2 Corinthians 12
12
Paul Qiñiqtuuraaŋi Puttuqsripkausiaŋiḷu
1Uqavigaaqsalguniq iluqani anniqsuutauŋitkaluaqtillugu, uqavigaaqtuavsaallaktuksrauruŋa. Quliaqtuaġutilavsi qiñiqtuuraamnik puttuqsripkausiamniglu Ataniġmiñ. 2Akimiaġuutaiḷaq ukiuq pianiktuq mayuurrauŋaqqaaqtilluŋa qiḷaum iḷaŋanun. Nalummiuŋa timilgiqsilaamnik naagga timiga qimakługu, God iḷisimaruq. 3Aglaan iḷisimatualuktuŋa mayuurrautilaamnik inaannun nalaunŋavlutiŋ ayuruat, timilgiqsilaamnik naagga timiga qimakługu pisilaaġa nalugiga, God iḷisimaruq. 4Aasii tusaavluŋa uqaluutinik uvaŋa uqautigiraksraġiŋisamnik, quliaqtuaġiyumiñaisamnik iñupayaanun. 5Tainnasiq qiñiqtuuraaq uqavigaaġutauyumiñaġaluaqtuq, aglaan uvaŋa uqavigaaġutiginiaŋitkiga. Uqavigaaġutigiłhaiññaġniaġitka suaŋairrutitka. 6Aasiivsauq uqavigaaġukkuma, isumalluaġiiġḷuŋa piñiaŋiñmiuŋa, qanuq uqautiqaġniaqtuŋa iḷumun ittuamik. Aglaan uqavigaaŋitchuŋa, kimulliqaa isummatigitquluŋa qaaŋiulaaġlugu tautuaġikkani uvamni, naaggaunnii tusaakkani uvamniñ.
7Suli pitchaiḷisaqłuŋa kamasaaqpaił̣ł̣aunmiñ iñugiaktuatigun qiñiqtuuraatigun, aitchuusiaqaŋaruŋa iłuiḷḷiuġunmik, kapuaġutitun ittuamik timimni. Iḷaŋat Satan kivgaŋisa tilirauŋaruq iłuiḷḷiġaqsaatquvluŋa kamasaaqpaitquŋił̣ł̣uŋa. 8Piŋasuiqsuaqłuŋa iŋiulaŋagiga Ataniq taavrumuuna, taamna piiquvlugu uvamniñ. 9Aasii ilaan uqallautiŋagaaŋa, “Uvaŋa nagliktuutiqpaga naamaruq iliŋnun, qanuq uvaŋa suaŋŋatiga iḷisimanammaġiksisuuruq kivgamni iliŋich suaŋaiḷimmata.” Taamna pisigivlugu, sugiŋitkiga iłuiḷḷiuġun pigigupku piiġñiŋaniñ. Tainnainman quyyatikun uqavigaaġutigiyumiñaġitka suaŋairrutitka, Christ suaŋŋataa itchumauq uvamni. 10Pisigivlugu Christ tavra quviasuutigigitka suaŋairrutit, pisaaŋŋasiat, siġḷiġniuġutit, nagliksaaqtirrusiat, iłuiḷḷiuġutiqpaich, qanuq suaŋaiḷikama Christ suaŋŋasiġuugaaŋa.
Paul Isumaaluutigigai Corinth-miut
11Uqaqtuŋa isumalluaġiitchuatun uqautikavsi tamatkuniŋa, ilivsi uqaqusaaqłuŋa. Uqautiyumiñaiñŋagaluaġivsi tamatkuniŋa, ilivsi isumakkutiqaġluatapayaaġuvsi iłuatun uvapkun. Supayaami qamalliuŋitchuŋa tamatkunaŋŋa tilirauruaniñ, suuŋitkaluaŋŋaġma, isummatigiruaniñ inmiŋnik kamanaqtualiuqłutiŋ. 12Iḷisimanautiŋi iḷumun tilirautilaam savaaguŋarut akunnavsiññi. Nayuqavsi, qiñuiqł̣uŋa savaaġiŋagitka aliuġnaqtuat sapiġñaqtuallu savaat nalupqinaiyautauruat tilirauŋatilaamnik. 13Isummatiqaqpalliqsusi uvamnun pivigruaġiŋił̣haaġasugalusi allaniñ aŋaiyyuliqiruaniñ pisigivlugu naŋniŋiññavsi pamarrusiaksrapkun ilivsiññiñ. Suliqutigiŋaiqsiŋa itqaumaŋaiġḷugu taavrumuuna killukuaġutaunasugirauruakun.
