Mag 14
14
Baah nan lolig bin ku Yisa man
(Matiu 26:1-5; Lug 22:1-2; Jɔnn 11:45-53)
1Tɔ, iweehn ilee li nan gur nin bin tiɛr yuglagir a chiigin, ke idaa yan wee bi ti jɔɔ ŋma boroboro wan kaa ŋaan nnyɔgin a daai n piin, le kumanug a ninkpeeb nin ban wɔɔnn Uwonbɔr a siimin, ban baah li nɔɔ nsan man ki woon ki choo Yisa ki ku u, le ki bei tab ke, 2“Ni laa che ti choo u kuchiig nan yaan ni, n ba ke ti choo u iyaayoo ke, kuninfogbaluŋin li gaa tijar ti bu.”
Upii uba kaah nan ŋa tulaali ki ŋa Yisa a yukper man
(Matiu 26:6-13; Jɔnn 12:1-8)
3Yisa nan be Betani, uja wan nan ye kikɔŋ wee bi yi u ke Simɔnn nan a niin le, ki ji tijiir. Le upii uba nan kɔɔn ki ŋmag tulaali kan jɔɔ kudaag pɔɔrug nan, bi yi tulaali nmɔn ke naar, le bi nan yi kululog#14:3 kululog Litangbagil lan wee bi yi li ke alabasita-n le bi nan ta naan kululog kan jɔɔ kudaag pɔɔrug nan. nmɔn ke alabasita. Le upii nmɔn choo kululog nmɔn ki biir ki gbir tulaali nmɔn ki ŋa Yisa a yukper.
4Le bininfob ban be niin nin pag nin liŋuul ki ke, “Ba ŋa wee u bii tulaali nmɔn man naa? 5Ti bi li fir kɔɔr ki kan ilig ke yin jo libinl a yɔɔr, ki ta ter bilanjiim nan.” Le ki nan ŋulin u bu.
6Le Yisa bei bi ke, “Ni jiɛn upii nmɔn na. Ni wan ŋanl le u tun ki seim nan, ke ba ŋa wee ni mugir u man naa? 7Bilanjiim le yin gbaa be ni ban le iyoo biɛn, le ni li fir ki ter bi n-yonn man wee ni ban; amaa min kaa yin gbaa be ni ban jigin ni. 8Upii nmɔn tun nan wee u li fir tun seim le. Waah gbir tulaali wan ŋa n gbanann bu nan, u ŋaam ngbanann a piim a sili le nmɔn. 9Ibamɔn le n bei ni nan, nan yaan biɛn wee bi li mɔɔn n bɔŋann nin kutingbɔŋ biɛn nan yaan, bi li mɔɔn upii nan kaah ŋa nan ki seim nan bu, le ni li ye ntiɛrim ki jiin u bu.”
Judasi kaah nan kɔɔr Yisa man
(Matiu 26:14-16; Lug 22:3-6)
10Man le Yisa a bɔɔnɔɔb piig nin bilee a ni u ba, wan wee bi yi u ke Judasi Isikariya nan, jon kumanug a ninkpeeb ban ke un kɔɔr Yisa. 11Le bi pooi nan penn, waah bei bi man Yisa bu-n, le bi siin u limɔsiinl ke bi li yɔ ilig ni bu. Le u ni nan piin ki ban isan yan wee u li ta Yisa ki ŋubin bi nɔɔn.
Yisa nin u bɔɔnɔɔb kaah jin yuglagir a tiɛrim a chiigin man
(Matiu 26:17-25; Lug 22:7-14,21-23; Jɔnn 13:21-30)
12Chinchinn a daal lan wee bi ti ŋma boroboro wan wee baa ŋaan nnyɔgin, wee ki ti ku npeebum iyaayoo ki ŋa Yuglagir a Tiɛrim a Chiig a jiirin, le Yisa a bɔɔnɔɔbin baan u ke, “A ban ti jo laa wee ki tan ŋa kuchiig nmɔn a jiir a sili ki sei ŋaa?”
