Galatians 3
3
Pitqurat Naagga Ukpiġun
1Ilivsi isumalaaŋitchuasii Galatians, kia alapititpasi? Uqaluuruat kikiaktuurrauniŋagun Jesus Christ nalunaipiaqługich alġaqsruutauŋagaluaqtut ilivsiññun. 2Apiġilavsi uumiŋa. Aitchuusiaġiŋavisiuŋ Ilitqusiġiksuaq pitquranik kamaksriñiqsi pisigivlugu, naagga ukpiliġñiqsi tusaayugaaġiksuanik alġaqsruutauŋaruanik ilivsiññun? 3Nalupqinaitchuamik isumalaaŋisigiyumiñaitchusi, isumallasiḷusi iñuk aitchuusiaqaŋaruq isuitchuamik iñuggunmik Ilitqusiġiksuamiñ, nakuułhaaġluni ukpiqtuaguyumiñaġniḷugu iñuuluni pitquratigun. 4Nalupqinaitchuamik, iluqaġmiŋ nagliksaaqtirrusiasi piuŋiḷauŋaitchut. 5God-im iñuupkaŋagaa Ilitqusiġiksuaq iḷuvsiññi, aasii aliuġnaqtuat savaaġipkaqługich akunnavsiññi, qanuq ukpiġiŋagiksi alġaqsruutauruaq ilivsiññun, pisigiŋaiqł̣ugu iñuuniatagniqsi nalaunŋaruakun sivuġaani God-im kamaksriñikun pitquranik.
6 #
Gn 15.6; Ro 4.3. Bible-niñ iḷitchumiñaġikput taamna qanuq aglausimaruq inna, “Abraham ukpiġiŋagaa God, aasii taamna pisigivlugu God-im akuqtuŋagaa ilaa nalaunŋarualivḷugu.” 7#Ro 4.16.Taavrumuuna kaŋiqsiyumiñaqtusi, iñuich ukpiqtuat Abraham ukpiġusiatun, nanmiñiq miqłiqtuġimmatun itkai, kiŋuniġipiaŋitkaluaŋŋaisa. 8#Gn 12.3.Aasiisuli piŋaisaktaŋŋaan, Bible satqummiŋagaat God-mun akuqtuġumaaġnivḷugich Jew-guŋitchuat nalaunŋarualiḷugich pisigilugu ukpiġutaat, qanuq God-im uqautiŋagaa Abraham tusaayugaaġiksuanik uqallautikamiuŋ, “Quviasuutiqaqtinniaġitka nunapayaani ukpiliqsuat uvamnun iliktuttauq ukpiqpata.” 9Tavra iñuich ukpiliqsuat Abraham-tun quviasaaġusiaqaġmiut piqatigivlugu Abraham ukpiŋaruaq.
10 #
Dt 27.26. Iluqaġmiŋ iñuich akuqtullasipkaġniaqsaaruat nalaunŋarualiḷutiŋ sivuġaani God-im kamagilugich pitquraŋi pasiñaqtut, aasii tuqulutiŋ, qanuq aglausimaruq Bible-ni inna, “Pasirauruq nalliummatiruġlu tuqqunmun kiñaliqaa iñuutuiññaŋitchuaq kamagilugich iluqapayauraŋisa aglausimaruat pitqurat.” 11#Hab 2.4.Paŋmapak nalupqinaiqsuq iñupayaaq nalaunŋasiyumiñaisilaaŋanik sivuġaani God-im kamaginiḷugich pitqurat, qanuq aglausimaruq Bible-ni inna, “Iñuk ukpiġunmigun nalaunŋasirauruaq iñuuniaqtuq.” 12#Lv 18.5.Akiḷḷiali taavruma uqaluum, iñuk iñuuruaq pitquratigun ukpiġutituaksraitchuq, qanuq Bible-ni aglausimaruq inna, “Iñuk iñuuniaqtuq kisianik kamagituiññaġlugich iluqaisa pitqurat, suuramikunnii kipuqłasuŋaġnagich.” 13#Dt 21.23.Uvagut pasiraugaluaqtilluta tuquruksrauvluta kamagilaił̣ł̣ugich God-im pitquraŋi, Christ tasuŋagaatigut pivḷugu ilaan uvagut tatavsausiaksraqput, qanuq Bible-ni aglausimaruq inna, “Pasirauruq tuquruksrauruġlu iñupayaaq kikiaktuurrauruaq napaaqtumun.” 14Aasii taamna Christ Jesus pimmagu Jew-guŋitchuat annaurrauyumiñaqsirut ukpiġutikun Abraham-tun, aasiisuli ukpiġutikun aitchuusiaqallasivḷuta Ilitqusiġiksuamik unniqsuqłiisauŋaruamik.
