Acts 22
22
1Aniqatiit aapauruallu, naalaġnisiŋa patchisaiññiaġnipkun sivuqqavsiññi. 2Tavra tusaakamirruŋ uqallautimmatiŋ Hebrew-tun uqaqłuni, nipaimmaġiksaaŋarut. Aasii Paul uqallaŋaruq. 3#Ac 5.34-39.Uvaŋa Jew-guruŋa, aniŋaruŋa Tarsus-mi Cilicia-miittuami, aglaan iñuguqłuŋa uvani Jerusalem-mi, iḷisaurriqaqłuŋa Gamaliel-mik. Iḷisaurrusiaqaqłuŋa tuvraipiaġatallaŋnikun pitquraŋiññik maŋŋuupta, suli kipiġniupiaġataqłuŋaptauq ilivsisun iviġagukługu God. 4#Ac 8.3; 26.9-11.Sivuani nagliksaaqtitchuuŋagitka iñuich tuqunniallavlugich ukpiqtuat Jesus-mun, tigutaaqługich aŋutillu aġnallu tigutaaġviŋmun. 5Aŋaiyyuliqsiqpaich qaukłiat iluqaġmiglu uqaqsitaaqtitchirit arguanaiġumiñaġaat iḷumun uqaqtilaaġa. Iliŋiññiñ aitchuusiaqaŋaruŋa tuyuutinik aniqatinun Jew-guruanun Damascus-miittuanun. Aasii iglauŋaruŋa tigutaaġiaqługich Jesus-mun ukpiqtuat, qiḷiqsruiḷugich Jerusalem-muutisukługich tatavsaqtautqulugich.
Paul Quliaqtuaġigaa Isumalitqigñini
(Acts 9.1-19; 26.12-18)
6Iglaullaġma qallimmiuŋalu Damascus-mun, uvluq qitiqqaqpalliġmiuġlu qaumaniqpak qiḷaŋmiñ tavraŋŋatchiaq qaummaġiksinŋaruq avatimnun. 7Tavra ulġuŋaruŋa nunamun aasii tusaavluŋa nipimik uqallaktuamik uvamnun, Saul, Saul, summan nagliksaaqtitpiŋa? 8Aasii kiuŋagiga, Kiuvich ququularuatiin uvamnik? Ilaalli kiuŋagaaŋa, Jesus-guruŋa Nazareth-miu nagliksaaqtitaġma. 9Tamatkuali tuvaaqatigikkaġma tautuŋagaluaġaat qaummaq aglaan tusaaŋaitkaat nipaa uqaqtuam uvamnun. 10Tavra apiġiŋagiga, Suniaqpik uvaŋa Ataniiq? Tavra Atanġum uqallautiŋagaaŋa, Makillutin, Damascus-mugiñ. Taamani uqallautiniaġaatin supayaanik God-im piraksriutiŋiñik iliŋnun. 11Tavra tautuksiḷḷaiġñiqama qaummaġikpaił̣ł̣uni taimña qaumaniq, tasirriutiŋagaanŋa iglauqatiŋma aullativluŋa Damascus-mun.
12Tavraniinŋaruq iñuk atiqaqtuaq Ananias, god-tiliqiruaq kamagivlugich pitquravut isumakkusiaqaġluataqłuniḷu iluqaiññiñ Jew-guruaniñ iñuuruaniñ Damascus-mi. 13Ullautiŋaruq uvamnun, aasii makiłłuni saniqqamnun uqallautiŋagaaŋa, Aniqaan Saul, tautullasiiñ. Tavra tavrauvvaa tautullasiŋaruŋa aasii qiviaqługu. 14Tavra ilaan uqallautiŋagaaŋa, God-iŋata maŋŋuupta piksraqtaaġiŋagaatin iḷitchuġitquvlutin pisuunmiñik, tautuquvlugu piḷuutaitchuaq Kivgani, suli tusaatquvlugu ilaan nipaa. 15Aasii taamna tautuŋakkan tusaaŋakkallu uqautimmatin, quliaqtuaġiniaġiñ iñupayaanun. 16Aasiuvva paŋmapak summan utaqqivich? Makillutin paptaiqsaugiñ, aasii piḷuutitin piiqsillugich, aŋaiyyutikun ikayuqtaiḷiqilutin ilaanun.
