Roma 2
2
Hukum duk legga Tuhanin kēmon meꞌ manusiyaꞌin
1Sine-sine ne kaꞌam, meꞌ bagaykun, gaꞌi tapaꞌinbi weꞌ gaꞌ niyaꞌ dusebi, duk iye taga dusehin duk subey ileggahin meꞌ saweꞌbin, peggeꞌ meꞌ hinangan malaꞌat panuksaꞌanbi siyehin hinangbi du isab. Bang tuksaꞌbi siye kuweꞌ du kaꞌam nuksaꞌ dibi. 2Kataꞌuhante weꞌ patut Tuhanin ngalegga meꞌ aꞌa maghinangan meꞌ malaꞌat miyaꞌan. 3Kannalbi weꞌ gaꞌi kaꞌam legga Tuhanin bu hinangbi du meꞌ hinangan laꞌat panuksaꞌanbi saweꞌbin? 4Sewukat ne Tuhanin maꞌaseꞌ si kaꞌam, duk kuweꞌ gaꞌi hadja hinangne ine dusebin, duk gaꞌi kaꞌam magtawus leggane, hatu kannalbi weꞌ gaꞌi iye subey asipbi. Gaꞌi ke tahātibi weꞌ hangkan Tuhanin maꞌaseꞌ si kaꞌam, peggeꞌ kaw du pagsusunanbi dusebin duk pinda ne ateybin? 5Saguwaꞌ tuwas kōkbin, gaꞌi bayaꞌ lebbahanbi dusebin. Hangkan hep pasōng pangalegga kaꞌamin bang taꞌabut ne ellew pamakite Tuhan astelne si meꞌ duse manusiyaꞌin duk pamakitene hukumanne mabentelin. 6Peggeꞌ tumbasan Tuhanin du meꞌ manusiyaꞌin dangan-dangan matalep si hinangden. 7Niyaꞌ meꞌ aꞌa magtuyuꞌ maghinang hāp peggeꞌ inapasden pudji Tuhanin siye duk pahadjene siye. Apasde isab weꞌ urungan Tuhanin siye umul gaꞌ tamananne. Meꞌ aꞌa inin asal urungan Tuhanin du umul si surgaꞌ gaꞌ tamananne. 8Sinduwe meꞌ aꞌahin isab iye hadja tapikilden diden. Gaꞌi tuhutde toloꞌ mabennal amban Tuhanin saguwaꞌ iye tinuhutden manggaꞌi matewwaꞌin. Pakitehan Tuhanin si siye weꞌ astel iye manamal-namal duk leggane teꞌed siye. 9Kēmon maghinangan malaꞌatin inurungan kasusehan weꞌ Tuhanin duk tiniksaꞌ du siye. Dumaꞌin hadja meꞌ Yahudihin saguwaꞌ sampay meꞌ bangsa seddilihin isab. 10Saguwaꞌ kēmon manusiyaꞌ maghinangan mahāpin, pudji Tuhanin du siye, duk pahadjene siye, duk urunganne siye kasanyangan dem ateyde. Dumaꞌin hadja meꞌ Yahudihin saguwaꞌ sampay meꞌ bangsa seddilihin isab. 11Peggeꞌ gaꞌi pagbiddaꞌ Tuhanin manusiyaꞌin; saliꞌ-saliꞌ siye si matahanne bisan ine bangsanen.
Dumaꞌin saraꞌin jānnen hangkan timbul meꞌ aꞌahin
12Meꞌ bangsa dumaꞌin Yahudihin, gaꞌi kataꞌuhande saraꞌ Tuhan tasulat weꞌ si Musahin. Bang magduse siye legga Tuhanin siye duk tapī siye si narkaꞌ. Saguwaꞌ dumaꞌin pangalegga siyehin sa pinaꞌin dem saraꞌin. Meꞌ Yahudihin, siye pangurungan saraꞌin, bang magduse siye, hinukum siye bang tatuhutde ke saraꞌin atawa gaꞌ. Bang gaꞌ tuhutde, legga Tuhanin siye sa pinaꞌin dem saraꞌin. 13Dumaꞌin aꞌa makakale saraꞌ Tuhanin iye inampun duk kinimmatan bentel weꞌ Tuhanin. Saguwaꞌ aꞌa manuhut kēmon pangandaꞌakan dem saraꞌin, iye inampun duk kinimmatan bentel weꞌ Tuhanin. 14Meꞌ bangsa dumaꞌin Yahudihin gaꞌ laꞌi si siye saraꞌ Tuhanin. Saguwaꞌ bisan gaꞌ laꞌi si siye saraꞌ Tuhanin, bang patekka niyaꞌ meꞌ pangandaꞌakan dem saraꞌin tatuhutde peggeꞌ kataꞌuhande dem pikilande bang ine mahāp hininangin. Hangkan kuweꞌ niyaꞌ saraꞌ dem pikilande. 15Takite si meꞌ hinanganden weꞌ kataꞌuhande dem ateyde bang ine pinaꞌin dem saraꞌ si Musahin. Kataꞌuhande dem pikilande bang hinanganden hāp atawa laꞌat. Bang patekka tapikilde weꞌ laꞌat hinanganden duk bang patekka isab tapikilde weꞌ hāp hinanganden. 16Paꞌin aka-aka mahāp minahalayakkun weꞌ sa miyaꞌan du isab si ellew dambuli bang daꞌak Tuhanin ne hinukum pu Isa Almasi meꞌ manusiyaꞌin. Pinaguwaꞌ du iyan weꞌ Tuhanin meꞌ tinapukande dem ateyden duk hukumne siye.