13Le u tun bi ni bilee ki ke, “Ni li chaa kitiŋ nan yaan man. Ni li kan uja uba wee u tu linyunbool, ni li nɔɔ wa man, 14ki li chaa iniin yan wee u ta li kɔɔ n-yaan, wee ki bei uniindaan nmɔn ke, ‘Wan wɔɔn ke ti baaŋ ke, bicham a diig kan wee u ma ni u bɔɔnɔɔb yin ji yuglagir a tiɛrim a chiigin be laa?’ 15Le u li wɔɔn ni kudiititɔrug kan yab wee bi pii ŋa ni wan biɛn a sili, wee ni ŋa tijiir nmɔn niin.”
16Le Yisa a bɔɔnɔɔb bilee nmɔn jon kitiŋ nmɔn yaan, ki sin tan kan ke ni wan biɛn ŋa sili ke waah bi bei bi man ni na. Le bi ŋa kuchiig nmɔn a jiir.
17Le Yisa nin u bɔɔnɔɔb piig nin bilee nmɔn nan dan kujɔɔg. 18Baah ka ki ji tijiir n-yonn man nin, le u nan bei bi ke, “Ibamɔn le n bei ni nan, min nin nim kaah ka ki ji tijiir tan nan, ni ni uba li yin kɔɔrim.”
19Le ni bii bi sufu, le bi baan u uba ba uba ba ke, “A len min lee?”
20Le u jiin ke, “Ni le ye ni piig nin bilee nan a ni uba wan wee min nin u ma lagin ki bɔr kisaŋ kiba ni nan le. 21Uninfosaal a Big le sin yin kpo le ke naah sɔb Uwonbɔr a gbɔŋin man nin, amaa tibɔbir li be wan yin kɔɔr u nan bu. Baa nan bi maa u daan gbaa ke, ni bi li sɔ u bu.”
Uyudaan a jɔɔg a jiir a jim a bɔr
(Matiu 26:26-30; Lug 22:14-20; 1 Korenti 11:23-25)
22Baah nan ji tijiir n-yonn man nin, le Yisa yuur boroboro ki miɛ Uwonbɔr, le ki war war ki sei u bɔɔnɔɔb, ki bei bi ke, “Ni gaa man. N gbanann le yen.”
23Man le u ji nan yuur kiyiinyɔɔg nin isiloon a daam ki miɛ Uwonbɔr, ki ta sei bi. Le bi biɛn nyun.
24Le u bei bi ke, “N cham le yen, le n cham li kpaar ki wur, bininfob takpem bu, ki wɔɔn ke Uwonbɔr poo tipoor pɔn na. 25Ibamɔn le n bei ni nan, maa ji li nyi ki nyu isiloon a daam nan ni see lidaal man wee n na yin nyu miwanpɔm Uwonbɔr a naamin ni.”
26Le bi nan gaa iwonjiɛn lan, ki nyan ki jon Olif a siigi a jɔɔlin a paab.
Yisa kaah nan pag ke Piita na li niɛ ke waa nyi u man
(Matiu 26:31-35; Lug 22:31-34; Jɔnn 13:36-38)
27Le Yisa bei bi ke, “Ni biɛn nan na li yiim, ni sɔb Uwonbɔr a gbɔŋin ke,
‘Uwonbɔr na li ku upeekpaarin,
le ipee n guun ki yaal.’#Zakariya 13:7
28Amaa n nan fii nkumin ke, n li chinn ki liin ni sam ki jo Galilii.”
29Le Piita bei ke, “N tab nan biɛn nan yiiŋ ke, min kaa li yiiŋi.”
30Le Yisa bei u ke, “Ibamɔn le n beiŋ nan, kunyiɛg nan, a li niɛ itaa itaa ke ŋaa nyi mi le ukooja n ni mɔɔ milee.”
31Le Piita mann pag nin linunmanl ke, “Hali ni ye min nin fin n lagin ki kpo gbaa ke, maa li nyi ki niɛ ke maa nyiŋi.”
Le u tabin mu len man.
Yisa kaah miɛ Uwonbɔr man
(Matiu 26:36-46; Lug 22:39-46)
32Le bi jon nan yaan wee bi yi Gesemani nan. Nin yaan nmɔn le Yisa bei u bɔɔnɔɔb ke, “Ni li ka doou wee n jo ki tan miɛ Uwonbɔr.”