Paul Alġaqsruitqurauruq Jew-guŋitchuanun
17Utianikama Jerusalem-mun aŋaiyyuniallaġma aŋaiyyuvikpaŋmi, qiñiqtuuraaŋaruŋa, 18aasii tautukługu Ataniq uqallaktuaq uvamnun, Qilamiqsruġlutin aullaġasuaġiñ Jerusalem-miñ, qanuq iñuich uvani ukpiġiniaŋitkaat quliaqtuan uvapkun. 19Aasii kiuŋagiga, Ataniiq, iliŋich iḷisimalluataqtut aŋaiyyuvipayaani tigutaaqsisuutilaamnik anaumikł̣ugiḷḷu tamatkua ukpiqtuat iliŋnun. 20#Ac 7.58.Suli Stephen alġaqsruirin tuqutaumman makitaŋammiuŋa tavrani, iviġaumagivlugu tuqutauniŋa, qaunagivlugiḷḷu annuġaaŋich taapkua iñuaqtuat ilaanik. 21Tavra Atanġum uqallautiŋagaaŋa, Aullaġiñ, qanuq tiliñiaġikpiñ uŋasiksuamun Jew-guŋitchuanun.
22Taavrumuŋaaglaan uqallautaanun, iñusalaich Paul naalaġniŋagaat. Tavraasii niparraqsiŋarut nipatutilaamiktun, uqaqłutiŋ, Tuqulliuna innasiq iñuk. Qanuq iñuuruksrauŋitchuq. 23Tavra nipaalapkaqługich annuġaamiŋniglu takuyaġaqtillugich miḷḷuutigivlugulu nunam avyua siḷamun, 24Rome-miut aŋuyaktiŋisa atanauraŋata piraksriŋagai iñuŋni itqutitquvlugu Paul aŋuyaktit igluŋiññun, suli uqallautivlugich ipiġaqtuġlugu iḷitchuġisaquvlugich sumik Jew-guruat saqłautiqaqtilaaŋannik ilaagun. 25Tavra qiḷiqsruiganiŋmanni akłunaanik ipiġaqtuġukługu, Paul-gum uqallautiŋagaa aŋuyaktit atanauraŋat makitaruaq tavrani, Pitqurani nalaunŋava ipiġaqtuġuvsiuŋ iñuk Rome-miunun iḷauruaq, isivġiqsauŋaiñŋaan? 26Aŋuyaktit atanauraŋata taamna tusaakamiuŋ, ullautiŋaruq qaukłiannun aŋuyaktit aasii uqallautivlugu, Susaġumaagaqsivich? Taamna iñuk Rome-miunun iḷauruq. 27Qaukłiata ullakługu Paul apiġiŋagaa, Uqallautiŋŋa, Rome-miunun iḷauvich? Paul kiuŋagaa, Aaŋ. 28Aŋuyaktit qaukłiat uqallaŋaruq, Tauqsiŋagiga taamna iḷaliutinik manisalaŋnik. Paul uqallaŋaruq, Aglaan uvaŋa aniŋaruŋa nutim iḷauvluŋa. 29Tavra tamatkua apiqsruqtuiyumaruat Paul-mik niguutiŋarut ilaaniñ tavrauvvaa, taamnalu aŋuyaktit qaukłiat iqsitchaŋammiuq iḷitchuġivluni Paul Rome-miunun iḷautilaaŋanik ilaallu qiḷiqsruiñiqamiuŋ.
Paul Qaġġisigaat Uqaqsitaaqtitchiriñun
30Tavra uvlaakumman aŋuyaktit qaukłiat kipiġniuqłuni iḷisimasukługu nalupqinaiġḷugu sumik Jew-guruanun pasisilaaŋanik Paul. Qiḷiġutaiŋagaa Paul, aasii piraksriqł̣ugich aŋaiyyuliqsiqpaich iluqaisalu uqaqsitaaqtitchirit katitquvlugich. Tavra ilaan qaġġisiŋagaa Paul ilaiññun aasii inillakługu sivuġaannun.
ទើបបានជ្រើសរើសហើយ៖
Acts 22: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
