1 Kauleethaus 1
1
1Kuv yog Paulus, tus uas tau raug hu los ua Yexus Khetos ib tug timthawj rawsli Vajtswv tus dejsiab, thiab los ntawm peb tus kwvtij Xauthenes.
2Xa mus rau Vajtswv pawg ntseeg uas nyob hauv lub nroog Kauleethaus, cov uas tau raug hu los ua Vajtswv haivneeg uas dawbhuv, cov uas yog Nws tug vim koom nrog Yexus Khetos, thiab nrog rau txhua tus uas nyob txhua qhov chaw uas pehawm peb tus Tswv Yexus Khetos, uas yog lawv tus Tswv thiab peb tus Tswv: #Teshl 18:1
3Thov Vajtswv uas yog peb Leejtxiv thiab tus Tswv Yexus Khetos pub txoj hmoovhlub thiab kev kajsiab rau nej.
Tej Koobhmoov Nyob Hauv Yexus Khetos
4Kuv niajhnub ua kuv tus Vajtswv tsaug rau nej, vim Nws tau pub txoj hmoovhlub rau nej los ntawm Yexus Khetos. 5Twb yog vim qhov uas nej nyob rau hauv Khetos, nej thiaj npluanuj rau txhua yam, tsis hais tej lus uas nej hais thiab tej kev txawjntse uas nej muaj. 6Vim tej lus uas qhia txog Khetos twb muaj nyob khovkho rau hauv nej lawm, 7nej thiaj tsis plam ib qhov khoomplig kiag li thaum nej tabtom tos hnub uas peb tus Tswv Yexus Khetos yuav rovqab los. 8Vajtswv yuav pab kom nej nyob ruaj-khov mus txog hnub kawg, kom hnub uas peb tus Tswv Yexus Khetos rovqab los, nej thiaj yuav tsis muaj ib qho txaus thuam li. 9Vajtswv yog tus uas ncajncees, Nws yog tus uas tau hu nej los koom nrog Nws tus Tub Yexus Khetos uas yog peb tus Tswv.
Kev Sibfaib Hauv Pawg Ntseeg
10Cov kwvtij, los ntawm peb tus Tswv Yexus Khetos lub npe, kuv thov kom nej ib leeg mloog ib leeg hais kom thiaj yuav tsis ua rau nej tawg ua pab ua pawg. Nej yuavtsum koom ib lub siab, koom ib txoj kev xav thiab muaj ib lub homphiaj xwb. 11Cov kwvtij, Khlau-es tsev neeg muaj qeeleej tau qhia rau kuv hais tias muaj kev sibcav sibceg nyob nruabnrab hauv nej. 12Qhov kuv hais yogli no: nej ibtxhia hais tias, “Kuv raws Paulus”; ibtxhia hais tias, “Kuv raws Apaulaus”; muaj dua ibtxhia ho hais tias, “Kuv raws Petus”; thiab tseem muaj dua ibtxhia hais tias, “Kuv raws Yexus Khetos.” #Teshl 18:24 13Khetos raug muab faib#1:13: Khetos raug muab faib; tej phau ntawv qub uas xuas tes sau, muaj Muab Khetos faib tsis tau. ua ob-peb tus no lov? Paulus yog tus tuag saum ntoo khaublig theej nej lub txhoj no lov? Lossis nej tau ua kevcai rausdej los ntawm Paulus lub npe no lov?
14Kuv ua Vajtswv tsaug uas kuv tsis tau muab nej leejtwg ua kevcai rausdej, tsuas yog kuv tau muab Khixapus thiab Nkai-us ua kevcai rausdej xwb. #Teshl 18:8; Teshl 19:29; Loos 16:23 15Yogli ntawd, tsis muaj leejtwg yuav hais tau tias nej yog cov uas ua kevcai rausdej hauv kuv lub npe. ( 16Yog lawm, kuv yeej tau muab Xatefanus tsev neeg ua kevcai rausdej lawm thiab; tiamsis dua li ntawd, kuv ho tsis nco hais tias xyov kuv puas tau muab lwmtus ua kevcai rausdej li thiab.) #1Klt 16:15 17Rauqhov Khetos tsis tau txib kuv mus muab neeg ua kevcai rausdej, tiamsis Nws txib kuv mus qhia Txoj Moo Zoo; uas tsis yog qhia rawsli neeg lub tswvyim txawjntse, kom Khetos tus ntoo khaublig thiaj tsis poob hwjchim.