33U nan ta Piita le nin Jemisi, nin Jɔnn ki jon. Le u sufu bii ki be ke u yin kpo le-n; 34le u bei bi ke, “Npoobiin man choom nan li kum. Ni li ka do ki li lig man.”
35Le ki fɔɔr ki jon nintogil wama, ki gbaan le u yutunl tan mar tum, ki miɛ Uwonbɔr, ke ni bi li fir ke, Uwonbɔr n bin che npoobiin man chaan u ban nan n bin jo lagir u bu, ki ji len ke, 36“N baa, n baa, niba li kaa be le ŋaa li fir tun ni. Laa che n nyu kiyiinyɔɔg nan yaan ni; Amaa che a yaa bam le n tun, wee ni laa ye n yaa bami.”
37Le u jirin u bɔɔnɔɔb bita n ban, ki miin bi jiɛn na. Le u baan Piita ke, “Simɔnn, a jiɛn lee? Ŋaa li fir kal guurim wamaa?” 38Le ki bei bi ke, “Ni ligir ki miɛ Uwonbɔr a wee ki laa kɔɔ nton nan yaan ni. Ni naam ma ban ni tun nan ŋan, amaa le ni gbanann kaa pɔɔ.”
39Le ki ji jir u wonmiɛlin ki tan miɛ ke waah bi miɛ man chinchinn ni, 40ki ji nan jirin ki miin u bɔɔnɔɔbin jiɛn na, nan bu-n njiɛm le nan jɔɔ bi takpem. Le baa nyi baah li bei u man ni.
41Waah nan jirin itaa itaa-n, le u baan bi ke, “Ni le la biɛ ni dɔ jiɛn ki fooraa? Ni kpaan man na. N-yonn nmɔn foou. Bi ta Uninfosaal a Big ki ŋubin tibirdam a nɔɔn na. 42Ni fiim wee ti jo. Lig wan kɔɔrimin le chaan nin.”
Baah choo Yisa man
(Matiu 26:47-56; Lug 22:47-53; Jɔnn 18:3-12)
43Yisa kaah la be pagin, le u bɔɔnɔɔb piig nin bilee-n a ni uba wan wee bi yi u ke Judasi nan ŋmag kuninfogbaluŋ ban wee Uwonbɔr a toontum ninkpeeb nan tun bi, bi ma nan ye kumanug a ninkpeeb nin ban wɔɔnn Uwonbɔr a siim nan nin bininkpeeb, le biba ŋmag takoobi, le biba mu ŋmag ilangul, 44le Judasi wan kɔɔr Yisa nmɔn pii wɔɔn bi ke, “Wan wee n sɔɔn ki poor u ke ni li nyi ke u ma yen. Wee ni choo u ki li ŋmag u nbamɔm ki li jɔɔ u chaau.
45Judasi kaah nan foon n-yonn man nin, libol nmɔn le u jon Yisa ban ki yin u ke, “Wan wɔɔn,” le ki sɔɔn ki poor u.#14:45 Juu yaab a kaalin Judasi nan mɔɔr Yisa a nɔɔ le. Le ni wɔɔn ke Yisa jon wa. 46Le bininfobin mu choo Yisa ki ŋmag u kenken. 47Le u bɔɔnɔɔbin a ni uba nar u takoobi ki gaa kumanug a ninkpelu n-yaa yomu a tul ki par.
48Le Yisa baan bi ke, “N ye ban kɔnn bininkpeeb a sanliiru le ni dan nan choom a le ke n ye ufeer le naa? 49N nan ti be ni ban le iwonjiɛn niin n-yaan iyoo biɛn le ki wɔɔn bininfob Uwonbɔr a bɔr, le naa ti chorimi, amaa ni kpaa talar le ke Uwonbɔr a gbɔŋ a bɔri tin gbeen.” 50Le u bɔɔnɔɔbin biɛn guun ki jiɛn u.
51Le unaachipɔɔn uba yee likinkenl a binba ki nɔɔ Yisa a bɔɔn. Le bi nan bib u ki choo u kinkenl, 52le u jiɛn likinkenl nmɔn bi nɔɔn, le ki guun nin lijakpalomil.
