Romans 10
10
1Aniqatiit, uummatimniñ kipiġniupiaġataqtuŋa aŋaiyyuruŋalu God-mun, aŋaiyyutivlugich Jew-guruat aniqatiitka annaurrautquvlugich. 2Iḷisimaruŋa kipiġniuqłutiŋ savautigaat God, aglaan tuvraŋitkaat God-im uqautaa inmiŋnun. 3Qanuq naluvlutiŋ God-mun iñuich nalaunŋasipkaġuutilaaŋat ukpiġutaatigun, inmiŋnik nalaunŋasiñiataŋarut sivuġaani God-im. Tavraasii nalaunŋasipkaqtinŋaitchut God-mun. 4Iñupayaaq ukpiqtuaq Christ-mun nalaunŋasiñiataŋaiŋaruq inmiñik kamaksriñiġmigun God-im pitquraŋiñik aitchuutauŋaruanik Moses-kun. Nalaunŋasipkaqtauŋaruq ukpiqami Christ-mun.
Iñupayaat Annaurrauyumiñaqtut
5 #
Lv 18.5. Moses aglaŋaruq, iñugguuq nalaunŋasipkaqtauniaġumi pitquratigun, ilaan kamagipiallagaksraġigai ataramik iluqaqpiuraŋisa God-im pitquraŋi. 6#Dt 30.12-14.Aglaalli nalaunŋasiñikun uqallaun ukpiġutikuaqtuaq inna ittuq. Isumaruksrauŋitchutin mayuqtuksraunasugalutin qiḷaŋmun atqautiyaqtuġlugu Christ qiḷaŋmiñ, 7atqaqtuksrauniḷutillu tuquŋaruat inaannun aŋipkaġiaġlugu Christ tuqqunmiñ. 8Uqaluk nalaunŋasiñikun ukpiġutikuaqtuaq alġaqsruutigigikput. Taamna uqaluk kaŋiqsiñaqtuq, iḷisimalluataġiksi, uvva inna ittuq, 9quliaqtuaġiguvsiuŋ allanun Jesus Atanġuniḷugu, suli ukpiġilugu uummativsiññiñ God-mun aŋipkaŋaniḷugu tuqqunmiñ, annaurrauniaqtusi. 10Qanuq iñuk ukpiġuuruq uummanmiñiñ aasii nalaunŋasirauvluni sivuġaani God-im, suli quliaqtuaġutivlugich allat ukpiġilikkaġmiñik aasii annaurrauvluni. 11#Is 28.16.Bible uqaqtut, “Kiñaliqaa ukpiqtuaq Christ-mun, nunuuraliġumiñaipiaqtuq.” 12Jew-guruaġlu Jew-guŋitchuaġlu allagiiŋitchuk, atausiq Ataniq atanġuruq iluqaiññun, suli aitchuiruq suġaliŋiñik annautim iluqaiññun ququularuanun inmiñun aŋaiyyuvlutiŋ. 13#Jl 2.32.Qanuq “Iñupayaaq ququularuaq aŋaiyyuvluni Ataniġmun, annaurrauniaqtuq.”
14Iñuich aglaan ququulayumiñaitchut Ataniġmun ukpiliŋaitkumiŋ ilaanun. Suli ukpiġumiñaiñmiut tusaayugaaŋaitkumiŋ ilaanik. Tusaayugaaġumiñaiñmiut alġaqsruiraiḷḷutiŋ. 15#Is 52.7.Alġaqsruirit alġaqsruiyumiñaiñmiut tilirauŋisuaġumiŋ. Alġaqsruiritigun uqaluk aglausimaruq Bible-ni inna, “Qanutun aliuġnaqtigiruq alġaqsruirit kukiḷuŋniŋat alġaqsruutigivlugu tusaayugaaġiksuaq.” 16#Is 53.1.Aglaan tamatkiġḷutiŋ akuqtuŋaitkaat tusaayugaaġiksuaq. Inna Isaiah uqallaŋaruq, “Ataniiq, ukpiġivigruaŋaitkaat alġaqsruutiga ilimiŋnun.” 17Tavra iñuich ukpiliġuurut Christ-mun tusaayugaaqamiŋ alġaqsruunmik Christ-kun.
18 #
Ps 19.4. Aglaan apiqsriruŋa, tusaaŋaiḷgataqpat? Iḷumun tusaaŋarut, qanuq “Tusaayugaaġiksuat tikiurrauŋarut nunamun iluqaanun, suli iluqaiññun nunam iñuŋiñun.” 19#Dt 32.21.Apiqsrivsaaqtuŋa, Israel-guruat kaŋiqsiŋaitparruŋ tusaayugaaġiksuaq Christ-kun? Kaŋiqsiŋagaluaqtut. Qanuq Moses uqallaŋaruq Bible-ni God inna uqallaŋnivḷugu, “Annautiniaġitka allat iñuich pigiŋisatka, aasii ilivsi siŋñaliqsillusi. Annautiniaġitka allat kaŋiqsiŋaitchuat, aasii ilivsi qinnaiḷusi.” 20#Is 65.1.Isaiah suli taluqsrasuŋaġnani uqallaŋaruq, inna God uqallaŋnivḷugu, “Iñuich iḷisimaniugaŋitchuat iḷitchuġiŋagaanŋa. Apiqsruqtuutiqaŋitchuanun uvamnik, ilaiññun iḷitchuġipkaŋaruŋa.” 21#Is 65.2.Israel-guruat God-im uqallausiġiŋagai inna, “Ataramik isaaqsimagaluaġikka tallika qaitquyummiiqł̣ugich kamaksriḷaitchuat qapiġnaqsruqtuallu iñuich.”
ទើបបានជ្រើសរើសហើយ៖
Romans 10: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