Gaꞌi timbul meꞌ Yahudihin sabab panuhutde saraꞌin
17Paꞌinbi weꞌ Yahudi kaꞌam, meꞌ aꞌa tapeneꞌ Tuhanin. Ngandel kaꞌam weꞌ peggeꞌ luꞌu si kaꞌam saraꞌ Tuhanin tayimaꞌ Tuhanin du kaꞌam. Magabbu kaꞌam weꞌ kaꞌam hadja mangataꞌuhan Tuhanin. 18Kataꞌuhanbi bang ine kabayaꞌan Tuhan subey hininangbin. Duk taꞌu kaꞌam meneꞌ hinangan mapatutin peggeꞌ taꞌayabi iyan amban saraꞌ Tuhanin. 19Paꞌinbi weꞌ kaꞌam dalil manundan meꞌ mapessekin. Hātinen taꞌu kaꞌam magtoloꞌ sabab Tuhanin. Paꞌinbi isab weꞌ kuweꞌ kaꞌam dantaꞌ niyewan meꞌ aꞌa dem lindemin, hātinen taꞌu kaꞌam moꞌo aꞌa tudju Tuhan. 20Peggeꞌ luꞌu si kaꞌam saraꞌ Tuhanin, iye hadja toloꞌ mabennalin, paꞌinbi weꞌ taꞌu du kaꞌam manoloꞌan meꞌ madupangin duk meꞌ maꞌawam sabab Tuhanin. 21Taꞌu kaꞌam noloꞌan saweꞌbin saguwaꞌ gaꞌi kaꞌam taꞌu noloꞌan dibin. Gaꞌi kaꞌam ngandaꞌak nangkew bu kaꞌam nangkew du. 22Gaꞌi kaꞌam ngandaꞌak magjina bu kaꞌam magjina du. Haram si kaꞌam meꞌ limbagan pinahadje meꞌ aꞌahin saguwaꞌ gaꞌi kaꞌam magalang-alang padiyalem nangkewan langgal palaꞌihan meꞌ limbagan miyaꞌan. 23Magabbu kaꞌam weꞌ luꞌu si kaꞌam saraꞌ Tuhanin saguwaꞌ langgalanbi du saraꞌin hangkan diniyawaꞌan Tuhanin weꞌ meꞌ aꞌahin. 24Pinaꞌin dem kitab, “Sababbi meꞌ Yahudihin, binissā-bissāhan Tuhanin weꞌ meꞌ aꞌa dumaꞌin Yahudihin.”
25Kite bi meꞌ Yahudihin, dinaꞌak hep kite bi magislam hinang tandaꞌ weꞌ kite bi bangsa tapeneꞌ weꞌ Tuhanin duk sukuꞌ si iye kite bi. Bang tuhutbi saraꞌin, hāp magislamin. Saguwaꞌ bang gaꞌi tuhutbi saraꞌin, gaꞌ niyaꞌ guna magislamin. 26Meꞌ aꞌa dumaꞌin Yahudihin, bisan siye gaꞌi magislam saguwaꞌ bang tuhutde saraꞌ Tuhanin, pamayam Tuhan siyehin kuweꞌ du siye bakas magislam. 27Kaꞌam meꞌ Yahudihin, magislam kaꞌam duk luꞌu saraꞌ Tuhanin tasulat si kaꞌam saguwaꞌ langgalanbi du saraꞌin. Bu meꞌ dumaꞌin Yahudihin, bisan siye gaꞌi magislam niyaꞌ du siye nuhut saraꞌ Tuhanin. Hangkan kaꞌiyaꞌ-iyaꞌan du kaꞌam iyan weꞌ de. 28Sine teꞌ asal Yahudi teꞌedin? Dumaꞌin aꞌa taga tandaꞌ si barannen peggeꞌ bakas iye magislam. 29Saguwaꞌ Yahudi teꞌedin aꞌa bakas binaꞌahuhan ateynen weꞌ Niyawa Tuhanin. Dumaꞌin panuhutne saraꞌin mamaꞌahuhan ateynen. Aꞌa inin bisan iye gaꞌi pudji pagkasine manusiyaꞌin saguwaꞌ pudji Tuhanin iye.
ទើបបានជ្រើសរើសហើយ៖
Roma 2: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
