaj tuag lawm xwb. 7Dhau ntawd ces Nws los tshwm rau Yakaunpaus pom, thiab tomqab ntawd Nws los rau cov timthawj sawvdaws pom.
8Zaum tomqab kawg nkaus, Nws tau los tshwm rau kuv, tus uas zooli tus menyuam uas yug tsis puv sijhawm#15:8: yug tsis puv sijhawm; lossis yug rau thaum uas tsis yog caij yug., #Teshl 9:3-6 9Rauqhov kuv yog tus uas qis tshajplaws ntawm cov timthawj huv tibsi, thiab twb tsis tsimnyog uas lwmtus yuav hu kuv ua ib tug timthawj, vim kuv tau tsimtxom Vajtswv pawg ntseeg los lawm. #Teshl 8:3 10Tiamsis vim Vajtswv txoj hmoovhlub es kuv thiaj muaj nyob zooli no, thiab txoj hmoovhlub uas Vajtswv tau muab pub rau kuv ntawd tsis yog tag dawb tag do. Tiamsis kuv tseem ua haujlwm hnyav dua tagnrho cov timthawj huv tibsi, tseeb tiag, tsis yog kuv ua ntawm kuv tuskheej, tiamsis yog Vajtswv txoj hmoovhlub uas nyob rau hauv kuv ua tus ua. 11Yogli ntawd, txawm yog kuv qhia lossis lawv qhia los, tej no puavleej yog tej uas peb qhia thiab puavleej yog tej uas nej twb ntseeg lawm.
Peb Kev Sawv Hauv Qhovtuag Rovqab Los
12Peb twb qhia rau nej lawm hais tias Khetos twb raug tsa sawv hauv qhovtuag rovqab los lawm, ua licas nej qeeleej tseem hais tias cov neeg uas tuag lawm yuav sawv tsis tau hauv qhovtuag rovqab los? 13Yog muaj tseeb li ntawd tiag, ces txhais tau hais tias Khetos yeej tseem tsis tau sawv hauv qhovtuag rovqab los; 14thiab yog tias Khetos tsis tau raug tsa sawv hauv qhovtuag rovqab los tiag, ces tej uas peb qhia yeej tsis muaj qabhau dabtsi li, thiab nej txoj kev ntseeg los yeej tsis muaj qabhau dabtsi li thiab. 15Tsis tag li ntawd xwb, sawvdaws yuav pom tias peb ua timkhawv tsis tseeb txog Vajtswv, rauqhov peb tau qhia hais tias Khetos tau sawv hauv qhovtuag rovqab los lawm. Yog tias cov neeg uas tuag lawm yeej tsis sawv hauv qhovtuag rovqab los tiag, ces Vajtswv kuj tsis tau tsa Khetos sawv hauv qhovtuag rovqab los. 16Rauqhov yog tias cov neeg uas tuag lawm tsis sawv hauv qhovtuag rovqab los, ces Khetos los yeej tsis tau sawv hauv qhovtuag rovqab los thiab. 17Yog Khetos tsis tau raug tsa sawv hauv qhovtuag rovqab los, ces nej txoj kev ntseeg yeej tsis muaj qabhau dabtsi li, thiab nej tseem nyob hauv nej lub txim li qub. 18Yogli ntawd, txhais tau hais tias cov uas tau tuag rau hauv Khetos lawm, lawv puavleej ploj tag lawm. 19Yog tias peb txoj kev ciasiab rau Khetos tsuas zoo rau peb lub neej nimno xwb,#15:19: Yog tias peb txoj kev ciasiab rau Khetos tsuas zoo rau peb lub neej nimno xwb; lossis Yog tias yam zoo tshajplaws uas peb muaj thaum peb tseem ua neej nyob no ces yog peb txoj kev ciasiab rau Khetos xwb. ces peb yog cov uas ntxim hlub tshaj txhua tus neeg hauv ntiajteb no.
20Tiamsis qhov tseeb yog Khetos twb raug tsa sawv hauv qhovtuag rovqab los lawm, Nws yog thawj-thawj tus ntawm cov neeg tuag uas tau sawv los. 21Vim txoj kev tuag tau tshwm los ntawm ib tug neeg los licas, txoj kev sawv hauv qhovtuag rovqab los, kuj yuav tshwm los ntawm ib tug neeg ib yam li ntawd thiab. 22Txhua tus raug kev ploj kev tuag vim koom nrog Adas licas, txhua tus yuav sawv hauv qhovtuag rovqab los vim koom nrog Khetos ib yam li ntawd thiab. 23Tiamsis txhua tus nyias yuav sawv rawsli nyias lub sijhawm: Khetos yog thawjtug uas xub sawv; tomqab ntawd thaum txog lub sijhawm uas Nws rovqab los, txhua tus uas yog Nws li mamli sawv.