Pitqurallu Unniqsuqłiiḷḷu
15Aniqatiit, uvva uuktuutauyumiñaqtuaq iñuŋniŋŋaqtaq. Iñuk unniqsuqłiimman aglautivlugu suli nalupqinaiyausiqł̣ugu atchiivigivlugu, kialiqaa asivaġumiñaitkaa naagga allaŋŋuġumiñaitkaalu taamna unniqsuqłiiñ. 16Tavra God-im unniqsuqłiisigiŋagaa quviasaaġusiaq Abraham-mun kiŋuniŋanullu. Una nalunaigilugu. Unniqsuqłiiñ quviasaaġusiakun unniqsuqłiisauŋaitchuq iñugiaktuanun kiŋuniġiiñun, aglaan atausisualuŋmun kiŋunġuruamun, aasii taamna kiŋunġuruaq Christ-guruq. 17#Ex 12.40.Uvva sivuniġikkaġa. God-im pitquraŋi aitchuutauŋarut 430 ukiut pianiŋmata nalupqinaiyausianiqqaaqtillugu ilaan unniqsuqłiisaa Abraham-mun. Taamna tainnainman, God-im unniqsuqłiisaa Abraham-mun nalupqinaiyausiŋaqqaaqtillugu asivaqtauyumiñaiñŋaruq, iñuuptauq unniqsuqłiisaa nalupqinaiyausiŋaruaq asivaġumiñaiñmatun. 18#Ro 4.14.Qanuq unniqsuqłiisauruaq quviasaaġusiaksraq annaun aitchuusiagullakpan kamaksriñiq pitquranik pisigilugu, aitchuusiaġinaġumiñai ŋaruq unniqsuqłiisikun. Aglaatkii God-im aitchuutigiŋagaa Abraham-mun unniqsuqłiisikun.
19Tamatkua tainnainniġmata, summan pitqurat aitchuutauŋavat? Pitqurat iḷḷatauŋarut aquagun unniqsuqłiiñ aitchuutauganiŋman iḷitchuġipkaqsaqługich iñuich piḷuun kamaksriŋiññiġutilaaŋanik God-im pitquraŋiñik, aasii God sivunniŋaruq iñuich iñuuruksrauvlugich sutigun satqummikkaġmigun Moses-kun qaiñiŋanun aglaan Christ, miqłiqtum unniqsuqłiisiaqaŋaruam. Pitqurat aitchuutauŋarut isaġuliktigun, iñukullu pirriruakun Moses-kun. 20Pisinniŋniq iñuŋnik piraksraġuġman, taamna sivuniqaqtuq iññuk malġuk atilutik uqaqtuksrauvlugik unniqsuqłiisikun. Aglaalli God-im unniqsuqłiikamiuŋ Abraham annaunmik, pirituŋaitchuq, inmiñik kisimi piŋagaa.
Sivuniŋat Pitqurat
21Taamna tainnainman, pitqurat paaqsaaŋavat God-im unniqsuqłiisiŋiñun? Naaggapiaġataq. Qanuq pitqurat aitchuutauŋakpata taimuŋa iñuullasiḷḷalugich iñuich, nalaunŋasiraunaġayaqtuq sivuġaani God-im pitquratigun. 22Aglaan uvva, uqallautiŋagaatigut Bible-ni iñupayaurat piḷuksiŋanivḷugich qanuq kamagilaił̣ł̣ugich God-im pitquraŋi. Paŋmapak-aasii tamatkua ukpiqtuat Jesus Christ-mun aitchuusiaqaqtut unniqsuqłiisauŋaruamik iñuggunmik isuitchuamik.
23Christ qaiŋaiñŋaan isiqtaġimmatun piŋagaatigut satqummiqsauvlutiŋ pitqurat aitchuutauruat Moses-kun. Taapkua pitqurat qaunaksrimmatun piŋarut uvaptiŋnik Christ satqummiġñiŋanunaglaan, annaurrauyumiñaqsiḷġataqtilluta ilaagun. 24Qaunaksri munaqsrimmatun miqłiqtunik ataniġnaqutiqaqłuni kamaksripkallavlugich iñuguġataqtillugich, tainnatulli pitqurat qaunagiŋagaatigut Christ qaiñiŋanunaglaan, nalaunŋasipkaqtaullasiḷġataġluta ukpiġluta Christ-mun. 25Aasii paŋmapak ukpiġumiñaqsikapta Christ-mun munaqsrituŋaiqsugut pitquranik.
26Qanuq atausiŋŋuqatigikavsiuŋ Christ Jesus ukpiġutikun, iluqasi aglianiŋarusi iġñiŋi God-im. 27Iluqasi atausiŋŋuqatauŋaruasii Christ-mun, paptaiqsauŋavlusi, ilaatun iḷiŋarusi. 28Tavra iluqasi atausiŋŋuqatauŋaruasii Christ Jesus-mun, atirusi iluqasi. Allagiiŋitchut Jew-guruallu Greek-giḷḷu, kivgallu kivgauŋitchuallu, aŋutillu aġnallu, iluqaġmiŋ atirut. 29#Ro 4.13.Tavraasii pigimmasi Christ, Abraham kiŋuniġigaasi, suli ilaan kiŋuvaannaktigigaasi, kiŋuvaannaktaaġilugu unniqsuqłiisiaŋa.
ទើបបានជ្រើសរើសហើយ៖
Galatians 3: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)