Mark 7
7
Iḷisaurrutaat Maŋŋuuruat
(Matthew 15.1-9)
1Tavra Pharisees-lu iḷisaurriḷḷu pitquranik qairuat Jerusalem-miñ katirvigiŋagaat Jesus. 2Tavra tautuŋagaich Jesus iḷitchitquraŋisa iḷaŋich niġiruat iqaġiqqaaġaluaġnagich argatiŋ Pharisees piraksriutaatitun iñuŋnun.
3Qanuq Pharisees, iluqaġmiglu Jews, Iqaġigaluamiiŋaunnagich argatiŋ, niġiḷaitchut, kamagivlugu taimaŋŋaqtaq iḷisaurrutaat maŋŋuuruat. 4Aasii tauqsiġñiaġviŋñiñ aikamiŋ niġiḷaitchut iqaġiŋaunnatiŋ. Suli iñugiaktuat allat akuqtuaġiŋagaich piḷġusiġisukługich, iqaġiniŋich qallugaurat, niuqqiutillu, uvluyuiḷallu utkusiich.
5Tavra Pharisees-lu iḷisaurriḷḷu pitquranik Jesus apiġiŋagaat, Summan iḷitchitquravich kamagilaitpatigik iḷisaurrutiŋich maŋŋuupta, niġivḷutiŋ iqaġiqqaaġaluaġnagich argatiŋ? 6#Is 29.13.Jesus kiuŋagai, Ilivsi ukpiŋŋuaqtuasii. Qanutun nalautigiŋaruq Isaiah uqaqtaa God-im uqallausiġikamisi. Ilaan aglaŋagai God-im uqaluŋi inna,
“Ukua iñuich nanġaġaluaġaanŋa uqalułhiñamiŋnik,
sivuniqasuŋaġnagich uqalutiŋ.
7Iliŋisa iḷumutun savautiŋitkaanŋa aŋaiyyuvigiluŋalu,
qanuq iḷisaurrirut iñuich pitquraliaŋiññik,
God-mun pitquraġiruatun iḷivḷugich.”
8Jesus uqallavsaaŋaruq, Kamagiŋitkisi God-im pitquraŋi, kamagiłhaaqługich piḷġusiḷiaŋich iñuich.
9Suli uqallautivsaaqługich, Ayyaksaasuġisi pitquraŋi God-im piupkaġniałhaaqługich ilivsi iḷisaurrutisi. 10#Ex 20.12; Dt 5.16; Ex 21.17; Lv 20.9.Moses piraksriiŋaruq, Suuŋiḷaġinagik aapallu aakallu. Kiñaliqaa uqallautiqaqtuaq pigiitchuamik aapamigun naagga aakamigun tuqutaksraupiaqtuq. 11Ilivsiḷiasii iḷisaurrirusi iñuk piqaġniqpan sumik ikayuutigiyumiñaġaluakkamiñik aapamiñun naagga aakamiñun, aglaan uqallausiġikpagu, Taamna Corban-guruq, sivuniqaqtuamik taamna God-im pia, 12ilaa pasirauyumiñaiññigiksi ikayuŋitkaluaġumigik aapaniḷu aakaniḷu. 13Tainna pikavsi, God-im uqalua anniqsuutauŋaiġiksi taimaŋŋaqtatigun iḷisaurrutivsigun iḷisaurrutigikkavsigun. Suli tainnatchiñik iñugiaktuanik piusi.
Sut Salumaiḷḷisit Iñuŋmun
(Matthew 15.10-20)
14Tavra ququaganikamigich iluqaisa iñuich ilimiñun, Jesus uqallautiŋagai, Naalaġnisiŋa iluqapayauravsi, kaŋiqsiḷusiḷu. 15Sumik piitchuq siḷataaniñ iñuum, niġikkaŋatun, isiqtuamik ilaanun piḷuksipkaġumiñaġlugu, aglaan aniaruam iñuum iḷuaniñ, uqaluusiatun piḷġusiatullu, tamatkua iñuk piḷuksipkaġumiñagaat. 16[Taamna pisigilugu, siutiqaqtusi tusaggatiksraŋnik naalaġnisiŋa.]