24Thaum ntawd lub sijhawm kawg yuav los txog; Khetos yuav muab txhua tus uas tswjhwm sab ntsujplig, txhua lub meejmom, thiab txhua lub hwjchim rhuav kom puastsuaj tag, thiab Nws yuav muab lub tebchaws cob rau Vajtswv tus uas yog Leejtxiv. 25Rauqhov Khetos yuavtsum kav mus txog thaum Vajtswv muab txhua tus yeebncuab tso rau hauv Nws qab xibtaws. 26Tus yeebncuab kawg uas Vajtswv yuav muab rhuav kom puastsuaj mus yog txoj kev tuag. 27Vajtswv Txojlus hais tias, “Vajtswv muab txhua yam tso rau hauv Nws qab xibtaws.” Lolus uas hais tias, “txhua yam” ntawd tsis tau hais txog Vajtswv tus uas muab txhua yam tso rau hauv Khetos qab xibtaws. 28Tiamsis thaum Vajtswv muab txhua yam rau Khetos kav lawm, ces Khetos uas yog Leejtub yuav los nyob hauvqab Vajtswv, tus uas muab txhua yam rau Nws kav, kom Vajtswv thiaj yog tus kav tagnrho ibpuas tsavyam huv tibsi.
29Yog tsis muaj li ntawd, cov neeg uas ua kevcai rausdej pub rau cov neeg uas tuag lawm, lawv ho yuav ua licas? Yog tias cov neeg uas tuag yeej sawv tsis tau rovqab los li lawm, vim licas lawv tseem ua kevcai rausdej pub rau cov neeg ntawd thiab? 30Rau peb ne, vim licas peb ho yuav nphavsiav tuag txhua lub sijhawm? 31Cov kwvtij, kuv yeej ntsib kev tuag txhua-txhua hnub li! Kuv txaussiab rau nej heev, qhov uas kuv hais tau li no twb yog kuv txaussiab rau lub neej uas peb muaj nyob rau hauv peb tus Tswv Yexus Khetos. 32Yog kuv tawmtsam tej tsiaj nyaum hauv lub nroog Efexaus rawsli neeg lub siab xav xwb, kuv yuav tau dabtsi? Yog tias cov neeg uas tuag lawm tsis sawv rovqab los, ces “Peb ciali noj thiab haus, rauqhov tagkis xwb peb twb yuav tuag.”
33Tsis txhob pub leejtwg ntxias tau nej: “Kev nrog tej neeg phem, yuav ua rau puas tus cwjpwm uas zoo.” 34Ciali rovqab los ua qhov zoo thiab tseg tsis txhob ua kev txhaum ntxiv lawm; kuv hais li no kom nej paub txajmuag vim nej qeeleej tseem tsis tau paub Vajtswv li.
Lub Cev Uas Sawv Rovqab Los
35Tiamsis muaj qeeleej yuav nug hais tias, “Cov neeg uas tuag lawm yuav ua licas sawv tau rovqab los? Thaum lawv sawv rovqab los, lawv yuav muaj lub cev zoo licas?” 36Uacas yuav ruam ualuaj li! Thaum koj muab ib lub noob cog rau hauv av, yog lub noob ntawd tsis tuag ces yeej yuav tuaj tsis taus kaus ib zaug li. 37Lub noob uas koj cog ntawd, txawm yog noob nplej lossis lwmyam noob los xij, koj yeej tsis muab kiag ib tsob uas twb loj lawm mus cog, tiamsis koj tsuas muab lub noob mus cog xwb. 38Vajtswv pub lub noob ntawd muaj nplooj muaj kav rawsli Nws pomzoo; thiab Vajtswv pub txhua yam noob nyias muaj nyias nplooj nyias kav rawsli nyias yam noob.
39Txhua yam nqaij uas muaj sia yeej zoo tsis sibthooj; nqaij neeg zoo lawm ib yam, nqaij tsiajtxhu zoo lawm ib yam, nqaij noog zoo lawm ib yam, thiab nqaij ntses zoo lawm ib yam.
40Lub cev qaumntuj thiab lub cev ntiajteb los kuj muaj; lub cev qaumntuj nws zoonkauj lawm nws ib yam, thiab lub cev ntiajteb nws kuj zoonkauj lawm nws ib yam. 41Lub hnub nws muaj nws ib txoj kev zoonkauj, lub hli nws muaj nws ib txoj kev zoonkauj, thiab tej hnubqub nyias muaj nyias txoj kev zoonkauj; txawm yog tej hnubqub los nyias zoonkauj txawv lawm nyias ib yam.