Khetos Yog Vajtswv Lub Hwjchim Thiab Lub Tswvyim
18Rau cov neeg uas tabtom yuav puastsuaj mus, mas qhov uas hais txog tus ntoo khaublig yog ib qhov uas ruam heev rau lawv; tiamsis rau peb cov uas tabtom txais txoj kev cawmdim, mas qhov ntawd yog Vajtswv lub hwjchim ntag. 19Vajtswv Txojlus hais tias:
“Kuv yuav rhuav cov neeg muaj tswvyim tej tswvyim,
thiab Kuv yuav muab cov neeg txawjntse tej kev txawjntse xyeeb tseg.” #Yaxaya 29:14
20Yogli ntawd, cov neeg muaj tswvyim nyob qhovtwg? lossis cov xibhwb uas qhia Kevcai nyob qhovtwg? lossis cov neeg uas txawj sibcav txog neeg tiam no tej tswvyim nyob qhovtwg? Vajtswv twb ua rau neeg ntiajteb lub tswvyim ruam lawm! #Yauj 12:17; Yaxaya 19:12; 33:18; Yaxaya 44:25
21Rauqhov nyob rau hauv Vajtswv lub tswvyim, neeg ntiajteb tsis muaj cuabkav yuav paub tau Nws los ntawm lawv lub tswvyim. Vimli ntawd, Vajtswv thiaj txiavtxim siab siv peb tej lus qhia uas neeg suav hais tias yog kev ruam los cawm cov uas ntseeg Nws. 22Cov neeg Yudais xav pom tej txujci tseemceeb, thiab cov neeg Kilis tsuas yog xav nrhiav tswvyim xwb. 23Tiamsis ntawm peb, ces peb tsuas qhia txog zaj uas Khetos raug ntsia saum tus ntoo khaublig; zaj ntawd ua rau tubqaug cov Yudais heev thiab ua rau Lwm Haivneeg suav hais tias yog kev ruam; 24tiamsis rau cov neeg uas Vajtswv tau hu lawm, tsis hais cov Yudais thiab Lwm Haivneeg, zaj no yog Khetos ntag; Nws yog Vajtswv lub hwjchim thiab yog Vajtswv lub tswvyim. 25Rauqhov Vajtswv txoj kev ruam tseem ntse dua li neeg lub tswvyim, thiab Vajtswv txoj kev tsaugmuag tseem muajzog dua li neeg lub zog.
26Cov kwvtij, nej ua tibzoo xav seb thaum Vajtswv hu nej los ntseeg ntawd nej yog neeg zoo licas. Nej muaj tsawg-tsawg leej xwb uas neeg ntiajteb suav hais tias yog cov txawjntse, nej tsis muaj pestsawg leej uas muaj hwjchim, thiab tsis muaj pestsawg leej uas muaj meejmom. 27Tiamsis Vajtswv xaiv yam uas neeg ntiajteb suav hais tias ruam kawg nkaus los ua kom cov txawjntse txajmuag; thiab Nws xaiv yam uas neeg ntiajteb suav hais tias tsis muajzog los ua kom cov neeg muajzog txajmuag. 28Vajtswv xaiv yam uas neeg ntiajteb suav hais tias qis kawg nkaus, yam uas luag saib tsis taus thiab suav hais tias tsis tseemceeb dabtsi hlo li, los rhuav kom tej uas neeg ntiajteb pom tias tseemceeb kom puastsuaj mus, 29kom thiaj tsis muaj ib tug twg khav tau rau ntawm Vajtswv lub xubntiag.
30Tiamsis Vajtswv tau coj nej los koom rau ntawm Yexus Khetos, thiab Vajtswv tau muab Khetos ua peb lub tswvyim. Vim Nws peb thiaj rov muaj kev sib haumxeeb nrog Vajtswv, peb thiaj dhau los ua Vajtswv cov neeg dawbhuv thiab raug tso kom dim. 31Yogli ntawd, rawsli Vajtswv Txojlus tau sau tseg hais tias, “Yog leejtwg xav khav, cia nws khav txog yam uas tus Tswv tau ua tiav lawm.” #Yelemi 9:24
ទើបបានជ្រើសរើសហើយ៖
1 Kauleethaus 1: MWW2022
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 United Bible Societies. All rights reserved.