17Tavra iñuich qimakługich isiġman iglumun, iḷitchitquraŋisa apiġiŋagaat taavrumuuna uuktuutikun. 18Aasii ilaan uqallautiŋagai, Kaŋiqsisaiñmivisivsauq? Kaŋiqsiŋitpisi? Supayaam iḷuanuktuam iñuum siḷanmiñ piḷuksiŋitkaa, 19qanuq isiŋitchuq isumaqaġvianun aglaan aqiaġuanun, aasii anivḷuni timaaniñ. Tainna uqallakami, Jesus niġiñaqtualigai niqipayaurat. 20Suli uqallavsaaŋaruq, Sum aniruam iñuŋmiñ, pigiitchuakun uqaluan piḷġusiġiitchuavlu, piḷuksipkaġaa, 21qanuq qamaŋŋamiñ iñuum isumaqaġvianiñ salapqiġaqtut piḷuktuat isumat, tigligaġniġich, iñuaġniġich, 22allatuutit, Kaviuqqutit, pigiitchualiqutit, sagluqqutit, pitquraiḷaġniġich, killuqsraġniġich, uqautikłiġñiġich pigiitchuamik, kamasaaġun, isumalluaġiirrun. 23Tamatkua iluqaġmiŋ pigiitchuat qairut iñuum iḷuaniñ, aasii piḷuksipkaqługu.
Aġnam Ukpiġutaa
(Matthew 15.21-28)
24Tavra tavraŋŋa Jesus aullaŋaruq nunaŋiññun Tyre-vlu Sidon-lu. Isiqami iglumun iḷisimatquyumaŋaitkaluaġaa sumiitilaani. Iñuich aasii iḷisimaŋagaat sumiitilaaŋa. 25Tavra tamaani aġnaq paniqaġniqsuaq ilitqusiqł̣uqaqtuamik tusaakami Jesus-mik, ullaŋagaa tavrauvvaa, aasii pułłuni sivuġaanun. 26Taamna aġnaq Jew-guŋitchuq, aniŋaruaq Phoenicia-mi Syria-miittuami. Ilaan apiġipiaŋagaa Jesus anitquvlugu ilitqusiqł̣uk paniŋmiñiñ. 27Tavra Jesus uqallaŋaruq ilaanun, Miqłiqtut Jew-guruat niqiksritqaaġlavut, qanuq nalaunŋaitchuq aitchuutigiruni miqłiqtum niqautaa qimmiñun. 28Tavra aġnam kiuŋagaa, Aaŋ iḷisaurrii, qimmich niġisuummiut niġġiviich ataanni miqłiqtut iḷakuŋiññik. 29Jesus uqallautiŋagaa aġnaq, Pisigilugu kiggutin, aggiiñ. Ilitqusiqł̣uk aniŋaruq paniŋniñ. 30Tavra aġnaq aikami, tautuŋagaa paniñi nalaruaq siñigviŋñi, ilitqusiqł̣uk aniŋavluni ilaaniñ.
Jesus Iłuaqsigaa Tusaalaitchuaq Uqalaitchuaġlu Iñuk
31Tavra Jesus aullaŋaruq Tyre-miñ Sidon-kuaqłuni aasii tavraŋŋa tasianun Galilee-m apqusaaqługich qulit nunaaqqich. 32Tavra iñuich qaġġisiŋagaat Jesus-mun tusiḷḷaqtuaq, iptuġiqł̣uniḷu. Aasii apiġipiaŋagaat Jesus aksiuquvlugu. 33Tavra Jesus asivaqtaaġutiŋagaa iñusalaŋniñ, aasii iḷiŋagai argagni siuttaŋnun, suli tivvuaqqaaqłuni, aksiuŋagaa uqaŋa. 34Tavra aaġluqłuni qiḷaŋmun, Jesus aniqsaapaŋaruq aasii uqallautivlugu, Ephphatha, sivuniqaqtuamik, aŋmaġiñ. 35Tavra tavrauvvaa siuttak aŋmaŋaruk, suli uqaŋa iłuaqsivḷuni, aasii uqaŋaruq kaŋiqsiñaqsivḷuni. 36Tavra piraksriŋagai quliaqtuaquŋił̣ł̣ugich iñuŋmun, tavra piraksrimmaġiksaaġuraġniaġmatiŋ, tainnatułhaavsaaq atqunaqługu quliaqtuaġiŋagaat. 37Iluqaġmiŋ tusaaruat kamasupiaġataŋarut, uqaqłutiŋ, Ilaa savaŋaruq supayaanik piḷḷuataqługich. Ilaan tusiḷḷaqtuat tusaallasigai, uqayuitchuallu uqallasivḷugich.
ទើបបានជ្រើសរើសហើយ៖
Mark 7: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)