1 Corinthians 10
10
Kiliktuusiat Iñuuraqpaktigun
1 #
Ex 13.21, 22;
Ex 14.22-29. Aniqatiit, itqaqsiuŋ suna piŋatilaaŋanik iŋiḷġaan maŋŋuuptiŋnun nunagluktuami. Nuvuyaŋata God-im aullatiŋagai iluqaisa, suli iluqaġmiŋ pisuaŋarut paliumaruakun nunakun ikaaqługu imaq. 2Tamatkunuuna nalautamikkun nuvuyakullu imikullu piqasiutiŋarut Moses-mun, aasii tamatkunuuna paptaiqsaummatun piŋarut Moses-mun. 3#Ex 16.35.Aasiisuli iluqaġmiŋ niqiqaŋarut God-im pamarrutiŋiñik aliuġnaqtuakun, 4#Ex 17.6; Nu 20.11.iluqaġmik suli imiqaġmivḷutiŋ imiġmik God-im pamarrutaanik aliuġnaqtuakun. Qanuq imiġiŋagaat imiq maqipkaqtitauruaq aliuġnaqtuakun uyaġagruaġmiñ, aasii taamna uyaġagruaq arrilisauruq Christ-mun. 5#Nu 14.29, 30.God-im qaunagilluataġaluaŋŋaisa, iñugiagniqsrat iviġaummatigiŋaitkai, aasii ilaan suksraunġiqł̣ugich nunagluktuami.
6 #
Nu 11.4. Tavra tamatkua piŋaruat taimani kiliktuutaurut uvaptiŋnun, kilikłuta kipiġniuquŋił̣ł̣uta pigiitchuanun, maŋŋuuruat piḷġusiatitun. 7#Ex 32.6.Ukpiqtaunasi sunun God-auŋitchuanun taipkua iḷaŋisa piḷġusiatitun. Taavrumuuna aglausimaruq Bible-ni inna, “Iñuich aquvinŋarut niqinaqisaqłutiŋ imiġukłutiglu, aasii makinmivḷutiŋ uamitchukłutiŋ.” 8#Nu 25.1-18.Allatuqtauŋitcha taipkua iḷaŋisitun, 23,000 tuqummata uvlumi atautchimi. 9#Nu 21.5, 6.Uvagut uuktugaksraġiŋitkikput Atanġum qimmaksaliyairrutaa taipkua iḷaŋisa piḷġusiatitun, suksraunġiqsauruat tuqunaliŋnun nimiġianun kiŋmaqtiłługich. 10#Nu 16.41-49.Suli uqamayuktuksrauŋitchugut iḷaŋisasuli piḷġusiatitun, suksraunġiqsittuat isaġulganun tuqqutim. 11Iluqaġmiŋ tamatkua nalautaġikkaŋich piŋarut iliŋiññun, uvaptiŋnun arriḷisautquvlugich, suli aglaaguvlutiŋ uvagut kiliktautquvluta piḷuksitquŋił̣ł̣uta, uvagut iñuuruaguut aqulliġñi uvluni. 12Tavraasii kiñaliqaa isumaqaġumi suaŋarualiḷuni ukpiġunmiñi, qaunagili piḷuksisuŋiḷḷuni. 13Qanupayaaq ikł̣igutchaktinniaqtauguvich, tainnatchikuttauq iluqaġmiŋ iñuich ikł̣igutchaktinniaqtauŋammiut. Aglaan God ukpiġnapiaqtuq, ikł̣igutchaktinniaqtaupkaġniaŋitkaatin qaaŋiġḷugu manimmiyumiñakkan. Ikł̣igutchaktinniaqtauguvich, ilaan akimmasiġñiaġaatin akimayumiñaqsiḷutin.