14Uvva piŋatchiġitka itqanaiġñitka ullagukłusi. Aasii naŋniġumaŋitkivsi, qanuq ivaqłiaŋitchuŋa sunik piqaġugluŋa pigikkavsiññik aglaan ilivsi pigisukkivsi, qanuq miqłiqtut sunakkiruksrauŋitchut pisilugich aŋayuqaatiŋ, aglaan aŋayuqaaguruat miqłiqtutiŋ sunakkisilugich. 15Quyyatigigiga aitchuutigiyumiñaqama uvamnik supayaamniglu ikayuġumiñaqługu ukpiġutivsi sivunmuktaaġniksraŋa, qiññaqaġaluaqtillugu qanutun piviuttaġiliqsaiññaqtillusi, piviuttaġiŋaiqsaiññaqtuatun pikavsiŋa. 16Paŋmapak isumasugnaqtusiḷuunnii inna. Ilaan naŋniŋitkaatigut pamarrusiaksramiñik aglaan pisaasuqłuni maniksraqtuġugnaqtuq pitqiksiġautikun. 17Uvaŋa apiġiŋavisi pamarrusiaksramik ilivsiññiñ taapkunuuna iñuktigun tilirapkun? 18Kiaqsruŋagiga Titus ullaquvlusi, tiliḷugulu aniqan piqatigitquvlugu ilaanun. Aglaan Titus apiġiŋaitkaasi pamaġitquluni ilivsiññun, qanuq atiruamik isumaqaqtuguk, suli atirut piḷġusivuk.
19Ukua tuyuutit isumapkaġugnaġaasiḷuunnii pasiraksraiññiatakkasugaluŋa aullasipkun. Taamna iḷumun inŋitchuq. Piviuttaġirauruasii, atausiŋŋuqatigiŋavlugu Christ, uqaŋaruŋa nayuqtigipiaqtuatun iḷivḷugu God, uqautivlusi iluqaiññik tamatkuniŋa, ukpiġurri suaŋasiḷaaqtautquvlugu. 20Ullatqikkuvsi anayasuktuŋa iñuusiġiniaŋiññasugilgiḷḷugu iñuusiġitquyumakkaġa ilivsiññun, aasii qaiguma aŋalatkaqsiḷgiḷḷusi niġiugiŋisavsigun iññiqiniksrapkun. Anayasuktuŋa iḷaanni qanaaġuunasugalusi, killuqsrautiqaġasugalusi, qinnaurriraġaġasugalusi siŋñatiqaġasugalusi, tiġliraqłiġasugalusi, uqautikkunmiglu siavsiñasugalusi, ilivsiḷu isummatiġruiññavsiññi isumatusaanasugalusi piuqłaanġiqattaġasugalusiḷu. 21Ullatqikkuvsi takulusi, anayasuktuŋa God-imnun kamanaiyaġniaġasugaluŋa sivuqqavsiññi, qanuq qirratiginiaġitka iñugiaktuat piḷuksianiŋaruat sivuani, aasii tamauŋanun aglaan isumalitqiŋaił̣ł̣utiŋ pigiitchuakun aullasiġiliutikkaġmikkun, allatuutiniḷḷu, suli atuqtuat timimiŋnik pitquraiḷautigivlugu.
ទើបបានជ្រើសរើសហើយ៖
2 Corinthians 12: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)