Juu yaab a ninkpeeb kaah jin Yisa tibɔr man
(Matiu 26:57-68; Lug 22:54-55,63-71; Jɔnn 18:13-14,19-24)
53Le bi ta Yisa ki jon kumanug a ninkpelu a niin, nan yaan wee kumanug a ninkpeeb, nin kitiŋ nmɔn a ninkpeeb, nin ban wɔɔnn Uwonbɔr a siimin lagin. 54Le Piita be Yisa a bɔɔn, nan fɔg hali nin baah tan kɔɔ kumanug a ninkpelu nmɔn a niin. Le Piita jon ki tan kal kpiɛ bi toontum bu, le bi wor nŋmi.
55Le kumanug a ninkpeeb nmɔn nin bininkpeeb nmɔn biɛn pɔɔn bi ba ke bin gbir siɛradam a mɔnn, wee ki kan Yisa a bir wee ki ku u, le kaa kan u biri. 56Siɛradam takpem nan por tibɔkar le ki tenn u, amaa le bi bɔkar nmɔn kaa nɔɔ nin tabi.
57Le bijab biba fii ki sir ki por tibɔkar npaan ni ke, 58“Ti gbir u bei ke, u li ber iwonjiɛn niin yan wee bininfob nan maa nan, ki ta iweehn itaa ki ji maa ki, wee nin laa ji ye bininfob li maa ki.” 59Nin ni biɛn nan yɔli, bi bɔkar nmɔn mu kaa biɛ nan nɔɔ tabi.
60Le kumanug a ninkpelu win nan fii ki baan Yisa ke, “Tibɔr tan wee bijab nan pag ki jiin a paam nan a taai yaa? Ŋaa jɔɔ ti jiim maa?”
61Le Yisa ŋmin, kaa jiin tiba. Le u ji mann ki baan u ke, “Fin le sin ye Masiya wan ye u ma Uwonbɔr a Bija n naa?”
62Le Yisa jiin ke, “Nn min le yen.
Ni na li kan Uninfosaal a Big kaah ka Utindaan Uwonbɔr a nɔɔjiim paam,
ki ji na li kan u ki miin u be titalangbann ni le ki jiirin!”
63Le kumanug a ninkpelu nmɔn tɔɔl choo u daala ki jiɛ, le ki ke, “Taa ji ban siɛra dami! 64Min tɔɔl kan waah sug Uwonbɔr man na. Ni tiɛr nii?”
Le bi biɛn chee ke u biiu, u kpaan nin nkum le.
65Le bi ni biba siin timɔsann jaar u bu; le ki piin u num paam le ki pebir u ntapam ki ji baan u ke, “Biɛ njee ŋma pebiŋ ŋaa.” Le ban guu win mu boo u.
Piita kaah nan niɛ ke waa nyi Yisa man
(Matiu 26:69-75; Lug 22:56-62; Jɔnn 18:15-18,25-27)
66Piita la nan be nloob le ki wor nŋmi, le kumanug a ninkpelu a niin a sapɔɔn toontunn uba nan kan u, 67ki lig u chiir, ki nan bei u ke, “A mu nan nɔɔ Nazarif a ninfou Yisa nmɔn le.”
68Le Piita niɛ ke, “Min kaa nyi wi, min kaa nyi tibɔr tan wee a pag nan a taai,” le ki fii nyan. Libol nmɔn le ukooja mɔɔ.
69Le usapɔɔn nin ji kan u niin ki mann bei bininfob ban si niin nin ke, “Uja nan mu ye u bɔɔnɔɔbin a ni uba le.” 70Le Piita ji mann niɛ.
Le ni kpiɛ wama le ban be niin nmɔn mann baan Piita ke, “A sin ye bininfob nan a ni uba le, nan bu-n a ye Galilii a ninfou le.”
71Le Piita poo ke, “Ni ye n por tibɔkar ke, Uwonbɔr n dar n tula, min kaa nyi naah pag uja wan nan a bɔri.”
72Libol nmɔn le ukooja mɔɔ kpiɛ itaa ilee; le Piita nin tiɛr Yisa kaah bi bei u man ni ke, “A li len ke ŋaa nyi mi itaa itaa le ukooja n nin mɔɔ.” Iyaayoo nmɔn le Piita nin piin ti mɔɔr.
ទើបបានជ្រើសរើសហើយ៖
Mag 14: KUGL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Komba New Testament © Bible Society of Ghana, 2014.