Mag 12
12
Bitoontum a bɔŋal
(Matiu 21:33-46; Lug 20:9-19)
1Iyaayoo nmɔn le Yisa gaa libɔŋal ke, “Uja uba le nan kon u dikpaab, le ki ŋuun ikunkon ki gɔɔn bi, le ki mann lidiboopal, le ki maa libinbinl lan kper ke wan guu-n li ka li paab ki guu bukpaab nmɔn. Le ki yin bikpaab biba ki ta bukpaabin ki ŋa bi nɔɔn ke bi li guu. I nan foo nchiɛm ke bin chiɛ sei u ni wee ki mu chiɛ bi yaan. Ni bɔɔn bu le u yaar ki jon kitiŋ kiba. 2Idi a chiɛm kaah nan foo-n, le u tun u yomu ke un tan gaa idi u toontum n ban ni, le u jon. 3Le bitoontumin tan choo u ki boo u nbamɔm, ki ŋɔɔr u gab le u kun yɔli. 4Le ukpadaan nmɔn ji tun uyom uba, le bitoontumin ji tan fa u yul ki chib, ki jin u ifa. 5Le ukpadaan nin ji mann tun uyom uba bi ban. Le bi tan ku u ma. Ni bɔɔn bu le u ji saar tun biyom takpem bi ban, le bi ji tan saar tun bi mu man, ki boo bibam, ki sin ku bibam. 6Ukpadaan nmɔn a bijiɛkaag le ni nan gur u ban, le u tun u bitoontum nmɔn ban, ki ke, “Bi li jiin bi ba ki sei n tɔɔl a bija nmɔn. 7Le bitoontum nmɔn bei tab ke, ‘U faajiru sɔ, che ti ku u, wee lifaal nmɔn n kpann ti yaal.’ 8Le bi choo u ki ku ki ta u nyan nkpagbaan ki tan gab.”
9Yisa kaah pag man ki diɛ n-yonn man le u baan bi ke, “Ni tiɛr ukpadaan nan ni yin ŋa niin? U yin dan le ki nan ku bitoontumin, le ki ta bukpaabin ki ŋa bitoontum biba a nɔɔn. 10Naa la nyi ki karin naah sɔb Uwonbɔr a gbɔŋin man n naa? Ni sɔb ke,
“Kudaag#12:10 Juu yaab nan jɔɔ litangbagtakpenl lan ŋmag kudiig a maam le, man le Bikɔɔm mu jɔɔ kijaantelig kan ŋmag kudiig a yɔgiri nin limɔɔpinl. kan wee bitanmaab yii ki n ni,
ki ma nan ye kijaantelig ŋaŋ,
11Uwonbɔr le ŋa man
Le ni ŋa ti ligaril.#Ilan a gbɔŋ 118:22-23”
12Yisa kaah pag man ki diɛ n-yonn man nin, le Juu yaab a yudam biɛ ke u ga libɔŋalin ki jiin bi paam le, le bi ban bin choo u, le ki sin san bininfobin bijawaam; ni bu le bi ta u ki jiɛn ki sin yaar.
Baah nan pen Yisa a lam man
(Matiu 22:15-22; Lug 20:20-26)
13Le bi nan tun Farasii yaab biba nin Ubɔr Herɔd a nib biba Yisa ban ke bin nan pen u lam. 14Le bi nan foon ki baan u ke, “Wan wɔɔn, ti nyi ŋaah pag ibamɔn, kaa san bijawaam nin bininfob kaah li tiɛr man ni. A biɛ wɔɔn bininfob Uwonbɔr a sam nin ibamɔn, le a baga kaa be nin uninfo kaah ye wan ni. Mambu, bei ti ni, ni ŋan nin ti yɔ lampo ki sei Rom a tiŋ a bɔru Siiza, bee ti laa yɔɔ?”
15Le Yisa biɛ ke bi ban bin pen u lam le, le ki jiin bi ke, “Ba ŋa wee ni ban ni kɔɔnim libiginlin naa? Li jɔɔn biligib nmɔn wee n lig.” 16Le bi ta sei u. Le u baan bi ke, “Ŋma a nunaŋ nin u yinl be biligib nmɔn buu?” Le bi bei u ke, “Siiza.”
17Le Yisa bei bi ke, “Tɔ, ni ta nan ye Siiza yaan ki sei Siiza u, ki ta nan ye Uwonbɔr yaan ki sei Uwonbɔr a.” Le ni gar bi takpem u jiim nmɔn bu.
Bitakpiib a fiim a bɔr
(Matiu 22:23-33; Lug 20:27-40)
18Le Sadusi yaab biba nan dan u ban. Ban len ke binib kaa yin fii nkumin ni, le ki bei ke, 19“Wan wɔɔn, Moziz nan sɔb nsiim ki ke, “Uja kpo wee ki jɔɔ upii wee kaa ma kibig ke, ni ŋan u na a big n ta lipukɔɔlin ki maa nbuwaab sei utakpiirin. 20Tɔ, bijab bilile le nan be ki ye tinabir, le uninkpelin kɔɔn u pii ki kpo kaa ma nbuwaabi. 21Le wan pa u bu ta lipukɔɔl nmɔn, le ki mu kpo kaa ma bigi; le wan kpiɛ bita n mu ta upii nmɔn, le ki mu nan kpo, kaa ma kibigi. 22Man le ban biɛn pa nmɔn kɔɔn upii nmɔn, le ki nan kpo, bi ni u ba kaa ma kibig nin upii nni. Ni bɔɔn bu, le upii nmɔn mu nan kpo. 23Tɔ, bitakpiib a fii daal, bi ŋmiɛ na yin ye upii nmɔn naa? Nan bu-n bi bilile nmɔn biɛn kɔɔn wa.”
