1 Kauleethaus 12
12
Tej Khoomplig Los Ntawm Vaj Ntsujplig Tus Dawbhuv Los
1Zaumno, hais txog tej khoomplig uas los ntawm Vaj Ntsujplig tus dawbhuv los.
Cov kwvtij, kuv xav kom nej paub qhov tseeb txog tej khoomplig ntawd. 2Nej paub tias yav tas los uas nej tseem tsis tau ntseeg, nej raug luag haub-ntxias mus pe tej mlom uas tsis muaj sia. 3Yogli ntawd, kuv xav kom nej totaub hais tias, tsis muaj leejtwg uas twb muaj Vajtswv tus Ntsujplig ua tus coj nws lawm es tseem yuav hais tau hais tias, “Thov kom Yexus raug foom!” thiab tsis muaj leejtwg uas yuav lees tau hais tias, “Yexus yog tus Tswv,” tsuas yog tus uas muaj Vajtswv tus Ntsujplig ua tus coj xwb thiaj hais tau.
4Muaj ntau yam khoomplig uas los ntawm Vaj Ntsujplig los, tiamsis tej ntawd puavleej yog tibtug Vaj Ntsujplig muab xwb. #Loos 12:6-8 5Muaj ntau txoj kev ua haujlwm, tiamsis yeej yog ua rau tibtug Tswv xwb. 6Muaj ntau lub peevxwm ua haujlwm, tiamsis puavleej yog tibtug Vajtswv pub lub peevxwm ntawd rau sawvdaws kom nyias ua nyias tes haujlwm.
7Vaj Ntsujplig tes haujlwm yeej tshwm nyob rau hauv txhua tus kom muajnqis rau sawvdaws huvsi. 8Vaj Ntsujplig pub rau ib tug kom muaj tswvyim puvnpo, thiab tibtug Vaj Ntsujplig ntawd ho pub rau lwmtus kom puvnpo kev txawjntse. 9Tibtug Vaj Ntsujplig ntawd pub rau ib tug kom muaj kev ntseeg, ho pub rau lwmtus kom muaj hwjchim kho kom zoo mob. 10Vaj Ntsujplig pub rau ib tug kom muaj hwjchim ua tau tej txujci tseemceeb, pub rau lwmtus kom txawj cev Vajtswv tej lus, pub rau lwmtus kom muaj peevxwm cais tau hais tias qhov khoomplig twg yog los ntawm Vajtswv tus Ntsujplig los thiab qhovtwg uas tsis yog. Nws pub rau ib tug txawj hais tej lus txawv-txawv, thiab ho pub rau lwmtus txawj txhais tej lus txawv-txawv ntawd. 11Tej no puavleej yog tibtug Vaj Ntsujplig ua tus pub xwb, thiab Nws pub tej khoomplig ntawd rau txhua tus rawsli Nws pomzoo.
Lub Cev Muaj Ntau Yam Koom Uake
12Khetos zooli ib lub cev uas muaj ntau yam koom uake; txawm yog muaj ntau yam li ntawd los puavleej yog tiblub cev xwb. Khetos los kuj zoo ib yam li ntawd thiab. #Loos 12:4-5 13Tibyam li ntawd, txawm peb sawvdaws yog neeg Yudais lossis Lwm Haivneeg los xij, peb puavleej ua kevcai rausdej los ntawm tibtug Vaj Ntsujplig, thiab Vajtswv tsuas hliv tibtug Ntsujplig los rau peb sawvdaws haus xwb.
14Tseeb tiag, lub cev yeej tsis yog muab ib yam los ua xwb, tiamsis muab ntau yam los ua. 15Yog txhais kotaw yuav hais tias, “Vim kuv tsis yog txhais tes, ces kuv tsis muaj feem koom rau ntawm lub cev,” txawm hais li ntawd los yeej muab nws cais tsis tau tawm ntawm lub cev. 16Yog lub pobntseg yuav hais tias, “Vim kuv tsis yog lub qhovmuag, ces kuv tsis muaj feem koom rau ntawm lub cev,” txawm hais li ntawd los yeej muab nws cais tsis tau tawm ntawm lub cev. 17Yog txhua yam ntawm lub cev yog lub qhovmuag xwb, nws yuav ua licas hnov lus? Thiab yog txhua yam ntawm lub cev yog lub pobntseg xwb, nws yuav ua licas hnov ntxhiab? 18Tseeb tiag, Vajtswv yeej tsim kom muaj txhua-txhua yam nyob rau ntawm lub cev rawsli Vajtswv pomzoo. 19Yog txhua yam zoo ib yam nkaus xwb, yuav tsis tsheej ib lub cev! 20Vimli ntawd, txawm yog muaj tiblub cev xwb los nws thiaj muaj ntau yam koom uake.
21Yogli ntawd, lub qhovmuag yuav hais tsis tau rau txhais tes hais tias, “Kuv tsis yuav koj!” Lossis lub taubhau yuav hais tsis tau rau txhais kotaw hais tias, “Kuv tsis yuav koj!” 22Tseeb tiag, txawm peb lub cev muaj qeeyam uas tsis tshua muajzog, los peb tseem ceev cia huv tibsi; 23thiab tej uas peb xav tias tsis tshua muajnqis pestsawg, peb tseem hajyam tu yam ntawd zoo dua; tej yam ntawm peb lub cev uas tsis tshua zoo saib, peb tseem hajyam ua tibzoo tu kom zoo saib tuaj, 24tiamsis tej yam uas zoo lawm ces tsis tag yuav tu. Vajtswv tau muab txhua yam los koom uake rau ntawm lub cev, thiab tau ua rau tej uas tsis tshua muajnqis pestsawg kom muajnqis tuaj. 25Yogli ntawd, lub cev thiaj yuav tsis muaj kev sibfaib, tiamsis txhua yam ntawd kom ib yam txhawjxeeb txog ib yam. 26Yog ib qho ntawm lub cev muaj mob, ces tagnrho txhua qhov yeej mob huv tibsi; yog ib qho raug qhuas, ces tagnrho txhua qhov yuav nrog qhov ntawd zoosiab.
27Nej txhua tus puavleej yog Khetos lub cev, thiab nej ib leeg yog ib yam ntawm lub cev ntawd. 28Nyob hauv pawg ntseeg, Vajtswv tsa peb nyias nyob muaj nyias chaw: thawj pab yog cov timthawj, pab thib ob yog cov xibhwb cev Vajtswv lus, thiab pab thib peb yog cov xibhwb uas cobqhia; dua li ntawd ces yog cov uas ua tej txujci tseemceeb, thiab cov uas tau qhov khoomplig kho mob zoo, cov uas muaj peevxwm pab tau lwmtus, cov uas txawj tswjhwm, thiab cov uas hais tau lus txawv-txawv. #Efex 4:11 29Tsis yog lawv txhua tus yuav ua timthawj lossis ua xibhwb cev Vajtswv lus lossis ua cov cobqhia. Tsis yog txhua tus tau lub hwjchim uas ua tau tej txujci tseemceeb, 30lossis kho tau mob zoo lossis hais tau lus txawv-txawv lossis txawj txhais tau tej lus txawv-txawv ntawd. 31Yogli ntawd, nej yuavtsum muab siab rau nrhiav tej khoomplig uas tseemceeb dua tej ntawd.
Zaumno, kuv yuav qhia ib txojkev uas zoo tshajplaws rau nej.
ទើបបានជ្រើសរើសហើយ៖
1 Kauleethaus 12: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.