Romans 7
7
Iḷisaurrusiaq Katitinniġmiñ
1Aniqatiit, uqautigivsi iḷisimaruasii God-im pitquraŋiñik qaisaŋiñik Moses-kun, iḷisimarusi pitquranun iñuk aŋalatitchuuruq iñuuniġmiñi kisianik. 2Uvva urriqatiksraŋa taavruma. Pitqurat uqaluqaqtut aġnamun iñuuqatigitquvlugu uiŋa iñuuniqtutilaaŋatun. Aglaan uiŋa tuqukpan, pitquram tuvaaqatigiiksitaŋakta aŋalataġiŋaiġaa. 3Tavra piqatiqaġumi allamik aŋunmik uiñi iñuuŋŋaan, allatuqtauniaqtuq. Aglaan uiŋa tuqukpan, taavruma pitquram tuvaaqatigiiksitaŋakta aŋalataġiŋaiġaa. Uiñikkumi allamik aŋunmik allatuqtauniaŋitchuq. 4Tainnatuttauq ilivsiññun inmiuq, aniqatiit. Christ tuqumman, tuquqatigiruatun piŋagiksi, aasii paŋmapak aglausimaruat pitqurat aŋalanŋaiġaasi. Paŋmapak tuvaaqasiutirusi allamun, sunauvva Christ-mun aŋipkaŋakkaŋanun God-im tuqqunmiñ. Tavraasii iñuuruksraurusi iviġaumalugu God. 5Iñuusuuŋŋapta kamagivlugu piḷuun, piḷuksisuguuŋarugut, aasii God-im pitquraŋisa iḷitchuġipkaqłuta piḷuusiqitilaaptiŋnik. Taavrumaasii pigiitchuam tatavsaqtaupkaġayaġaatigut isuitchuamun. 6Aglaan paŋmapak pitqurat aŋalanŋaiŋagaatigut. Tuqummatun piŋarugut tamatkunuŋa aŋalatigisuukkaptiŋnun, aŋalataġitquvluta Ilitqusiġiksuamun, iñuulutaasii nutauruamik iñuutchimik, aŋalanŋisaŋannik utuqqauruat aglausimaruat pitqurat.
Pitqurallu Piḷuullu
7 #
Ex 20.17; Dt 5.21. Uqallakkumiñaqpisa pitquranun piḷuksipkaġuuniḷuta? Tainna uqallaktuksrauŋipiaqtugut. Pitqurat anniqsuġaatigut iḷitchuġipkaqłuta piḷuutim suutilaaŋanik. Nalunayaqtuŋa kaviuġniq piḷuutautilaaŋanik pitqurat uqallaŋaitpata, “Kaviuġnaq.” 8Iḷitchuġikama pitqurani kaviuġniġmik, piḷuutim kipiġniuqtitkaqsigaaŋa qanusipayaanun pigiitchuanun. Iñuum nalugumigich God-im pitquraŋi, nalummiuq suutilaaŋanik piḷuun. 9Qaŋauvlugu iñuunnamni naluŋagaluaqtuŋa God-im pitquraŋiñik. Taimani piḷuutaiñmatun inŋagaluaqtuq uvamnun. Aasii iḷitchuġikapkich pitqurat iḷitchuġimmiuŋa piḷuksiŋatilaamnik. Tavra tatavsaaksraġuŋaruŋa isuitchuamun. 10Taapkua pitqurat iñuuliññiktuksraġaluat uvamnik, iḷitchuġipkaqsiññaŋagaanŋa pasirautilaamnik tatavsaqtauyumiñaqsivḷuŋa isuitchuamun. 11#Gn 3.13.Qanuq iḷitchuġiŋaruŋa piḷuksiŋatilaamnik iḷitchuġipqauraqapkich God-im pitquraŋi. Niġiukkaluaqtuaŋaa iñuggutinnagniaġasugaluŋa pitquratigun, sagluqirauŋaruŋa, aasii piḷuutikun tatavsaaksraġuqłuŋa isuitchuamun. 12Tavra God-im pitquraŋi qaisaŋi Moses-kun piḷuutaitchut nalaunŋarullu nakuurullu. 13God-im pitquraŋisa nakuuruat pasiraksraġuŋavanŋa tatavsaqtauruksraġuqłuŋa isuitchuamun? Naaggapiaġataq. Uvaŋa piḷuunma pasiraupkaŋagaanŋa. Iḷitchuġipqauraqama God-im nakuuruanik pitquraŋiñik, iḷitchuġimmiuŋa qanutun piḷuusiqiriqpaurautilaamnik.
Malġuk Irrutchik Iñuŋmi
14Pitqurat nakuurut. Pasiraksrauŋitchut pitqurat, aglaan uvaŋa kamagilaiññiġitka piḷukpaił̣ł̣uŋa. 15#Ga 5.17.Kaŋiqsiḷguitchuŋaunnii uvamnik, qanuq uvva pisukkaluaġaqtuŋa sumik nalaunŋaruamik, piḷaitchuŋa. Pianigaġigiga pisuŋitkaluakkaġa naġġugikkaġalu. 16Tavraasii pisuuniqama pitqurat pitquŋisaŋiññik, uvaŋalu piyumaŋitkaluakkamnik, piiḷaaġiŋitkiga pitqurat nakuutilaaŋat. 17Nutauruam iñuutchima pipkaqtaŋitkai sut naġġugikkatka. Aglaan piḷuksisuguuruam iñuutchima pipkaqtaġaaŋa naġġugikkamnik. 18Iḷisimaruŋa piḷuksisuguuruaq iñuusiġikkaġa nakuuŋipiaqtuq. Nakuurualiqisugluqtuŋaunnii suaŋŋataitchuŋa nakuurualiqiyumiñaġluŋa. 19Qanuq piḷaitkiga nakuurualiqiaġiyumakkaġa, aglaan pivḷugu pigiitchuaq pisuŋitkaluakkaġa. 20Tavra pisuuniġupku pisuŋitkaluakkaġa, nutauruam iñuutchima pipkaqtaŋitkaa, aglaan piḷuksisuguuruam iñuutchima.
21Tainnasuŋaiññaq pisuuruq, nakuurualiqisukkaluaqama piḷaitkiga, aglaan pigiitchualiqiruŋa. 22Nutauruami iñuutchimñi, nakuaġigaluaġitka God-im pitquraŋi, 23aglaan iḷisimaruŋa uvamni ittuq alla suaŋŋan aŋuyaktuaq pitchaiḷiraġnikłuni uvamnik nakuurualiqitchaiḷivḷuŋa, kivgaupkaqłuŋa piḷuutimnun. 24Qanutun uvaŋa quviasuŋisigivik? Kia atanġiqsinniaqpaŋa piḷuksisuguuruamiñ iñuutchimñiñ? 25Quyyavigigiga God atanġiqsinmaŋa Jesus Christ-kun Ataniptigun. Tavraasii nutauruami iñuutchimñi kamagisukkitka God-im pitquraŋi, aglaan piḷuksisuguuruam iñuutchima piḷuksipkaġuugaaŋa.
ទើបបានជ្រើសរើសហើយ៖
Romans 7: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