24Le Yisa bei bi ke, “Naa nyi niba. Nan che naa nyi nmɔn ye nan le. Naa nyi Uwonbɔr a gbɔŋi, kaa ji nyi waah jɔɔ npɔɔn man ni. 25Bitakpiib nan fii nkumin ke, bi na yin be le ke malakam kaah be Uwonbɔr a niin man nin; lipiikɔɔnl nin lijakunl kaa na yin be. 26Ki jiin nkum a fiim paam, naa nyi ki karin Uwonbɔr a linlenu Moziz a sɔbim n naa, naa nan pag ki jiin kujagorug a bɔr n naa? Ni sɔb ke Uwonbɔr nan bei Moziz ke u ma Uwonbɔr le ye Abiraham a weem, nin Azig a weem, nin Jekɔb a weem. 27Waa ye ban kpo a weemi, u ye ban fo a weem le. Ni jɔɔ kuŋmaruŋ.”
Nsiim man yab a bɔr
(Matiu 22:34-40; Lug 10:25-28)
28Tɔ, ban wɔɔnn nsiim nmɔn a ni uba nan be niin ki gbir Yisa nin Sadusi yaab nan a bɔr pagilin, ki kan Yisa kaah jiin ibinbaan ni nbamɔm man. Ni bu le u dan Yisa ban, ki mu nan baan u ke, “Ke nsiim mi la ba le ye nsiim man pɔɔ?”
29Le u jiin u ke, “Nsiim man pɔɔ ye nan le: ‘Iziral yaab, ni pelim man, ti Yudaau Uwonbɔr ye Uwonbɔr uba le. 30Li jiɛ u nin a sufu biɛn, nin a naaŋ biɛn, nin a potiɛl biɛn, nin a pɔɔm biɛn na.’ 31Nsiim man pɔɔ ki kpiɛ milee ye nan le: ‘Li jiɛ a tau ke ŋaah jiɛ a ba man ni.’ Nsiim nba kaa ji be ki jon nsiim milee nan ni.”
32Le wan wɔɔnn nsiim nmɔn bei Yisa ke, “Wan wɔɔn, n pooriŋ. A pag ibamɔn le, ke ti Yudaau Uwonbɔr ye Uwonbɔr uba le, le Nween nba kaa ji be ki kpiɛ u bu, 33ke uninfosaal li jiɛ Uwonbɔr nin u sufu biɛn, nin u potiɛl ke, ki ji li jiɛ u tau ke waah jiɛ u ba man nin ke. Ni ŋan ki jon nin uninfo n ta tiwankor ki mann kumanug ki nyɔɔ nŋmi sei Uwonbɔr a.”
34Yisa kaah nan kan ke u jiimin jɔɔ nlamin, le u bei u ke, “Ŋaa fɔg nin Uwonbɔr a niin a naami.” Ni niɛ nan a bɔɔn uba kaa ji nan jɔɔ sufu nin un baan Yisa nbinbaan ni.
Masiya kaah ye wan
(Matiu 22:41-46; Lug 20:41-44)
35Yisa kaah nan be wɔɔn bininfob iwonjiɛn niin n ni, le u nan baan bi nbinbaan ke, “Ba ŋa wee ban wɔɔnn Uwonbɔr a siimin ke Masiya n ye Defid a yaabil lee? 36Kasi a Naaŋ le nan gbeen Defid, le u ke,
‘Uwonbɔr nan bei n Yudaau ke,
kalim n nɔɔjiim paam
hali nin maah na li che a dataam nkpann
a taai a tɔɔn bol.’#Ilan 110:1
37Defid baantɔɔl kaah nan yi Masiya ke u yudaau nan, ke ni ŋa niin wee Masiya ye Defid a yaabil laa?”
Ban nan wɔɔn Uwonbɔr a siim nan a bɔr
(Matiu 23:1-36; Lug 20:45-47)
Bininfob takpem le nan pelig Yisa a wɔɔmin nin npopeen. 38Waah nan wɔɔn bi nan, le ki bei bi ke, “Ni li nyi ban wɔɔnn ni Uwonbɔr a siim nan a binbem bu man; bi ma ban bi li yee daala fufɔgir ki choon, ki ban ke bininfob li poor bi kinyaŋin, 39le bi kɔɔ kuwonjiɛndiigin ke, bi ban bin kal bininkpeeb a kikaabol le; bi ji jon kuchiigin mu ke, bi ban bin kal biyudam a kikaabol le; 40bi ma ji ipukɔɔ dulim, le ki ji jirin ki nan miɛ Uwonbɔr ki yuur, ki ban bininfob n kan bi ki ke bi ye bininfoŋam le. Bi tudaril na li bir pam.”
Lipukɔɔl a piini a bɔr
(Lug 21:1-4)
41Yisa nan ka iwonjiɛn niin le ki mal Uwonbɔr a piini a yiigin, ki lig bininfob kaah kpeen ilig man. Le bijɔɔndam takpem nan kpeen ilig takpem, 42le kipukɔɔlanjiimig mu nan kpeen koobu ilee.#12:42 Iyaayoo i nan ye ilig yan li fir da tijiir le.
43Le Yisa yin u bɔɔnɔɔbin ki bei bi ke, “Ibamɔn le n bei ni nan, kipukɔɔlanjiimig nan kaah ta u piini yan kpeen kiyiig nan yaan nan, jon ipiin yan biɛn be niin nin na. 44Nan bu-n, bi biɛn nan nyan bi piini nmɔn bi jɔɔmin le, amaa kipukɔɔlanjiimig nan ma ta u faal biɛn le sei.”
ទើបបានជ្រើសរើសហើយ៖
Mag 12: KUGL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Komba New Testament © Bible Society of Ghana, 2014.