42Yogli ntawd, thaum cov neeg tuag sawv rovqab los ces yuav zooli ntawd ntag. Lub cev uas muab faus yog lub uas txawj tuag; lub cev uas sawv rovqab los yog lub uas tsis txawj tuag. 43Lub cev uas muab faus yog lub uas tsis zoonkauj thiab tsis muajzog, tiamsis lub cev uas sawv rovqab los yog lub uas ci ntsa-iab thiab khovkho. 44Lub cev uas muab faus yog lub cev nqaijtawv, tiamsis lub cev uas sawv rovqab los yog lub cev ntsujplig. Yog twb muaj lub cev nqaijtawv ces yeej yuav muaj lub cev ntsujplig xwb.
45Vajtswv Txojlus hais tias, “Thawjtug Adas, yog tus uas Vajtswv tsim thiab Vajtswv rau siav rau pa kom ciajsia,” tiamsis tus Adas kawg, yog tus Ntsujplig uas pub tau txojsia rau neeg. #Chiv 2:7 46Tsis yog xub-xub muaj lub cev ntsujplig uantej, tiamsis yog xub muaj lub cev nqaijtawv uantej, tomqab ntawd mamli muaj lub cev ntsujplig. 47Thawjtug Adas yog los hauv ntiajteb no los thiab yog Vajtswv muab av puab; tiamsis tus Adas thib ob, yog los saum ntuj los. 48Tus uas Vajtswv muab av puab los zoo licas, ces neeg ntiajteb zoo ib yam li ntawd; tus uas los saum ntuj los zoo licas, ces cov neeg saum ntuj zoo ib yam li ntawd thiab. 49Peb muaj tus yamntxwv zooli tus uas Vajtswv muab av puab los licas, ces peb yeej yuav muaj tus yamntxwv#15:49: peb yeej yuav muaj tus yamntxwv; tej phau ntawv qub uas xuas tes sau, muaj cia peb muaj tus yamntxwv. zoo ib yam li tus uas los saum ntuj los thiab.
50Cov kwvtij, qhov uas kuv hais ntawd yogli no: lub cev uas muaj roj muaj ntshav yuav tsis muaj feem rau hauv Vajtswv lub Tebchaws, thiab yam uas txawj ploj txawj tuag yuav tsis muaj feem tau txais yam uas tsis txawj ploj tsis txawj tuag ib zaug li.
51-52Nej ciali ua tibzoo mloog, kuv yuav qhia ib zaj uas muab npog cia lawm rau nej paub: Peb txhua tus yuav tsis tuag huv tibsi, tiamsis thaum lub rajxyu nrov ua zaum kawg, tib ntsais muag xwb peb yuav hloov dua tshiab. Rauqhov thaum lub rajxyu ntawd nrov, ces cov uas tuag lawm yuav sawv rovqab los, yuav tsis tuag ib zaug ntxiv li lawm, thiab peb txhua tus yuav hloov dua tshiab. #1Thex 4:15-17 53Rauqhov lub cev uas txawj lwj yuav hloov ua lub uas tsis txawj lwj; lub cev uas txawj tuag yuav hloov ua lub uas tsis txawj tuag. 54Yogli ntawd, thaum lub cev uas txawj lwj hloov ua lub cev uas tsis txawj lwj lawm, lub cev uas txawj tuag hloov ua lub cev uas tsis txawj tuag lawm, ces thaum ntawd yuav tiav rawsli Vajtswv Txojlus uas hais tias, “Txoj kev tuag tau raug rhuav puastsuaj lawm lau; txoj kev muajyeej tiavlog lawm lau!” #Yaxaya 25:8
55“Txoj kev tuag, koj txoj kev muajyeej nyob qhovtwg?
Txoj kev tuag, koj tej taug nyob qhovtwg?” #Hauxe 13:14
56Tej taug ntawm txoj kev tuag yog kev txhaum, thiab lub hwjchim ntawm txoj kev txhaum yog tej kevcai. 57Tiamsis ua Vajtswv tsaug, vim Nws tau pub txoj kev muajyeej rau peb los ntawm peb tus Tswv Yexus Khetos!
58Yogli ntawd cov kwvtij uas kuv hlub, nej yuavtsum sawv khovkho thiab ruaj nrees. Rausiab ntso ua tus Tswv tes haujlwm, rauqhov nej twb paub lawm hais tias, tej haujlwm uas nej ua nyob rau hauv tus Tswv yeej yuav tsis nkim nej lub zog li.
ទើបបានជ្រើសរើសហើយ៖
1 Kauleethaus 15: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.