14Taamna tainnainman, uvaŋa piviuttaġivlusi aniqatiitkaa, ukpiqtuksrauŋipiaqtusi sunun God-auŋitchuanun. 15Uqautigivsi isumaturuatun iñuktun iḷivḷusi. Isivġiqsigik ilivsiññik uqaluŋma iḷumun itilaaŋat. 16#Mt 26.26-28; Mk 14.22-24; Lk 22.19, 20.Atanġum nullautchiġvianik pikapta, suli imiqłuta qallugauramiñ quyyatigiŋakkaptiŋniñ ilaanun, iluqata piqatigiiksinmatun pisuurugut, iḷaŋiutiniġmi anniqsuusianun Christ maqipkaqtauŋaruamiñ auŋaniñ. Suli niġikaptigu punniq atautchimiiłłuta, iḷaŋiutimmatun pisuummiugut anniqsuusianiñ piruaniñ Christ timaaniñ tuqutauŋaruamiñ uvagut pisivluta. 17Aasii pisigivlugu iluqata niġiñiqput atautchimiñ punniġmiñ, uvagut atausiŋŋuqtitaurugut atautchisun timitun. 18#Lv 7.6.Uuktuutigilugu una, isummatigisigik Jew-guruat piḷġusiŋich. Tamatkua niġisuuruat niġrutinik aitchuutauŋaruanik ikipkaiviŋmi piqasiutisuurut God-mun. 19Uvva iḷisautiniḷukkivsi tamatkua niqit aitchuutauruat iñuuraqpaŋnun suuŋitchut, iñuuraqpaitchauq suuŋiñmatun. 20#Dt 32.17.Sivuniġigiga ukpiŋaitchuat aitchuikamiŋ ikipkautinik iñuuraqpaŋnun, aitchuirut ilitqusiqł̣uŋnun God-mun pigaluaġnatiŋ. Piqasiqsuutitquŋitkivsi ilitqusiqł̣uŋnun. 21Imiġniaŋitkisi tapillugik qallugauraŋalu Atanġum qallugauraŋallu ilitqusiqł̣uich. Iḷaŋiutiyumiñaiñmiusi Atanġum niġġiviŋiññiñ iḷaŋiutilusiḷu niġġiviŋiññiñ ilitqusiqł̣uich. 22#Dt 32.21.Ataniġmun qinnautipkaġniaŋaiqsa, qanuq iḷisimarusi suaŋałhaaŋitchugut ilaaniñ.
23 #
1 Co 6.12. Supayaat piñaiḷauŋitchut, tainna uqaġuurusi. Aakkaluaq, aglaan iḷaŋich ikayuutaulaitchut iñuum ukpiġutaanun. Supayaat piñaiḷauŋiññigisi, aglaan iḷaŋich suli qapiŋaisaaġutauŋitchut iñuum ukpiġutaanun. 24Piḷġutchiñi nalaunŋanasugalugich pisuukkavsiññi, anniqsuqsałhaaġlugich siḷallisi piraġutitchi, ilivsiññułhiñaq piŋaiġḷusi. 25Niġġisiuŋ sunapayaaq tunirauruaq niqipianik tuniuqqaiviŋmi salapqiiñiaŋaiġḷusi qanusipayaamik nalupqitchautiksramik isumami, 26#Ps 24.1.qanuq Bible-ni uqaluk aglausimaruq, “Nuna Atanġum pigigaa, suli sunapayaaq nunamiittuaq.” 27Iḷaŋata ukpiqtuaguŋitchuat aiyugaaqpasi niġiyaqtuqulusi aiyugaaqtauniġuvsi, niġġisiuŋ sunapayaaq inillaktauruaq sivuqqavsiññun salapqiiñiaŋaiġḷusi qanusipayaamik nalupqitchautiksramik isumami. 28,29Aglaan iñuum uqallautikpasi inna, Taamnauvva niqi ilaaguaqtauŋaruaq iñuuraqpaŋnun, tainnaqpasi niġġiñagu, pisigilugu taamna kiliksiruaq ilivsiññik, qanuq nalupqisukłuni isumamiñi nalaunŋatilaaŋanik niġiruni kilikkaasi. Iḷaanni apiqsriñiaġugnaġmiusi, summanmiuvva niġiḷḷaniġa aŋalanniaġmivauŋ iñuum allam? 30Niġiḷḷaanigniġuma supayaamik quyyatigiŋakkamnik God-mun, summan iñuich pasiñiaqpanŋa niqitigun niġikkapkun?
31Innauvva ittuq. Niġiñiqsiḷu imiġniqsiḷu naagga sunapayaaq pikkaqsi, God-im nanġausiaqautigillaliuŋ. 32Sumik piññasi piñaiḷutchiutauyumiñaqtuamik iñuich ukpiqtuaġuġniksraŋannun, Jew-gugaluaqpata, Greek-gugaluaqpata, naaggaunnii God-mun aŋaiyyuliqiruanun. 33Piraġutitchiḷi uvaptun. Iviġagniḷułhaaġaġigitka iñupayaat supayaatigun pikkapkun. Uvamnun anniqsuġniałhaalaitchuŋa, aglaan allat annaurrautqugaluaqługich.
ទើបបានជ្រើសរើសហើយ៖
1 Corinthians 10: INUPIAQ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)